Fluwa nga Pɔlu klɛli Kolɔsufuɛ mun’n 2:1-23
2 Afin n kunndɛ kɛ amun wun i wlɛ kɛ amun nin be nga be o Laodise lɔ’n,+ ɔ nin be kwlaa nga b’a wunman min’n be ti’n, n su mian min ɲin kpa.
2 Ń yó sɔ naan be wla gua ase,+ naan klolɛ mɔ be klo be wun’n ti’n, be afiɛn sɛ.+ Asa ekun’n, ń yó sɔ naan kɛ mɔ be lafi su kpa kɛ be wun sa wlɛ’n, be ɲan ninnge kpakpa kwlaa. I liɛ’n, bé sí Klisi mɔ Ɲanmiɛn fɛli i su ndɛ fiali’n i kpa.+
3 Be fali Ɲanmiɛn i ngwlɛlɛ nin i sa silɛ+ mɔ be leman wunsu’n be kwlaa be fiɛli i nun kpa.
4 Ń kán sɔ naan sran fi w’a fɛmɛn i nuan nun fɛ w’a lakaman amun.
5 N nunman amun wun lɔ, sanngɛ min akunndan’n wo lɔ. Yɛ kɛ n wun kɛ amun yo ninnge mun sɛsɛsɛ+ mɔ amun lafi Klisi i su kpa’n+ ti’n, n di aklunjɔɛ.
6 I sɔ’n ti’n, kɛ mɔ amun sɔli Klisi Zezi m’ɔ ti e Min’n i nun’n ti’n, maan amun nin i be bo yo kun be nanti titi.
7 Kɛ nga be kleli amun’n sa’n, maan i su mɔ amun lafi’n i bo’n wla ase kpa,+ maan ɔ tɛkɛ i su kpa, yɛ maan ɔ jran cinnjin kpa.+ Asa ekun’n, maan amun la Ɲanmiɛn i ase kpa titi.+
8 Amun nian amun wun. Nán maan sran wie fa mɛn nunfuɛ’m be ngwlɛlɛ’n nin ndɛ ngbɛnngbɛn mɔ be ti gblɛ ngunmin’n,+ ɔ laka amun naan amun kaci i kanga. Ndɛ sɔ’m be fin klɔ sran, be fin be nannan’m be nzuɛn’n, be finman Klisi.
9 Afin i nun yɛ Ɲanmiɛn i nzuɛn’n kwlaa wo-ɔ.+
10 I dunman nun’n, amun ɲannin ninnge’n kwlaa. I yɛ ɔ o awa kwlaa nin kpɛnngbɛn kwlaa be ti su-ɔ.+
11 Kɛ mɔ amun nin i be o nun’n ti’n, be wlali amun klɛn. Sanngɛ nán sran yɛ ɔ kpɛli amun wunnɛn’n yili i ase-ɔ.+ Klɛn ng’ɔ fin Klisi’n yɛ be wlali amun-ɔn.+
12 Afin kɛ mɔ be yoli amun batɛmun kɛ i liɛ’n sa’n ti’n,+ ɔ ti kɛ be sieli amun nin i likawlɛ sa. Yɛ kɛ mɔ amun nin i be o nun’n ti’n, amun nin i be cɛnnin nguan,+ afin amun lafi su kɛ Ɲanmiɛn m’ɔ cɛnnin i’n, ɔ yo abonuan sa.+
13 Asa ekun’n, kannzɛ bɔbɔ amun wuli amun sa tɛ’m be nun’n naan b’a wlaman amun klɛn’n, sanngɛ Ɲanmiɛn cɛnnin amun nin i,+ yɛ ɔ yacili e sa tɛ’m be kwlaa cɛli e klun ufue su.+
14 Kpɛkun mmla+ nga be klɛli m’ɔ tanndannin e ɲrun’n,+ ɔ nunnunnin i.+ Ɔ boboli mmla’n ɲrɛnnɛn waka’n* su,+ ɔ yoli maan ɔ nunman lɛ kun.
15 Ɲrɛnnɛn waka’n* ti’n, ɔ kwlali awa mun nin kpɛnngbɛn mun. Ɔ fa be fiteli sran’m be kwaa be ɲrun fa kleli kɛ ɔ kwlali be,+ yɛ ɔ tra be kɔ kɛ bisuafuɛ mun sa.
16 I sɔ’n ti’n, nán sran fi di amun jɔlɛ like nga amun di’n, annzɛ like nga amun nɔn’n,+ annzɛ cɛn dilɛ, annzɛ anglo le kun,+ annzɛ wunmiɛn-lolɛ-cɛn wie ti.+
17 Ninnge sɔ’m be ti ninnge nga bé wá bá’n be wawɛ.+ Sanngɛ sran nga ti yɛ e wun ninnge sɔ’m be wawɛ’n, yɛle Klisi’n.+
18 Nán maan sran wie m’ɔ yo i wun kɛ ɔ ti wun ase kanfuɛ sa’n, m’ɔ su anzi mun’n,* ɔ yo naan amun a ɲanman akatua’n.+ Ninnge nga sran sɔ’n i ɲin ta be’n, be su ngunmin yɛ ɔ jran-ɔn, kpɛkun ɔ fɛ i ngwlɛlɛ m’ɔ ti klɔ sran liɛ’n ɔ fa di i nuan.
19 Ɔ suman sran ng’ɔ ti e ti’n,*+ i su. Kusu nn sran sɔ’n yɛ ɔ ta wunnɛn’n i wunmuan’n niɔn. Yɛ i ti yɛ i kpɔlɛkpɔlɛ nin i ndin’m be sasa su sɛsɛsɛ-ɔ. Kpɛkun wunnɛn sɔ’n i wafa ng’ɔ ɲin kɔ’n, ɔ ti Ɲanmiɛn liɛ’n su.+
20 ?Sɛ amun nin Klisi be wuli’n, yɛle kɛ sɛ amun faman amun nannan’m be nzuɛn’n su kun’n,+ nn ngue ti yɛ amun te yo kɛ amun ti mɛn’n nunfuɛ sa mɔ amun te nanti mmla nga’m be su-ɔ?+
21 Mmla sɔ’m be se kɛ: “Nán fa like nga, nán ɔ nuan kan like nga, nán ɔ sa kan like nga.”
22 Mmla sɔ’m be kan ninnge nga kɛ be ko di annzɛ be ko nɔn’n nn b’a saci’n be ndɛ. Klɔ sran mun yɛ be kpɛ mmla sɔ mun-ɔn.+
23 Ninnge sɔ’m be ti kɛ ngwlɛlɛ like sa. Kusu nn be nga be yo be’n be su Ɲanmiɛn kɛ be bɔbɔ be klo’n sa. Be yo be wun like yaya,+ afin be kunndɛ kɛ sran’m be se kɛ be ti wun ase kanfuɛ. Sanngɛ ninnge sɔ’m be kwlá ukaman sran naan w’a wlɛ i konvi tɛ’n i ase.
Ja ngua lɔ ndɛ mun
^ Nian Ndɛ’m be bo tulɛ lika’n nun lɔ.
^ Be kwla se ekun kɛ “I.”
^ Be kwla se ekun kɛ “m’ɔ yo i wun kɛ ɔ su Ɲanmiɛn kɛ anzi mun sa’n.”
^ Be kwla se ekun kɛ “e su kpɛn’n.”
