Sran kpanngban be bumɛn i kɛ cɛn wie lele’n sran’m be su kpaman sran nun kun.

•   Antonio Guterɛsi m’ɔ ti ONU i su kpɛn’n seli kɛ: “Sran’m be wunnɛn kplo’n ti’n, be kpa sran nun. I sɔ’n ti kɛ ayre tɛ wie sa. Ɔ saci anuannzɛ mun yɛ ɔ saci sran’m be afiɛn. I sɔ’n ti’n sran’m be bu be wiengu lufle.”

 ?Cɛn wie lele’n sran’m be su kpaman sran nun kun? ?I su ndɛ benin yɛ Biblu’n kan-ɔn?

 Biblu’n kle wafa nga Ɲanmiɛn bu sran mun’n.

•   “[Ɲanmiɛn] yoli maan nvlenvle’m be kwlaa be fin sran kunngba naan sran’m be tran asiɛ wunmuan’n su.”—Sa Nga Be Yoli’n 17:26.

•   “Ɲanmiɛn kpaman sran nun. Sanngɛ nvle kwlaa nun’n, sran ng’ɔ sro i m’ɔ yo sa ng’ɔ ti kpa’n, i sɔfuɛ’n yɛ i klun jɔ i wun-ɔn.”—Sa Nga Be Yoli’n 10:34, 35.

 Biblu’n kle kɛ sran’m be kwlaa be fin sran kunngba naan kannzɛ be wunnɛn kplo’n timan kun’n sanngɛ Ɲanmiɛn sɔ be kwlaa be nun.

 Ɲanmiɛn Sielɛ’n yɛ ɔ́ wá yó maan sran’m be su kpaman sran nun kun-ɔn. Ɔ ti awa kun yɛ ɔ o ɲanmiɛn su lɔ. Awa sɔ’n wá klé sran mun wafa nga be nin be wiengu’m be kwla tran klanman’n. Ɔ maan sran’m bé sí like ng’ɔ fata kɛ be yo naan b’a buman be wiengu wun akunndan tɛ kun’n.

•   ‘Mɛn’n nunfuɛ’m bé sí like nga be flɛ i sa nuan su sɛsɛ yolɛ’n.’—Ezai 26:9.

•   “Sa nuan su sɛsɛ yolɛ’n i kpafuɛ’n i bo m’ɔ́ gúa’n yɛle fɔundi dilɛ’n, yɛ sa nuan su sɛsɛ yolɛ’n i kpafuɛ’n i mma ng’ɔ́ wá sú’n, yɛle be wla m’ɔ gua ase titi’n, ɔ nin sa m’ɔ ɲanman be’n.”—Ezai 32:17.

 Andɛ’n, Biblu’n uka sran miliɔn kpanngban maan be bu be wiengu’m be sran.

•   Sɛ a kunndɛ kɛ á sí nun kpa ekun’n, kanngan fluwa An Tinnge! nga nun: “?Sran’m be wiengu wun akunndan tɛ bulɛ’n ɔ́ wíe?”

•   Kanngan ndɛ nga nun wie: “Comment parler de racisme à votre enfant.” I liɛ’n, á sí wafa nga siɛ nin niɛn’m be nin be mma’m be kwla koko ndɛ sɔ’n su yalɛ’n.