2 Samiɛli 7:1-29
7 Famiɛn’n ko trɛnnin i bɔbɔ i sua’n*+ nun. Yɛ Zoova yoli maan ɔ ɲɛnnin i ti i kpɔfuɛ mɔ be nvle’n mɛntɛn i liɛ’n, be kwlaa be sa nun.
2 I sin’n, famiɛn’n seli Ɲanmiɛn nuan ijɔfuɛ Natan+ kɛ: “Sua nga n tran nun yɛ’n, sɛdri waka+ yɛ be fa kplannin-ɔn. Kusu nn Ɲanmiɛn Kpli i Alaka’n wo tannin sua nun.”+
3 Natan tɛli famiɛn’n su kɛ: “Like nga ɔ awlɛn o su kɛ á yó’n, yo. Afin Zoova jin ɔ sin.”+
4 Sanngɛ kɔnguɛ sɔ’n nun’n, Zoova kan ndɛ kleli Natan. Ɔ seli i kɛ:
5 “Kɔ ko se min sufuɛ Davidi kɛ: ‘Ndɛ nga Zoova kan’n yɛ: “?Ngue ti yɛ á kplán sua kun mán min naan n tran nun yɛ?+
6 Kɛ n fali Izraɛlifuɛ mun Ezipti lɔ fiteli lele andɛ’n,+ n nin-a tranman sua kpakpa nun sa le. Sanngɛ tannin sua+ nin kpata bo yɛ n tu trannin sa lelele-ɔ.
7 Nán andɛ sa yɛ e nin Izraɛlifuɛ’m be kwlaa e sɔli ajalɛ tulɛ-ɔ. ?Sanngɛ Izraɛli akpasua’m be su kpɛn nga n sieli be naan be nian min sran’m be lika’n, n seli be nun kun sa le kɛ ngue ti yɛ w’a faman sɛdri waka w’a kplanman sua kun w’a manman min-ɔn?”’”
8 Kan ndɛ nga kle min sufuɛ Davidi. Se i kɛ: ‘Ndɛ nga Zoova m’ɔ ti sonja’m be su kpɛn’n kan’n yɛ: “Kɛ ń kó fá wɔ’n, nn a su nian bua’m be lika,+ be didiwlɛ’n nun lɔ. Kpɛkun n sieli wɔ Izraɛli m’ɔ ti min nvle’n i su kpɛn.+
9 Lika kwlaa nga á kɔ́’n, e nin wɔ-ɔ.+ Yɛ ń kún ɔ kpɔfuɛ’m be kwlaa ɔ ɲrun lɛ.+ Ń yó maan ɔ dunman’n fú kpa+ kɛ asiɛ’n su sran dandan’m be liɛ’n sa.
10 Ń wá mán Izraɛlifuɛ mɔ be ti min sran’n be lika kun. Lɛ yɛ bé trán-ɔn. Yɛ like fi su kleman be yalɛ kun. Klunwifuɛ’m be su kleman be ɲrɛnnɛn kun kɛ laa’n sa.+
11 Jɔlɛ difuɛ nga n fa be n sieli Izraɛli m’ɔ ti min nvle’n su’n+ be blɛ su yɛ be sɔli be ɲrɛnnɛn klelɛ-ɔ. Sanngɛ ń yó maan á ɲán ɔ ti ɔ kpɔfuɛ’m be kwlaa be sa nun.+
“‘“Asa ekun’n, n bɔbɔ Zoova n seli wɔ kɛ Zoova yó maan famiɛn dilɛ’n su tuman ɔ osu’n nun le.*+
12 Kɛ a ko wu+ mɔ be ko sie wɔ kɛ be fa sieli ɔ nannan mun sa’n, ń fá ɔ osu’n nunfuɛ kun, yɛle kɛ ɔ klun ba kun, naan ɔ sin ɔ ja nun naan ɔ di famiɛn. Yɛ ń yó maan i sielɛ’n táka kpa.+
13 I yɛ ɔ́ wá kplán sua kun naan min dunman’n tran su-ɔ.+ Yɛ ń yó maan i famiɛn dilɛ’n táka kpa, kpɛkun ɔ́ ká lɛ tititi.+
14 Ń káci i si, yɛ ɔ́ káci min wa.+ Sɛ ɔ yo sa tɛ’n, ń fá ɲantiaan ń tú i fɔ, yɛ ń bó i kɛ klɔ sran’m* be liɛ’n sa.+
15 Ń kló i titi. N su yimɛn i ase kɛ nga n fa yili Saili i ase+ mɔ n kɛnnin i bo ɔ ɲrun lɛ’n sa.
16 Ɔ awlo’n ká lɛ tititi, yɛ famiɛn dilɛ’n ká ɔ osu’n nun tititi. Ɔ famiɛn dilɛ’n táka kpa tititi.”’”+
17 Natan ko kannin ndɛ kwlaa sɔ’n, ɔ nin sa ng’ɔ wunnin i aolia nun’n i kwlaa kleli Davidi.+
18 Kɛ ɔ yoli sɔ’n, Famiɛn Davidi ko trannin ase Zoova ɲrun lɛ naan w’a se kɛ: “?Min Min Zoova, wɔ mɔ a Sie Like Kwlakwla’n, wan yɛle min? ?Yɛ min awlo’n ti i liɛ sɛ ti yɛ a yoli like kwlaa sɔ’n mannin min-ɔn?+
19 Min Min Zoova, wɔ mɔ a Sie Like Kwlakwla’n, a bu i kɛ like nga a yo mannin min’n ti kaan. Kpɛkun a kan sa nga bé wá jú min mɔ n ti ɔ sufuɛ’n min awlo’n nun cɛn wie lele’n, i ndɛ ekun kle min. Min Min Zoova, wɔ mɔ a Sie Like Kwlakwla’n, i sɔ’n ti mmla, yɛ ɔ ti klɔ sran’m be kwlaa be liɛ.
20 Min Min Zoova, wɔ mɔ a Sie Like Kwlakwla’n, a si min kpa liɛ su.+ ?Ɔ maan ngue ndɛ yɛ n bɔbɔ Davidi mɔ n ti ɔ sufuɛ’n, ń kɛ́n i ekun-ɔn?
21 Ɔ ndɛ’n nin akunndan nga a buli i ɔ klun lɔ’n* ti’n, a yoli sa dandan kwlaa sɔ mun, kpɛkun a yili be nglo kleli min mɔ n ti ɔ sufuɛ’n.+
22 Min Min Zoova, wɔ mɔ a Sie Like Kwlakwla’n, i sɔ’n ti yɛ a ti dan-ɔn.+ Sran fi nin wɔ sɛman.+ Ɲanmiɛn uflɛ fi nunman lɛ, saan wɔ.+ Ndɛ kwlaa nga e tili’n kle sɔ weiin.
23 ?Yɛ asiɛ’n su nvle benin yɛ ɔ ti kɛ Izraɛli m’ɔ ti ɔ nvle’n sa-ɔ?+ Ɲanmiɛn, a ko kpɔli be ti naan be kaci ɔ liɛ.+ Yɛ a yoli sa dandan mun, nin sa sroesroe mun mannin be.+ Ɔ maan ɔ dunman’n fuli.+ Ɔ sran mɔ a ko kpɔli be ti Ezipti lɔ’n ti’n, a kannin nvlenvle mun nin be amuin’m be bo.
24 A fali Izraɛlifuɛ mun yoli ɔ nvle mlɔnmlɔnmlɔn.+ Yɛ Zoova, ɔ kusu, a yoli be Ɲanmiɛn.+
25 “Siɛn’n, Ɲanmiɛn Zoova, like nga a seli kɛ á yó mán min mɔ n ti ɔ sufuɛ’n nin min osu’n nunfuɛ mun’n, maan ɔ kpɛn su tititi. Yɛ yia ndɛ nga a kannin’n i nuan.+
26 Maan be manman ɔ dunman’n tititi,+ yɛ maan sran’m be se kɛ: ‘Zoova m’ɔ ti sonja’m be su kpɛn’n yɛ ɔ ti Izraɛli i Ɲanmiɛn-ɔn.’ Yɛ maan n bɔbɔ Davidi mɔ n ti ɔ sufuɛ’n, min awlo’n taka kpa ɔ ɲrun.+
27 Afin Zoova, wɔ mɔ a ti sonja’m be su kpɛn’n nin Izraɛli i Ɲanmiɛn’n, a yili sa kun i nglo kleli min mɔ n ti ɔ sufuɛ’n. A seli kɛ: ‘Ń yó maan famiɛn dilɛ’n su tuman ɔ osu’n nun le.’*+ I sɔ’n ti yɛ min mɔ n ti ɔ sufuɛ’n, n ɲannin wunmiɛn n srɛli wɔ kɛ nga sa-ɔ.
28 Min Min Zoova, wɔ mɔ a Sie Like Kwlakwla’n, wɔ yɛ a ti Ɲanmiɛn Kpli’n niɔn. Yɛ ndɛ nga a kan’n, ɔ ti nanwlɛ.+ A seli kɛ á yó ninnge kpakpa sɔ mun mán min mɔ n ti ɔ sufuɛ’n.
29 I sɔ’n ti’n, yra min mɔ n ti ɔ sufuɛ’n, min awlo’n su, yɛ maan ɔ ka ɔ ɲrun lɛ tititi.+ Afin min Min Zoova, wɔ mɔ a Sie Like Kwlakwla’n, wɔ yɛ a seli kɛ á yó i sɔ like’n niɔn. Yra min mɔ n ti ɔ sufuɛ’n, min awlo’n su naan muae tran nun tititi.”+
Ja ngua lɔ ndɛ mun
^ Annzɛ “i famiɛn sua’n.”
^ Ebr., “Zoova kplán sua kun mán wɔ.”
^ Be kwla se ekun kɛ “Adan i mma mun.”
^ Annzɛ “ɔ klun sa’n.”
^ Ebr., “Zoova yó sua kun mán wɔ.”
