2 Samiɛli 12:1-31
12 Kɛ ɔ yoli sɔ’n, Zoova sunmannin Natan+ Davidi sin. Ɔ ko seli i+ kɛ: “Bian nɲɔn be o klɔ kun su. Kun ti aɲanbeunfuɛ, yɛ kun ti yalɛfuɛ.
2 Aɲanbeunfuɛ’n le bua nin nannin kpanngban kpa.+
3 Sanngɛ yalɛfuɛ’n leman like fi, saan bua ba bla kun. Ɔ toli bua sɔ’n,+ yɛ ɔ tɛli i lele ɔ nin i mma’m be ɲinnin likawlɛ. Aliɛ kaan ng’ɔ ɲɛn i’n, i wie yɛ ɔ fa mɛn i-ɔ. Ɔ nin i be nɔn klowa kunngba’n nun. Bua’n la bian’n i wue’n nun, yɛ ɔ kacili kɛ i wa bla wie sa.
4 Cɛn kun’n, aofuɛ kun wa toli aɲanbeunfuɛ’n. Kɛ ɔ yo naan ɔ kun i bɔbɔ i bua annzɛ i nannin’m be nun kun naan ɔ fa sɔ aofuɛ’n nun’n, w’a yoman sɔ. Sanngɛ ɔ ko fali yalɛfuɛ’n i bua ba’n, kpɛkun ɔ kunnin i naan w’a tɔn w’a man aofuɛ’n.”+
5 Kɛ Davidi tili i sɔ’n, ɔ fali bian’n i wun ya dan kpa. Ɔ seli Natan kɛ: “N kan Zoova m’ɔ lafiman’n,+ sran ng’ɔ yoli sɔ’n, ɔ nin kunlɛ fata!
6 Ɔ fata kɛ ɔ yi bua’n i ti sika man yalɛfuɛ’n i wunsu kpɛ nnan,+ afin ɔ ti sran tɛ, ɔ siman aunnvɔɛ.”
7 Natan seli Davidi kɛ: “Sran sɔ’n yɛle wɔ. Ndɛ nga Zoova m’ɔ ti Izraɛli i Ɲanmiɛn’n kan’n yɛ: ‘Min yɛ n fali ɔ naan a yo Izraɛli nvle’n su famiɛn-ɔn.+ Asa ekun’n, n deli wɔ Saili i sa nun.+
8 N fali ɔ min’n i awlo’n n mannin wɔ,+ yɛ n fɛli i yi mun n wlali ɔ sa nun.+ Asa ekun’n, n sieli wɔ Izraɛli nin Zida nvle’n+ be su famiɛn. Ɔ nin i sɔ ngba’n, min waan ń yó like kpanngban ekun ń mán wɔ.+
9 ?Ngue ti yɛ a yoli Zoova i nuan ndɛ’n i finfin mɔ a yoli sa ng’ɔ timan kpa’n i ɲrun-ɔn? A kunnin Iri m’ɔ ti Ɛtifuɛ’n!+ Kɛ a fɛ i wlali Amɔnfuɛ’m be sa nun mɔ be fali tokofi be kunnin i’n,+ a ko fɛli i yi’n yoli ɔ liɛ.+
10 I sɔ’n ti’n, tokofi yɛ bé fá klé ɔ awlo’n nunfuɛ’m be ɲrɛnnɛn sa trilili-ɔ.+ Afin kɛ a ko fali Iri m’ɔ ti Ɛtifuɛ’n i yi’n, a yoli min finfin.’
11 Ndɛ nga Zoova kan’n yɛ: ‘Ń yó maan ɔ bɔbɔ wɔ awlo’n nunfuɛ’m bé fá ɲrɛnnɛn yí ɔ su.+ Ń fá ɔ yi mun ń mán sran uflɛ ɔ ɲin bo lɛ.+ Yɛ sran sɔ’n nin ɔ yi’m bé sí sua wia klakla kpa’n nun.+
12 A yoli ɔ sa liɛ’n nvialiɛ nun.+ Sanngɛ min liɛ nga ń wá yó’n, ɔ́ yó Izraɛlifuɛ’m be kwlaa be ɲrun, wia klakla kpa’n nun.’”
13 Davidi seli Natan kɛ: “N fɔnnin Zoova wun.”+ Yɛ Natan tɛli i su kɛ: “Zoova kusu w’a yaci ɔ sa tɛ’n w’a cɛ wɔ.+ A su wuman.+
14 Sanngɛ ɔ wa nga b’a wu i lɛ’n, ɔ́ wú. Afin sa ngalɛ’n nun’n, ɔ ɲin w’a yiman Zoova.”
15 I sin’n, Natan ɔli i awlo.
Kpɛkun Zoova yoli maan ba nga Iri i yi’n nin Davidi be wuli i’n, ɔ tɔli tukpacɛ.
16 Davidi srɛli Ɲanmiɛn Kpli lele naan ɔ yo ba’n i juejue. Davidi i nuan kanman like. Kɛ ɔ kɔ i awlo’n, ɔ la asiɛ wun lɛ kɔnguɛ lele aliɛ’n fa cɛn i.+
17 I sɔ’n ti’n, Davidi i awlo’n nun kpɛnngbɛn’m be ko wunnin i wun. Be waan bé mɛ́n i su naan ɔ jaso. Sanngɛ Davidi w’a kplinman su. Asa kusu’n, w’a kplinman su kɛ ɔ nin be dí like likawlɛ.
18 I cɛn nso su’n yɛ ba’n wuli-ɔ. Sanngɛ Davidi i sufuɛ’m be kwlá semɛn i kɛ ba’n wuli. Be seli be wun kɛ: “I nun nga ba’n i ɲin te o su’n, e kannin ndɛ kleli i, sanngɛ w’a siemɛn i su e nuan bo. ?I sɔ’n ti’n, sɛ e ko se i kɛ ba’n wuli’n, ɔ su yomɛn i wun like yaya yɛ ɔ o lɛ-ɔ?”
19 Kɛ Davidi wunnin kɛ i sufuɛ’m be su tu be wiengu aswre’n, ɔ wunnin i wlɛ kɛ ba’n wuli. Ɔ maan ɔ usali be kɛ: “?Ba’n wuli?” Be tɛli i su kɛ: “Ɛɛn, ɔ wuli.”
20 Yɛ Davidi jasoli asiɛ wun lɛ-ɔ. Ɔ ko wunnzinnin, ɔ fali ngo fanninfannin kun kpakpali,+ yɛ ɔ kacili i wun tralɛ’n. Kpɛkun ɔ ɔli Zoova i sua’n+ nun lɔ, ɔ ko kotoli i bo. I sin’n, ɔ sɛli i sin i awlo lɔ,* kpɛkun ɔ seli kɛ be blɛ i aliɛ. Yɛ ɔ dili-ɔ.
21 I sufuɛ’m be usɛli i kɛ: “?Ngue ti yɛ a yoli sɔ-ɔ? Kɛ ba’n i ɲin o su’n, a diman like, yɛ a sunnin lelele. Sanngɛ kɛ ba’n wuli cɛ’n, a jasoli waka, kpɛkun a dili like.”
22 Ɔ tɛli be su kɛ: “Kɛ ba’n i ɲin te o su’n, n cili nglɛmun,+ yɛ n sunnin lelele, afin n seli min wun kɛ: ‘Nja, sɛ Zoova sí min aunnvɔɛ naan ba’n su wuman-o.’+
23 ?Siɛn mɔ ba’n w’a wu’n, ngue ti yɛ ń kó cí nglɛmun ekun-ɔn? ?N kwla yo naan ɔ sɛ i sin wa ekun?+ Min yɛ ń má tó i lɔ-ɔ.+ Sanngɛ i liɛ’n, ɔ kwlá sɛmɛn i sin toman min wa kun.”+
24 I sin’n, Davidi fɔnvɔli i yi Bati-Seba.+ Davidi ɔli i wun lɔ, yɛ ɔ nin i be lali. Kpɛkun bla’n wa wuli ba yasua kun. Davidi tɔnnin ba’n i dunman kɛ Salomɔn.*+ Zoova kloli ba sɔ’n dan.+
25 I sɔ’n ti’n, ɔ sunmɛnnin i nuan ijɔfuɛ Natan+ naan Zoova i dunman nun’n, ɔ ko tɔn ba’n i dunman kɛ Zedidiya.*
26 Zoabu fali alɛ wlali Raba+ m’ɔ ti Amɔnfuɛ’m+ be klɔ’n i sin lele ɔ fali famiɛn klɔ’n.+
27 Yɛ Zoabu sunmannin sran naan be ko se Davidi kɛ: “E nin Raba+ lɔfuɛ mun e kunnin, yɛ n fali nzue klɔ’n.*
28 I sɔ’n ti’n, yiayia sonja onga mun naan be kpɛ sin yia klɔ’n naan fa klɔ’n. Sɛ w’a yoman sɔ’n naan n fa klɔ’n, min yɛ bé bó min dunman-ɔn.”*
29 Davidi yiayiali sonja’m be kwlaa, kpɛkun ɔ ɔli Raba. Ɔ nin lɔfuɛ’m be ko kunnin naan w’a fa be klɔ’n.
30 Kpɛkun ɔ fali famiɛn kle ng’ɔ o Malkamun i ti’n. Kle sɔ’n i nɔnnin’n ti sika ɔkwlɛ talan kun.* Yɛ yɔbuɛ kpakpa’m be tata kle sɔ’n su. Be fali kle’n wlali Davidi i ti. Asa ekun’n, ɔ fali klɔ’n+ nun ninnge kpanngban kpa+ ɔli.
31 Yɛ ɔ trali lɔfuɛ mun ɔli naan be di junman kɛ kanga sa. Wie’m be sɛli yɔbuɛ, wie’m be fali ninnge wie mɔ blalɛ yɛ be fa yoli m’ɔ la kpa’n, ɔ nin kpɛliɛ nga be fali blalɛ be yoli’n be dili junman, yɛ wie’m be kpɛli bliki. Sa nga Davidi yoli i Amɔnfuɛ’m be klɔ’m be kwlaa su’n yɛ ɔ o lɛ-ɔ. I sin’n, Davidi nin i sonja’m be ngba be sali be sin Zerizalɛmun.
Ja ngua lɔ ndɛ mun
^ Annzɛ “i famiɛn sua’n nun lɔ.”
^ Ɔ fin Ebre nun ndɛ mma kun nun. I bo’n yɛle kɛ “Fɔundi.”
^ I bo’n yɛ: “Ya i awlɛn su ba.”
^ Atrɛkpa’n, klɔ’n i nun lika nga nzue o lɛ’n niɔn.
^ Ebr., “bé fá min dunman’n fá síe i klɔ’n su.”
