Afuɛ 2022, Novanblu i le 20 m’ɔ ti Mɔnnɛn cɛn’n yɛ aɲia nga Nvlenvle’m be Anuannzɛ’n (ONU) kpɛli i ba naan b’a kan lika m’ɔ kacikaci’n i ndɛ’n ɔ wieli-ɔ. Be nuan sɛli su kɛ bé mán nvle nga sika ndɛ ti kekle be su’n be sika naan sɛ lika m’ɔ kacikaci’n ti’n sa kekle kɛ nzue m’ɔ tɔ di lika’n tɔ be su’n, b’a kwla jran kekle. Sanngɛ sran sunman be di i nanwlɛ kɛ nɛ́n i sɔ’n ti yɛ maan sa bɔbɔ ba nga ti yɛ lika’n kacikaci’n ɔ́ wíe-ɔ.

•   Afuɛ 2022, Novanblu i le 19, Antonio Guterɛsi m’ɔ ti ONU i su kpɛn’n, ɔ seli kɛ: “Ajalɛ nga e fɛli i kɛ é síe sika é fá úka be nga lika’n i kacikacilɛ’n kle be yalɛ’n, ɔ yo min fɛ. Sanngɛ nanwlɛ, i sɔ’n juman. […] Afin asiɛ’n ti kɛ sran wie mɔ tukpacɛ kekle o i su m’ɔ fata kɛ be yo i ayre ndɛndɛ’n sa. Sɛ y’a yomɛn i kpa’n e su kwlá siesiemɛn i ye kun.”

•   Afuɛ 2022, Novanblu i le 20, Mari Robinisɔnun mɔ laa ɔ ti Irilandi lɔ plezidan’n, mɔ kusu laa ɔ ti ONU lɔ akpasua ng’ɔ kpli sran’m be ti’n i su kpɛn’n, ɔ seli kɛ: “Lika m’ɔ kacikaci’n ti’n, ɔ cɛman naan sa kekle kpa w’a ɲan asiɛ’n koko nun wa. Yɛ sran’m be kwlaa bé ísɛ i bo nzuɛn’n.”

 Gbanflɛn nin talua mun yɛ be koko wafa nga lika’n wá yó e ɲrun lɔ’n i ti dan-ɔn. ?Sanngɛ nvlenvle’m be bo kwla yo kun be yo naan sa nga ti yɛ lika’n kacikaci’n w’a wie? ?I su ndɛ benin yɛ Biblu’n kan-ɔn?

 Biblu’n kle kɛ kannzɛ bɔbɔ nvlenvle’m be mian be ɲin kpa naan lika mɔ kacikaci’n w’a kleman sran’m be yalɛ ngboko’n, sanngɛ be su kwlá yoman naan sa sɔ’n w’a wie mlɔnmlɔn. Maan e nian sa nɲɔn nga ti yɛ ɔ ti sɔ’n:

•   “Like ng’ɔ ti bliwa’n, be kwlá tinngɛmɛn i.”—Akunndanfuɛ’n 1:15.

   Like nga ndɛ sɔ’n kle e’n: Awa’m be kwlá yoman like kwlaa nga be kunndɛ kɛ bé yó’n, afin Ɲanmiɛn w’a yiman klɔ sran mun kɛ be sie be bɔbɔ be wun. (Zeremin 10:23) Kannzɛ bɔbɔ be bo yo kun’n, sanngɛ be kwlá yoman naan mɛn’n nun sa’m be wie. Kannzɛ bɔbɔ be mian be ɲin sɛ’n, be su kwlá yomɛn i sɔ’n le.

•   “Afin sran’m bé bú be bɔbɔ be wun akunndan, bé yó sika klofuɛ, […] be su kunndɛman kɛ be nin be wiengu’m bé tí be wun aniɛn.”—2 Timote 3:2, 3.

   Like nga ndɛ sɔ’n kle e’n: Biblu’n dun mmua seli kɛ e blɛ liɛ nga nun’n, sran kaka bé bú be bɔbɔ be wun akunndan yɛ be su kplinman su kɛ bé dí junman likawlɛ naan sran’m be ngba be ɲan su ye.

 Sanngɛ nán klɔ sran’m be awa mun yɛ bé wá yó naan e ɲrun lɔ’n yó kpa-ɔ. Ɲanmiɛn w’a kpa sran kun kɛ ɔ yo mɛn’n i Siefuɛ, yɛle Zezi Klisi. Biblu’n kɛn i ndɛ se kɛ:

•   “Bé fá sielɛ’n bé wlɛ́ i sa nun, bé flɛ́ i kɛ Afɔtuɛ Manfuɛ Kpa, Ɲanmiɛn m’ɔ Kwla’n, Siɛ m’ɔ o lɛ Titi’n, Fɔundi Wlengbi.”—Ezai 9:6.

 Zezi ti Ɲanmiɛn Sielɛ’n yɛle kɛ awa ng’ɔ o ɲanmiɛn su lɔ’n i su Famiɛn. (Matie 6:10) Ɔ le tinmin, ɔ si ngwlɛlɛ, yɛ ɔ kunndɛ kpa kɛ ɔ́ nían asiɛ’n nin i sufuɛ’m be lika. (Jue Mun 72:12, 16) Ɲanmiɛn su lɔ awa sɔ’n wá núnnún be nga “be saci asiɛ’n” yɛ ɔ́ yó maan asiɛ’n yó sanwun ekun.—Sa Nglo Yilɛ 11:18; Ezai 35:1, 7.

 Sɛ a kunndɛ kɛ á sí like ng’ɔ kwla yo naan lika’n i kacikacilɛ’n mɔ maan sa kekle tɔ sran’m be su’n w’a wie mlɔnmlɔn’n i su ndɛ ekun’n, kanngan ndɛ ng’ɔ suan “Les changements climatiques et notre avenir: qu’en dit la Bible ?” i nun.