Nga Matie klɛli’n 4:1-25
4 I sin’n, Ɲanmiɛn wawɛ’n fali Zezi ɔli aawlɛ flɛnnɛn’n nun lɔ naan Suɛn Tɔnfuɛ’n+ ko sɛ i nian.+
2 W’a diman like lele cɛn ba ablanan (40) wia nun nin kɔnguɛ. I sin’n, awe kunnin i.
3 Kpɛkun Lakafuɛ’n+ bɛli i wun lɛ, ɔ seli i kɛ: “Sɛ a ti Ɲanmiɛn wa’n, se yɔbuɛ nga’m be kɛ be kaci kpanwun.”
4 Sanngɛ ɔ tɛli su kɛ: “Be klɛli i kɛ: ‘Nán aliɛ* ngunmin yɛ ɔ kwla yo maan sran tran nguan nun-ɔn, sanngɛ ndɛ kwlaa ng’ɔ fin Zoova* nuan fite’n niɔn.’”+
5 Suɛn Tɔnfuɛ’n fɛ i ɔli klɔ m’ɔ ti Ɲanmiɛn liɛ klonglo’n su lɔ.+ Kpɛkun ɔ fɛ i sieli Ɲanmiɛn sua’n i ti su lɔ,*+
6 yɛ ɔ seli i kɛ: “Sɛ a ti Ɲanmiɛn wa’n, yaci ɔ wun nun naan tɔ asiɛ wun lɔ, afin be klɛli i kɛ: ‘Ɔ́ súnmɛn i anzi mun ɔ sin,’ yɛ ‘Bé fá ɔ be sa su, ɔ maan ɔ ja su kplaman yɔbuɛ.’”+
7 Zezi seli i kɛ: “Be klɛli i ekun kɛ: ‘Nán sa Zoova* m’ɔ ti ɔ Ɲanmiɛn’n nian.’”+
8 I sin’n, Suɛn Tɔnfuɛ’n fɛ i ɔli oka fleiin kpa kun su, yɛ ɔ fali mɛn wunmuan’n nun famiɛn diwlɛ’m be kwlaa ɔ nin be aɲrunɲan’n kleli i.+
9 Kpɛkun ɔ seli i kɛ: “Sɛ a koto min bo naan a yo like kunngba cɛ fa su min’n, ń fá ninnge kwlaa nga mun ń mán wɔ.”
10 Yɛ Zezi seli i kɛ: “Satan, jaso lɛ! Afin be klɛli i kɛ: ‘Zoova* m’ɔ ti ɔ Ɲanmiɛn’n yɛ ɔ fata kɛ a koto i bo-ɔ,+ yɛ i kunngba cɛ yɛ ɔ fata kɛ a su i-ɔ.’”+
11 Yɛ Suɛn Tɔnfuɛ’n yacili i lɛ ɔli-ɔ.+ Kpɛkun anzi’m be bali be wa niɛnnin i lika.+
12 Kɛ ɔ tili i kɛ be trali Zan’n,+ ɔ ɔli Galile.+
13 I sin’n, ɔ jasoli Nazarɛti lɔ, ɔ ko trannin Kapɛɛnaɔmun,+ jenvie’n* i nuan lɛ, Zabilɔn nin Nɛftali be akpasua’n su lɔ.
14 Ɔ yoli sɔ naan ndɛ nga Ɲanmiɛn nuan ijɔfuɛ Ezai kannin’n, ɔ kpɛn su. Ɔ seli kɛ:
15 “Ee, Galile mɔ nvle uflɛ nun sran’m be tran lɔ’n, Zabilɔn akpasua’n nin Nɛftali akpasua’n, amun mɔ amun o akpɔ nga be fa kɔ jenvie’n* su lɔ’n i nuan’n, Zurdɛn i bue kun lɔ’n!
16 Be nga be tran aosin tuun kpa’n nun’n, be wunnin kɛ lika’n kpajali dan kpa. Yɛ be nga be tran mɛn kun mɔ wie’n i fɔnvɔ’n kata su’n i nun’n be liɛ’n, kannin+ kpajali be su.”+
17 Kɛ ɔ fin lɛ’n, Zezi boli jasin bolɛ bo. Ɔ se kɛ: “An kaci amun akunndan’n, afin ɲanmiɛn su lɔ Famiɛn Diwlɛ’n w’a mantan koko.”+
18 Kɛ ɔ́ nánti Galile Jenvie’n i nuan lɛ’n, ɔ wunnin sran nɲɔn mɔ be ti niaan’n. Be yɛle Simɔn mɔ be flɛ i Piɛli’n,+ ɔ nin i niaan bian Andre. Be su gua lala jenvie’n nun, afin be ti jue trafuɛ.+
19 Yɛ ɔ seli be kɛ: “An su min su, yɛ ń yó maan amún trá sran mun kɛ be fa tra jue’n sa.”+
20 Be ja nun lɛ’n, be yacili be lala’m be lɛ be suli i su.+
21 Kɛ ɔ tuli i bo lɛ ɔli i ɲrun’n, ɔ wunnin sran nɲɔn ekun mɔ be ti niaan’n. Be yɛle Zaki nin i niaan bian Zan,+ Zebede i mma mun-ɔn. Be nin be si Zebede be o alie’n nun be su tanndan be lala’m be nun, yɛ ɔ flɛli be-ɔ.+
22 Be ja nun lɛ’n, be yacili alie’n ɔ nin be si lɛ, kpɛkun be suli i su.
23 I sin’n, ɔ wlan sinnin Galile asa’n kwlaa su,+ ɔ kleli like be Ɲanmiɛn sulɛ sua’m+ be nun, ɔ boli Ɲanmiɛn Sielɛ’n i jasin fɛ’n, kpɛkun ɔ yoli maan sran’m be tukpacɛ wafawafa kwlaa, ɔ nin lɛ wafawafa kwlaa ng’ɔ o be wun’n be wieli.+
24 I su ndɛ nga be kan’n, ɔ truli Siri mɛn wunmuan’n nun. Yɛ be fali be kwlaa nga tukpacɛ nin be wunnɛn nun yaya fanunfanun ti be o ɲrɛnnɛn nun’n,+ ɔ nin be nga mmusu’m be kle be yalɛ’n,+ ɔ nin ngbitiɛfuɛ mun,+ ɔ nin bubuwafuɛ mun be blɛli i, kpɛkun ɔ yoli be juejue.
25 I sɔ’n ti’n, sran kpanngban kpa be suli i su. Sran sɔ’m be fin Galile, nin Dekapɔlu,* nin Zerizalɛmun, nin Zide, ɔ nin Zurdɛn’n i sin lɔ.
Ja ngua lɔ ndɛ mun
^ Glk., “kpanwun.”
^ Annzɛ “i ti su nglo lɔ talɛ’n su”, “i lika ng’ɔ ti nglonglo kpa’n su.”
^ Galile Jenvie’n niɔn.
^ Kɔlɛ’n, Mediterane Jenvie’n niɔn. Sanngɛ sran wie’m be waan Galile Jenvie’n niɔn.
^ Annzɛ “Klɔ Dandan Blu’m be Asa’n su.”
