2 Samiɛli 23:1-39
23 Ndɛ kasiɛn nga Davidi kannin’n yɛ:+
“Zese i wa Davidi i nuan ndɛ’n,+sran m’ɔ ɲannin ɲrun kpa’n,+mɔ Zakɔbu i Ɲanmiɛn’n kpɛli i’n,+mɔ kɛ ɔ́ tó Izraɛli jue mun’n,+ i wun yo fɛ’n, i nuan ndɛ’n yɛ.
2 Zoova i wawɛ’n i fanngan nun yɛ n ijɔli-ɔ.+Ɔ fɛli i ndɛ’n wlali min nuan.*+
3 Izraɛli i Ɲanmiɛn’n ijɔli,Izraɛli i Yɔbuɛ’n+ seli min kɛ:
‘Kɛ sran ng’ɔ sie i wiengu mun’n ti nanwlɛfuɛ’n,+mɔ kɛ ɔ́ síe sran mun’n, ɔ sro Ɲanmiɛn’n,+
4 ɔ ti kɛ nglɛmun mɔ lika’n w’a titi mɔ wia’n su bo,+mɔ be wunman ɲanmiɛn ble’n sa.
Ɔ ti kɛ nzue’n w’a kpɛ naan lika’n kpaja weiin,naan ijre’m b’a fifi asiɛ’n su sa.’+
5 Kɛ Ɲanmiɛn bu min awlofuɛ’m be sɔ-ɔ.
Afin aenguɛ ng’ɔ nin min trali’n, ɔ́ ká lɛ tititi,+ɔ siesieli i cɛcɛcɛ, yɛ ɔ kwlá saciman le.
Afin i ti yɛ n kwla ɲan min ti mlɔnmlɔn-ɔn, yɛ n kwla di aklunjɔɛ kpa-ɔ.I sɔ’n ti yɛ ɔ yoli maan ɔ yoli kpa-ɔ.+
6 Sanngɛ finfinfuɛ’m be liɛ’n, bé wá kán be bo+ kɛ be fa gua owieowie’m be blo’n sa.Afin be kwlá faman be sa traman be.
7 Sran nga i waan ɔ́ kán be’n,Maan blalɛ nin cua waka be trɛn i sa nun.Bé wɔ́ be nun sekeseke be osu kunngba’n nun lɛ.”
8 Davidi i safuɲrɛn’m be dunman mun yɛ:+ Be flɛ kun kɛ Zosɛbu-Basebɛti, yɛ ɔ ti Takɛmɔnfuɛ. Ɔ ti be nsan’n be su kpɛn.+ Cɛn kun’n, ɔ fɛli i cua’n kunnin sran ya mɔcuɛ (800).
9 Be flɛ kun ekun kɛ Eleazaa.+ Dodo+ i wa-ɔ, i kusu ti Aoi i wa. Ɔ o Davidi i safuɲrɛn nsan nga be nin i ɔli Filistifuɛ’m be klɔklɔlɛ’n be nun wie. Filistifuɛ sɔ’m be wa yiali naan be nin Izraɛlifuɛ’m bé kún. Kɛ Izraɛli sonja’m be cuɛnnin be wun’n,
10 Eleazaa kali lɛ. Ɔ nin Filistifuɛ’m be kunnin lele i sa’n kpɔli. Kɛ ɔ trali tokofi nun lele’n, i sa’n ɲɛnnin i wun.+ Yɛ sran’m be toli i lɔ naan b’a ko isa be ng’ɔ kunnin be’n be bo ninnge mun. Cɛn sɔ’n nun’n, Zoova kwlali dan kpa.+
11 Be flɛ sran nsan su’n kɛ Sama. Age m’ɔ fin Arari’n i wa-ɔ. Filistifuɛ’m be ko yiali Lei lɔ, kan lantii fie kun o lɛ’n. Izraɛlifuɛ’m be wanndili Filistifuɛ’m be bo.
12 Sanngɛ i liɛ’n, ɔ ko jrannin fie sɔ’n i afiɛn lɔ naan b’a faman. Ɔ nin Filistifuɛ’m be kunnin lele be nun kpanngban kpa be wuli. Ɔ maan Zoova kwlali dan kpa.+
13 Fie su ninnge’m be kpɛlɛ blɛ’n nun’n, kpɛnngbɛn ablasan (30) mun be nun nsan be ɔli Davidi sin yɔbuɛ buɛ ng’ɔ o Adulamun+ lɔ’n nun. Kɛ ɔ́ yó sɔ’n, nn Filistifuɛ’m be sonja akpasua kun o Refafuɛ’m be Kongo’n+ nun lɛ.
14 Davidi kusu o i fiawlɛ’n nun lɔ,+ yɛ Filistifuɛ’m be sonja akpasua kun ekun o Bɛtleɛmun.
15 Kpɛkun Davidi i akunndan’n ɔli Bɛtleɛmun lɔ nzue’n su naan w’a se kɛ: “Nanwlɛ, sɛ ɔ ti kɛ n kwla ɲan gbo ng’ɔ o Bɛtleɛmun klɔ’n i anuan’n i wun lɛ’n, i nun nzue kan n nɔn’n, ɔ́ yó min fɛ-o!”
16 Kɛ ɔ kɛnnin i sɔ’n, i safuɲrɛn nsan’m be fali be wue kekle be wluli Filistifuɛ’m be nanmue’n nun lɔ. Be ko sali gbo ng’ɔ o Bɛtleɛmun klɔ’n i anuan’n i wun lɛ’n, i nun nzue’n wie blɛli Davidi. Sanngɛ i waan ɔ nɔnman, ɔ guɛli i ase mannin Zoova.+
17 Ɔ seli kɛ: “Zoova, n kwlá nɔnman nzue sɔ’n mlɔnmlɔn. ?Ń nɔ́n be nga be fali be nguan’n sieli i wie nuan’n be mmoja’n?”+ Ɔ maan w’a nɔnman. Like nga Davidi i safuɲrɛn nsan’m be yoli’n yɛ ɔ o lɛ-ɔ.
18 Zeruya+ i wa Zoabu i niaan bian Abisai+ ti sonja akpasua kun ekun su kpɛn. Be akpasua liɛ’n nun’n, be ti sran nsan wie. Cɛn kun’n, ɔ fɛli i cua’n kunnin sran ya nsan (300). I dunman’n fuli kɛ safuɲrɛn nsan’m be liɛ’n sa.+
19 Kannzɛ bɔbɔ ɔ ɲannin sasu trali be nsan’n be akpasua’n liɛ’n, naan ɔ yoli be su kpɛn’n, sanngɛ w’a ɲanman sasu kɛ safuɲrɛn nsan klikli mun sa.
20 Zoyada i wa Benaya+ ti yakpafuɛ kpa. Ɔ yoli sa kekleekle wie mun Kabizeɛli+ lɔ. Ɔ kunnin Ariɛli m’ɔ ti Moabufuɛ’n i wa yasua nɲɔn mun. Cɛn kun mɔ laglasi ng’ɔ fin nglo lɔ gua munkɛnmunkɛn’n ɔ́ gúa kpa liɛ su’n, ɔ jrali kunman kun nun naan w’a kun asɔmɔli kun.+
21 Asa ekun’n, ɔ kunnin Ezipti bian kun m’ɔ ti kpandangblanwun kpa’n. Kɛ ɔ́ kɔ́ Eziptifuɛ’n su’n, waka yɛ ɔ o i sa nun-ɔn. Yɛ cua kun o Eziptifuɛ’n i sa nun. Sanngɛ ɔ ko deli Eziptifuɛ’n i bɔbɔ i cua’n fa kunnin i.
22 Like nga Zoyada i wa Benaya yoli’n yɛ ɔ o lɛ-ɔ. I dunman’n fuli kɛ safuɲrɛn nsan’m be liɛ’n sa.
23 Kannzɛ bɔbɔ ɔ ɲannin ɲrun trali sran ablasan (30) mun’n, sanngɛ w’a ɲanman sasu kɛ safuɲrɛn nsan’m be sa. Sanngɛ Davidi fɛli i sieli i i gladi difuɛ’m be su kpɛn.
24 Zoabu i niaan bian Azaɛli+ o sran ablasan (30) mun be nun wie. Sran sɔ mun yɛ: Dodo m’ɔ fin Bɛtleɛmun’n+ i wa Ɛlanan,
25 nin Sama m’ɔ fin Arɔdu’n, nin Elika m’ɔ fin Arɔdu’n,
26 nin Elɛzi+ m’ɔ fin Bɛti-Pelɛti’n, nin Ikɛsi m’ɔ fin Tekoa’n i wa Ira,+
27 nin Abiezɛɛ+ m’ɔ fin Anatɔtu’n,+ nin Mebunai m’ɔ ti Isafuɛ’n,
28 nin Zalmɔn m’ɔ fin Aoi i osu’n nun’n, nin Maarai+ m’ɔ fin Netofa’n,
29 nin Baana m’ɔ fin Netofa’n i wa Elɛbu, nin Ribai m’ɔ fin Bɛnzamɛnfuɛ’m be klɔ nga be flɛ i kɛ Gibea’n i wa Itai,
30 nin Benaya+ m’ɔ fin Piratɔn’n, nin Idai m’ɔ fin Gaasi+ lɔ kan nzue ba’m be o lɔ’n,
31 nin Abi-Albɔn m’ɔ fin Bɛti-Araba’n, nin Azmavɛti m’ɔ fin Baurimun’n,
32 nin Eliaba m’ɔ fin Saalibɔn’n, nin Zasɛnin i mma yasua mun, nin Zonatan,
33 nin Sama m’ɔ fin Arari’n, nin Saraa m’ɔ fin Arari’n i wa Aiamun,
34 nin Maakati bian’n i wa Aasbai i wa liɛ Elifelɛti, nin Aitofɛli+ m’ɔ fin Gilo’n i wa Eliamun,
35 nin Ɛzro m’ɔ fin Kaamɛli’n, nin Paarai m’ɔ ti Arabifuɛ’n,
36 nin Natan ng’ɔ fin Zoba’n i wa Igali, nin Banin m’ɔ ti Gadifuɛ’n,
37 nin Zelɛki m’ɔ ti Amɔnfuɛ’n, nin Naarai m’ɔ fin Beerɔti’n m’ɔ tra Zeruya i wa Zoabu i alɛ ninnge’m be nun’n,
38 nin Ira m’ɔ ti Itirifuɛ’n, nin Garɛbu m’ɔ ti Itirifuɛ’n,+
39 ɔ nin Iri+ m’ɔ ti Ɛtifuɛ’n. Be kwlaa be ti sran ablasan-nin-nso (37).
Ja ngua lɔ ndɛ mun
^ Ebr., “I ndɛ’n wo min taaman’n su.”
