MIAN Ɔ ƝIN NAAN SI JASIN FƐ’N I BO KPA | MAAN E DI AKLUNJƆƐ KPA JASIN FƐ’N I BOLƐ’N NUN
Maan e uka Biblu’n nun like suanfuɛ mun naan be tran aɲia’m be bo
Ɲanmiɛn sulɛ kpafuɛ’n nun’n aɲia’m be ti cinnjin kpa. (Ju 22:23) Be kwlaa nga be su Zoova’n be di aklunjɔɛ yɛ ɔ yra be su. (Ju 65:5) Blɛ sunman’n kɛ Biblu’n nun like suanfuɛ’m be tran aɲia’m be bo titi’n be kɔ be ɲrun ndɛndɛ.
?Ngue yɛ e kwla yo uka be nga e kle be Biblu’n nun like naan b’a tran aɲia’m be bo-ɔ? Maan e yia be titi. Asa’n, maan e bo video nga be flɛ i kɛ ?Ngue yɛ be yo i Ɲanmiɛn Sielɛ Sua’n nun lɔ ɔ? e kle be. Sɛ be tran aɲia’m be bo’n i su ye nga bé ɲɛ́n i’n maan e kɛn i ndɛ e kle be. (lff like suanlɛ 10) E kwla kan like trele kun mɔ be yoli i aɲia’n i bo lɔ m’ɔ yoli e fɛ’n i ndɛ e kle be. Annzɛ e kwla kan like nga be wá yó i aɲia’n i bo lɔ’n i ndɛ e kle be wie. Fluwa nga e suan nun like aɲia’n i bo lɔ’n maan e fa man be. Asa kusu’n, maan e fa ajalɛ trele wie mun e uka be. Atrɛkpa’n ɔ fata kɛ e uka be ninnge wie’m be nun naan b’a tran aɲia’m be bo. Sɛ e yo sɔ’n kpɛ klikli nga bé trán aɲia’n i bo’n é wún i wlɛ kɛ y’a kleman e wun yalɛ ngbɛn.—1Ko 14:24, 25.
AN NIAN VIDEO NGA BE FLƐ I KƐ MAAN E UKA BIBLU’N NUN LIKE SUANFUƐ MUN NAAN BE TRAN AƝIA’M BE BO. I SIN’N, AN TƐ KOSAN NGA’M BE SU:
-
?Blɛ benin nun yɛ Neta yiali Jadi aɲia’m be bo-ɔ?
-
?Ngue ti yɛ kɛ Biblu’n nun like suanfuɛ kun tran aɲia’m be bo’n i sɔ’n yo fɛ-ɔ?
-
“Ɲanmiɛn o amun afiɛn sakpa.”
?Kpɛ klikli nga Jadi trannin aɲia’m be bo’n ngue yɛ ɔ sieli i nzɔliɛ-ɔ?
