2 Be Ɲoliɛ 32:1-33
32 Kɛ Ezekiasi yoli sa kpakpa sɔ mun’n,+ i sin’n, Sankeribu m’ɔ ti Asiri famiɛn’n wluli Zida nvle’n nun. Ɔ wa boli i nanmue klɔ nga be sisili be wun’n be wun lɛ naan ɔ́ búbú be wun talɛ mun naan ɔ́ útu be.+
2 Kɛ Ezekiasi wunnin kɛ Sankeribu w’a ba naan ɔ kunndɛ kɛ ɔ́ fá alɛ wlá Zerizalɛmunfuɛ’m be sin’n,
3 ɔ nin i nvle’n nun sran dandan mun nin i safuɲrɛn’m be kokoli be wun. Kpɛkun ɔ fali ajalɛ kɛ ɔ́ tánnin nzue ti nga be o klɔ’n i sin lɔ’n.+ Be kusu be seli kɛ bé súɛn i bo.
4 Sran kpanngban kpa be bali. Be tanninnin nzue ti mun nin nzue ng’ɔ sonji sin nvle’n nun’n. Be seli kɛ: “?Sɛ Asiri famiɛn’m be ju wa’n, ngue ti yɛ bé ɲán nzue kpanngban yɛ?”
5 Asa ekun’n, ɔ wlɛli i wun ase kplannin talɛ ng’ɔ bu guali’n i wunmuan’n i uflɛ. Yɛ ɔ kplannin sua fleiin wie mun talɛ’n su. Asa kusu’n, ɔ kplannin talɛ kun ekun ukali klikli liɛ’n su. Ɔ siesieli Milo Cenje*+ m’ɔ o Davidi Klɔ’n su lɔ’n i ye. Yɛ ɔ yoli alɛ kunlɛ ninnge kpanngban kpa nin ɲrɛn mun.
6 I sin’n, ɔ kpali sonja kpɛnngbɛn wie mun sieli be sran’m be su. Kpɛkun ɔ yiali be lika gbawun ng’ɔ o klɔ’n i anuan’n nun lɛ’n nun. Ɔ wlali be yakpa.* Ɔ seli be kɛ:
7 “Amun yo yakpafuɛ yɛ amun jran kekle. Nán srɛ kun amun, yɛ nán amun wun usu amun Asiri famiɛn’n+ nin i sran kpanngban kpa ng’ɔ nin be bali’n be ti. Afin be nga be o e sin’n, be sɔnnin tra be nga be o i sin’n.+
8 I liɛ’n, klɔ sran fanngan su yɛ ɔ lafi-ɔ. Sanngɛ e liɛ’n, Zoova m’ɔ ti e Ɲanmiɛn’n yɛ ɔ suan e bo-ɔ. I yɛ ɔ kun e alɛ mun man e-ɔ.”+ Ndɛ nga Ezekiasi m’ɔ ti Zida famiɛn’n kannin’n ɔ wlali sran’m be fanngan.+
9 I sin’n, Sankeribu m’ɔ ti Asiri famiɛn’n sunmɛnnin i sufuɛ wie mun Zerizalɛmun lɔ. Kɛ ɔ́ yó sɔ’n, nn i bɔbɔ nin i sran kpanngban’m* be kwlaa be o Lakisi lɛ.+ I waan be ko se Ezekiasi m’ɔ ti Zida famiɛn’n nin Zidafuɛ nga be tran Zerizalɛmun lɛ’n+ be kɛ:
10 “Ndɛ nga Sankeribu m’ɔ ti Asiri famiɛn’n kan’n yɛ: ‘Amun te o Zerizalɛmun klɔ’n nun. Kusu nn sonja’m b’a bo b’a sin b’a yiɛ i. ?Ngue su yɛ amun fa amun wla’n gua-ɔ?+
11 ?Nán lakalɛ yɛ Ezekiasi su laka amun naan awe nin nzuewe kun amun lele naan amun wu-ɔ? Afin ɔ se kɛ: “Zoova m’ɔ ti e Ɲanmiɛn’n dé e Asiri famiɛn’n i sa nun.”+
12 ?Nán Ezekiasi sɔ’n yɛ ɔ yili amun Ɲanmiɛn’n i lika nglonglo mun+ ɔ nin i tɛ yiwlɛ mun’n niɔn?+ ?Nɛ́n i yɛ ɔ seli Zidafuɛ mun nin Zerizalɛmunfuɛ’m be kɛ be koto tɛ yiwlɛ kunngba cɛ i ɲrun lɛ, naan i su yɛ be yi tɛ, naan sin wunsrɛn’n fite lukuu’n niɔn?+
13 ?Amun siman like nga min bɔbɔ nin min nannan mun e fa yoli nvle kun ngalɛ’m be nunfuɛ’m be kwlaa’n?+ ?Nvle sɔ’m be ɲanmiɛn’m be kwla deli be min sa nun?+
14 ?Nvlenvle nga min nannan’m be nunnunnin be’n, be nun onin yɛ be ɲanmiɛn’m be kwla deli be min sa nun, mɔ i ti yɛ amun bu i kɛ amun Ɲanmiɛn’n kwla de amun min sa nun-ɔn?+
15 Nán amun yaci Ezekiasi lɛ naan ɔ laka amun naan amun mlin.+ Nán amun lafi i su. Afin nvle nin famiɛn diwlɛ wie fi be ɲanmiɛn’m b’a kwlá deman be nunfuɛ mun min bɔbɔ nin min nannan mun e sa nun. ?Sɛ ɔ ti sɔ’n, amun Ɲanmiɛn liɛ’n yɛ ɔ́ kó dé amun min sa nun-ɔn?’”+
16 I sufuɛ’m be kannin Zoova m’ɔ ti Ɲanmiɛn Kpli’n nin i sufuɛ Ezekiasi be wun ndɛ tɛtɛ wie mun ekun.
17 Asa ekun’n, ɔ klɛli fluwa+ fa kpɛli Zoova m’ɔ ti Izraɛli Ɲanmiɛn’n i nzowa,+ yɛ ɔ kɛnnin i wun ndɛ tɛtɛ. Ɔ seli kɛ: “Nvle onga’m be ɲanmiɛn’m b’a kwlá deman be sran mun min sa nun.+ Ezekiasi kusu i Ɲanmiɛn’n su kwlá demɛn i sran mun min sa nun.”
18 Be kpannin kekle kpa kannin ndɛ’n kleli Zerizalɛmunfuɛ nga be o talɛ’n su’n Zifu’m be aniɛn’n nun, naan srɛ kun be, naan be wun usu be. I liɛ’n, bé fá be klɔ’n.+
19 Nvle kun ngalɛ’m be ɲanmiɛn mɔ be ti klɔ sran sa nuan like’n be wun ndɛ tɛtɛ nga be kannin’n, i kunngba’n yɛ be kɛnnin i Zerizalɛmunfuɛ’m be Ɲanmiɛn’n i wun-ɔn.
20 Sanngɛ Famiɛn Ezekiasi nin Amɔzu i wa Ezai m’ɔ ti Ɲanmiɛn nuan ijɔfuɛ’n+ be srɛli Ɲanmiɛn lele, yɛ be kpan flɛli i kɛ ɔ de be.+
21 Yɛ Zoova sunmannin anzi kun-ɔn. Ɔ wa kunnin safuɲrɛn mun,+ nin sonja su kpɛn mun, nin kpɛnngbɛn onga mun Asiri famiɛn’n i nanmue’n nun lɛ. Ɔ maan Asiri famiɛn’n fɛli i ɲrun ɲannzuɛn’n sɛli i sin i nvle’n nun lɔ. Kɛ i osu cɛli kan’n, ɔ ɔli i ɲanmiɛn’n i sua’n nun lɔ. Kpɛkun i bɔbɔ i wa wie’m be wluli i sin lɔ naan b’a fa tokofi b’a kun i.+
22 Kɛ Zoova deli Ezekiasi nin Zerizalɛmunfuɛ mun Sankeribu m’ɔ ti Asiri famiɛn’n, ɔ nin i kpɔfuɛ’m be kwlaa be sa nun kɛ ngalɛ’n sa. Yɛ ɔ yoli maan nvle’n i bue kwlaa su tɔli fɔuun mannin be.
23 Yɛ sran kpanngban kpa be ko cɛli Zoova like Zerizalɛmun lɔ. Be mannin Ezekiasi m’ɔ ti Zida famiɛn’n+ i ninnge kpakpa mun wie. Kɛ ɔ yoli sɔ’n, nvlenvle’m be kwlaa be nunfuɛ’m be ɲin wa yili i dan.
24 Blɛ sɔ’n nun’n, Ezekiasi tɔli tukpacɛ kekle kpa, ɔ timan nguan liɛ. Yɛ ɔ srɛli Zoova-ɔ.+ I kusu tɛli i su kpɛkun ɔ kleli i nzɔliɛ* kun.+
25 Sanngɛ Ezekiasi w’a siman ye nga be yoli i’n, i su ye. Afin ɔ* wa tuli i wun. Ɔ maan Ɲanmiɛn wa fɛli i bɔbɔ nin Zidafuɛ mun nin Zerizalɛmunfuɛ’m be wun ya.
26 Sanngɛ Ezekiasi i wun tulɛ sɔ’n wa yoli i nsisɔ naan w’a kɛn i wun ase.+ Zerizalɛmunfuɛ’m be kusu be kannin be wun ase kɛ i sa. Ɔ maan Zoova w’a faman ya ng’ɔ fali’n, i nuan su sa w’a yiman be su Ezekiasi i blɛ su.+
27 Ezekiasi ɲannin aɲanbeun ninnge kpanngban kpa. Yɛ ɔ ɲannin ɲrun.+ Ɔ kplannin ninnge siewlɛ mun.+ Kpɛkun ɔ fɛli i sika’n, nin sika ɔkwlɛ’n, nin yɔbuɛ kpakpa mun, nin bomie ngo’n, nin ɲrɛn mun ɔ nin ninnge kpakpa kwlaa sieli be lɔ.
28 Asa ekun’n, ɔ kplannin ninnge siewlɛ mun naan be fa fie su ninnge mun, nin duvɛn uflɛuflɛ’n, nin ngo’n sie be lɔ. Yɛ ɔ kplannin nnɛn wafawafa’m be klangla mun, ɔ nin bua’m be klangla mun.
29 Ɔ kplannin klɔ wie mun. Yɛ ɔ ɲannin nannin nin bua nin boli kpanngban kpa, afin Ɲanmiɛn mɛnnin i ninnge kpanngban kpa.
30 Ezekiasi yɛ ɔ tanninnin Giɔn+ lɔ nzue ti’n i nglo lɔ lika’n niɔn.+ Kpɛkun ɔ kleli i ɲin naan ɔ sonji wɔ ja ngua lɔ, Davidi Klɔ’n+ i wia atɔliɛ lɔ. Like kwlaa nga Ezekiasi yoli’n, ɔ yoli ye i sa nun.
31 Sanngɛ kɛ Babilɔnin lɔ sran dandan’m be sunmannin sran naan be ko usɛ i abonuan sa*+ ng’ɔ juli i nvle’n nun’n+ i su ndɛ’n, Ɲanmiɛn Kpli yacili i lɛ naan i ngunmin fa ajalɛ. I waan ɔ́ sɛ́ i nían+ naan ɔ́ sí like kwlaa ng’ɔ o i awlɛn’n nun’n.+
32 Ezekiasi i su ndɛ’n i onga’n nin sa ng’ɔ yoli be m’ɔ kle kɛ ɔ klo Ɲanmiɛn dan’n,+ be o ndɛ nga Amɔzu i wa Ezai+ m’ɔ ti Ɲanmiɛn nuan ijɔfuɛ’n wunnin be aolia nun m’ɔ klɛli be’n, be nun. Be o Zida nin Izraɛli Famiɛn’m be Fluwa’n nun.+
33 I sin’n, Ezekiasi wa wuli.* Be sieli i kan be fu be kɔ Davidi i mma’m be asieliɛ’n su lɔ’n.+ Kɛ ɔ wuli’n, Zidafuɛ mun nin Zerizalɛmunfuɛ’m be kwlaa be kleli kɛ be bu i sran. Kpɛkun i wa Manase sinnin i osu kacili famiɛn.
Ja ngua lɔ ndɛ mun
^ Nian Ndɛʼm be bo tulɛ likaʼn nun lɔ.
^ Ebr., “Ɔ kannin ndɛ kleli be awlɛn’n.”
^ Annzɛ “i sonja kpakpa’m be kwlaa nin i aɲrunɲan’n.”
^ Annzɛ “abonuan sa.”
^ Ebr., “i awlɛn’n.”
^ Annzɛ “nzɔliɛ.”
^ Ebr., “Be lɛli i i nannan’m be wun lɛ.”
