Bo Bolɛ 48:1-22
48 I sin’n, be wa seli Zozɛfu kɛ: “Ɔ si kpinndinman.” Kɛ Zozɛfu tili i sɔ’n, ɔ fali Manase nin Efraimun mɔ be ti i wa yasua nɲɔn mun’n,+ naan w’a to Zakɔbu lɔ.
2 Be seli Zakɔbu kɛ: “Ɔ wa Zozɛfu w’a ba ɔ sin.” I sɔ’n ti’n, Izraɛli miɛnnin i ɲin jasoli naan w’a tran ase i bɛ’n su lɛ.
3 Ɔ seli Zozɛfu kɛ:
“I nun mɔ n wo Kanaan mɛn’n nun lɔ lika nga be flɛ i kɛ Lizi’n, Ɲanmiɛn M’ɔ Kwla Like Kwlaa Yo’n fiteli min ɲrun. Kpɛkun ɔ yrali min su.+
4 Ɔ seli min kɛ: ‘Ń yó maan á wú ba kaka. Yɛ ń yó maan ɔ osu’n trɛ́ lele ɔ́ káci nvle kpanngban.+ Yɛ ń fá mɛn nga ń mán ɔ osu’n nunfuɛ mun naan be tran nun tititi.’+
5 Ba nga a wuli be Ezipti mɛn’n nun wa kwlaa naan m’an to ɔ wa’n, be ti min liɛ.+ Efraimun nin Manase bé káci min klun ba kɛ Ribɛnin nin Simeɔn be sa.+
6 Sanngɛ ba nga a wuli be kasiɛn’n yɛ bé yó ɔ liɛ-ɔ. Aja like nga be niaan’m bé ɲɛ́n i’n, be dunman’n tɛ́ nun wie.+
7 Kɛ ń fín Padan ń bá’n, Rasɛli wuli+ min sa nun Kanaan mɛn’n nun. Kɛ ɔ́ yó sɔ’n, nn n nin-a mantanman Efrati+ kaan sa. I sɔ’n ti’n, n sieli i Efrati mɔ be flɛ i ekun kɛ Bɛtleɛmun’n,+ i atin’n su lɛ.”
8 Kɛ Izraɛli wunnin Zozɛfu i mma mun’n, ɔ usali kɛ: “?Wan mun yɛle nga?”
9 Yɛ Zozɛfu seli i si kɛ: “Ba nga Ɲanmiɛn fa mannin min lika nga nun wa’n mun-ɔn.”+ I kusu seli kɛ: “Yaci, fa be wunnge min wun wa naan n bo muae n man be.”+
10 Blɛ sɔ’n nun’n, nn Izraɛli wunman ase kpa kun afin w’a yo oke. Be flɛ i kɛ ɔ wunman ase bɔbɔ. I sɔ’n ti’n, Zozɛfu fali ba mun wunngeli i wun lɔ naan w’a fɛ i nuan’n w’a bo be fuka’n su, kpɛkun ɔ tɔli be nun.
11 Izraɛli seli Zozɛfu kɛ: “M’an bumɛn i le kɛ min ɲinma gúa ɔ wun ekun.+ Sanngɛ Ɲanmiɛn yoli maan m’an wun ɔ mma mun wie bɔbɔ.”
12 I sin’n, Zozɛfu fali ba mɔ be o Izraɛli ja su’n. Kpɛkun ɔ utuli i ɲin ase.
13 Zozɛfu fali be nɲɔn’n. Ɔ fɛli i sa fama’n trali Efraimun+ naan ɔ jran Izraɛli i bɛ su. Kpɛkun ɔ fɛli i sa bɛ’n trali Manase+ naan ɔ jran Izraɛli i fama su. Yɛ ɔ fa be wunngeli i wun koko.
14 Sanngɛ Izraɛli fɛli i sa fama’n sieli i Efraimun i ti’n su, kusu nn i yɛ ɔ ti ba kasiɛn’n niɔn. Kpɛkun ɔ fɛli i sa bɛ’n sieli i Manase i ti’n su. Manase yɛ ɔ ti ba kpɛn’n niɔn.+ Sanngɛ Izraɛli bɔbɔ i ɲinfu yɛ ɔ yoli sɔ-ɔ.
15 I sin’n, ɔ boli muae mannin Zozɛfu. Kpɛkun ɔ seli kɛ:+
“Ɲanmiɛn Kpli, wɔ mɔ a nin min si Abraamun nin min si Izaaki be nantili’n,+Ɲanmiɛn Kpli, wɔ mɔ kɛ ɔ fɛ i laa lele andɛ’n, a niannin min su kɛ bua tafuɛ fa niɛn i bua’m be su’n sa’n,+
16 wɔ mɔ a sunmannin ɔ anzi’n kɛ ɔ de min ɲrɛnnɛn kwlaa nun’n,+ yra ba yasua nga’m be su.+
Maan e nin Abraamun nin Izaaki mɔ be ti min si’n, e dunman’n ka be su,maan be osu’n trɛ kpanngban kpa asiɛ’n su.”+
17 Kɛ Zozɛfu wunnin kɛ i si i sa fama’n wo Efraimun i ti’n su’n, w’a yomɛn i fɛ. I sɔ’n ti’n, i waan ɔ́ yí i si i sa ng’ɔ o Efraimun i ti’n su’n naan ɔ́ fá síe i Manase i ti’n su.
18 Zozɛfu seli i si kɛ: “Baba, nɛ́n i su-ɔ. Ba kpɛnngbɛn’n yɛ ɔ o yɛ.+ Fa ɔ sa fama’n sie i ti’n su.”
19 Sanngɛ i si w’a kplinman su. Ɔ seli kɛ: “Min wa, n si sɔ. N si sɔ. I kusu wá káci nvle kun yɛ ɔ́ ɲán ɲrun dan. Sanngɛ i sinma’n wá ɲán ɲrun trɛ́ i.+ Kpɛkun i osu’n nunfuɛ’m bé sɔ́n dan ti’n, bé káci nvle kpanngban.”+
20 Ɔ boli muae mannin be ekun cɛn sɔ’n nun.+ Ɔ seli kɛ:
“Kɛ Izraɛlifuɛ’m bé bó muae mán be wiengu’n, maan be bo amun dunman be se kɛ:‘Maan Ɲanmiɛn yo naan a kaci kɛ Efraimun nin Manase be sa.’”
Ɔ maan ɔ fali Efraimun dunnin Manase i ɲrun titi.
21 Izraɛli seli Zozɛfu ekun kɛ: “N su wa wu.+ Sanngɛ Ɲanmiɛn jrán amun sin titi. Yɛ ɔ́ yó maan amún sá amun sin amun nannan’m be mɛn’n nun lɔ.+
22 Nian, ɔ lika liɛ nga n su wa man wɔ’n, ɔ́ yó dán trá ɔ niaan’m be liɛ’n. Min tokofi’n nin min ta’n yɛ n fa deli lika sɔ’n Amɔɔfuɛ’m be sa nun-ɔn.”
