Riti 2:1-23
2 Naomin i wun Elimelɛki i osufuɛ kun o lɛ’n, be flɛ i kɛ Boazi.+ Ɔ ti aɲanbeunfuɛ.
2 Riti m’ɔ ti Moabufuɛ’n seli Naomin kɛ: “Man min atin maan n wɔ fie su. Ń sú sran kun m’ɔ kwla si min aunnvɔɛ’n i su naan ń ísaísa+ ninnge ng’ɔ kpɛ be’n i kunngun ng’ɔ kɛ i sin’n.” Naomin seli i kɛ: “Min wa, kɔ.”
3 Yɛ ɔ ɔli-ɔ. Kɛ sran’m bé kpɛ́ be ninnge’m bé kɔ́’n, nn ɔ́ sú be su ɔ́ ísaísa i kunngun ng’ɔ ka be sin’n. Ɲanmiɛn sa, ɔ juli Boazi+ m’ɔ ti Elimelɛki i osufuɛ’n+ i fie’n su.
4 Yɛ Boazi fin Bɛtleɛmun lɔ ɔ wa juli lɛ-ɔ. Ɔ seli ninnge kpɛfuɛ’m be kɛ: “Maan Zoova suan amun bo.”* Be tɛli i su kɛ: “Maan Zoova yo ɔ liɛ ye.”
5 Yɛ Boazi usali gbanflɛn ng’ɔ nian ninnge kpɛfuɛ’m be su’n kɛ: “?Wan li wa yɛle talua nga?”
6 Gbanflɛn’n tɛli i su kɛ: “Talua’n ti Moabufuɛ.+ I yɛ ɔ nin Naomin be fin Moabu lɔ be bali’n niɔn.+
7 Ɔ usali kɛ: ‘?Yaci, ninnge nga junman difuɛ’m be kpɛ’n* i kunngun ng’ɔ ka be sin’n, n kwla wlanwlan fie’n nun n isa?’+ Kɛ ɔ bali nglɛmun’n, w’a di junman lele yɛ w’a fa ju yɛ. Icra’n yɛ w’a ɔ wunmiɛn lolɛ kan kpata’n i bo lɔ-ɔ.”
8 Boazi seli Riti kɛ: “Min wa, nán se kɛ á kɔ́ fie uflɛ su kó ísa like lɔ, nán kɔ lika uflɛ kun. Ka min talua’m be wun wa. ?A tili?+
9 Nian fie’n i lika nga be su kpɛ ninnge mun lɛ’n su kpa, naan a nin be wɔ. N seli min gbanflɛn’m be kɛ nán be kan wɔ.* Sɛ nzuewe kun wɔ’n, kɔ lika nga nzue sɛ’m be o lɔ’n naan nɔn nzue nga gbanflɛn’m be sali’n wie.”
10 Kɛ ɔ yoli sɔ’n, Riti kotoli i bo, ɔ utuli i ɲin ase, kpɛkun ɔ seli i kɛ: “?Aofuɛ kɛ min sa’n, ɔ yo sɛ yɛ a fali ɔ ɲin sieli min su mɔ a si min aunnvɔɛ dan sɔ-ɔ?”+
11 Boazi tɛli i su kɛ: “Kɛ ɔ wun wuli’n, like nga a yoli mannin ɔ sewi’n, be kɛnnin i kwlaa kleli min. A kpacili ɔ si nin ɔ nin, a jasoli nvle nga i nun yɛ be wuli wɔ’n nun, kpɛkun a bali nvle kun mɔ a simɛn i nunfuɛ mun laa’n i nun.+
12 Like nga a yoli’n, maan Zoova yi man wɔ+ kpɛ blu, yɛ maan ɔ yo ɔ liɛ ye. Afin a bali naan á kúnndɛ fiawlɛ Zoova m’ɔ ti Izraɛlifuɛ’m be Ɲanmiɛn’n i ndɛwa’n bo.”+
13 Riti tɛli i su kɛ: “Min min, si min aunnvɔɛ sɔ titi-o. N nunman ɔ sufuɛ’m be nun. Sanngɛ w’a niɛnmɛn i sɔ’n ti, a fɔnvɔli min, a guali ɔ sufuɛ’n i awlɛn su nzue.”
14 Kɛ like dilɛ’n juli’n, Boazi seli i kɛ: “Bla wa, fa kpanwun’n wie, fa bo i vinɛgli’n nun naan di.” Riti ko trannin junman difuɛ’m be wun lɔ. Boazi fali ɔɔzu kɛɛnwa wie mɛnnin i, ɔ dili, i ku yili. I wie bɔbɔ kali.
15 Kɛ Riti jasoli naan ɔ́ kó dí junman’n,+ Boazi seli i gbanflɛn’m be kɛ: “Amun yaci i nun naan ɔ isaisa ninnge nga amun kpɛ’n* i kunngun ng’ɔ ka amun sin’n. Nán amun kle i yalɛ.+
16 I kpa bɔbɔ’n, nga amun cici be sɔlɛsɔlɛ’n, amun yiyi wie guɛ i amun sin maan ɔ isa. Nán amun se i kɛ ɔ yaci i isalɛ.”
17 Riti isali ɔɔzu’n fie’n su lele nnɔsua flɔlɔ.+ Kɛ ɔ boli ɔɔzu ng’ɔ isali’n, ɔ fuanfuan efa kun.*
18 I sin’n, ɔ fa ɔli klɔ. Kpɛkun ɔ fa kleli i sewi’n. Asa ekun’n, ɔ fali aliɛ ng’ɔ dili’n i onga’n mɛnnin i.+
19 I sewi’n usɛli i kɛ: “?Nin yɛ a ko isali like andɛ-ɔ? ?Nin yɛ a ko dili junman-ɔn? Maan Ɲanmiɛn yra sran ng’ɔ yoli ɔ ye’n i su.”+ Riti kannin sran nga i fie’n su yɛ ɔ ko dili junman’n i ndɛ kleli i sewi’n. Ɔ seli kɛ: “Bian nga andɛ n dili junman i fie’n su’n suan Boazi.”
20 Naomin seli i sewi’n kɛ: “Zoova w’a yaciman be nga be wuli’n nin be nga be ɲin o su’n be klolɛ le. Maan ɔ yra bian sɔ’n su.”+ Naomin seli ekun kɛ: “Bian’n ti e osufuɛ.+ Ɔ ti e ti kpɔfuɛ’m* be nun kun.”+
21 I sin’n, Riti m’ɔ ti Moabufuɛ’n seli kɛ: “Bian’n seli min ekun kɛ: ‘Ka min gbanflɛn’m be wun wa lele saan b’a wie min fie’n su ninnge wunmuan’n be kpɛ.’”+
22 Naomin seli i sewi Riti kɛ: “Sɛ a nin i talua’m be san nun’n, ɔ flunman tra kɛ a wɔ fie uflɛ su naan be kle wɔ yalɛ’n.”
23 Ɔ maan Riti nin Boazi i talua’m be sannin nun. Kɛ bé kpɛ́ ɔɔzu+ nin ble’n, ɔ isaisali ng’ɔ ka be sin’n lele be wieli be kpɛ. Yɛ ɔ nin i sewi’n be trannin titi.+
Ja ngua lɔ ndɛ mun
^ Ebr., “Maan Zoova nin amun tran.”
^ Be kwla se ekun kɛ “nga b’a cici i sɔlɛsɔlɛ’n.”
^ Annzɛ “nán be kle wɔ yalɛ.”
^ Be kwla se ekun kɛ “amun cici i sɔlɛsɔlɛ’n.”
^ Annzɛ “e osufuɛ nga be le atin be kpɔ e ti’n.”
