Sofonin 2:1-15
2 Nvlefuɛ mɔ be siman ɲannzuɛn’n,+maan amun ti yia, maan amun ti yia.+
2 Ka naan ndɛ’n w’a kpɛn su’n,ka naan cɛn’n w’a sin kɛ nga aunmuan’n fa ble wla’n kɔ’n sa’n,ka naan Zoova i ya’n w’a jue amun su’n,+ka naan Zoova i ya cɛn’n w’a ju’n,
3 amun kunndɛ Zoova,+ amun kwlaa mɔ amun ti wun ase kanfuɛ asiɛ’n su’n,mɔ amun fɛ i mmla seiin’m be su’n.
Maan amun mian amun ɲin be yo sa kpa, maan amun kle kɛ amun ti wun ase kanfuɛ.
I liɛ’n, nja, sɛ Zoova i ya cɛn’n nun’n amún ɲán fiawlɛ-o.+
4 Afin Gaza klɔ’n tɔ́ srolo,yɛ Askalɔn klɔ’n bó.+
Bé kán Asdɔdu klɔ’n i sufuɛ’m be bo wia klengle’n* nun,yɛ bé núnnún Ekrɔn sekeseke.+
5 “Kerɛtifuɛ mun, amun mɔ amun tran jenvie nuan’n, amun yako!+
Zoova buli amun fɔ.
Kanaan, wɔ mɔ a ti Filistifuɛ’m be mɛn’n, ń má núnnún wɔ,ɔ maan sran fi su tranman ɔ nun kun.
6 Jenvie’n i nuan lika’n wá káci nnɛn’m be didiwlɛ,lika sɔ’n nun gbo’m bé yó nnɛn kankanfuɛ’m be liɛ, yɛ bé fá lɔ yɔbuɛ mun bé yó bua tuin.
7 Lika sɔ’n wá káci Zida i awlo’n nunfuɛ nga be kali lɛ’n be liɛ,+lɔ yɛ bé dí like-ɔ.
Kɔnguɛ’n, sua nga be o Askalɔn lɔ’n be nun yɛ bé lá-ɔ.
Afin Zoova m’ɔ ti be Ɲanmiɛn’n, ɔ́ wá kpɛ́ i ɲin be su,*
yɛ be nga be trali be ɔli’n, ɔ́ fá be sá be sin.”+
8 “N tili ndɛ tɛtɛ nga Moabufuɛ’m+ be kannin’n, ɔ nin nzowa nga Amɔnfuɛ’m+ be kpɛli’n.
Be yoli min nvle’n i nunfuɛ’m be finfin, yɛ be dili be nuan kɛ bé fá be mɛn’n.+
9 Ndɛ nga Zoova m’ɔ ti sonja’m be su kpɛn’n, m’ɔ ti Izraɛli Ɲanmiɛn’n ɔ kan’n yɛ: “N wo lɛ sakpa,“Moabu klɔ’n káci kɛ Sodɔmun+ klɔ’n sa,yɛ Amɔnfuɛ’m be lika’n yó kɛ Gomɔru+ klɔ’n sa.
Lika’n káci ijre tɛ ngunmin, ɔ́ káci njin lika, yɛ ɔ́ káci aawlɛ flɛnnɛn.+
Min sran nga be kali lɛ’n, bé fɛ́n lɔfuɛ’m be bo ninnge mun,yɛ min nvle’n i nunfuɛ nga be kali lɛ’n, bé dé lɔfuɛ’m be sa nun ninnge mun.
10 Sa ng’ɔ́ wá jú be su’n, yɛ ɔ o lɛ-ɔ. Be su tuman be wun kun.+
Afin be yoli Zoova m’ɔ ti sonja’m be su kpɛn’n i sran’m be finfin, kpɛkun be yoli be wun dandan be su.
11 Zoova su yoman be blɛblɛ.
Afin ɔ́ wá núnnún asiɛ’n su amuin’m be kwlaa,yɛ nvle nga be o jenvie’n i afiɛn’n be nunfuɛ’m be kwlaa bé kóto i bo.*+
Be tinuntinun bé ká be osu’n nun yɛ bé yó sɔ-ɔ.
12 Etiopifuɛ mun, amun kusu, min tokofi’n wá kún amun wie.+
13 Ɔ́ wá tínngɛ i sa’n nglo lɔ lika’n i wun, kpɛkun ɔ́ sáci Asiri mɛn’n.
Yɛ ɔ́ yó maan Ninivu klɔ’n bó.+ Ɔ́ káci aawlɛ flɛnnɛn, like fi su yoman ye lɔ.
14 Ɔ́ káci nnɛn’m be lawlɛ, blo nnɛn wafawafa kwlaa* bé lá lɔ.
Kɔnguɛ’n, nzue su anunman nga be flɛ i pelikan’n,* ɔ nin fle’n bé lá sua ja mlomlo’m be afiɛn.
Bé tí jue tolɛ fenɛtri’n nun.
Anuan’n nun lɛ lika’n, ɔ́ sáci,afin sɛdri waka’m be wun ká ngbɛn.
15 Klɔ nga i sufuɛ’m be tu be wun’n, mɔ srɛ kunman be’n, yɛ ɔ o lɛ-ɔ.
Ɔ seli i klun lɔ kɛ: ‘N leman wunsu, yɛ sran fi timan kɛ min sa.’
Be nian kɛ w’a yo kain-ɔn,w’a kaci blo nnɛn’m be lawlɛ!
Sran kwlaa ng’ɔ́ sín i wun lɛ’n, ɔ́ bó feliman, kpɛkun ɔ́ ɲɔ́nɲɔ́n acɔliɛ fá wlɛ́nwlɛ́n i.”+
Ja ngua lɔ ndɛ mun
^ Annzɛ “wia jran’n.”
^ Annzɛ “ɔ́ nían be lika.”
^ Annzɛ “bé sú i.”
^ Ebr., “nnɛn kwlaa nga be o nvle kun nun’n.”
^ Ɔ tra jue sie i konviabo.
