1 Samiɛli 19:1-24
19 I sin’n, Saili wa seli i wa Zonatan nin i sufuɛ’m be kwlaa be kɛ ɔ kunndɛ kɛ ɔ́ kún Davidi.+
2 Sanngɛ Saili i wa Zonatan klo Davidi i sa dan.+ I sɔ’n ti’n, ɔ seli i kɛ: “Min si Saili waan ɔ́ kún wɔ. Ainman nglɛmun’n, nian ɔ wun su kpa. Kɔ ko fia lika kun naan ka lɔ.
3 E nin min si é kɔ́ blo lɔ, lika nga á kó fía lɔ’n nun. Kpɛkun ń kán ɔ wun ndɛ ń klé min si. Ndɛ kwlaa nga n ti’n, ń bó su ń klé wɔ.”+
4 Zonatan kannin Davidi i wun ndɛ kpa+ kleli i si Saili. Ɔ seli i kɛ: “Wɔ mɔ a ti famiɛn’n, ɔ fataman kɛ a yo Davidi i tɛ. Afin w’a yoman ɔ tɛ, ye yɛ ɔ yoli wɔ-ɔ.
5 Ɔ fɛli i nguan’n sieli i wie nuan yɛ ɔ kunnin Filistifuɛ’n niɔn.+ Kɛ ɔ yoli sɔ kusu’n, Zoova deli Izraɛli nvle wunmuan’n.* Ɔ bɔbɔ a wunnin i sɔ liɛ’n, yɛ ɔ yoli ɔ fɛ lelele. ?Ɔ maan ngue ti yɛ á kó yó sran mɔ w’a yoman sa’n i tɛ-ɔ? ?Ngue ti yɛ á kó kún Davidi sa ngbɛn-ɔn?”+
6 Saili fali Zonatan i ndɛ’n su. Kpɛkun ɔ tali nda kɛ: “N kan Zoova m’ɔ lafiman’n, be su kunmɛn i.”
7 I sin’n, Zonatan flɛli Davidi naan w’a kan ndɛ kwlaa sɔ’n w’a kle i. Kpɛkun ɔ fali Davidi ɔli Saili sin. Ɔ maan Davidi suli i ekun kɛ ng’ɔ fa yo i laa’n sa.+
8 Kɛ ɔ́ kɔ́ i ɲrun’n, alɛ wa tɔli ekun. Yɛ Davidi nin Filistifuɛ’m be ko kunnin. Ɔ kunnin be lelele. Kpɛkun Filistifuɛ’m be wanndili i bo.
9 Cɛn kun’n, Zoova yacili Saili lɛ maan wawɛ tɛ kun wa kleli i yalɛ.+ Kɛ ɔ́ yó sɔ’n, nn ɔ ti i sua’n nun lɔ, yɛ i cua’n wo i sa nun. Yɛ Davidi kusu o lɛ bó jru.+
10 Saili toli cua’n naan ɔ́ fá wɔ́ Davidi naan ɔ nin cua’n be sende talɛ’n wun. Sanngɛ Davidi ciɛli i wun, kpɛkun cua’n ko kplannin talɛ’n wun. Yɛ Davidi fiteli-ɔ. Ɔ wanndili kɔnguɛ sɔ’n nun.
11 I sin’n, Saili sunmannin sran mun naan be ko sasa Davidi i sua’n, naan be kun i nglɛmun.+ Sanngɛ Davidi i yi Mikali seli i kɛ: “Sɛ kɔnguɛ nga’n w’a wanndiman’n, bé kún wɔ ainman.”
12 Yɛ Mikali fali Davidi jrɛli i fenɛtri’n nun naan ɔ wanndi wɔ.
13 I sin’n, Mikali fali amuin ba’n,* ɔ fa sieli i bɛ’n su. Ɔ fali like kun mɔ boli ndrɛ yɛ be fa yoli’n sieli i ti lika. Kpɛkun ɔ fali tralɛ kun katali su.
14 Kɛ Saili sunmannin sran mun kɛ be ko tra Davidi’n, Mikali seli be kɛ: “Ɔ kwlaman nun.”
15 Ɔ maan Saili sunmannin be ekun naan be ko nian Davidi. Ɔ seli be kɛ: “Amun fɛ i bɛ’n su blɛ min naan be kun i.”+
16 Kɛ sran sɔ’m be juli lɔ’n, bé nían-ɔn, amuin ba’n* yɛ ɔ o bɛ’n su-ɔ, like kun mɔ boli ndrɛ yɛ be fa yoli’n wo kɛ Davidi sie i ti’n lɛ’n.
17 Yɛ Saili seli Mikali kɛ: “?Ngue ti yɛ a lakali min sɔ-ɔ? ?Ngue ti yɛ a yacili min kpɔfuɛ’n+ nun m’ɔ wanndili-ɔ?” Mikali tɛli Saili su kɛ: “Ɔ seli min kɛ: ‘Yaci min nun maan n wɔ. Sɛ w’a yoman sɔ’n, ń kún wɔ.’”
18 Kɛ Davidi wanndili’n, ɔ ko toli Samiɛli Rama+ lɛ. Ɔ kannin like kwlaa nga Saili yoli i’n kleli Samiɛli. Kpɛkun ɔ nin Samiɛli be jasoli lɛ, be ko trannin Naiɔtu.+
19 I sin’n, be wa kan kleli Saili kɛ: “Nian! Davidi o Naiɔtu, Rama wa.”
20 Be ja nun lɛ’n, Saili sunmannin sran mun naan be ko tra Davidi. Kɛ be ɔli mɔ be wunnin kɛ Ɲanmiɛn nuan ijɔfuɛ’m be nun kpɛnngbɛn’m be su kan Ɲanmiɛn nuan ndɛ’n, naan Samiɛli yɛ ɔ dun be ɲrun’n, Ɲanmiɛn wawɛ’n jrali be su. Kpɛkun be kusu be yoli kɛ be ti Ɲanmiɛn nuan ijɔfuɛ wie sa.
21 Kɛ be kan kleli Saili cɛ’n, ɔ sunmannin sran wie mun ekun. Kɛ be juli lɔ’n, be kusu be yoli kɛ be ti Ɲanmiɛn nuan ijɔfuɛ wie sa. I kpɛ nsan su’n, ɔ sunmannin sran wie mun ekun. Kɛ be juli lɔ’n, be kusu be yoli kɛ be ti Ɲanmiɛn nuan ijɔfuɛ wie sa.
22 Kasiɛn su’n, i bɔbɔ Saili ɔli Rama lɔ. Kɛ ɔ juli kunman dan* ng’ɔ o Seku lɔ’n su’n, ɔ usali sran’m be kɛ: “?Samiɛli nin Davidi be o nin?” Be tɛli i su kɛ: “Be o Naiɔtu,+ Rama wa.”
23 Kɛ Saili fali atin m’ɔ́ kɔ́ Naiɔtu m’ɔ o Rama’n, Ɲanmiɛn wawɛ’n jrɛli i su wie. Yɛ Saili nantili kɛ Ɲanmiɛn nuan ijɔfuɛ sa lele ɔ fa juli Naiɔtu m’ɔ o Rama’n.
24 Ɔ yili i wun tralɛ mun. Kpɛkun ɔ yoli kɛ ɔ ti Ɲanmiɛn nuan ijɔfuɛ wie sa Samiɛli i ɲrun lɛ. Ɔ fɛli i wun kplɛn lali asiɛ wun* cɛn sɔ’n nin kɔnguɛ sɔ’n nun. I sɔ’n ti’n, sran’m be kan be ndɛ be se kɛ: “?Yoo Saili o Ɲanmiɛn nuan ijɔfuɛ’m be nun wie?”+
Ja ngua lɔ ndɛ mun
^ Annzɛ “ɔ yoli maan Izraɛli nvle wunmuan’n kwlali dan.”
^ Annzɛ “awlo amuin’n.” Ebr., “terafimun’n.”
^ Annzɛ “awlo amuin’n.” Ebr., “terafimun’n.”
^ Be fu kunman dan sɔ’n naan nzue ng’ɔ tɔ’n ɔ jran nun annzɛ nzue ti wie sonji gua nun.
^ Annzɛ “w’a wlɛwlɛmɛn i wun kpa.”
