Afuɛ 2022, Zuɛn anglo nun’n, anuannzɛ nga be flɛ i kɛ Groupe de la Banque Mondiale i su kpɛn’n seli kɛ: “Sika ndɛ’n w’a yo kekle kpa asiɛ wunmuan’n su.” Asa’n, ɔ seli ekun kɛ: “Ninnge’m be gua’n i su uka ndɛndɛ kpa, yɛ kusu sran’m be leman sika.”

 Anuannzɛ nga be flɛ i kɛ Fonds monétaire international seli kɛ: “Sanzi’n nin aliɛ’n be gua’n i su w’a uka kpa. Kɛ ɔ yo sɔ’n, nvle nga sika ndɛ’n ti kekle man be’n be wun be ɲrun kpa.”

 Biblu’n uka e naan y’a wun like nga ti yɛ sika ndɛ’n ti kekle e su’n. Asa’n, ɔ uka e naan y’a jran sa sɔ’m be ɲrun kekle yɛ ɔ uka e naan y’a lafi su kɛ sa sɔ’n wíe cɛn kun.

•   Blɛ nga e wo nun yɛ’n Biblu’n flɛ i kɛ “mɛn’n i awieliɛ blɛ.”—2 Timote 3:1.

•   Zezi seli kɛ blɛ sɔ’n nun’n, sran’m bé wá wún “ninnge sroesroe mun.” (Liki 21:11) Kɛ sran’m be wun kɛ ninnge’m be gua’n i su uka ndɛndɛ’n, srɛ kun be, yɛ be koko. Be usa be wun sɛ be ɲrun lɔ’n yó sɛ-o, sɛ bé kwlá nían be awlobofuɛ’m be lika-o.

•   Sa Nglo Yilɛ fluwa’n kannin ninnge’m be gua’n i su m’ɔ́ wá úka’n i ndɛ. I nun’n be seli kɛ: “N tili like kun ngan. Ɔ tɛ kɛ nɛn sa. […] Ɔ seli kɛ: ‘Ble kilo kun annzɛ ɔrzu kilo nsan i gua’n, ɔ́ yó junman mɔ be di i cɛn wunmuan kun nun’n i ti akatua.’”—Sa Nglo Yilɛ 6:6, Easy-to-Read Version.

 Sɛ a kunndɛ kɛ á sí ‘mɛn’n i awieliɛ blɛ’n’ ɔ nin sa nga Sa Nglo Yilɛ fluwa’n kan be ndɛ’n be su ndɛ ekun’n, nian video nga be flɛ i kɛ Le monde a changé depuis 1914. Asa’n, kanngan ndɛ ng’ɔ suan “?Ngue yɛ sran nnan sɔ’m be ti be nzɔliɛ-ɔ?” i nun.

•   “Sɛ min sran’m be kplan sua’n, bé trán be nun, sɛ be ta vinyi’n, bé dí i su mma. Be su kplanman sua be yaci manman sran wie kɛ ɔ tran nun. Be su taman waka be yaci manman sran uflɛ kɛ ɔ di i su mma.”—Ezai 65:21, 22.

•   “Maan ble’n ɔ su lele ɔ bu mɛn’n nun. Maan kpɔlɛ’m be su’n, be wun kɛ aunngban’n ɔ keje ble ja kpanngban.”—Jue Mun 72:16.

•   “Anannganman waan: ‘Yalɛfuɛ nga be kle be yalɛ’n, ɔ nin nyrɛnnɛn wunfuɛ nga be fɛfɛ’n, be ti m’an jaso.’”—Jue Mun 12:6. a

 Ɔ cɛ kan’n, Ɲanmiɛn wá yó maan sika ndɛ’n ɔ́ wíe. Nán nvle kunngba nun yɛ ɔ́ yó i sɔ liɛ’n niɔn, sanngɛ mɛn wunmuan’n nun yɛ ɔ́ yó i sɔ liɛ’n niɔn. Sɛ a kunndɛ kɛ á sí wafa nga ɔ́ yó i sɔ liɛ’n kanngan ndɛ ng’ɔ suan “Peut-on espérer un système économique plus juste?” i nun.

 Kɛ é sé yɛ bɔbɔ’n, Biblu’n kwla uka ɔ naan kannzɛ be uka ninnge’m be gua’n su’n w’a jran kekle. ?Wafa sɛ? Afɔtuɛ trele wie mɔ be kwla uka ɔ naan w’a yo ɔ sika’n i cɛcɛ’n be o Biblu’n nun. (Ɲanndra Mun 23:4, 5; Akunndanfuɛ’n 7:12) Sɛ a kunndɛ kɛ á sí nun kpa ekun’n, kanngan ndɛ ng’ɔ suan “Yo ɔ sika’n i cɛcɛ” nin ng’ɔ suan “Comment vivre avec moins” be nun.