Ezai 48:1-22
48 Ee, Zakɔbu i awlo’n nunfuɛ mun, amun tie ndɛ nga,amun mɔ Izraɛli+ i dunman’n o amun su’n,amun mɔ amun fin Zida nzue ba’m be nun’n,*amun mɔ amun fa Zoova i dunman’n ta nda’n,+amun mɔ amun kpan flɛ Izraɛli Ɲanmiɛn’n,mɔ sanngɛ amun yoman sɔ nanwlɛ su’n, yɛ amun yomɛn i kɛ ɔ nin i fata’n sa’n,+ amun sie amun su.
2 Klɔ m’ɔ ti Ɲanmiɛn liɛ klonglo’n+ i dunman’n o be su,be kunndɛ kɛ Izraɛli Ɲanmiɛn’n,mɔ i dunman’n yɛle Zoova m’ɔ ti sonja’m be su kpɛn’n ɔ suan be bo.+
3 “N kannin laa ninnge mun* be ndɛ w’a cɛ.Be fin min nuan fiteli,n yoli maan be sili be.+N kali lɛ n yoli be, kpɛkun be nuan yiali.+
4 N si kɛ amun ɲin su ti kekle,amun kɔmin’n ti kɛ blalɛ sa, yɛ amun ngban’n ti kɛ aaba sa.+
5 I sɔ’n ti’n, n kan kleli amun w’a cɛ.Ka naan w’a ju’n, n yoli maan amun tili nun,i liɛ’n amun su seman kɛ: ‘E amuin mun yɛ be yoli nga-ɔ.E amuin mɔ be sɛli be’n, ɔ nin e amuin mɔ be kloli like fa yoli be’n, be ti yɛ sa sɔ’n juli-ɔ.’
6 Amun tili, yɛ amun wunnin i kwlaa.?Amun su kɛnmɛn i ndɛ?+Kɛ ɔ fɛ i andɛ’n, ń má kán sa uflɛuflɛ wie mun be ndɛ ń klé amun,+be ti nvialiɛ nun ndɛ, amun siman be.
7 Andɛ bɔbɔ yɛ n yili be-ɔ, be o lɛ ɔ nin-a cɛman,sɛ w’a yoman kɛ andɛ sa’n, amun nin-a timan be su ndɛ le,amun kwlá seman kɛ: ‘Nian! E si be laa.’
8 Cɛcɛ, amun a timan,+ amun a siman nun,laa’n, amun su’n timan tikewa.Afin n si kɛ amun ti gblɛfuɛ kpa,+Kɛ be wuli amun cɛ’n be flɛli amun kɛ ɲin keklefuɛ.+
9 Sanngɛ min dunman’n ti’n, ń má yáci ya’n.+Min aɲrunɲan’n ti’n, ń má trá min awlɛn amun wun,yɛ n su nunnunman amun.+
10 An nian! N yili amun nun fiɛn’n, sanngɛ m’an yomɛn i kɛ sika’n i liɛ’n sa.+N sali amun ɲrɛnnɛn fuu’n nun n niannin.*+
11 Min bɔbɔ min liɛ ti’n, ɛɛn, min bɔbɔ min liɛ ti’n, ń má yó sa kun.+?Afin ngue ti yɛ ń kó yáci min wun lɛ naan be yo min finfin yɛ?+N faman min aɲrunɲan’n n manman sran fi.*
12 Ee Zakɔbu, sie ɔ su min nuan bo, ee Izraɛli, wɔ mɔ n flɛli wɔ’n.N kaciman.+ Min yɛ n ti klikli’n niɔn, yɛ kusu min yɛ n ti kasiɛn’n niɔn.+
13 Min bɔbɔ min sa’n yɛ ɔ wlali asiɛ’n i bo ase-ɔ,+min sa fama’n yɛ ɔ trɛli ɲanmiɛn m’ɔ la nglo lɔ plaii’n nun-ɔn.+Kɛ n flɛ be’n be jaso likawlɛ.
14 Amun kwlaa, maan amun ti yia naan amun tie.?Be nun onin yɛ ɔ kannin sa nga’m be ndɛ-ɔ?Sran nga n bɔbɔ min Zoova n kloli i’n,+ɔ́ wá yía like nga n klo kɛ ń fá yó Babilɔnin’n i nuan,+i sa wá kwlá Kaldefuɛ mun.+
15 N bɔbɔ n kannin ndɛ, yɛ n flɛli i.+N fɛli i n bali, yɛ like kwlaa ng’ɔ yo’n ɔ́ yó ye.+
16 Amun wunnge min wun wa naan amun tie ndɛ nga.Kɛ ɔ fɛ i i bo bolɛ nun’n, m’an kanman ndɛ nvialiɛ nun.+Kɛ sa sɔ’n jú’n, nn n wo lɛ.”E Min Zoova m’ɔ Sie Like Kwlakwla’n ɔ sunmannin min, ɔ nin i wawɛ’n.
17 Zoova m’ɔ ti amun Ti Kpɔfuɛ’n, Izraɛli Ɲanmiɛn m’ɔ ti Sanwun’n i ndɛ ng’ɔ kan’n yɛ:+“Min Zoova, n ti amun Ɲanmiɛn,n kle amun like amun bɔbɔ amun kpa yolɛ ti,+n kle amun atin ng’ɔ fata kɛ amun fa su’n.+
18 Sɛ ɔ ti kɛ amun sie amun su min mmla’m be bo sa’n,+nn fɔundi nga amún dí’n, ɔ́ sónji kɛ nzue ba sa,+yɛ amun sa nuan su sɛsɛ yolɛ’n ɔ́ yó kɛ jenvie’n i bolɛ’n sa.+
19 Amun osu’n nunfuɛ’m bé sɔ́n kɛ aunɲan sa,yɛ amun mma’m bé sɔ́n kɛ aunɲan sa.+Be su yiman be dunman’n le, annzɛ be su nunnunmɛn i min ɲrun.”
20 An fin Babilɔnin klɔ’n nun fite!+An wanndi Kaldefuɛ’m be sa nun!An kpan aklunjɔɛ kpanlɛ be kɛn i ndɛ! An bo i jɔ!+An kan naan be nga be o asiɛ’n i tiwa lɔ’n be ti.+Amun se kɛ: “Zoova kpɔli i sufuɛ Zakɔbu i ti.+
21 Kɛ ɔ́ fá be sín aawlɛ flɛnnɛn’n nun lɔ’n, nzuewe w’a kunman be.+Ɔ yoli maan nzue fin yɔbuɛ’n nun fiteli, ɔ fa mannin be.Ɔ kpacili yɔbuɛ kun nun yɛ nzue fin nun fiteli.”+
22 Zoova waan: “Klunwifuɛ’m be liɛ’n, be diman alaje.”+
Ja ngua lɔ ndɛ mun
^ Be kwla se ekun kɛ “amun ti Zida osu’n nunfuɛ’n.”
^ Ebr., “ninnge klikli mun.”
^ Annzɛ “N nianniannin amun.” Be kwla se ekun kɛ “N fali amun.”
^ Annzɛ “E nin sran fi e cɛman min aɲrunɲan’n nun.”
