1 Be Ɲoliɛ 23:1-32
23 Kɛ Davidi yoli oke m’ɔ wunnin kɛ ɔ su wa wu’n,* ɔ sieli i wa Salomɔn famiɛn Izraɛli nvle’n su.+
2 Kpɛkun ɔ yiali Izraɛli lɔ sran dandan mun, nin Ɲanmiɛn ɲrun jranfuɛ mun,+ ɔ nin Levifuɛ mun.+
3 Be kali Levifuɛ nga be le afuɛ ablasan (30) nin afuɛ ablasan tra su’n.+ Kɛ be kali be kunngunngun’n, be ti akpiakpi ablasan-nin-mɔcuɛ (38.000).
4 Be nun akpiakpi ablaɔn-nin-nnan (24.000) be niannin Zoova i sua’n i su junman’n su. Be nun akpi nsiɛn (6.000) be yoli sran’m be su kpɛn nin jɔlɛ difuɛ.+
5 Be nun akpi nnan (4.000) be yoli anuan sunianfuɛ,+ yɛ be nun akpi nnan (4.000) be fali miziki bolɛ ninnge mun manmannin+ Zoova. Miziki bolɛ ninnge sɔ mun yɛ Davidi kannin be ndɛ-ɔ. Ɔ seli kɛ: “N yoli be naan be fa manman Ɲanmiɛn.”
6 Davidi siesieli* be akpasuaakpasua+ naan w’a man be junman sɛsɛsɛ. Levi i mma’m be osu nga i nun yɛ be fin’n, i su yɛ ɔ niannin naan w’a yo sɔ-ɔ. Ba sɔ mun yɛle Gɛɛsɔn, nin Keati, ɔ nin Merari.+
7 Ladan nin Simei be fin Gɛɛsɔn osu’n nun.
8 Ladan i mma mun yɛle Zeiɛli m’ɔ ti be su kpɛn’n, nin Zetamun, ɔ nin Zoɛli.+ Be ti sran nsan.
9 Simei i mma mun yɛle Selomɔtu, nin Aziɛli, ɔ nin Aran. Be ti sran nsan. Be yɛ be ti Ladan osu’n nun awlobo’m be su kpɛn mun-ɔn.
10 Yɛ Simei i mma mun yɛle Zaati, nin Zina, nin Zeisi, ɔ nin Beria. Simei i mma mun yɛle be nnan’n.
11 Zaati ti be su kpɛn, yɛ be nɲɔn su’n yɛle Ziza. Sanngɛ kɛ mɔ Zeisi nin Beria b’a wuman ba yasua kpanngban’n ti’n, be kali be kɛ awlobo kunngba nunfuɛ mun sa. Kpɛkun be mannin be junman kunngba’n.
12 Keati i mma mun yɛle Amramun, nin Izeari,+ nin Ebrɔn, ɔ nin Uziɛli.+ Be ti sran nnan.
13 Amramun i mma mun yɛle Aarɔn+ nin Moizi.+ Sanngɛ be kpali Aarɔn sieli i liɛ ngunmin.+ Be waan ɔ yo Sua Ba Ngunmin Kun m’ɔ ti Ɲanmiɛn liɛ Klonglo’n nin i bɔbɔ nin i mma’m be sanwun tititi naan be yi tɛ Zoova ɲrun, be di junman mɛn i, yɛ be bo muae man sran mun i dunman nun titi.+
14 Moizi m’ɔ ti Ɲanmiɛn Kpli i sran’n i mma’m be liɛ’n, be kali be wlali Levi akpasua’n nunfuɛ’m be nun.
15 Moizi i mma mun yɛle Gɛɛsɔmun+ nin Eliezɛɛ.+
16 Gɛɛsɔmun i mma’m be su kpɛn’n yɛle Sebuɛli.+
17 Reabia ti Eliezɛɛ i osu’n nunfuɛ’m* be su kpɛn. Eliezɛɛ w’a wuman ba yasua uflɛ kun, sanngɛ Reabia+ liɛ’n, ɔ wuli ba yasua kpanngban kpa.
18 Izeari+ i mma’m be su kpɛn’n yɛle Selomiti.+
19 Ebrɔn i mma mun yɛ: Zeriya ti be su kpɛn, be nɲɔn su’n yɛle Amaria, be nsan su’n yɛle Zaaziɛli, yɛ be nnan su’n yɛle Zekameamun.+
20 Uziɛli+ i mma mun yɛ: Mise ti be su kpɛn, be nɲɔn su’n yɛle Isia.
21 Merari i mma mun yɛle Mali nin Misi.+ Mali i mma mun yɛle Eleazaa nin Kisi.
22 Eleazaa wuli, sanngɛ w’a wuman ba yasua. Ba bla ngunmin yɛ ɔ wuli be-ɔ. Kisi i wa yasua mɔ be ti be osu’n nunfuɛ* wie’n, be jali ba bla sɔ mun.
23 Misi i mma mun yɛle Mali, nin Edɛɛ, ɔ nin Zeremɔtu. Be ti sran nsan.
24 Levi i mma’m be awloboawlobo mun yɛ be o lɛ-ɔ. Be niannin be awlobo mun nin be awlobo’m be su kpɛn’m be dunman’m be su naan b’a klɛ be dunman. Be kali be nga be le afuɛ ablaɔn (20) nin afuɛ ablaɔn tra su’n, kpɛkun be klɛli be dunman naan be di junman Zoova i sua’n nun.
25 Afin Davidi seli kɛ: “Zoova m’ɔ ti Izraɛli i Ɲanmiɛn’n yoli maan i sran’m be ɲannin be ti be kpɔfuɛ’m be sa nun.+ Yɛ ɔ́ trán Zerizalɛmun lɔ tititi.+
26 Asa ekun’n, Levifuɛ’m be su suaman tannin sua’n annzɛ i nun ninnge nga be fa su Ɲanmiɛn’n be wie fi kun.”+
27 I sɔ’n ti yɛ ndɛ kasiɛn nga Davidi kannin’n nun’n, ɔ seli kɛ be ka Levifuɛ nga be le afuɛ ablaɔn (20) nin afuɛ ablaɔn tra su’n niɔn.
28 Be seli be kɛ be uka Aarɔn i mma mun+ naan be nian Zoova i sua’n i lika: Be nian awlo klun mun,+ nin sua ba nga be nun yɛ be di like’n be lika. Be yo ninnge kwlaa nga be ti Ɲanmiɛn liɛ klonglo’n be sanwun. Yɛ be di junman kwlaa ng’ɔ fata kɛ be di i Ɲanmiɛn Kpli i sua’n nun’n.
29 Asa ekun’n, be uka be naan be nian kpanwun nga be tian be wiengu su’n,*+ nin sanmlɛn mlɛnnɛnnɛn kpa nga be fa man Ɲanmiɛn’n, nin gato nga b’a guaman nun levii’n,+ nin gato nga be tɔn be puali nun’n, nin sanmlɛn nga be fɔtɔli’n,+ ɔ nin ninnge wafawafa kwlaa nga be fa sunnzun like’n, be lika.
30 Nglɛmun kwlaa’n+ ɔ fata kɛ be bla naan be wa la Zoova i ase, yɛ be mɛnmɛn i, yɛ ɔ fata kɛ be yo i sɔ nnɔsua kwlaa+ wie.
31 Wunmiɛn-lolɛ-cɛn’n nun’n,+ nin anglo le kun’n,+ nin cɛn’m be dilɛ’n nun+ mɔ bé yí tɛ nga kɛ bé yí’n be yra nnɛn’n i kɔlikɔli’n be man Zoova’n, be uka be wie. Mmla nga be fa mannin be’n, i su yɛ be nian naan b’a di be junman’n i tititi Zoova ɲrun-ɔn.
32 Asa ekun’n, be di tannin sua mɔ Ɲanmiɛn yi i wun nglo nun’n, nin lika m’ɔ ti Ɲanmiɛn liɛ klonglo’n be nun junman nga be fa mannin be’n. Kpɛkun be uka Aarɔn i mma mɔ be ti be niaan’n naan b’a nian Zoova i sua’n i lika.
Ja ngua lɔ ndɛ mun
^ Ebr., “ɔ yoli oke mɔ i cɛn’m be juli i’n.”
^ Annzɛ “bubuli be nun.”
^ Ebr., “i wa yasua mun”
^ Ebr., “niaan bian.”
^ Yɛle kɛ, kpanwun nga be fa man Ɲanmiɛn’n.
