Rɔmunfuɛ Mun 15:1-33
15 Sanngɛ e mɔ e le wunmiɛn’n, ɔ fata kɛ e uka be nga be leman wunmiɛn’n+ naan be jran kekle ninnge nga be tin be su dan’n, be ɲrun. I sɔ’n ti’n, nán e yo ninnge nga be jɔ e ngunmin e klun’n.+
2 Maan e tinuntinun e yo like ng’ɔ jɔ e wiengu klun’n naan ɔ yo i ye, naan ɔ wlɛ i fanngan.+
3 Afin Klisi bɔbɔ w’a yoman like ng’ɔ jɔ i bɔbɔ i klun’n.+ I sɔ yɛ be klɛli i Ɲanmiɛn ndɛ’n nun-ɔn. Be klɛli i kɛ: “Nzowa nga be nga be yo ɔ finfin’n be kpɛ wɔ’n, ɔ tɔli min su wa.”+
4 Ndɛ nga be klɛli be laa’n, be klɛli be naan e si sa.+ I liɛ’n, e awlɛn mɔ e tra+ nin fɔnvɔlɛ mɔ Ɲanmiɛn Ndɛ’n fɔnvɔ e’n ti’n, é ɲán like é fá e wla é gúa su.+
5 Maan Ɲanmiɛn mɔ maan sran kwla jran kekle, mɔ kusu ɔ fɔnvɔ sran’n, ɔ yo maan amun bu akunndan kunngba nga Klisi Zezi buli’n wie.
6 I liɛ’n, amun bo yó kun,+ yɛ amun aniɛn’n* yó kun amún mánmán e Min Zezi Klisi i Ɲanmiɛn m’ɔ ti i Si’n.
7 I sɔ’n ti’n, maan amun sɔ amun wiengu nun+ kɛ Klisi kusu fa sɔli amun nun’n sa+ naan Ɲanmiɛn ɲan ɲrun.
8 Afin ń kán klé amun kɛ Klisi kacili be nga be wlali be klɛn’n be sufuɛ,+ naan Ɲanmiɛn yo nanwlɛfuɛ. Ɔ yoli sɔ fa kleli kɛ like nga Ɲanmiɛn seli kɛ ɔ́ yó mán be nannan mun’n, ɔ́ yó i sakpa.+
9 Asa ekun’n, ɔ yoli sɔ naan nvlenvle’m be nunfuɛ’m b’a manman Ɲanmiɛn, afin ɔ si aunnvɔɛ.+ I sɔ yɛ be klɛli i Ɲanmiɛn ndɛ’n nun-ɔn. Be klɛli i kɛ: “I sɔ’n ti’n, ń kɛ́n i nvlenvle’m be nunfuɛ’m be ɲrun kɛ n si wɔ, yɛ ń tó jue ń bó flɛ́ wɔ.”+
10 Ɔ seli ekun kɛ: “Nvlenvle mun, maan amun nin i sran’m be di aklunjɔɛ.”+
11 Ɔ kɛnnin i ekun kɛ: “Nvlenvle mun, maan amun kwlakwla an manman Zoova.* Maan sran’m be kwlaa be mɛnmɛn i.”+
12 Ezai seli ekun kɛ: “Zese i olui’n wá bá,+ yɛ ɔ́ wá jáso síe nvle’m be kwlaa be nunfuɛ mun.+ Nvlenvle’m bé fá be wla gúɛ i su.”+
13 Maan Ɲanmiɛn mɔ maan e lafi su kɛ é ɲán like’n, ɔ yo maan amun klun jɔ, yɛ amun wla gua ase fɔuun, i su mɔ amun fa amun wla gua’n ti. I liɛ’n, like nga amun fa amun wla gua su’n, Ɲanmiɛn wawɛ’n i fanngan nun’n, amun ɲin trɛ́n i sin kpa titi.+
14 Min niaan mun, n lafi su kpa kɛ sa kpa yolɛ’n ti amun nzuɛn, amun si sa kpanngban, yɛ amun kwla tu amun wiengu fɔ kusu.*
15 Sanngɛ fluwa nga n klɛli amun’n i nun’n, n kannin sa wie’m be ndɛ weinwein n kleli amun. N yoli sɔ n fa kpɛnnin amun wla, Ɲanmiɛn i ye dan m’ɔ yoli min’n ti.
16 Ɔ yoli min ye dan naan m’an kwla yo Klisi Zezi i junman difuɛ nvlenvle’m be nun.+ N fali min wun n wlali jasin fɛ bolɛ junman m’ɔ ti Ɲanmiɛn i junman’n, i dilɛ’n nun.+ I liɛ’n, nvle sɔ’m be nunfuɛ’m bé yó kɛ tɛ m’ɔ ti kpa, mɔ Ɲanmiɛn wawɛ’n yoli i sanwun’n sa.
17 Ɔ maan Klisi Zezi i sɔnnzɔnfuɛ mɔ n ti’n ti’n, n di ninnge nga be ti Ɲanmiɛn liɛ’n be su aklunjɔɛ.
18 N su kanman like uflɛ ndɛ, saan ninnge nga Klisi sinnin min lika yoli naan nvlenvle’m be nunfuɛ’m be yo aɲinyiɛfuɛ’n, be ngunmin be ndɛ yɛ ń kán-ɔn. N yili i sɔ’n i nglo ndɛ nga n kannin’n nin sa nga n yoli’n nun,
19 ɔ nin abonuan sa nin sa dandan+ nga n yoli be Ɲanmiɛn wawɛ’n i fanngan nun’n, be nun wie. Ɔ maan kɛ ɔ fɛ i Zerizalɛmun lele m’ɔ́ fá jú Iliri’n, n niannin nun n boli Klisi’n i jasin fɛ’n i kpa.+
20 I sɔ yolɛ nun’n, n seli min wun kɛ lika nga be dun mmua boli Klisi i dunman lɔ’n, n su boman jasin fɛ’n lɔ, kɛ ɔ ko yo naan m’an guaman sran uflɛ i junman liɛ’n i bo’n ti.
21 Sanngɛ ndɛ nga be klɛli i Ɲanmiɛn ndɛ’n nun’n, i su cɛ yɛ n fali-ɔ. Be klɛli i kɛ: “Be nga b’a bomɛn i ndɛ’n su b’a kleman be’n, bé wún i. Yɛ be nga b’a timɛn i su ndɛ’n, bé wún i wlɛ.”+
22 Ninnge nga be tanndannin min ɲrun kpɛ sunman mɔ be ti’n m’an kwlá ɔman amun wun lɔ’n, be nun kun yɛ ɔ o lɛ-ɔ.
23 Sanngɛ siɛn’n, n leman jasin fɛ bowlɛ kun akpasua nga’m be su. I afuɛ kpanngban yɛ,* ɔ o min klun kpa kɛ ń kɔ́ amun wun lɔ.
24 I sɔ’n ti’n, kɛ ń má kɔ́ Ɛspaɲin lɔ’n, ń kó wún amun wun naan e tran le nɲɔn kun, naan i sin’n amun a ko gua min atin.
25 Sanngɛ kɛ é sé yɛ’n, n su wa kɔ Zerizalɛmun, ń kó nían Ɲanmiɛn i sran nga be o lɔ’n be lika.+
26 Afin be nga be o Maseduanin nin Akai lɔ’n, be waan bé úka Ɲanmiɛn i sran nga be o Zerizalɛmun lɔ mɔ be nun wie’m be ti yalɛfuɛ’n. Ɔ maan be fali be sa nun ninnge wie’m be mannin be klun ufue su.+
27 Nanwlɛ, like nga be yoli’n, be yoli i aklunjɔɛ su sakpa. Afin Zifu’m be kalɛ o be su. Yɛle kɛ ninnge nga be ti Ɲanmiɛn liɛ mɔ Zifu’m be ɲannin be’n, be nin be nga be timan Zifu’n be cɛcɛli nun. I sɔ’n ti yɛ be kusu be fali be sa nun ninnge’m be suannin be bo’n niɔn.+
28 Ɔ maan kɛ n ko wie i sɔ’n i yo’n, mɔ n ko fa be ninnge nga be mannin’n n ko wla aniaan’m be sa nun’n, ń sín amun wun lɔ naan m’an wɔ Ɛspaɲin.
29 Asa ekun’n, n si kɛ kɛ ń má kɔ́ amun wun lɔ’n, ń fá suyralɛ kpanngban m’ɔ fin Klisi’n ń kɔ́.
30 Aniaan mun, e Min Zezi Klisi nin klolɛ nga Ɲanmiɛn wawɛ’n yoli maan e kloli e wun’n ti’n, ń srɛ́ amun, amun mian amun ɲin kpa be srɛ Ɲanmiɛn be man min kɛ n bɔbɔ n fa yo’n sa.+
31 Amun yo sɔ naan m’an kwla flo be nga be lafiman Zezi su mɔ be o Zide lɔ’n be sa nun,+ naan Ɲanmiɛn i sran’m be klun w’a jɔ junman nga n su ko di i Zerizalɛmun lɔ’n su.+
32 Amun yo sɔ kusu naan sɛ ɔ ti Ɲanmiɛn klun su’n, aklunjɔɛ yɛ n fa to amun lɔ-ɔ, naan e kwlaa e fɔnvɔ e wun.
33 Maan Ɲanmiɛn mɔ maan sran di fɔundi’n, ɔ nin amun kwlaa be tran.+ Maan ɔ yo sɔ.
Ja ngua lɔ ndɛ mun
^ Glk., “nuan.”
^ Annzɛ “amun kwla kle amun wiengu like.”
^ Be kwla se ekun kɛ “W’a di afuɛ nɲɔn kun.”
