1 Be Ɲoliɛ 13:1-14
13 Davidi nin sran akpi su kpɛn mun, nin sran ya su kpɛn mun, nin kpɛnngbɛn’m be kwlaa+ be yiali, yɛ be kokoli be wun.
2 Davidi seli Izraɛlifuɛ’m be kwlaa kɛ: “Maan e to ngaliɛ Izraɛli akpasua’m be kwlaa be su naan e niaan onga mun, nin Ɲanmiɛn ɲrun jranfuɛ mun, nin Levifuɛ mɔ be o be klɔ’m*+ be su’n, be to e wa. Sɛ ɔ ti amun klun su’n, yɛ sɛ amun nian naan i sɔ’n ti kpa e Ɲanmiɛn Zoova i ɲrun’n, maan e yo sɔ.
3 Maan e ko fa e Ɲanmiɛn’n i Alaka’n+ e bla.” Afin Saili+ blɛ su’n, b’a niɛnmɛn i lika.
4 Be kwlaa nga be yiali lɛ’n, be kplinnin su. Afin sran’m be kwlaa be wunnin kɛ i sɔ’n ti ajalɛ kpa.
5 I sɔ’n ti’n, Davidi yiali Izraɛlifuɛ’m be kwlaa, kɛ ɔ fɛ i Ezipti nzue’n* su lɔ lele fa ju Lebo-Amati’n,*+ naan be ko fa Ɲanmiɛn Kpli i Alaka’n Kiriati-Zearimun+ lɔ be bla.
6 Davidi nin Izraɛlifuɛ’m be kwlaa be ɔli Baala.+ Be flɛ klɔ sɔ’n i ekun kɛ Kiriati-Zearimun, yɛ ɔ o Zida akpasua’n su lɔ. Be ɔli lɔ naan bé kó fá Ɲanmiɛn Kpli Zoova m’ɔ ti i famiɛn bia’n su, seribɛn’m+ be ti su nglo lɔ’n* i Alaka’n bé bá. Alaka sɔ’n i ɲrun lɛ yɛ sran’m be bo flɛ i-ɔ.
7 Be ɔli Abinadabu i sua’n nun lɔ. Sanngɛ be fali Ɲanmiɛn Kpli i Alaka’n be sieli i kakaklolo uflɛuflɛ+ kun su naan b’a fa wɔ. Yɛ Uza nin Aio yɛ be nian kakaklolo’n+ su yɛ be kɔ-ɔ.
8 Davidi nin Izraɛlifuɛ’m be kwlaa be tuli be klun be toli jue, yɛ be sili su able Ɲanmiɛn Kpli i ɲrun lɛ. Kɛ bé yó sɔ’n, nn bé bó jru, nin miziki bolɛ ninnge wie mun ekun mɔ be le ɲanman’n, nin klɛn,+ nin sɛnbali,*+ ɔ nin awɛ.+
9 Sanngɛ kɛ be juli Kidɔn lɔ ble nin ɔɔzu bowlɛ’n nun lɛ’n, Uza toli i sa’n naan w’a tra Alaka’n, afin ɔ ka kan naan nannin’m b’a yi i ase.
10 I sɔ’n ti’n, Zoova fali Uza i wun ya dan kpa. Ɔ maan ɔ kunnin i. Afin ɔ toli i sa’n trali Alaka’n.+ Yɛ ɔ wuli Ɲanmiɛn ɲrun lɛ.+
11 Sanngɛ kɛ Zoova fali Uza i wun ya m’ɔ kunnin i’n, i sɔ’n w’a yoman Davidi i fɛ. Andɛ nin andɛ’n, be te flɛ lika sɔ’n kɛ Perɛzi-Uza.*
12 Ɔ maan Davidi sroli Ɲanmiɛn Kpli cɛn sɔ’n nun. Yɛ ɔ seli kɛ: “?Yɛ ń yó sɛ naan m’an fa Ɲanmiɛn Kpli i Alaka’n m’an ju min klɔ’n su lɔ?”+
13 Davidi w’a faman Alaka’n w’a ɔmɛn i tranwlɛ’n mɔ be flɛ i kɛ Davidi Klɔ’n i su lɔ kun. Sanngɛ ɔ fa ko sieli i Obɛdi-Edɔmun m’ɔ fin Gati’n i sua’n nun lɔ.
14 Ɲanmiɛn Kpli i Alaka’n kali Obɛdi-Edɔmun i awlofuɛ’m be wun lɔ. Ɔ dili anglo nsan i sua’n nun lɔ. Blɛ sɔ’n nun’n, Zoova yrali Obɛdi-Edɔmun nin i awlofuɛ’m be su. Yɛ i sa nun ninnge kwlaa yoli ye.+
Ja ngua lɔ ndɛ mun
^ Ebr., “klɔ nga nnɛn’m be didiwlɛ o be sin’n.”
^ Annzɛ “kɛ ɔ fɛ i Siɔɔ’n.”
^ Annzɛ “Amati i anuan’n nun’n.”
^ Be kwla se ekun kɛ “be afiɛn’n.”
^ Miziki bolɛ like-ɔ. Ɔ ti sa vaa, aaba annzɛ like uflɛ yɛ be fa yo-ɔ.
^ I bo’n yɛ: “Uza i Fɔ Tulɛ.”
