Afuɛ 2022 nun’n, nganniɛn nga e tili be’n be kwlaa be ti alɛ nin sika ndɛ ɔ nin sanvuɛsa ngunmin. Biblu’n kunngba cɛ yɛ ɔ yiyi like nga ti yɛ sa sɔ’m be juli’n i nun-ɔn.

Like nga ti yɛ sa nga be juli afuɛ 2022 nun’n be juli’n

 Sa nga be juli afuɛ sin’n, be kle kɛ e o blɛ nga Biblu’n flɛ i kɛ “mɛn’n i awieliɛ blɛ’n” i nun sakpa. (2 Timote 3:1) Blɛ sɔ’n boli i bo afuɛ 1914 nun. Maan e nian wafa nga sa nga be juli koko nun wa’n be nin e blɛ liɛ’n i su ndɛ nga Biblu’n dun mmua kannin’n be kɔ likawlɛ’n:

 “Alɛ’n.”—Matie 24:6.

•   “Afuɛ 2022 nun yɛ alɛ tɔli Abloki lɔ ekun-ɔn. Nanwlɛ, sran’m be wunnin be ɲrun dan.” a

 “Awe’n.”—Matie 24:7.

•   “Awe ng’ɔ kpɛnnin afuɛ 2022 nun’n, be nin-a wunmɛn i wunsu le.” b

 “Tukpacɛ m’ɔ sa ndɛndɛ’n.”—Liki 21:11.

•   “Tukpacɛ nga be flɛ i polio’n ɔ sɛli i sin ekun. Kpɛkun kowli wafa kun kleli sran’m be yalɛ kpa. Asa’n, koronavirisi’n te kun sran mun te kɔ. I kwlaa sɔ’n kle weiin kɛ tukpacɛ nga be sa ndɛndɛ’n be ti tɛ kpa naan klɔ sran’m be kwlá jranman be ɲrun.” c

 “Ninnge sroesroe mun.”—Liki 21:11.

•   “Afuɛ 2022 nun’n, lika’n loli tratrali su, wawa’n kpɛnnin dan, yɛ sin nin nzue be dili lika wie mun. Nanwlɛ, sran’m be wla su fiman afuɛ sɔ’n i su le. Afin Zuie nin Utu nun’n sanvuɛsa sunman be tɔli sran’m be su. I ti’n, ninnge kaka be sacili, sran kpanngban kpa be wuli, yɛ mɛn wunmuan’n nun’n sran miliɔn kaka b’a ɲanman lawlɛ kun.” d

 “Sa sukusuku mun.”—Liki 21:9.

•   “Afuɛ 2022 nun’n, kɛ sika ndɛ’n wa yoli kekle’n, i li kɛ ninnge’m be gua’n wa ukali su ndɛndɛ’n, sran kpanngban be fali be awa’m be wun ya yɛ be nantili. Be nga be nantili afuɛ sɔ’n nun’n be nin-a sɔnman dan sɔ le.” e

?Sa benin yɛ ɔ́ wá jú afuɛ ng’ɔ́ bá lɛ’n nun-ɔn?

 Sran fi kwlá siman sa trele ng’ɔ́ wá jú afuɛ 2023 nun’n. Nga e si i’n yɛle kɛ ɔ ka kan’n, Ɲanmiɛn Sielɛ’n m’ɔ ti ɲanmiɛn su lɔ awa kun’n ɔ́ wá yó ninnge kaka asiɛ’n su wa. (Daniɛli 2:44) Awa sɔ’n wá núnnún like nga ti yɛ sran’m be fɛ’n yɛ ɔ́ yó maan Ɲanmiɛn i klun sa’n kpɛ́n su asiɛ’n su wa.—Matie 6:9, 10.

 É wlá ɔ fanngan kɛ a fa ndɛ nga Zezi Klisi kannin’n su. Ɔ seli kɛ: “Maan amun ɲin tran su.” I bo’n yɛle kɛ maan e fa e ɲin e sie i mɛn’n nun sa’m be su naan e wun wafa nga Biblu’n nun ndɛ’m be su kpɛn su’n. (Marki 13:37) Sɛ a kunndɛ kɛ á sí wafa nga Biblu’n kwla uka wɔ nin ɔ osufuɛ mun naan amun liɛ w’a yo ye’n, é srɛ́ wɔ kɛ a klɛ e fluwa.