?A bu i kɛ e ɲrun lɔ’n yó kpa? Kannzɛ sa kekle sunman be tɔ e su’n, sanngɛ sran wie’m be lafi su kɛ e ɲrun lɔ’n yó kpa. ?Sanngɛ yo, e kwla lafi su sakpa kɛ e ɲrun lɔ’n yó kpa? Ɛɛn-ɛn! Ndɛ nga Biblu’n kan’n ɔ cici e wla kpa.

•  ?Ndɛ benin yɛ Biblu’n kan m’ɔ cici e wla-ɔ?

•  ?Nán lafilɛ nun ndɛ yɛle i sɔ’n?

•  ?Wafa sɛ yɛ ndɛ sɔ’n kpɛ́n su-ɔ?

•  ?Blɛ benin nun yɛ ndɛ sɔ’n kpɛ́n su-ɔ?

•  ?Wafa sɛ yɛ ndɛ sɔ’n kwla uka e andɛ-ɔ?

 Biblu’n di i nanwlɛ weiin kɛ sa kekle sunman be o sran’m be su. Sanngɛ ɔ se ekun kɛ sa sɔ’m be su kaman lɛ sa trilili. Sa sɔ mɔ bé wá wíe’n, be nun wie mun yɛ:

•   Sa’n: Sran’m be ɲanman sua

   Ndɛ nga Biblu’n kan’n: “Bé kplán sua mun yɛ bé trán be nun.”—Ezai 65:21.

   Ndɛ sɔ’n i bo’n: Sran’m bé ɲán be bɔbɔ be sua.

•   Sa’n: Sran’m be ɲanman junman yɛ be di yalɛ

   Ndɛ nga Biblu’n kan’n: “Min sran mɔ n kpali be’n, bé ɲán be sa nuan ninnge’m be su ye dan.”—Ezai 65:22.

   Ndɛ sɔ’n i bo’n: Sran’m be kwlaa bé ɲán junman kpa bé dí, yɛ bé dí su aklunjɔɛ.

•   Sa’n: Be bu sran’m be lufle

   Ndɛ nga Biblu’n kan’n: “Sran dandan’m bé wá síe mɛn’n sa nuan su sɛsɛ yolɛ’n ti.”—Ezai 32:1.

   Ndɛ sɔ’n i bo’n: Be su nianman sran’m be wunnɛn kplo’n annzɛ sika mɔ be lemɛn i’n naan b’a di be ndɛ. Be su buman sran lufle kun.

•   Sa’n: Sran’m be ɲanman aliɛ kpa be diman

   Ndɛ nga Biblu’n kan’n: “Ble nin i wunsu ninnge’m bé bú asiɛ’n su, bé bú oka’m be ti’n su.”—Jue Mun 72:16.

   Ndɛ sɔ’n i bo’n: Sran kwlakwla ɲán aliɛ kpa dí. Sran fi su laman awe kun. Yɛ awe m’ɔ kun sran lele ɔ wu’n, ɔ su tranman lɛ kun.

•   Sa’n: Sran kunlɛ nin nzaje sa yolɛ’n

   Ndɛ nga Biblu’n kan’n: “Be tinuntinun bé trán be viɲin nin be figie waka’m be bo, yɛ sran fi su wlaman be ɲin nglonglo.”—Mise 4:4.

   Ndɛ sɔ’n i bo’n: Sran kwlakwla wún i wun fɛ, srɛ fi su kunman sran mun. Afin bé núnnún sran tɛtɛ’m be kwlaa, yɛ “asiɛ’n yó sran kpa’m be liɛ.”—Jue Mun 37:10, 29.

•   Sa’n: Alɛ

   Ndɛ nga Biblu’n kan’n: “Nvle kun su manman tokofi su nvle uflɛ wun, yɛ be su suanman alɛ kunlɛ kun.”—Ezai 2:4.

   Ndɛ sɔ’n i bo’n: Fɔundi’n trán asiɛ wunmuan’n su. (Jue Mun 72:7) Alɛ su diman sran fi kun, yɛ sran fi su wanndiman alɛ kun.

•   Sa’n: Tukpacɛ’n

   Ndɛ nga Biblu’n kan’n: “Sran fi su seman kɛ: ‘N kpinndinman.’”—Ezai 33:24.

   Ndɛ sɔ’n i bo’n: Sran’m be su tɔman tukpacɛ kun. (Ezai 35:5, 6) I kpa bɔbɔ’n, Biblu’n se kɛ: “Wie’n su tranman lɛ kun.”—Sa Nglo Yilɛ 21:4.

•   Sa’n: Asiɛ’n mɔ sran’m be saci i’n

   Ndɛ nga Biblu’n kan’n: “Aawlɛ flɛnnɛn’n nin asiɛ kee’n bé bó sró, yɛ lika kpɛtɛkplɛɛ’n i klun wá jɔ́, ɔ́ wá bó nɲrɛ kɛ safran’n sa.”—Ezai 35:1.

   Ndɛ sɔ’n i bo’n: Asiɛ wunmuan’n káci lika klanman kpa, yɛ sran’m bé trán su kɛ nga Ɲanmiɛn fa sunnzunnin i i bo bolɛ nun’n sa.—Bo Bolɛ 2:15; Ezai 45:18.

 Sɛ a bu i kɛ i sɔ’n ti lafilɛ nun ndɛ’n, e wun i wlɛ. Sanngɛ é wlá ɔ fanngan kɛ a fa ɔ ɲin sie i e ɲrun lɔ sa’m be su ndɛ nga Biblu’n kan’n i su kpa. ?Ngue ti-ɔ? Afin Biblu’n liɛ’n kɛ ɔ kan ndɛ kun’n, ɔ timan kɛ be nga be kan ndɛ mɔ be yiɛmɛn i nuan’n sa. Ndɛ ng’ɔ o Biblu’n nun’n, ɔ fin Ɲanmiɛn Kpli bɔbɔ. Ɔ maan e kwla lafi su. Sa nga ti yɛ e kwla lafi su’n yɛ:

•   E kwla lafi Ɲanmiɛn su. Biblu’n se kɛ Ɲanmiɛn liɛ’n, “ɔ kwlá buaman ato.” (Titi 1:2) Asa’n, Ɲanmiɛn kunngba cɛ yɛ ɔ kwla kan e ɲrun lɔ sa’m be ndɛ-ɔ. (Ezai 46:10) Biblu’n nun sa kpanngban be kle kɛ ndɛ nga Ɲanmiɛn kan’n ɔ kpɛn su titi. Sɛ ɔ waan á sí be’n, nian video ?Ngue yɛ ɔ kle kɛ Biblu’n nun ndɛ’n ti nanwlɛ-ɔ?

•   Ɲanmiɛn kwla yi e su sa mun. Biblu’n se kɛ Ɲanmiɛn kwla yo “like kwlaa ng’ɔ klo’n.” (Jue Mun 135:5, 6) Ɔ maan like fi kwlá yoman naan Ɲanmiɛn w’a yiaman ndɛ ng’ɔ kannin’n i nuan. Yɛ ng’ɔ o su ekun’n yɛle kɛ Ɲanmiɛn bɔbɔ kunndɛ kɛ ɔ́ úka e, afin ɔ klo e dan.—Zan 3:16.

 Kɔlɛ’n, a usa ɔ wun kɛ: ‘?Sɛ Ɲanmiɛn waan ɔ́ úka e naan ɔ kwla uka e sakpa’n, yɛ nn ngue ti yɛ e te wun e ɲrun dan sɔ-ɔ?’ Sɛ ɔ waan á sí i su tɛlɛ’n, nian video ?Ngue ti yɛ Ɲanmiɛn yaci sran’m be lɛ mɔ be wun ɲrɛnnɛn-ɔn?

 Ɲanmiɛn wá sín i Sielɛ’n i lika naan w’a yia ndɛ sɔ’m be nuan. I Sielɛ sɔ’n ti awa kun, yɛ ɔ o ɲanmiɛn su lɔ. Ɲanmiɛn sieli Zezi Klisi famiɛn Sielɛ sɔ’n i su. Yɛ ɔ mɛnnin i kwlalɛ naan ɔ yo asiɛ’n sufuɛ’m be ye. I nun mɔ Zezi wo asiɛ’n su wa’n, ɔ yoli tukpacifuɛ’m be juejue, ɔ mannin be nga awe kun be’n be aliɛ, ɔ ijɔli aunmuan dan kpa kun, yɛ ɔ cɛnnin be nga be wuli’n bɔbɔ. (Marki 4:39; 6:41-44; Liki 4:40; Zan 11:43, 44) I lɛ nun’n, ɔ kleli like nga sɛ ɔ kaci Ɲanmiɛn Sielɛ’n i su Famiɛn’n ɔ́ wá yó’n.

 Sɛ ɔ waan á sí like nga Ɲanmiɛn Sielɛ’n wá yó mán e’n, nian video ?Ngue yɛle Ɲanmiɛn Sielɛ’n?

 Ɔ ka kaan sa! ?Ngue ti yɛ e se sɔ-ɔ? Afin Biblu’n kan sa wie mɔ bé klé kɛ ɔ ka kan’n, Ɲanmiɛn Sielɛ’n wá síe asiɛ’n be ndɛ. (Liki 21:10, 11) Yɛ sa sɔ’m be kpɛn su andɛ.

 Sɛ ɔ waan á sí sa sɔ mun’n, kanngan ndɛ “?Blɛ benin nun yɛ Famiɛn nga Ɲanmiɛn sieli i’n ɔ́ wá síe asiɛ’n niɔn?” i nun.

 Biblu’n i klɛfuɛ kun fali like nga e wla o su mɔ Biblu’n kɛn i ndɛ’n fa sunnzunnin “like ng’ɔ tra mmeli’n i ase’n.” (Ebre Mun 6:19) Like sɔ’n ti’n, sɛ aunmuan dan kpa kun fita mmeli’n bɔbɔ’n, ɔ jran kekle. I wafa kunngba’n, ndɛ nga Biblu’n kan mɔ e wla o su’n ti’n, kannzɛ sa’m be tɔ e su sɛ’n, e kwla jran kekle. Ɔ maan e wla boman e wun tratraman su, yɛ e akunndan’n sannganman dan.—1 Tesalonikifuɛ Mun 5:8.