Sran’m be ɲanman nzue kpa be nɔnman: ?I su ndɛ benin yɛ Biblu’n kan-ɔn?
Sɛ e ɲanman nzue kpa e nɔnman’n, e kwlá tranman nguan nun. Antonio Guterɛsi m’ɔ ti nvlenvle’m be anuannzɛ nga be flɛ i ONU i su kpɛn’n, ɔ seli kɛ: “Kɛ aliɛ cɛ́n m’ɔ́ sán’n nn nzue kpa’n i ɲanlɛ’n yó kekle. Sran kaka be ɲanman nzue be nɔnman.” Nanwlɛ, mɛn wunmuan’n nun’n, sran miliaa kpanngban be ɲanman nzue kpa be nɔnman.
Strdel/AFP via Getty Images
?Cɛn wie lele’n, sran’m be kwlaa bé kwlá ɲán nzue kpa bé nɔ́n? ?Annzɛ i sɔ liɛ’n su kwlá yoman ye le? ?I su ndɛ benin yɛ Biblu’n kan-ɔn?
Nzue ɲanlɛ’n i su ndɛ nga Biblu’n kan’n
Biblu’n kle kɛ cɛn wie lele’n sran’m be kwlaa bé ɲán nzue kpa bé nɔ́n. I kpa bɔbɔ’n, be su diman nzue kpa i yalɛ asiɛ’n su.
“Nzue wá ɲrɛ́n aawlɛ flɛnnɛn’n nun lɔ, yɛ nzue ba’m bé wá sónji lika kpɛtɛkplɛɛ’n nun lɔ. Asiɛ kee’n ɔ́ wá káci nzue lika yɛ ndɛma’m bé fífí lɔ, kpɛkun asiɛ m’ɔ srɛ nzue’n, ɔ́ káci nzue ti’m be lika.”—Ezai 35:6, 7.
?Ngue ti yɛ e kwla lafi ndɛ sɔ mɔ Biblu’n kan’n su-ɔ? Maan e fa e ɲin e sie i wafa nga Ɲanmiɛn yili asiɛ’n i su ndɛ nga Biblu’n kan’n su.
Asiɛ’n nin nzue’n be su ndɛ nga Biblu’n kan’n
“Nán ngbɛn ti yɛ [Ɲanmiɛn] yili [asiɛ’n] niɔn, sanngɛ ɔ yili i kɛ be tran su.”—Ezai 45:18.
Kɛ mɔ Ɲanmiɛn yili asiɛ’n kɛ be tran su’n ti’n, ɔ yili ninnge uflɛ wie mun naan y’a kwla ɲan nzue kpa blɛ kwlaa nun.
“[Ɲanmiɛn] cuɛn nzue m’ɔ kpɛnkpɛn’n kɔ nglo. Kpukpuwa’n yo kpikplikpi kpɛkun ɔ kaci nzue. Kpɛkun ɲanmiɛn ble’m be yo maan nzue’n gua. Ɔ gua kpanngban kpa klɔ sran’m be su.”—Zɔbu 36:27, 28.
Ndɛ mma sɔ’m be kle like nga Ɲanmiɛn yoli naan y’a kwla ɲan nzue blɛ kwlaa nun’n. Kɛ wia’n bo asiɛ’n su ninnge mun nin jenvie’n be su’n, nzue kpukpuwa’n fu kɔ nglo. Kɛ kpukpuwa sɔ’n ko yo kpikplikpi’n, ɔ kaci nzue kpɛkun ɔ tɔ. Ɔ maan klɔ sran mun nin nnɛn’m be kwla ɲan nzue blɛ kwlaa nun.—Akunndanfuɛ’n 1:7; Amɔsu 5:8.
“Ń má yó maan kɛ nzue’n i tɔlɛ blɛ ju’n ɔ́ tɔ́, yɛ asiɛ’n i su ninnge’m bé yó ye, yɛ fie’m be su waka’m bé sú mma.”—Sanwun Yolɛ 26:4.
Ɲanmiɛn tali Izraɛlifuɛ mɔ be ti fie difuɛ’n be nda kɛ ɔ́ yó maan nzue tɔ́ blɛ kwlaa nun naan be fie’m be su ninnge’m b’a kwla su mma kpanngban. Ɔ si kɛ, kɛ ɔ ko yo naan y’a kwla ɲan aliɛ y’a di’n, ɔ fata kɛ nzue’n tɔ blɛ ng’ɔ nin i fata’n nun.
Like nga Ɲanmiɛn yo mannin Izraɛlifuɛ mun laa’n, ɔ cɛ kan’n ɔ́ wá yó i kunngba’n mán sran’m be kwlaa. (Ezai 30:23) Sanngɛ dɔ nga su’n, asiɛ’n i lika kpanngban nun’n nzue ndɛ’n w’a yo kekle kpa. Sa nga ti yɛ ɔ ti sɔ’n i kun yɛle nzue m’ɔ tɔman’n. ?Like uflɛ benin yɛ Ɲanmiɛn wá yó naan nzue ndɛ’n w’a wie-ɔ?
Wafa nga nzue ndɛ’n wá wíe’n
Biblu’n waan Ɲanmiɛn wá sín i Sielɛ’n i lika núnnún asiɛ’n su sa’m be kwlaa. Nzue ndɛ mɔ w’a yo kekle andɛ’n, ɔ o nun wie. (Matie 6:9, 10) Ɲanmiɛn Sielɛ’n, yɛle kɛ Ɲanmiɛn i awa m’ɔ o ɲanmiɛn su lɔ’n, ɔ́ wá síe asiɛ wunmuan’n. (Daniɛli 2:44; Sa Nglo Yilɛ 11:15) I kpa bɔbɔ’n, Ɲanmiɛn Sielɛ’n wá yó like nga mɛn siefuɛ’m be kwlá yoman’n. Yɛle kɛ ɔ́ yó maan sa nga ti yɛ nzue ndɛ’n wo lɛ’n bé wíe.
Like ng’ɔ kle sran’m be yalɛ’n: Lika mɔ w’a kaci’n ti’n, nzue’n tɔman kɛ laa’n sa kun. I sɔ’n ti’n, wawa’n kpɛn dan. Sɛ kusu nzue’n waan ɔ́ tɔ́’n, ɔ tɔ lele ɔ di lika’n. Ɔ ju wie kusu’n jenvie’n yi lele ɔ tratra su.
Like nga Ɲanmiɛn wá yó’n: Ɲanmiɛn Sielɛ’n wá yó maan ninnge’m bé sá be sin káci kɛ laa’n sa. Ɲanmiɛn seli kɛ: “Nian! N su yo like kwlaa uflɛ.” (Sa Nglo Yilɛ 21:5) Kɛ Ɲanmiɛn wá yó sɔ’n, nzue wá ɲrɛ́n lika kee’m be nun. Ɔ maan lika nga sran’m be kwlá tranman lɔ dɔ nga su bɔbɔ’n, sran’m bé trán lɔ. (Ezai 41:17-20) Zezi Klisi m’ɔ ti Ɲanmiɛn Sielɛ’n i su famiɛn’n, ɔ́ wá yó maan ninnge kɛ aunmuan annzɛ nzue annzɛ sin sa’n, be su saciman asiɛ’n kun.
I nun mɔ Zezi wo asiɛ’n su wa’n, ɔ yoli maan aunmuan sroesroe kun yacili fitalɛ. I lɛ nun’n, ɔ yili tinmin nga Ɲanmiɛn mɛnnin i’n i nglo kan. (Marki 4:39, 41) Kɛ Zezi m’ɔ ti Ɲanmiɛn Sielɛ’n i su famiɛn’n ɔ́ wá síe asiɛ’n, ninnge kɛ asiɛ m’ɔ keje’n annzɛ nzue m’ɔ tɔ di lika’n bé wíe. Ɔ maan sran’m bé dí fɔundi kpafuɛ’n yɛ like fi su kunman be srɛ kun.
Like ng’ɔ kle sran’m be yalɛ’n: Sran tɛtɛ wie mun nin susute dandan wie’m be fa ninnge tɛtɛ nin wlawla’m be guɛ i nzue ba’m be nun. I sɔ’n ti’n, sran’m be ɲanman nzue kpa be nɔnman.
Like nga Ɲanmiɛn wá yó’n: Ɲanmiɛn wá yó asiɛ’n i sanwun yɛ ɔ́ yó nzue ba nin jenvie’m be sanwun wie. Asiɛ’n wá káci lika klanman. I kpa bɔbɔ’n, Biblu’n se kɛ: “Aawlɛ flɛnnɛn’n nin asiɛ kee’n bé bó sró, yɛ lika kpɛtɛkplɛɛ’n i klun wá jɔ́, ɔ́ wá bó nɲrɛ kɛ safran’n sa.”—Ezai 35:1.
?Be nga be saci asiɛ’n mɔ be buman be wiengu’m be akunndan’n, sa benin yɛ ɔ́ jú be su-ɔ? Ɲanmiɛn waan ɔ́ “núnnún be nga be saci asiɛ’n.”—Sa Nglo Yilɛ 11:18; Ɲanndra Mun 2:21, 22.
Like ng’ɔ kle sran’m be yalɛ’n: Klɔ sran’m be fa nzue’n be yo ninnge ng’ɔ fataman kɛ be fa yo’n. I lɛ nun’n, be saci nzue’n i dan.
Like nga Ɲanmiɛn wá yó’n: Ɲanmiɛn Sielɛ’n wá yó maan Ɲanmiɛn i klun sa’n ‘kpɛ́n su asiɛ’n su wa.’ (Matie 6:9, 10) Ɲanmiɛn Sielɛ’n maan bé klé sran’m be like kpa. Ezai 11:9 se kɛ “Zoova i silɛ’n ɔ́ yí asiɛ’n.” a Kɛ bé wá klé sran’m be like mɔ bé wá kló Ɲanmiɛn nin ninnge ng’ɔ yili be’n be kpa’n, bé nían asiɛ’n nin i su ninnge’m be lika kpa.
Sɛ a kunndɛ kɛ á sí like nga Ɲanmiɛn Sielɛ’n wá yó’n i su ndɛ kpa ekun’n, kanngan ndɛ nga nun “Que fera le royaume de Dieu?”
Kanngan Biblu’n nun fluwa nga be flɛ i Ezai i ndɛ tre 35 nun naan w’a wun wafa nga asiɛ’n wá káci lika klanman’n.
Nian video nga be flɛ i kɛ ?Ngue ti yɛ Ɲanmiɛn yili asiɛ’n niɔn? I liɛ’n á sí like nga Ɲanmiɛn kunndɛ kɛ ɔ́ yó mán klɔ sran mun’n.
a Ɲanmiɛn i dunman’n yɛle Zoova. (Jue Mun 83:18) Kanngan ndɛ “?Wan yɛle Zoova?” i nun.
Ninnge wie mɔ be kwla yo ɔ fɛ ekun'n
KOSAN MƆ BIBLU’N TƐ BE SU’N
?Ngue ndɛ yɛ Biblu’n kɛn i sanvuɛsa’m be su-ɔ?
?Ɲanmiɛn fa sanvuɛsa mun tu e fɔ? ?Ɲanmiɛn suan be nga sanvuɛsa ɲan be’n be bo?
NINNGE CINNJIN NGA BIBLU’N KLE BE’N
?Ngue yɛ be flɛ i Ɲanmiɛn Sielɛ’n niɔn?
I nun mɔ Zezi kán Ɲanmiɛn ndɛ’n, ɔ kannin Ɲanmiɛn Sielɛ’n i ndɛ trali like kwlaa. I afuɛ ya kpanngban yɛ, sran’m be srɛ maan Sielɛ’n i blɛ’n ju.
E SU NDƐ
Se e naan e wa nian ɔ osu
A nin Zoova i Lalofuɛ mun amun koko Biblu’n nun ndɛ kun su yalɛ, annzɛ kunndɛ kɛ á sí be su ndɛ kpa.
