Ezekiɛli 36:1-38
36 “Sran wa, ɔ liɛ’n kan sa ng’ɔ́ wá jú Izraɛli oka’m be su’n i ndɛ, se kɛ: ‘Ee Izraɛli oka mun, amun tie ndɛ nga Zoova kan’n.
2 Ndɛ nga Miɛn Zoova m’ɔ Sie Like Kwlakwla’n kan’n yɛ: “Amun kpɔfuɛ’m be kan amun wun ndɛ be se kɛ: ‘W’a yo kpa wie ke! Laa lika nglonglo mun bɔbɔ’n b’a kaci e liɛ siɛn’n!’”’+
3 “I sɔ’n ti’n, kan sa ng’ɔ́ wá jú’n i ndɛ, se kɛ: ‘Ndɛ nga Miɛn Zoova m’ɔ Sie Like Kwlakwla’n kan’n yɛ: “Be yoli maan amun tɔli srolo, be fin lika’n i bue kwlaa su be wa tɔli amun su. Be yoli sɔ naan amun kaci be nga be kali nguan nun* nvlenvle’m be nun’n be liɛ, naan sran’m be kan amun wun ndɛ yɛ be tɔn amun suɛn.+
4 I sɔ’n ti’n, ee Izraɛli oka mun, amun tie ndɛ nga Miɛn Zoova m’ɔ Sie Like Kwlakwla’n kan’n. Ndɛ nga Miɛn Zoova m’ɔ sie like kwlakwla’n kan kle oka mun, nin kpɔlɛ mun, nin nzue ba mun, nin kongo mun, nin lika nga be sacili mɔ be tɔli srolo’n,+ ɔ nin klɔ nga be tɔli srolo mɔ be nga be kali nguan nun nvlenvle nga be o be wun lɛ’n be nun’n be fɛnnin be nun ninnge mun’n, mɔ be yoli be finfin’n+ yɛ.
5 Ndɛ nga Miɛn Zoova m’ɔ Sie Like Kwlakwla’n kan kle sran sɔ mun’n yɛ: ‘Min ya dan m’ɔ jue kɛ sin sa’n ti’n,+ ń má bú be nga be kali nguan nun nvlenvle’m be nun’n be fɔ, ń bú Edɔmun mɛn wunmuan’n i fɔ. Sran sɔ mun be dili aklunjɔɛ dan, yɛ b’a buman min like fi,+ be fali min nvle’n yoli be liɛ, be fɛli i nnɛn didiwlɛ mun, kpɛkun be fɛnnin i nun ninnge mun.’”’+
6 “Ɔ maan kan sa ng’ɔ́ wá jú Izraɛli nvle’n su’n i ndɛ. Se oka mun, nin kpɔlɛ mun, nin nzue ba mun, ɔ nin kongo’m be kɛ: ‘Ndɛ nga Miɛn Zoova m’ɔ Sie Like Kwlakwla’n kan’n yɛ: “Amun nian! Ń má kán ndɛ juejue su, yɛ ń kɛ́n i ya su, afin nvlenvle’m be guali amun ɲin ase.”’+
7 “I sɔ’n ti’n, ndɛ nga Miɛn Zoova m’ɔ Sie Like Kwlakwla’n kan’n yɛ: ‘N bɔbɔ n man min sa’n su n ta nda kɛ nvle nga be o amun wun lɛ’n bé wá súa be bɔbɔ be ɲannzuɛn’n.+
8 Sanngɛ Izraɛli oka mun, amun liɛ’n amún wá ɲán sama yɛ amún sú mma Izraɛlifuɛ’m be ti,+ afin ɔ cɛ kan’n bé sá be sin.
9 Afin e nin amun e o nun, ń má kpɛ́ min ɲin ń nían amun, yɛ bé wá dí fie amun su, yɛ bé lúa ninnge mma mun amun su.
10 Ń má yó maan amun sran’m bé wá sɔ́n, Izraɛli nvle’n nunfuɛ’m be kwlaa, ɛɛn, be kwlaa bé sɔ́n. Yɛ bé trán klɔ’m be su,+ kpɛkun bé kplán ninnge nga be bubuli’n be uflɛ.+
11 Nanwlɛ, ń má yó maan amún wá sɔ́n kpa, yɛ amun nnɛn’m bé sɔ́n wie.+ Bé wá sɔ́n yɛ bé wú ba kaka. Kpɛkun ń má yó maan bé trán amun nun ekun kɛ laa’n sa.+ Ń má yó maan amun liɛ wá yó ye trá laa’n.+ Kpɛkun amún wá sí jrɛiin kɛ n ti Zoova.+
12 Ń má yó maan sran mun, yɛle kɛ Izraɛli m’ɔ ti min nvle’n, ɔ́ wá nánti amun su, bé fá amun yó be liɛ.+ Amún wá káci be aja like, kpɛkun amun su yoman naan be mma’m b’a fi be sa ekun.’”+
13 “Ndɛ nga Miɛn Zoova m’ɔ Sie Like Kwlakwla’n kan’n yɛ: ‘Be seli ɔ kɛ: “A ti nvle kun m’ɔ di sran-ɔn, yɛ a yo maan ɔ nvle’m be nunfuɛ’m be mma’m be fi be sa.”’
14 ‘I sɔ’n ti’n, a su diman sran kun, yɛ a su yoman naan ɔ nvle’m be nunfuɛ’m be mma’m b’a fi be sa ekun.’ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.
15 ‘N su yaciman ɔ lɛ kun naan nvlenvle’m be kpɛ ɔ nzowa, yɛ ń má yó maan sran’m be su klɔklɔman ɔ kun.+ Yɛ ɔ nvle’m be nunfuɛ’m be ja su kplaman ɔ dunman nun kun.’ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.”
16 Kpɛkun Zoova kannin ndɛ kleli min ekun. Ɔ seli min kɛ:
17 “Sran wa, i nun mɔ Izraɛli nvle’n nunfuɛ’m be tran be nvle’n nun lɔ’n, be ayeliɛ’n nin sa nga be yo’n ti’n be yoli i fiɛn.+ Be ayeliɛ’n ti min ɲrun kɛ bla kun m’ɔ o fiɛn nun i mannza blɛ nun’n sa.+
18 I sɔ’n ti’n, n fali min ya dan’n i kwlaa n guali be su, afin be guali sran mmoja ase nvle’n nun,+ kpɛkun be fali be amuin mɔ be ti like kain’n* be yoli nvle’n i fiɛn.+
19 Ɔ maan be bo sanndili nvlenvle’m be nun, be bo sanndili mɛnmɛn’m be nun.+ N niannin be ayeliɛ’n nin sa nga be yo’n su yɛ n dili be jɔlɛ-ɔ.
20 Sanngɛ kɛ be juli nvle sɔ’m be nun lɔ’n, sran’m be yoli min dunman m’ɔ ti sanwun’n i finfin.+ Be kan be ndɛ be se kɛ: ‘Zoova i nvle’n nunfuɛ mun-ɔn, sanngɛ be kannin be bo i nvle’n nun.’
21 Ɔ maan min dunman m’ɔ ti sanwun’n, mɔ Izraɛli nvle’n nunfuɛ’m be yoli i finfin nvle nga be ɔli be nun lɔ’n be nun’n, ń má klé kɛ ɔ ti min cinnjin.”+
22 “I sɔ’n ti’n, se Izraɛli nvle’n nunfuɛ’m be kɛ: ‘Ndɛ nga Miɛn Zoova m’ɔ Sie Like Kwlakwla’n kan’n yɛ: “Ee, Izraɛli nvle’n nunfuɛ mun, nán amun dunman nun ti yɛ n su yo sa sɔ’n niɔn, sanngɛ min dunman m’ɔ ti sanwun mɔ amun yoli i finfin nvle nga amun ɔli be nun lɔ’n be nun’n i ti-ɔ.”’+
23 ‘Min dunman m’ɔ ti dan m’ɔ yoli finfin nvlenvle’m be nun’n, mɔ amun yoli i finfin be nun’n, ń má yó maan ɔ́ yó sanwun.+ Kɛ ń má yí i nglo kɛ n ti sanwun nvlenvle’m be ɲin bo lɛ’n, bé wá sí jrɛiin kɛ n ti Zoova.’+ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.
24 ‘Ń kó fá amun nvlenvle’m be nun, ń fá amun mɛnmɛn’m be kwlaa be nun ń kó tían amun nuan, kpɛkun ń fá, amun ń kɔ́ amun mɛn’n nun lɔ.+
25 Ń má fá nzue sanwun ń ɲrɛ́nɲrɛ́n amun su, kpɛkun amún yó sanwun.+ Ń má kpló amun wun fiɛn’n i kwlaa,+ yɛ ń núnnún amun amuin mɔ be ti like kain’n.+
26 Ń má mán amun awlɛn uflɛ,+ yɛ ń má fá akunndan* uflɛ ń wlá amun nun.+ Ń má yí amun awlɛn m’ɔ ti kɛ yɔbuɛ sa’n+ amun nun, kpɛkun ń mán amun awlɛn kun m’ɔ ti wɛtɛɛ’n.*
27 Ń má fá min wawɛ’n ń wlá amun nun, kpɛkun ń yó maan amún fá ndɛ nga n kan’n su.+ Amún wá nían min mmla’m be su bé nánti.
28 Kpɛkun amún wá trán nvle nga n fa mannin amun nannan mun’n i nun. Amún wá yó min nvle’n nunfuɛ, yɛ n kusu ń yó amun Ɲanmiɛn.’+
29 “‘Ń má dé amun amun fiɛn’m be kwlaa be nun, kpɛkun ń sé ble’n nin ɔɔzu’n be kɛ be su kpanngban kpa. Yɛ n su faman awe’n n yiman amun su kun.+
30 Ń má yó maan waka mun, ɔ nin fie’m be su ninnge mun bé sú kpanngban. I liɛ’n, amun su wunman ɲannzuɛn mɔ awe’n ti’n amun wun i nvlenvle’m be nun’n kun.+
31 Kpɛkun amun wla wá kpɛ́n amun ayeliɛ tɛtɛ’n, ɔ nin sa nga amun yo mɔ be timan kpa’n be su. Kpɛkun amun sa tɛ’n, ɔ nin amun tete sa’m be ti’n, amún wá kpɔ́ amun bɔbɔ amun wun.+
32 Sanngɛ maan amun si kɛ nán amun dunman nun ti yɛ n su yo sa sɔ’n niɔn.+ I kpa bɔbɔ’n, Izraɛli nvle’n nunfuɛ mun, amun ayeliɛ’n ti’n, maan amun ɲin gua ase, yɛ maan ɲannzuɛn kun amun.’ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.
33 “Ndɛ nga Miɛn Zoova m’ɔ Sie Like Kwlakwla’n kan’n yɛ: ‘Cɛn sɔ’n nun’n, amun sa tɛ’m be kwlaa be ti’n, ń má kpló amun wun fiɛn’n. Ń má yó maan sran’m bé trán klɔ’m be su,+ kpɛkun bé kplán ninnge nga be bubuli’n be uflɛ.+
34 Nvle m’ɔ tɔli srolo’n, mɔ be kwlaa nga be sin lɔ’n be wun kɛ w’a tɔ srolo’n, bé wá dí fie lɔ ekun.
35 Kpɛkun sran’m bé wá sé kɛ: “Nvle m’ɔ kali lɛ ngbɛn’n w’a kaci kɛ Edɛnin fie klanman’n+ sa. Yɛ klɔ mɔ be sacili be mɔ be tɔli srolo’n, mɔ be bubuli be’n, siɛn’n b’a sisi be wun yɛ sran’m be tran be su.”+
36 Kpɛkun nvlenvle nga be kali amun wun lɛ’n, bé wá sí jrɛiin kɛ min bɔbɔ Zoova yɛ n kplannin lika ng’ɔ bubuli’n niɔn, naan min yɛ n tali like lika ng’ɔ kali lɛ ngbɛn’n nun-ɔn. Min bɔbɔ Zoova n kannin ndɛ yɛ n yoli i nuan sa.’+
37 “Ndɛ nga Miɛn Zoova m’ɔ Sie Like Kwlakwla’n kan’n yɛ: ‘Ń má yáci Izraɛli nvle’n nunfuɛ’m be lɛ naan be se min kɛ n yo like yɛ’n n man be: Ń má yó maan be sran’m bé sɔ́n kpanngban kpa kɛ nnɛn mun sa.
38 Bé wá sɔ́n kpanngban kɛ Ɲanmiɛn i sran mun sa. Bé sɔ́n kɛ Zerizalɛmun lɔ cɛn dilɛ+ nun nnɛn mun sa.* Klɔ nga be bubuli be’n be nun sran mun bé wá sɔ́n kpanngban kɛ nnɛn mun sa.+ Kpɛkun bé wá sí jrɛiin kɛ n ti Zoova.’”
Ja ngua lɔ ndɛ mun
^ Ebr., “be nga be kali lɛ’n.”
^ Ebre nun ndɛ sɔ’n ɔ nin ndɛ kun mɔ be fa kan “sewie’n” i ndɛ’n be kɔ likawlɛ. Be fa kan like m’ɔ yo kain’n i ndɛ.
^ Ebr., “wawɛ.”
^ Yɛle kɛ, awlɛn kun m’ɔ fa Ɲanmiɛn i atin’m be su’n.
^ Be kwla se ekun kɛ “kɛ Zerizalɛmun lɔ bua kpanngban nga be fa yi tɛ cɛn dilɛ nun’n sa.”
