1 Famiɛn Mun 18:1-46
18 Kɛ ɔ cɛli kan’n, i afuɛ nsan’n su’n,+ Zoova seli Eli kɛ: “Kɔ ko wun Akabu wun, afin ń má yó maan nzue’n tɔ́ asiɛ’n su.”+
2 Eli ko wunnin Akabu wun. Kɛ ɔ́ yó sɔ’n, nn awe’n timan blɛblɛ+ Samari lɔ.
3 Blɛ sɔ’n nun’n, Akabu flɛli Abdiasi m’ɔ nian awlo’n su’n. (Abdiasi i ɲin yi Zoova kpa liɛ su.
4 Kɛ Zezabɛli+ kún Zoova i nuan ijɔfuɛ mun’n, Abdiasi fali be nun ya (100) fiali. Ɔ fiali ablenun (50) yɔbuɛ buɛ kun nun, yɛ ɔ fiali ablenun (50) yɔbuɛ buɛ uflɛ nun, ɔ mannin be kpanwun nin nzue.)
5 Akabu seli Abdiasi kɛ: “E ko wlanwlan mɛn’n nun, e wɔ nzue ti’m be kwlaa be su nin kongo’n be nun. Atrɛkpa’n, e kwla ɲan ijre kpanngban naan e nnɛn kpanngɔ nin e milɛ’m b’a kwla ka nguan nun, naan e nnɛn’m be kwlaa b’a wuman.”
6 Be cɛli mɛn m’ɔ fata kɛ be wlanwlan nun’n i nun. Akabu i ngunmin fɛli i atin liɛ, yɛ Abdiasi kusu i ngunmin fali atin uflɛ.
7 Kɛ Abdiasi kɔ́’n, Eli nin i be yiali. Abdiasi ka lɛ wunnin Eli i wlɛ, ɔ maan ɔ utuli i ɲin ase, yɛ ɔ seli kɛ: “?Min min Eli, wɔ-ɔ?”+
8 Ɔ tɛli i su kɛ: “Min-ɔn. Kɔ ko se ɔ min’n kɛ: ‘Eli o wa.’”
9 Sanngɛ Abdiasi seli i kɛ: “?Sa tɛ benin yɛ n yoli mɔ i ti yɛ á fá ɔ sufuɛ’n wlá Akabu i sa nun naan ɔ kun min-ɔn?
10 N kan ɔ Ɲanmiɛn Zoova, nvle fi annzɛ famiɛn diwlɛ fi nunman lɛ mɔ min min’n w’a sunmanman sran lɔ kɛ be ko kunndɛ wɔ-ɔ. Kɛ be ko se kɛ: ‘Ɔ nunman wa’n,’ ɔ yo maan famiɛn diwlɛ sɔ’n annzɛ nvle sɔ’n i nunfuɛ’m be ta nda kɛ b’a kwlá wunman wɔ.+
11 Kpɛkun ɔ waan: ‘Kɔ ko se ɔ min’n kɛ: “Eli o wa.”’
12 Kɛ n ko jaso ɔ wun wa’n, Zoova wawɛ’n wá fá wɔ kɔ́+ lika kun mɔ n simɛn i’n nun, yɛ sɛ n ko kan kle Akabu naan w’a wunman wɔ’n, saan ɔ́ kún min. Kusu kɛ ɔ fɛ i ɔ sufuɛ’n i kaan nun lele’n, i ɲin yi Zoova.
13 ?Kɛ Zezabɛli kún Zoova i nuan ijɔfuɛ mun’n, like nga n yoli’n b’a kan kleman min min’n? N fali Zoova i nuan ijɔfuɛ ya (100) n fiali. N fiali ablenun (50) yɔbuɛ buɛ kun nun, yɛ n fiali ablenun (50) yɔbuɛ buɛ uflɛ nun, yɛ n mannin be kpanwun nin nzue titi.+
14 Kpɛkun ɔ waan: ‘Kɔ ko se ɔ min’n kɛ: “Eli o wa.”’ Saan ɔ́ kún min.”
15 Sanngɛ Eli seli kɛ: “N kan Zoova m’ɔ ti sonja’m be su kpɛn mɔ n su i’n,* andɛ’n ń má kó wún i wun.”
16 Ɔ maan Abdiasi ɔli ko wunnin Akabu i wun naan w’a kan ndɛ’n w’a kle i. Kɛ ɔ yoli sɔ’n, Akabu ɔli Eli i wun lɔ.
17 Kɛ Akabu wunnin Eli cɛ’n, ɔ seli i kɛ: “?Wɔ mɔ a fali ɲrɛnnɛn dan yili Izraɛli su’n, wɔ yɛ a o yɛ?”
18 Ɔ tɛli i su kɛ: “Nán min ti yɛ Izraɛlifuɛ’m be wun ɲrɛnnɛn-ɔn, a nin ɔ si i awlo’n nunfuɛ’m be ti-ɔ, afin amun yacili Zoova i mmla mun, kpɛkun amun sɔli Baali mun.+
19 Siɛn’n, se Izraɛlifuɛ’m be kwlaa naan be to min Kaamɛli+ Oka’n su lɔ. Flɛ Baali i nuan ijɔfuɛ ya nnan ablenun (450) mun, ɔ nin waka nga be taka mɔ be sɔ i’n*+ i nuan ijɔfuɛ ya nnan (400) mɔ be di like Zezabɛli i tabli’n su’n be wie.”
20 Ɔ maan Akabu sunmannin sran Izraɛlifuɛ’m be kwlaa be sin, yɛ ɔ yiali Baali i nuan ijɔfuɛ mun nin waka nga be taka mɔ be sɔ i’n i nuan ijɔfuɛ mun Kaamɛli Oka’n su lɔ.
21 Kɛ ɔ yoli sɔ’n, Eli wunngeli nvlefuɛ’m be kwlaa be wun lɔ yɛ ɔ seli kɛ: “?Cɛn onin naan amun a yaci akunndan nɲɔnnɲɔn’n?+ Sɛ Zoova yɛ ɔ ti Ɲanmiɛn Kpli’n, amun su i,+ sɛ kusu Baali’n, amun su i!” Sanngɛ nvlefuɛ’m b’a kwlá kanman ndɛ fi b’a tɛmɛn i su.
22 I sin’n, Eli seli nvlefuɛ’m be kɛ: “Min kunngba cɛ yɛ m’an ka Zoova i nuan ijɔfuɛ-ɔ,+ sanngɛ Baali i nuan ijɔfuɛ’m be ti ya nnan ablenun (450).
23 Maan be man e nannin gbanflɛn nɲɔn, yɛ maan be fa nannin gbanflɛn kun naan be kpɛkpɛ nun be fa siesie i yie’n su. Sanngɛ nán be wla nun sin. N kusu ń má kpɛ́kpɛ́ nannin gbanflɛn kunfuɛ’n nun, kpɛkun ń fá síesíe i yie’n su, yɛ n su wlaman nun sin.
24 I sin’n, amun kpan flɛ amun ɲanmiɛn liɛ’n,+ yɛ n kusu ń kpán flɛ́ Zoova. Ɲanmiɛn ng’ɔ́ fá sin tɛ́ su’n, nn i yɛ ɔ ti Ɲanmiɛn Kpli’n niɔn.”+ Kɛ ɔ kannin sɔ’n, nvlefuɛ’m be kwlaa be tɛli su kɛ: “Ndɛ nga a kannin’n ti kpa.”
25 Yɛ Eli seli Baali i nuan ijɔfuɛ’m be kɛ: “Amun fa nannin gbanflɛn kun, amun dun mmua kpɛkpɛ nun fa siesie i yie’n su, afin amun yɛ amun sɔnnin-ɔn. I sin’n, maan amun kpan flɛ amun ɲanmiɛn liɛ’n, sanngɛ nán amun wla nun sin.”
26 Ɔ maan be fali nannin tola nga be fa mannin be’n, be kpɛkpɛli nun fa siesieli i yie’n su, yɛ be kpan flɛli Baali nglɛmun lele mindi su, be se kɛ: “Baali, tɛ e su!” Sanngɛ b’a timan sran fi nɛn, yɛ sran fi w’a tɛman be su.+ Kɛ ɔ́ yó sɔ’n nn bé tú kpɛ́n bé sín yía tɛ yiwlɛ nga be yoli’n.
27 Kɛ mindi wá jú’n, Eli boli be finfin yolɛ bo, ɔ seli kɛ: “Amun kpan kekle kpa be flɛ i! ?Ɔ timan amun ɲanmiɛn ti-ɔ?+ Atrɛkpa’n ɔ su bu akunndan annzɛ w’a wɔ atin nun.* Atrɛkpa kusu’n, ɔ su lafi yɛ ɔ fata kɛ sran kun tinnge i.”
28 Be kpannin kekle kpa trali laa’n, kpɛkun be fali tokofi nin cua be kpɛkpɛli be wun kɛ nga be fa yo i titi’n sa, lele be mmoja’n sonjili be wunnɛn wunmuan’n su.
29 Kɛ mindi sín’n, nn be te yo kɛ like wie w’a fu be sa.* Be yoli sɔ lele ble annzɛ i wunsu like mɔ be fa man Ɲanmiɛn nnɔsua nun’n i manlɛ dɔ’n juli. Sanngɛ b’a timan sran fi nɛn, sran fi w’a tɛman be su, yɛ sran fi w’a nianman be lɔ.+
30 I agualiɛ su’n, Eli seli nvlefuɛ’m be kwlaa be kɛ: “Amun wunnge min wun wa.” Ɔ maan nvlefuɛ’m be kwlaa be wunngeli i wun lɔ. I sin’n, ɔ siesieli Zoova i tɛ yiwlɛ mɔ be bubuli i’n i ye.+
31 Eli fali yɔbuɛ blu-nin-nɲɔn (12), kɛ nga Zakɔbu i mma’m be akpasua’n be nuan’n fa ti’n sa. Zakɔbu sɔ’n, Zoova seli i kɛ: “Bé wá flɛ́ wɔ Izraɛli.”+
32 Ɔ fali yɔbuɛ mun fa kplannin tɛ yiwlɛ kun+ naan ɔ́ mánmán Zoova i dunman’n. I sin’n, ɔ fuli kunman kun bo sin yiali tɛ yiwlɛ’n. Kunman sɔ’n, be kwla fa like mma sea* nɲɔn be lua nun.
33 Kɛ ɔ yoli sɔ’n, ɔ fali yie siesieli su sɛsɛsɛ, ɔ kpɛkpɛli nannin gbanflɛn’n nun ɔ fa siesieli yie’n su.+ Kpɛkun ɔ seli kɛ: “Amun sa nzue sɛ dandan nnan naan amun fa gua tɛ nga kɛ bé yí’n be yra nnɛn’n i kɔlikɔli’n, ɔ nin yie’m be su.”
34 I sin’n ɔ seli be kɛ: “Amun gua su ekun.” Ɔ maan be guali su ekun. Ɔ seli be ekun kɛ: “Amun gua su ekun maan ɔ ju kpɛ nsan.” Ɔ maan be guɛli i kpɛ nsan su’n.
35 Nzue’n jrannin tɛ yiwlɛ’n i wun lɛ, ɔ guali kunman’n nun nzue wie.
36 Kɛ ble annzɛ i wunsu like mɔ be fa man Ɲanmiɛn’n i fa manlɛ dɔ’n wá jú’n,+ Eli m’ɔ ti Ɲanmiɛn nuan ijɔfuɛ’n ɔ wunngeli tɛ yiwlɛ’n i wun lɔ, kpɛkun ɔ seli kɛ: “Zoova, Abraamun+ nin Izaaki+ nin Izraɛli be Ɲanmiɛn, andɛ’n maan sran’m be kwlaa be si kɛ a ti Ɲanmiɛn Izraɛli mɛn’n nun, naan n ti ɔ sufuɛ, naan wɔ yɛ a seli min kɛ n yo ninnge kwlaa nga mun-ɔn.+
37 Ee Zoova, tɛ min su! Tɛ min su naan nvlefuɛ nga mun be si kɛ wɔ Zoova, wɔ yɛ a ti Ɲanmiɛn Kpli’n niɔn, naan wɔ yɛ a su yo naan be awlɛn’n sɛ i sin ɔ su-ɔ.”+
38 Kɛ ɔ yoli sɔ’n, yɛ Zoova i sin’n fin nglo lɔ jrali-ɔ. Ɔ yrali tɛ nnɛn’n+ nin yie mun nin yɔbuɛ mun, ɔ nin ndutre’n, kpɛkun ɔ yoli maan nzue ng’ɔ o kunman’n nun’n wieli nun.+
39 Kɛ nvlefuɛ’m be kwlaa be wunnin i sɔ’n, be ka lɛ utuli be ɲin ase kpɛkun be seli kɛ: “Zoova yɛ ɔ ti Ɲanmiɛn Kpli’n niɔn! Zoova yɛ ɔ ti Ɲanmiɛn Kpli’n niɔn!”
40 Ɔ maan Eli seli kɛ: “An tra Baali i nuan ijɔfuɛ mun! Nán be nun ba kun sa wanndi!” Be ka lɛ trali be, kpɛkun Eli fa be ɔli Kisɔn nzue ba’n+ i nuan lɔ, yɛ ɔ kunnin be lɔ.+
41 Yɛ Eli seli Akabu kɛ: “Jaso kɔ ko di like naan nɔn nzue, afin n ti nzue dan kun m’ɔ su wa tɔ’n i ngan.”+
42 Akabu ɔli ko dili like yɛ ɔ nɔnnin nzue. Eli kusu fuli Kaamɛli oka’n i ti su lɔ, ɔ kluli, i ɲrun’n o i ja nannglunman’m be afiɛn.+
43 I sin’n, ɔ seli i sufuɛ’n kɛ: “Yaci, fu nglo lɔ naan nian jenvie’n i bue liɛ’n su lɔ.” Ɔ maan ɔ fuli nglo lɔ, ɔ nianniannin, kpɛkun ɔ seli kɛ: “Like fi nunman lɔ.” Eli seli i kpɛ nso kɛ: “Sa ɔ sin.”
44 I kpɛ nso su’n, i sufuɛ’n seli kɛ: “Nian! Ɲanmiɛn ble kaan kun m’ɔ ti kɛ sran sa ngbabua sa’n, ɔ fin jenvie’n su lɔ su ba. Yɛ Eli seli kɛ: “Ko se Akabu kɛ: ‘Tanndan ɔ kakaklolo’n! Jra kɔ naan nzue’n w’a tanninman wɔ!’”
45 Nzue’n mlannin tritritri, aunmuan’n fitali, kpɛkun nzue’n tɔli dan kpa.+ Kɛ ɔ́ yó sɔ’n nn Akabu o i kakaklolo’n nun, ɔ su kɔ Zizreɛli.+
46 Sanngɛ Zoova mannin Eli i wunmiɛn,* ɔ fɛli i tralɛ’n cili i afiɛn, kpɛkun ɔ wanndi dunnin Akabu i ɲrun mmua lele fa juli Zizreɛli.
Ja ngua lɔ ndɛ mun
^ Ebr., “mɔ n jrɛn i ɲrun’n.”
^ Nian Ndɛ’m be bo tulɛ lika’n nun lɔ.
^ Be kwla se ekun kɛ “w’a wɔ lika wie.”
^ Annzɛ “be yo kɛ Ɲanmiɛn nuan ijɔfuɛ mun sa.”
^ Ebr., “Zoova i sa’n trannin Eli su.”
