2 Samiɛli 1:1-27
1 Saili wuli. Davidi kusu ko kwlali Amalɛkifuɛ mun. Kpɛkun ɔ sɛli i sin Ziklagi.+ Ɔ trannin lɛ cɛn ba nɲɔn.
2 I cɛn ba nsan su’n, bé nían-ɔn, bian kun fin kan Saili boli i nanmue lɔ’n ɔ su ba. I wun tralɛ’m be ti titiwa, yɛ ndutre o i ti’n su. Kɛ ɔ toli Davidi lɔ’n, ɔ kotoli kpɛkun ɔ utuli i ɲin ase.
3 Yɛ Davidi usɛli i kɛ: “?A fin nin?” Bian’n tɛli i su kɛ: “N fin kan Saili boli i nanmue lɔ’n yɛ n wanndi n ba-ɔ.”
4 Davidi usɛli i kɛ: “?Ɔ ti sɛ lɔ? Yaci, kan kle min.” Bian’n tɛli i su kɛ: “Sran’m be wanndili. Sran sunman be wuli. Saili bɔbɔ nin i wa Zonatan be wuli.”+
5 Yɛ Davidi usali gbanflɛn ng’ɔ bo jasin’n kle i’n kɛ: “?Ɔ yo sɛ yɛ a si kɛ Saili nin i wa Zonatan be wuli-ɔ?”
6 Gbanflɛn’n tɛli i su kɛ: “N wunnin Saili Gilboa Oka’n+ su lɔ. Kɛ ń wún i’n, nn ɔ kisɛ i cua’n su, yɛ sonja nga be fu kakaklolo’m be nun’n, ɔ nin nnɛn kpanngɔ’m be su’n be su mɛntɛn i koko.+
7 Kɛ ɔ niɛnnin i sin m’ɔ wunnin min’n, ɔ flɛli min. Yɛ n tɛli su kɛ: ‘Min yɛ!’
8 Yɛ ɔ usali min kɛ: ‘?Ninfan fuɛ yɛle wɔ?’ N tɛli su kɛ: ‘N ti Amalɛkifuɛ.’+
9 Yɛ ɔ seli kɛ: ‘Yaci, wunnge min wun wa naan kun min kpɛkun. Afin min ɲin te o su sɔ, sanngɛ n su wun min ɲrun dan.’
10 Kɛ n wunnin kɛ ɔ la asiɛ wun lɛ naan like yaya w’a yo i’n, n si kɛ ɔ su fiteman nun. I sɔ’n ti’n, n ko jrɛnnin i su yɛ n kunnin i-ɔ.+ Kpɛkun n fali famiɛn kle ng’ɔ o i ti’n nin i sa kɔmin nun nga’n. Min min, n fali naan ń fá blɛ́ wɔ.”
11 Kɛ Davidi tili i sɔ’n, ɔ titili i wun tralɛ’m be nun. Kpɛkun be kwlaa nga be o i wun lɛ’n, be yoli sɔ wie.
12 Cɛn sɔ’n nun’n, be yili ngwlɛ, be sunnin yɛ b’a diman like+ lele aliɛ fa sannin be. Afin be fali tokofi be kunnin Saili nin i wa Zonatan nin Zoova i sran mun ɔ nin Izraɛlifuɛ kpanngban kpa.+
13 Davidi usali gbanflɛn ng’ɔ bali jasin bolɛ’n kɛ: “?A fin nin?” Ɔ seli kɛ: “Aofuɛ bian kun m’ɔ tran Izraɛli nvle nun’n i wa yɛle min. Ɔ ti Amalɛkifuɛ.”
14 Yɛ Davidi seli i kɛ: “?Kɛ a jaso ko kun Zoova i sran m’ɔ kpɛli i’n, ɔ klun titiman wɔ?”+
15 Yɛ Davidi flɛli i gbanflɛn’m be nun kun naan w’a se i kɛ: “Wunnge wa naan kun i.” Yɛ gbanflɛn’n kunnin i-ɔ.+
16 Davidi seli i kɛ: “Ɔ wie’n fin ɔ bɔbɔ.* Afin ɔ bɔbɔ ɔ nuan ndɛ’n yɛ ɔ cili wɔ-ɔ. A seli kɛ: ‘N bɔbɔ min yɛ n kunnin Zoova i sran m’ɔ kpɛli i’n niɔn.’”+
17 I sin’n, Davidi yili ngwlɛ Saili nin i wa Zonatan be ti.+
18 Kpɛkun ɔ seli kɛ maan be fa kle Zidafuɛ mun naan be si i. Be flɛ ngwlɛ sɔ m’ɔ yili’n kɛ “Ta’n,” yɛ be klɛli i Zasaa fluwa’n nun.+ Ɔ seli kɛ:
19 “Ee Izraɛli, ɔ sran nanndoliɛ mun yɛ b’a kun be oka’m be su yɛ.+
Safuɲrɛn mun yɛ b’a tɔ yɛ.
20 Nán maan be kɛn i ndɛ Gati lɔ.+Nán be bo i jɔ Askalɔn klɔ’n i nun mmuɛ’m be nun,ɔ timɛn i ti’n, Filisti talua’m be klun jɔ́,be nga b’a wlaman be klɛn’n, be wa bla’m bé tálo.
21 Gilboa oka mun,+nán maan bɔlɛ gua amun su naan se kɛ nzue yɛ ɔ́ tɔ́-ɔ,nán maan fie nga be o amun su’n, be su ninnge nga be fa man Ɲanmiɛn’n i wie fi yo kpa,+afin amun su lɔ yɛ be yoli safuɲrɛn’m be ɲrɛn’n i fiɛn-ɔn,be su faman ngo kankanman Saili i ɲrɛn’n kun.
22 Kɛ Zonatan i ta’n nin safuɲrɛn’m be mmoja’n ɔ nin be lui’m be yia nun’n,ɔ sɛmɛn i sin le,+yɛ Saili i tokofi’n ɔ sɛmɛn i sin sa ngbɛn.+
23 I nun mɔ Saili nin Zonatan+ be ɲin o su’n, sran’m be kloli be yɛ be wun yo fɛ.Kɛ bé wú bɔbɔ’n, b’a kpɔciman be wiengu.+
Be wun kpɛ tra anunman ɲin mun,+be le wunmiɛn tra asɔmɔli mun.+
24 Izraɛli talua mun, amun sun Saili.I yɛ ɔ fali tralɛ ɔkwlɛ bioun nin i nun ninnge nglanmannglanman mun wlawlali amun-ɔn.I yɛ ɔ fali sika ɔkwlɛ ninnge mun siesieli amun tralɛ’m be su-ɔ.
25 Alɛ’n dili safuɲrɛn mun-o!
Be kunnin Zonatan amun oka’m be su!+
26 Ee, min niaan bian Zonatan, ɔ ti’n min wla w’a bo min wun,n kloli wɔ sa dan.+
Klolɛ nga a fa kloli min’n, i dan tra bla’m be klolɛ’n lelele.+
27 Ee, safuɲrɛn’m b’a tɔ-o,alɛ ninnge’m b’a saci-o!”
Ja ngua lɔ ndɛ mun
^ Ebr., “Ɔ mmoja’n wo ɔ bɔbɔ ɔ ti su.”
