MAAN AMUN ƝIN TRAN SU!

 ?Ngue ti yɛ sran’m be kpɔ be wiengu dan sɔ-ɔ?—?I su ndɛ benin yɛ Biblu’n kan-ɔn?

 Andɛ’n, ndɛ tɛtɛ nga sran’m be kan’n nin nzaje sa mun nin alɛ’m be kle kɛ sran’m be kpɔ be wiengu. Yɛ i sɔ ndɛ liɛ’n yɛ e ti be televiziɔn nin aladio’m be nun-ɔn.

 • Afuɛ 2023, Novanblu i le 15 su’n, zronali kun seli kɛ: “Alɛ ng’ɔ o Izraɛli nin Gaza be afiɛn’n ɔ nin be nga be klo nzaje sa’m be yolɛ’n be ti’n, ndɛ tɛtɛ kanlɛ’n w’a tru rezo sosio’m be su kpokpaa.”—The New York Times.

 • Afuɛ 2023, Novanblu i le 3 su’n, Denisi Flansisi m’ɔ ti nvlenvle’m be anuannzɛ nga be flɛ i ONU i nun sran dan kun’n, ɔ seli kɛ: “Kɛ ɔ fɛ i Ɔktɔblu i le 7 su’n m’ɔ́ fá jú andɛ’n, sran lufle bulɛ’n ti’n, sran’m be nuan nun ndɛ’m b’a yo tɛ b’a tra laa’n yɛ be yo nzaje sa mun tra laa’n.”

 Ndɛ tɛtɛ kanlɛ nin nzaje sa yolɛ ɔ nin alɛ dilɛ’n be finman andɛ. Biblu’n se kɛ laa nun’n, sran’m “be nuan nun ndɛ’m be yo ya kɛ ta mma sa,” yɛ alɛ dilɛ’n nin nzaje sa yolɛ’n yɛ sran’m be kunndɛ kɛ bé yó-ɔ. (Jue Mun 64:3; 120:7; 140:1) Sanngɛ Biblu’n se kɛ wafa nga sran’m be fa kpɔ be wiengu andɛ’n, ɔ timan ngbɛn.

Nán ngbɛn ti yɛ sran kpɔlɛ’n w’a tru andɛ-ɔ

 Sa nga ti yɛ sran’m be kpɔ be wiengu dan andɛ’n, Biblu’n kan be nun nɲɔn be ndɛ.

 1. Biblu’n seli kɛ e blɛ liɛ nga nun’n “sran kpanngban be su kloman be wiengu kɛ laa’n sa kun.” (Matie 24:12) Kɛ ɔ yo naan sran’m be klo be wiengu’n, ninnge tɛtɛ mun yɛ be yo be-ɔ. I sɔ’n ti’n, sran’m be kpɔ be wiengu tra laa’n.—2 Timote 3:1-5.

 2. Sa nga ti yɛ sran kpɔlɛ’n w’a yo dan andɛ’n i kun ekun yɛle kɛ Suɛn Tɔnfuɛ Satan yɛ ɔ sie mɛn’n niɔn. Biblu’n se kɛ “mɛn wunmuan’n wo klunwifuɛ’n i sa nun.”—1 Zan 5:19; Sa Nglo Yilɛ 12:9, 12.

 Sanngɛ Biblu’n se kɛ ɔ ka kan’n, Ɲanmiɛn wá yó maan sran kpɔlɛ’n wíe mlɔnmlɔn. I kpa bɔbɔ’n, ɔ́ wá núnnún sran kpɔlɛ’n i sin sa’m be kwlakwla. Biblu’n se kɛ:

 • Ɲanmiɛn wá “núnnún be ɲinmuɛn’n kwlaa, wie’n su tranman lɛ kun, be su yoman sɛ kun, be su sunman kun, be su wunman ɲrɛnnɛn kun. Laa ninnge’m be nunman lɛ kun.”—Sa Nglo Yilɛ 21:4.

É wlá ɔ fanngan kɛ a kanngan Sasafuɛ Tranwlɛ nga be flɛ i kɛ “E kwla wla sran kpɔlɛ’n i ase” i nun. I liɛ’n, á sí wafa nga Biblu’n tɛ kosan nga’m be su’n:

?Ngue ti yɛ sran’m be kpɔ be wiengu-ɔ?

?É yó sɛ naan y’a kpɔman e wiengu?

?Ngue yɛ Ɲanmiɛn wá yó naan sran kpɔlɛ’n w’a wie-ɔ?