Zɔbu 38:1-41
38 I sin’n, Zoova tɛli Zɔbu su aunmuan dan m’ɔ su tu’n i afiɛn lɔ:+
2 “?Wan yɛ ɔ su sanngan ajalɛ nga n fali’n nunm’ɔ siman like fi sanngɛ ɔ kan ndɛ’n niɔn?+
3 Yaci, jran kpa kɛ yasua sran sa.Ń má úsa ɔ sa, nga n simɛn i’n, kan kle min.
4 ?Kɛ ń yí asiɛ’n, nn a o nin?+Sɛ a wun i wlɛ’n, kan kle min.
5 ?Wan yɛ ɔ sieli i tiwatiwa mun-ɔn? Sɛ a si i’n, kan.?Annzɛ wan yɛ ɔ fali ɲanman nga be fa sunnzun like’n sieli su-ɔ?
6 ?Ngue nun yɛ be wlɛli i bo ase-ɔ??Annzɛ wan yɛ ɔ wlɛli i cɔnjɔ su yɔbuɛ’n i bo ase+
7 i nun mɔ nglɛmun nzraama’m+ bé kpán aklunjɔɛ kpanlɛ likawlɛ’n,mɔ Ɲanmiɛn i mma’m*+ be kwlaa bé bó sró’n niɔn?
8 ?Wan yɛ ɔ toli jenvie’n i sin anuan-ɔn?+I nun m’ɔ fin asiɛ’n* nun fiteli piaa’n,
9 i nun mɔ n fali ɲanmiɛn ble’n n wlɛli i kɛ tralɛ sa’n,mɔ n fali aosin tritritri kpa’n n kɛtɛli i wun’n,
10 i nun mɔ n kleli i awɛ’nmɔ n wlɛli i anuan mun kpɛkun n tɛnndɛnnin i sin’n,+
11 yɛ n seli kɛ: ‘A kwla ba lele ju wa, nán tra su.Wa yɛ ɔ nun nzue m’ɔ mɛn i wun su kendengleiin’n, ɔ́ jrán-ɔn.’+
12 ?W’a man nglɛmun’n i mmla le??W’a kle wia’n i lika ng’ɔ fata kɛ ɔ tu i bo lɛ’n le+
13 naan ɔ tra asiɛ’n i tiwatiwa’m be nunnaan ɔ kejekeje klunwifuɛ mun?+
14 Asiɛ’n kaci kɛ ufa nga be fali nzɔliɛ sieli su’n sa,yɛ i wafa ng’ɔ ti’n, i ɲin fite weiin kɛ kondro wie nun nzɔliɛnzɔliɛ mun sa.
15 Sanngɛ be fali klunwifuɛ’m be kannin’n ɔli,yɛ be buli be sa nga be mannin su’n.
16 ?A jrali lele a juli jenvie’n i bo lɔ??Annzɛ a ko nianniannin nzue bunman’m be nun?+
17 ?Be fali wie’n i anuan mun+ kleli wɔ??Annzɛ a wunnin aosin tritritri’n i anuan mun?*+
18 ?A wunnin asiɛ’n i tɛtrɛ m’ɔ ti’n i wlɛ?+Sɛ a si i kwlaa sɔ’n, kan maan n ti.
19 ?Nin yɛ kannin’n tran-ɔn?+?Nin yɛ aosin’n i lika liɛ’n wo
20 naan w’a fa be w’a ɔ be lika’n nun,naan w’a si atin nga be fa kɔ be wun lɔ’n niɔn?
21 ?Kɛ ɔ́ yó sɔ’n, nn b’a wu ɔ naan se kɛ á sí sɔ??Annzɛ afuɛ nga w’a di’n, w’a sɔn dan?
22 ?A wluli laglasi m’ɔ fin nglo lɔ gua munkɛnmunkɛn’n be siewlɛ’m be nun?+?Annzɛ a wunnin nzraama nga kɛ nzue’n tɔ́’n be gua’n, be siewlɛ mun?+
23 Ɲrɛnnɛn blɛ’n,alɛ kunlɛ cɛn’n ti yɛ n sieli be lɛ-ɔ.+
24 ?Atin benin su yɛ kannin’n* sin m’ɔ kpaja lika’n nun-ɔn??Nin yɛ wia afiliɛ lɔ aunmuan’n fin m’ɔ fita asiɛ’n su-ɔ?+
25 ?Wan yɛ ɔ yili atin kun nglo lɔ mannin nzue’n naan ɔ sin su di lika’n niɔn??Wan yɛ ɔ kleli nzue mɔ kɛ ɔ mlan tritritri’n, aunmuan’n fita kpɛkun ɲanmiɛn tɛ kplannankplannan’n i atin-ɔn?+
26 ?Wan yɛ ɔ yoli sɔ naan nzue’n tɔ lika nga sran fi tranman lɛ’n,aawlɛ flɛnnɛn’n nun mɔ sran fi nunman lɔ’n+
27 naan asiɛ kee’m be ɲan nzue kpanngban kpanaan ijre’m be fifi-ɔ?+
28 ?Nzue’n le si?+?Annzɛ wan yɛ ɔ wuli bɔlɛ ufue’n niɔn?+
29 ?Laglasi ng’ɔ gua’n, wan ku sɛ nun yɛ ɔ fin-ɔn??Yɛ wan yɛ ɔ wuli laglasi ng’ɔ o ɲanmiɛn su lɔ’n niɔn?+
30 ?Wan ti yɛ nzue’m be ɲin su’n kete kekleke kɛ yɔbuɛ wie sɛ su sa-ɔ??Wan ti yɛ nzue nga be bo ti kplouu’n be ɲin su’n kaci laglasi-ɔ?+
31 ?A kwla cici nzraama akpasua nga be flɛ i kɛ Kima’n i ɲanman mun?*?Annzɛ a kwla ɲannji nzraama akpasua nga be flɛ i kɛ Kesili’n* i ɲanman mun?+
32 ?Kɛ nzraama akpasua kun* i blɛ liɛ’n ju’n, a kwla fɛ i fite??A kwla kle nzraama akpasua nga be flɛ i kɛ Asi’n* nin i mma’m be atin?
33 ?A si mmla nga ɲanmiɛn m’ɔ la nglo lɔ plaii’n nanti be su’n?+?Annzɛ a kwla yo maan be* ɲan kwlalɛ asiɛ’n su?
34 ?A kwla kpan naan ɲanmiɛn ble’n ti,naan nzue’n tɔ kpanngban kpa ɔ su?+
35 ?A kwla sunman ɲanmiɛn m’ɔ kpa sin piaa’n kɛ ɔ wɔ lika??Kpɛkun ɔ́ bá ɔ́ wá sé wɔ kɛ: ‘Min yɛ n wo yɛ’?
36 ?Wan yɛ ɔ fali ngwlɛlɛ wlali ɲanmiɛn ble’m be nun-ɔn?*+?Annzɛ wan yɛ ɔ yoli maan abonuan sa nga be wun be ɲanmiɛn m’ɔ la nglo lɔ plaii’n su lɔ’n be wun sa wlɛ-ɔ?*+
37 ?Wan yɛ ɔ kwla fɛ i ngwlɛlɛ’n ka ɲanmiɛn ble mun-ɔn??Annzɛ wan yɛ ɔ kwla utu ɲanmiɛn su lɔ sɛ’m be nun nzue’n,+
38 blɛ mɔ ndutre’n kaci nnɔtiɛmɔ asiɛ’n su fa’n bo tɔlɛ’n niɔn?
39 ?A kwla tra nnɛn man asɔmɔli kun??Annzɛ a kwla man asɔmɔli ba’m be aliɛ lele be ku yi?+
40 ?Kɛ be o be fiawlɛ’m be nun’n,annzɛ kɛ b’a sa cɛiin be kunman’m be nun’n, a kwla man be aliɛ?
41 ?Kɛ kɔkɔkuankuan’n i mma’m be kpan flɛ Ɲanmiɛn kɛ ɔ de be’n,mɔ aliɛ mɔ be ɲɛnmɛn i’n ti’n be wlan sa daan’n,wan yɛ ɔ kunndɛ aliɛ mɛn i-ɔ?+
Ja ngua lɔ ndɛ mun
^ Ebre nun ndɛ nga be kacili i Wawle’n nun lɛ’n, be fa kan anzi mɔ be ti Ɲanmiɛn i mma mun’n be ndɛ.
^ Ebr., “ku sɛ’n.”
^ Annzɛ “wie’n i fɔnvɔ’n.”
^ Be kwla se ekun kɛ “ɲanmiɛn m’ɔ kpa sin piapia’n.”
^ Atrɛkpa’n, Akɔta nin i Mma mun-ɔn. Be o nzraama akpasua nga be flɛ i kɛ Toro’n nun.
^ Atrɛkpa’n, nzraama akpasua nga be flɛ i kɛ Oriɔn’n i ndɛ yɛ be kan-ɔn.
^ Ebr., “Mazarɔtu.”
^ Atrɛkpa’n, nzraama akpasua nga be flɛ i kɛ Ursu Dan’n i ndɛ yɛ be kan-ɔn.
^ Be kwla se ekun kɛ “ɔ.”
^ Be kwla se ekun kɛ “sran’m be nun-ɔn.”
^ Be kwla se ekun kɛ “?Annzɛ wan yɛ ɔ yoli maan akunndan’n wun sa wlɛ-ɔ?”
