Afuɛ 2024 Avrili i le 13 m’ɔ ti Fue cɛn’n nun’n, Iran nvle’n toli bɔnbu mun yili be Izraɛli nvle’n nun lɔ. Antonio Guterɛsi m’ɔ ti nvlenvle’m be anuannzɛ nga be flɛ i kɛ ONU i su kpɛn’n kannin sa sɔ’n i ndɛ. Ɔ seli kɛ: “Andɛ nga bɔbɔ’n, maan e yo like kwlaa nga e kwla yo naan be jran alɛ sɔ’n i kunlɛ, naan lika’n tɔ fɔuun kan. Maan e suan e awlɛn tralɛ siɛn’n.”

 Nán mɛn’n i bue sɔ’n nun lɔ ngunmin yɛ sran’m be kun alɛ-ɔ.

 Afuɛ 2023 Zanvie i le 26 su’n, anuannzɛ nga be flɛ i ONU nun sran dandan wie’m be yoli aɲia kun. Aɲia sɔ’n i bo’n, be seli kɛ: “Dɔ nga su’n, alɛ w’a tɔ nvle kpanngban nun. Kɛ ɔ fɛ i blɛ nga be kunnin Alɛ Dan Nɲɔn su’n lele w’a fa ju andɛ’n, alɛ nin-a tɔman lika kpanngban nun kɛ ngalɛ’n sa le. Yɛ alɛ sɔ’m be ti’n, sran miliaa nɲɔn be wun be ɲrun. Yɛle kɛ sɛ be bu mɛn wunmuan’n nun sran’m be nun nnan’n, be bue kun wunmɛn i wun fɛ alɛ’n ti.”

 Lika nga alɛ w’a tɔ lɔ’n, be nun wie mun yɛ: Izraɛli, Gaza, Siri, Azɛɛbaijan, Ikrɛnin, Sudan, Etiopi, Nizɛɛ, Mianmaa, Aiti. a

 ?Cɛn benin yɛ sran’m be su kunman alɛ kun-ɔn? ?Mɛn siefuɛ’m be kwla yo naan mɛn’n tɔ fɔuun? ?Ndɛ benin yɛ Biblu’n kan-ɔn?

 Alɛ nga sran’m be kun be nvlenvle’m be nun’n, ɔ kle kɛ blɛ wie wá jú’n, be su kunman alɛ kun. Alɛ nga e wun be andɛ’n, be kle kɛ blɛ nga e o nun’n i su ndɛ nga Biblu’n kannin’n ti nanwlɛ. Biblu’n flɛ blɛ nga e o nun yɛ’n kɛ ‘mɛn’n i awieliɛ blɛ.’—Matie 24:3.

•   “Amún wá tí alɛ ngan, ɔ nin alɛ kunlɛ ndɛ mun. . . . Nvle kun wá jáso nvle uflɛ wun. Yɛ famiɛn kun wá jáso famiɛn uflɛ wun.”—Matie 24:6, 7.

 Kanngan ndɛ nga nun: “Quel est le signe des « derniers jours », ou « temps de la fin » ?” I liɛ’n, á wún kɛ alɛ nga e wun be andɛ’n, be su ndɛ nga Biblu’n kannin’n ti nanwlɛ.

 Biblu’n kle kɛ sran’m be su kunman alɛ kun. Sanngɛ nán klɔ sran mun yɛ bé yó maan i sɔ liɛ’n yó ye-ɔ. Aamagedɔn, mɔ yɛle “Ɲanmiɛn m’ɔ Kwla Like Kwlaa Yo’n i cɛn dan’n,” i ti yɛ sran’m be su kunman alɛ kun-ɔn. (Sa Nglo Yilɛ 16:14, 16) Kɛ Ɲanmiɛn ko kun alɛ sɔ’n ko wie’n, ɔ́ yía nda ng’ɔ tali’n i nuan. Yɛle kɛ ɔ́ yó maan klɔ sran’m bé dí fɔundi.—Jue Mun 37:10, 11, 29.

 Sɛ a kunndɛ kɛ á sí Ɲanmiɛn i alɛ sɔ’n, ɔ nin wafa nga ɔ́ yó maan sran’m be su kunman alɛ kun’n be su ndɛ wie mun ekun’n, kanngan ndɛ nga nun: “?Ngue yɛle Aamagedɔn alɛ’n?”