Jue Mun 139:1-24
Ɔ ti jue tofuɛ’m be su kpɛn’n i liɛ. Davidi i jue-ɔ.
139 Ee Zoova, a niannian min, yɛ a si min.+
2 Kɛ n tran ase’n a si nun, yɛ kɛ n jaso’n a si nun.+
Kɛ a o mmua lɔ’n, a si akunndan nga n bu’n.+
3 Kɛ n tu ajalɛ’n, yɛ kɛ n la’n, a fa ɔ ɲin sie min su.
A si sa kwlaa nga n yo’n.*+
4 Ka naan ndɛ kun w’a fin min nuan w’a fite bɔbɔ’n,ee Zoova, a si i lalaa.+
5 A o min sin nin min ɲrun, a bo sin yia min.
Yɛ a fa ɔ sa’n sie min su.
6 Silɛ mɔ a si min’n, n kwlá wunmɛn i wlɛ mlɔnmlɔn.*
Ɔ tra min kpɛn.*+
7 ?Nin yɛ n kwla wanndi ɔ wawɛ’n n kɔ-ɔ?
?Nin yɛ n kwla wanndi ɔ ɲrun n kɔ-ɔ?+
8 Sɛ n fu n kɔ ɲanmiɛn su lɔ’n, a o lɔ,yɛ sɛ n ko sɛ min bɛ’n Ndia’n* nun lɔ bɔbɔ’n,a o lɔ.+
9 Sɛ n fa aliɛ njɛnniɛn’n i ndɛwa mun n tu
n ko tran jenvie m’ɔ o mmua kpa lɔ’n i nuan’n,
10 lɔ bɔbɔ’n, ɔ sa’n klé min atin,yɛ ɔ sa fama’n trá min nun.+
11 Sɛ n se kɛ: “Saan aosin tuun’n káta min su!”
Kpɛkun aosin m’ɔ bo sin yia min’n w’a kpaja.
12 Aosin tuun’n bɔbɔ’n, ɔ su yoman tuun dan ɔ ɲrun,sanngɛ kɔnguɛ’n kpája kɛ wia nun’n sa.+
Aosin tuun’n nin lika m’ɔ kpaja’n be ti kun ɔ ɲrun.+
13 Afin wɔ yɛ a yili min aklɛnzia mun-ɔn.
A fali min fiali* min nin i ku sɛ’n nun.+
14 Ń mánmán wɔ, afin wafa nga a yili min’n, ɔ yo ɲɛnmɛn yɛ ɔ ti abonuan.+
Sa nga a yo be’n be ti abonuan,+n si sɔ kpa.
15 Kɛ a yili min nvialiɛ nun’n,mɔ a wuli min kɛ tannin sa asiɛ’n i bo mmua kpa lɔ’n,min owie wie fi timan fiawa ɔ ɲrun.+
16 I nun mɔ n te yo mmoja min nin i ku sɛ’n nun bɔbɔ’n, ɔ ɲinma’m be wunnin min.
Min likalika’m be kwlaa be su ndɛ’n ti klɛwa ɔ fluwa’n nun,cɛn nga a yili be’n,ɔ nin kɛ be nin-a fiteman bɔbɔ’n, be su ndɛ’n ti klɛwa ɔ fluwa’n nun.
17 Ɔ maan min ɲrun’n, ɔ akunndan’m be ti cinnjin kpa!+
Ee Ɲanmiɛn, kɛ be kan be kwlaa be bo nun’n be sɔnnin kpa!+
18 Sɛ min waan ń ká be’n, bé sɔ́n dan trá aunɲan’n.+
Kɛ n tinnge’n, e nin wɔ e o nun titi.*+
19 Ee Ɲanmiɛn, yaci, kun klunwifuɛ mun!+
I liɛ’n, nzaje sa yofuɛ’m* bé kɔ́ min wun mmua.
20 Sran’m be kan ɔ wun ndɛ naan bé yó ɔ tɛ.
Be ti ɔ kpɔfuɛ, be yo ɔ dunman’n i finfin.+
21 ?Ee Zoova, n kpɔman be nga be kpɔ wɔ’n?+
?Yɛ min ɲin ciman be nga be yo ɲin kekle ɔ su’n?+
22 Kpɔlɛ bɔɔ cɛ yɛ n kpɔ be-ɔ.+
B’a kaci min kpɔfuɛ mlɔnmlɔn.
23 Ee Ɲanmiɛn, niannian min, naan si min awlɛn’n.+
Niannian min, naan si sa m’ɔ sanngan min akunndan’n.+
24 Nian, sɛ n su fa atin tɛ su-o,+yɛ fa min sin+ atin m’ɔ leman awieliɛ’n su.
Ja ngua lɔ ndɛ mun
^ Ebr., “A si min atin’m be kwlaa.”
^ Annzɛ “ɔ ti abonuan dan.”
^ Annzɛ “Ɔ tra nga n kwla wun i wlɛ’n.”
^ Annzɛ “Seɔlu’n.” Nian Ndɛ’m be bo tulɛ lika’n nun lɔ.
^ Be kwla se ekun kɛ “A wuli min.”
^ Be kwla se ekun kɛ “Kɛ ń tínnge’n, nn n te ka be.”
^ Annzɛ “mmoja ase guafuɛ mun.”
