Ezekiɛli 27:1-36
-
Tir i su ngwlɛ yilɛ (1-36)
27 Zoova kannin ndɛ kleli min ekun. Ɔ seli min kɛ:
2 “Sran wa, ɔ liɛ’n, Tir dunman nun ti’n yi ngwlɛ.+
3 Se Tir kɛ:‘Wɔ mɔ a tran jenvie’n nuan lɛ’n,mɔ a nin lika mɔ nzue bo sin yia be’n be nun kpanngban be nunfuɛ mun be di aata’n,ndɛ nga Miɛn Zoova m’ɔ Sie Like Kwlakwla’n kan’n yɛ:
“Ee Tir, ɔ bɔbɔ a seli kɛ: ‘N ti klanman dan.’+
4 Ɔ lika mun be o jenvie’n i afiɛn lɔ.Be mɔ be kplan wɔ’n, b’a yo maan w’a yo klanman kpa.
5 Sɛnii+ lɔ zenevrie waka yɛ be fa yoli ɔ waka paplaapla’m be kwlaa-ɔ.Yɛ Liban lɔ sɛdri waka yɛ be fa yoli ɔ waka flolo’n niɔn.
6 Basan lɔ sɛnin waka yɛ be fa yoli ɔ tɛbua mun-ɔn.Yɛ siprɛsi waka mɔ be wlawlali nun sui je’n, m’ɔ fin Kitimun+ lɔ lika mɔ nzue bo sin yia be’n be nun’n, yɛ be fa yoli ɔ ɲrun lika’n niɔn.
7 Ezipti lɔ lɛn mɔ i ɲin kpaja kpa’n yɛ be fa yoli ɔ tannin’n niɔn.Yɛ jese ble nin jese ɔkwlɛ kankan mɔ be fin Elisa+ lɔ lika mɔ nzue bo sin yia be’n be nun’n, yɛ be fa yoli ɔ lika nga be nantinanti lɛ’n i su tannin’n niɔn.
8 Sidɔnfuɛ mun nin Aavadifuɛ mun+ yɛ be ti ɔ kanfuɛ mun-ɔn.
Ee Tir, ɔ bɔbɔ ɔ sran nga be si junman di kpa’n yɛ be di junman ɔ nun-ɔn.+
9 Gebali+ lɔ sran nga be sa w’a tɔ junman nun* mɔ be si junman di kpa’n be yɛ be siesie ɔ ye naan nzue w’a wluman ɔ nun-ɔn.+
Jenvie’n su mmeli’m be kwlaa nin be nun junman difuɛ’m be ba ɔ wun lɛ be wa di aata.
10 Pɛɛsifuɛ mun, nin Ludifuɛ mun, nin Putifuɛ mun+ be o ɔ sonja’m be nun, be ti ɔ alɛ kunfuɛ.
Be fa be ɲrɛn mun nin be kpongbo kle mun be sendesende ɔ wun, yɛ be yo maan a ɲan ɲrun.
11 Aavadifuɛ nga be o ɔ sonja’m be nun’n be jranjran ɔ talɛ’m be su tɛɛn sin yia nun,yasua yakpafuɛ’m be sasa ɔ sua fleiin mun.
Be fa ɲrɛn kukluuklu mun be sendesende ɔ talɛ’m be wun tɛɛn sin yia nun,yɛ be yo maan ɔ klanman’n i ɲin fite dan.
12 “‘“Taasisi+ nin wɔ be di aata, afin ɔ aɲanbeun ninnge’m be sɔnnin.+ Be fa sika, nin blalɛ, nin etɛn, nin sunmun be man wɔ, yɛ ɔ kusu a fa ɔ ninnge liɛ mun man be.+
13 Zavan nin Tubali+ nin Mesɛki+ be nin wɔ di aata. Be man wɔ kanga mun,+ nin ninnge mɔ be fali aaba be yoli’n, yɛ ɔ kusu a fa ɔ ninnge liɛ mun man be.
14 Togaama+ i awlo’n nunfuɛ mun be man wɔ junman dilɛ nnɛn kpanngɔ nin alɛ kunlɛ nnɛn kpanngɔ mun, ɔ nin milɛ, yɛ ɔ kusu a fa ɔ ninnge liɛ mun man be.
15 Dedanfuɛ’m+ be nin wɔ di aata. Yɛ a le ɔ aata difuɛ mun lika mɔ nzue bo sin yia be’n be nun kpanngban nun. Be fa sui je+ nin ebɛnin waka be man wɔ.
16 Edɔmun nin wɔ be di aata, afin ɔ ninnge’m be sɔnnin. Be man wɔ tikuazi, nin tannin ɔkwlɛ kankan, ɔ nin ninnge mɔ be yili be nun desɛn mɔ be ɲin kpaja kpa’n, ɔ nin tannin kpakpa mun, nin korai, nin ribi, yɛ ɔ kusu a fa ɔ ninnge liɛ mun man be.
17 “‘“Zida nin Izraɛli nvle’n be nin wɔ be di aata. Be fa Miniti+ lɔ ble, nin aliɛ kpakpa mun, nin awɛma nzue,+ nin ngo, ɔ nin bomie ngo+ be man wɔ, yɛ ɔ kusu a fa ɔ ninnge liɛ mun man be.+
18 “‘“Damasi+ nin wɔ be di aata, afin ɔ ninnge’m be sɔnnin yɛ a ti aɲanbeunfuɛ. Be fa Ɛlbɔn lɔ duvɛn, nin Zaa lɔ nnɛn ndrɛ tannin be man wɔ.
19 Vedan nin Zavan mɔ be fin Izali’n be blɛ wɔ blalɛ mɔ be boli’n, nin kasi,* nin ndɛma m’ɔ bɔn fannin’n, yɛ ɔ kusu a fa ɔ ninnge liɛ mun man be.
20 Dedan+ nin wɔ be di aata. Ɔ man ɔ like nga be fa sie i nnɛn’m be su mɔ be tran su’n.
21 Arabu mun nin Kedaa+ kpɛnngbɛn’m be kwlaa, mɔ be yo bua ba nin bua ɲin, ɔ nin boli atɛ’n+ be di junman ɔ sa nun.
22 Saba nin Raama+ aata difuɛ’m be nin wɔ be di aata. Be man wɔ palifɛn kpakpa wafa kwlaa, nin yɔbuɛ kpakpa mun, ɔ nin sika ɔkwlɛ, yɛ ɔ kusu a fa ɔ ninnge liɛ mun man be.+
23 Aran,+ nin Kane, nin Edɛnin,+ nin Saba+ lɔ aata difuɛ mun, ɔ nin Asuu,+ nin Kilmadi be nin wɔ be di aata.
24 Be yo tralɛ nglanman mun, nin tralɛ dandan mɔ be fa tannin ble be yo be’n, ɔ nin ninnge mɔ be yili be nun desɛn mɔ be ɲin kpaja kpa’n, ɔ nin tapi mɔ be ɲin’n ti fanunfanun’n be atɛ ɔ aata dilɛ lika’m be nun. Be fali ɲanman be cicili be kwlaa kekle kpa.
25 Taasisi mmeli+ mɔ be wlanwlan lika’m be nun be di aata’n yɛ be sua ɔ aata dilɛ ninnge mun-ɔn.Ɔ maan trɔ’n w’a yi wɔ piɛ, yɛ a yo nɔnnin kpa* jenvie’n i afiɛn lɔ.
26 Ɔ kanfuɛ’m be fali wɔ be ɔli jenvie’n m’ɔ bo dan’n su lɔ.Wia afiliɛ lɔ aunmuan’n ti’n a utuli jenvie’n i afiɛn lɔ.
27 Ɔ sacilɛ cɛn’n nun’n, ɔ aɲanbeun’n, nin ɔ ninnge mun, nin ɔ ninnge nga a yo be atɛ’n, nin ɔ kanfuɛ mun, nin ɔ nun junman difuɛ mun,be mɔ be siesie ɔ ye naan nzue w’a wluman ɔ nun’n, be mɔ be yo ɔ ninnge’m be atɛ’n,+ ɔ nin alɛ kunfuɛ’m be kwlaa,+ɔ nun sran kpanngban’m be ngba,
be kwlaa bé mlɔ́n jenvie’n i afiɛn lɔ.+
28 Kɛ ɔ nun junman difuɛ’m bé kpán’n, jenvie’n i nuan lika’m bé kéje.
29 Mmeli kanfuɛ’m be kwlaa, ɔ nin mmeli nun junman difuɛ mun, nin jenvie’n su junman difuɛ mun,bé fín be mmeli’m be nun bé jrá asiɛ wun.
30 Bé mán be nɛn’n su bé kpán kpanlɛ kpa.+Bé fá ndutre bé gúa be ti’n su, kpɛkun bé kóndo nzuɛn’n nun.
31 Bé yí be ti’n yɛ bé wlá bajɛ tralɛ.Bé sún sunlɛ kpa ɔ dunman nun, yɛ bé bó awuyomo dan kpa.
32 Be wla m’ɔ́ bó be wun dan’n ti’n, bé yí ngwlɛ yɛ bé tó jue aunnvɔɛ su ɔ dunman nun. Bé sé kɛ:
‘?Wan yɛ ɔ ti kɛ Tir mɔ andɛ’n w’a tɔ srolo jenvie’n i afiɛn lɔ’n sa-ɔ?+
33 Kɛ ɔ ninnge mun be fin jenvie’n su lɔ be ba’n, a yo maan sran kpanngban be klun jɔ.+
Ɔ aɲanbeun ninnge kpanngban mun nin ɔ aata dilɛ ninnge mun be yo maan asiɛ’n su famiɛn’m be ɲan be wun.+
34 Siɛn’n, w’a saci jenvie’n nun lɔ, w’a saci nzue mɔ i bo ti kploun’n nun lɔ.+Ɔ aata dilɛ ninnge mun, ɔ nin ɔ sran mun be nin wɔ b’a mlɔn nzue’n nun.+
35 Lika nga nzue bo sin yia be’n be nunfuɛ’m be kwlaa bé nían ɔ siin, be nuan m’ɔ́ bó be wundan’n ti.+
Yɛ srɛ dan m’ɔ́ kún famiɛn mun’n ti’n, bé úsu,+ be ɲrun’n klé kɛ awlabɔɛ’n w’a kun be kpo.
36 Sa ng’ɔ́ wá jú ɔ su’n ti’n, nvlenvle’m be nun aata difuɛ’m bé bó feliman.
Awieliɛ’n ká lɛ wíe ɔ kpɛ kunngba, yɛ ɔ́ yó sro dan.Kpɛkun a su tranman lɛ kun mlɔnmlɔn.’”’”+
Ja ngua lɔ ndɛ mun
^ Ebr., “kpɛnngbɛn mun.”
^ Waka sɔ’n i wafa’n ti kɛ sinamɔmun waka sa.
^ Be kwla se ekun kɛ “a le ɲrun.”
