2 Famiɛn Mun 23:1-37
23 Ɔ maan famiɛn’n sunmannin sran, kpɛkun be yiali Zida nin Zerizalɛmun kpɛnngbɛn’m be kwlaa.+
2 I sin’n, famiɛn’n ɔli Zoova i sua’n nun lɔ, ɔ nin Zidafuɛ’m be kwlaa, nin Zerizalɛmunfuɛ’m be kwlaa, nin Ɲanmiɛn ɲrun jranfuɛ mun, nin Ɲanmiɛn nuan ijɔfuɛ mun. Nvlefuɛ’m be kwlaa be ɔli, i bakan-o, i kpɛnngbɛn-o.* Ɔ kanngannin aenguɛ’n+ i fluwa’n+ nga be wunnin i Zoova i sua’n nun lɔ’n i nun ndɛ’n kwlaa kleli be.+
3 Famiɛn’n jrannin sua ja mlomlo’n i wun lɛ, kpɛkun ɔ trali aenguɛ*+ kun Zoova i ɲrun lɛ naan ɔ́ fɛ́ i awlɛn’n kwlaa nin i nguan’n kwlaa sú Zoova, yɛ ɔ́ nánti i mmla mun nin i afɔtuɛ mun nin i ndɛ ng’ɔ kan’n su. I sɔ’n kle kɛ ɔ́ nánti aenguɛ’n i su ndɛ nga be klɛli i fluwa’n nun’n su. Yɛ nvlefuɛ’m be kwlaa be kplinnin su kɛ bé dí aenguɛ’n su.+
4 Famiɛn’n seli Ilkia+ m’ɔ ti Ɲanmiɛn ɲrun jranfuɛ dan’n ɔ nin Ɲanmiɛn ɲrun jranfuɛ nga be mɛntɛn i’n, ɔ nin anuan sunianfuɛ’m be kɛ be yi ninnge kwlaa nga be yo mannin Baali’n, nin waka mɔ be sɔ i’n,*+ ɔ nin ninnge nga be yo mannin ɲanmiɛn su lɔ sonja’m be kwlaa mɔ be o Zoova i sua’n nun lɔ’n be fite. Kpɛkun ɔ ko wɔli be nun Zerizalɛmun klɔ’n i sin lɔ, Sedrɔn kongo’n nun lɔ, yɛ ɔ fali be nzuɛn’n ɔli Betɛli.+
5 Nvle uflɛ nun ɲanmiɛn’m be ɲrun jranfuɛ nga Zida famiɛn’m be sieli be kɛ be yi tɛ lika nglonglo nga be o Zida nin klɔ nga be mantan Zerizalɛmun’n be su naan wunsrɛn’n fite’n, ɔ fuannin be. Asa ekun’n ɔ fuannin be nga be yi tɛ be man Baali nin wia’n, nin anglo ba’n, nin nzraama akpasuaakpasua nga be flɛ be kɛ zodiaki’n, ɔ nin ɲanmiɛn su lɔ sonja’m be kwlaa’n.+
6 Ɔ yili waka mɔ be sɔ i’n*+ m’ɔ o Zoova i sua’n nun’n fiteli, ɔ fa ɔli Zerizalɛmun klɔ’n i tiwa lɔ, Sedrɔn kongo’n nun lɔ. Ɔ wɔli nun+ Sedrɔn kongo’n nun lɔ, ɔ fufuli i, kpɛkun ɔ fɛli i ndutre’n ko guɛli i sran ngbɛn’m be asieliɛ’n su lɔ.+
7 Ɔ bubuli sua nga be o Zoova i sua’n nun lɔ mɔ yasua’m be bo tekle be nun’n.+ Lɔ yɛ bla’m be wu tannin sua be man waka nga be sɔ i’n* niɔn.
8 I sin’n, ɔ fali amuin ɲrun jranfuɛ’m be kwlaa Zida klɔ’n nun fiteli. Yɛ kɛ ɔ fɛ i Geba+ lele fa ju Beɛ-Seba+ lɔ’n, lika nglonglo nga amuin ɲrun jranfuɛ’m be yi tɛ be su’n, ɔ yoli maan b’a kwlá yiman be su tɛ lɔ kun. Asa ekun’n, ɔ bubuli lika nglonglo nga be o Zozie m’ɔ ti klɔ’n i su kpɛn’n i anuan’n i wun lɛ’n. Kɛ sran kun wlú klɔ’n nun’n, ɔ o i sa bɛ su.
9 Lika nglonglo’m be su amuin ɲrun jranfuɛ’m be yiman tɛ Zoova i tɛ yiwlɛ m’ɔ o Zerizalɛmun lɔ’n+ su, sanngɛ be nin be niaan mun be di kpanwun mɔ levii nunman nun’n.
10 Ɔ yoli maan b’a kwlá sɔman Tofɛti+ m’ɔ o Inɔmun i Mma’m be Kongo’n*+ nun lɔ’n kun. Ɔ yoli sɔ naan sran fi w’a kwlá yrɛmɛn i wa yasua annzɛ i wa bla sin’n nun* w’a manman Molɛki kun.+
11 Ɔ fali ajalɛ kɛ nán maan nnɛn kpanngɔ nga Zida famiɛn’m be fa mannin wia’n be sin Natan-Melɛki m’ɔ di junman famiɛn’n i awlo lɔ’n i sua ba’n nun* naan b’a wlu Zoova i sua’n nun lɔ. Sua ba sɔ’n wo kpata tɛnndɛn’n i bo lɛ. Ɔ wɔli kakaklolo nga be yo mannin wia’n+ be nun.
12 Famiɛn’n bubuli tɛ yiwlɛ nga Zida famiɛn’m be takali be Akazi i nglo lɔ sua ba’n i ti su lɔ’n,+ ɔ nin tɛ yiwlɛ nga Manase yoli be Zoova i sua’n i awlo klun nɲɔn’m be nun’n.+ Ɔ fufuli be nun, kpɛkun ɔ fali be ndutre’n sanndili i Sedrɔn Kongo’n nun.
13 Famiɛn’n yoli maan b’a kwlá yiman tɛ tɛ yiwlɛ nga be o lika nglonglo’m be su’n mɔ be o Zerizalɛmun i ɲrun lɛ’n, mɔ be o Sacilɛ Oka’n* i lika nga i ɲin kpɛ ja ngua lɔ* nun’n be su kun. Salomɔn m’ɔ ti Izraɛli famiɛn’n yɛ ɔ yoli tɛ yiwlɛ sɔ mun-ɔn. Ɔ yo be mannin Sidɔnfuɛ’m be amuin bla m’ɔ ti like kain mɔ be flɛ i kɛ Astaate’n, ɔ nin Moabufuɛ’m be amuin m’ɔ ti like kain mɔ be flɛ i kɛ Kemɔsu’n, nin Amɔnfuɛ’m+ be tete amuin mɔ be flɛ i kɛ Milkɔmun’n.+
14 Ɔ bubuli yɔbuɛ nga be sɔ be’n, yɛ ɔ kpɛkpɛli waka nga be sɔ be’n.*+ Kpɛkun ɔ fali sran owie guɛli i be osu’n nun.
15 Asa ekun’n ɔ bubuli tɛ yiwlɛ ng’ɔ o Betɛli lɔ’n, lika nglonglo nga Nebati i wa Zeroboamun yoli mɔ i ti’n Izraɛlifuɛ’m be yoli sa tɛ’n.+ Kɛ ɔ wieli tɛ yiwlɛ’n nin lika nglonglo’n be bubu’n, ɔ wɔli lika nglonglo’n nun kpɛkun ɔ wɔli waka nga be sɔ i’n*+ nun.
16 Kɛ Zoziasi kpɛli i ɲin m’ɔ wunnin ndia nga be o oka’n su’n, ɔ yoli maan be yili ndia’m be nun owie mun, kpɛkun be wɔli be nun tɛ yiwlɛ’n su, naan b’a kwlá yiman tɛ su kun. Ɔ maan ndɛ mɔ Zoova sinnin Ɲanmiɛn Kpli i sran’n i lika kannin’n ɔ kpɛnnin su.+
17 I sin’n ɔ usali kɛ: “?Wan i ndia yɛle nga yɔbuɛ o su lɔ lɛ’n?” Klɔ’n nunfuɛ’m be tɛli i su kɛ: “Ɲanmiɛn Kpli i sran m’ɔ fin Zida’n+ i ndia’n niɔn. I yɛ ɔ kannin like nga á wá fá yó tɛ yiwlɛ ng’ɔ o Betɛli lɔ’n i ndɛ’n niɔn.”
18 Ɔ seli kɛ: “Nán maan sran fi kɛn i owie mun. Amun yaci be lɛ diin.” Ɔ maan be yacili i owie mun nin Ɲanmiɛn nuan ijɔfuɛ ng’ɔ fin Samari’n i owie mun lɛ.+
19 Asa ekun’n, amuin sua nga be o lika nglonglo’m be su’n, Zoziasi bubuli be kwlaa Samari klɔ’m+ be su. Izraɛli famiɛn’m be kplannin be naan bé fá fɔ́kɔ Ɲanmiɛn i awlɛn. Like ng’ɔ fa yoli lika nglonglo ng’ɔ o Betɛli lɔ’n, i kunngba’n yɛ ɔ fa yoli be-ɔ.+
20 Ɔ fali lika nglonglo’m be su amuin ɲrun jranfuɛ nga be o lɛ’n yili tɛ tɛ yiwlɛ’m be su, yɛ ɔ wɔli sran owie’m be nun+ tɛ yiwlɛ sɔ’m be su. Kpɛkun ɔ sɛli i sin Zerizalɛmun.
21 I sin’n famiɛn’n seli kɛ: “Amun di Delɛ Cɛn+ kun be man amun Ɲanmiɛn Zoova kɛ nga be fa klɛli i aenguɛ fluwa nga nun’n sa.”+
22 Kɛ ɔ fɛ i jɔlɛ difuɛ’m be blɛ su nin Izraɛli famiɛn mun nin Zida famiɛn’m be kwlaa be blɛ su’n, be nin-a diman Delɛ Cɛn kɛ ngalɛ’n sa le.+
23 Sanngɛ kɛ Zoziasi kacili famiɛn’n i afuɛ blu-nin-mɔcuɛ (18) su’n, be dili Delɛ Cɛn sɔ’n be mannin Zoova Zerizalɛmun lɔ.
24 Asa ekun’n, Zoziasi fuannin be nga be waan be nin be nga be wuli’n be ijɔ’n, ɔ nin wunnzue yifuɛ mun,+ ɔ yili amuin ba mun,*+ nin amuin mɔ be ti like kain’n,* nin ninnge kainkain nga be yoli be Zida mɛn’n nun nin Zerizalɛmun lɔ’n. Ɔ yoli sɔ naan ɔ́ nánti Mmla nga be klɛli i fluwa’n nun’n su.+ Fluwa sɔ’n yɛ Ɲanmiɛn ɲrun jranfuɛ Ilkia wunnin i Zoova i sua’n nun lɔ’n niɔn.+
25 Famiɛn nga be dunnin mmua i ɲrun’n be nun wie fi w’a nianman Moizi i Mmla’n su w’a fɛmɛn i awlɛn’n kwlaa, nin i nguan’n kwlaa+ nin i wunmiɛn’n kwlaa w’a suman Zoova kɛ i sa. Yɛ be nga be bɛli i sin’n be nun wie fi w’a yoman sɔ.
26 Sanngɛ Zoova w’a guɛmɛn i ya dan m’ɔ fɛli i Zida wun’n i ase, sa tɛtɛ nga Manase yoli fa fɔkɔli i awlɛn’n ti.+
27 Zoova seli kɛ: “Ń má yí Zida min ɲin bo lɛ,+ kɛ nga n fa yili Izraɛli+ min ɲin bo lɛ’n sa. Zerizalɛmun klɔ mɔ n fali’n, ɔ nin sua nga n seli kɛ ‘min dunman’n trán su titi’n,’ ń má yí be blo.”+
28 Zoziasi i su ndɛ’n i onga’n, like kwlaa ng’ɔ yoli be’n, be klɛli be fluwa ng’ɔ kan Zida famiɛn’m be ndɛ’n i nun.
29 Zoziasi i blɛ su’n, Faraɔn Neko m’ɔ ti Ezipti famiɛn’n ɔli naan ɔ́ kó tó Asiri famiɛn’n Efrati Nzue Ba’n i nuan lɔ. Kpɛkun Famiɛn Zoziasi ɔli kɛ ɔ nin i bé kó kún. Sanngɛ kɛ Neko wunnin i’n, ɔ kunnin i Megido lɛ.+
30 Ɔ maan i sufuɛ’m be fɛli i fuɛn’n kakaklolo kun nun Megido lɛ be ɔli Zerizalɛmun, kpɛkun be ko sieli i i ndia’n nun. I sin’n, nvle’n nunfuɛ’m be fali Zoziasi i wa Zoakazi, be guɛli i ti su ngo kpɛkun be sieli i famiɛn i si i osu.+
31 Kɛ Zoakazi+ káci famiɛn’n, nn ɔ le afuɛ ablaɔn-nin-nsan (23). Ɔ dili famiɛn anglo nsan Zerizalɛmun lɛ. Be flɛ i nin’n kɛ Amitali,+ Zeremin m’ɔ fin Libina’n i wa bla-ɔ.
32 Ɔ yoli sa ng’ɔ ti tɛ Zoova ɲrun’n, kɛ nga i nannan’m be fa yoli’n sa.+
33 Faraɔn Neko+ wlɛli i bisua Ribla lɔ,+ Amati mɛn’n nun. Ɔ yoli sɔ naan w’a kwlá sieman Zerizalɛmun kun. Kpɛkun ɔ seli kɛ maan nvle’n nunfuɛ’m be yi sika talan ya kun (100)* nin sika ɔkwlɛ talan kun.+
34 Asa ekun’n, Faraɔn Neko sieli Zoziasi i wa Eliakimun famiɛn i si Zoziasi i osu, yɛ ɔ kacili i dunman’n kɛ Zozakimun. Sanngɛ ɔ fali Zoakazi ɔli Ezipti.+ Lɔ yɛ ɔ wuli-ɔ.+
35 Zozakimun fali sika’n nin sika ɔkwlɛ’n mannin Faraɔn. Sanngɛ kɛ ɔ ko yo naan w’a ɲan sika sɔ’n naan w’a kwla yi sika nga Faraɔn kleli’n, ɔ seli nvlefuɛ mun kɛ be tua lapo. Ɔ miannin nvle’n nunfuɛ mun naan be tinuntinun be yi sika nin sika ɔkwlɛ nuan trele kun naan w’a fa man Faraɔn Neko.
36 Kɛ Zozakimun+ káci famiɛn’n, nn ɔ le afuɛ ablaɔn-nin-nnun (25). Ɔ dili famiɛn afuɛ blu-nin-kun (11) Zerizalɛmun lɔ.+ Be flɛ i nin’n kɛ Zebida. Pedaya m’ɔ fin Ruma’n i wa bla-ɔ.
37 Ɔ yoli sa ng’ɔ ti tɛ Zoova i ɲrun’n titi,+ kɛ nga i nannan’m be fa yoli’n sa.+
Ja ngua lɔ ndɛ mun
^ Annzɛ “be nga be le ɲrun-o, be nga be leman ɲrun-o.”
^ Annzɛ “ɔ trali aenguɛ’n i uflɛ.”
^ Nian Ndɛ’m be bo tulɛ lika’n nun lɔ.
^ Nian Ndɛ’m be bo tulɛ lika’n nun lɔ.
^ Nian Ndɛ’m be bo tulɛ lika’n nun lɔ.
^ Nian Ndɛ’m be bo tulɛ lika’n nun lɔ, “Zeɛnin.”
^ Ebr., “w’a fɛmɛn i wa yasua annzɛ i wa bla w’a sinman sin’n nun.”
^ Ebr., “kan be di like lɛ’n.”
^ Yɛle kɛ, Olivie Oka’n, i li i lika ng’ɔ kpɛ ja ngua lɔ’n, be flɛ i ekun kɛ Ngasi Lolɛ Oka’n.
^ Ebr., “fama su.” Yɛle kɛ, kɛ sran kun i ɲin kpɛ wia afiliɛ lɔ’n, ɔ o i sa fama su.
^ Nian Ndɛ’m be bo tulɛ lika’n nun lɔ.
^ Nian Ndɛ’m be bo tulɛ lika’n nun lɔ.
^ Ebre nun’n, be kwla fa ndɛ mma kunngba sɔ’n be kan “sewie’n” i ndɛ. Be fa kan like m’ɔ yo kain’n i ndɛ.
^ Annzɛ “awlo amuin mun.” Ebr., “terafimun mun.”
