Afuɛ 2023, Mɛ i le 23 su’n, Etazinin lɔ’n dɔɔtrɔ’m be su kpɛn’n seli kɛ rezo sosio’m be kle gbanflɛn nin talua sunman be yalɛ.

•   “Rezo sosio’m be yo bakan nin gbanflɛn nin talua suman be ye. Sanngɛ sa kpanngban be kle kɛ rezo sosio’m be kwla sanngan be akunndan yɛ be kwla man be tukpacɛ bɔbɔ.”—Social Media and Youth Mental Health: The U.S. Surgeon General’s Advisory, 2023.

 Fluwa kunngba sɔ nun’n be kannin sa nga ti yɛ ɔ fata kɛ ndɛ sɔ’n yo e cinnjin’n i ndɛ.

•   Ba nga be le afuɛ 12 m’ɔ́ fá ju 15 “mɔ aliɛ ba kun nun’n be di dɔ 3 rezo sosio’m be su’n be ti nun kwla sanngan ndɛndɛ yɛ be wla kwla bo be wun.”

•   Ba nga be le afuɛ 14, “mɔ be kɔ rezo sosio’m be su dan’n be nun wie’m be lafiman kpa, sran wie’m be kle be yalɛ ɛntɛnɛti su, be bumɛn i kɛ be ti klanman. Asa’n, be buman be wun sran yɛ be wla bo be wun tratra su. Ba bla mun yɛ i sɔ’n ju be su dan-ɔn.”

 ?Wafa sɛ yɛ siɛ nin niɛn’m be kwla sasa be mma mun-ɔn? Biblu’n man afɔtuɛ kpakpa wie mun.

 Nán amun ɲin kpa be su. Amun bu sa ng’ɔ kwla tɔ amun mma’m be su’n i akunndan. Yɛ amun nian sɛ ɔ fata kɛ be wɔ rezo sosio’m be su annzɛ nán be wɔ-o.

•   Ndɛ nga Biblu’n kan’n: “Kle bakan’n i atin ng’ɔ fata kɛ ɔ fa su’n.”—Ɲanndra Mun 22:6, ja ngua lɔ ndɛ’n.

•   Sɛ a kunndɛ kɛ á sí nun kpa ekun’n, kanngan ndɛ “Mon enfant devrait-il utiliser les réseaux sociaux ?” nun.

 Sɛ amun man amun mma’m be atin kɛ be wɔ rezo sosio’m be su’n, an fa amun ɲin sie i ninnge nga be kwla yo be abɔlɛ’n be su. Asa’n, an fa amun ɲin sie i ninnge nga be yo be lɔ’n be su wie. ?Wafa sɛ yɛ an kwla yo sɔ-ɔ?

 An sasa amun mma mun ninnge nga be kwla yo be abɔlɛ rezo sosio’m be su’n be lika. An uka amun mun naan be si ninnge ng’ɔ fata kɛ be nian be wun su be lika’n.

•   Ndɛ nga Biblu’n kan’n: “Nán maan bla nin bian kunndɛlɛ sukusuku nin i wunsu ɲannzuɛn sa nin sa kainkain wafawafa kwlaa annzɛ aɲinkpli be tran amun afiɛn le. […] Asa ekun’n, nán an yo ɲannzuɛn sa fi, nán an ijɔ finfin, nán an di aɔwi tɛtɛ.”—Efɛzifuɛ Mun 5:3, 4.

•   Sɛ a kunndɛ kɛ á sí nun kpa ekun’n, kanngan ndɛ “Protégez votre adolescent des dangers des réseaux sociaux” nun.

 An kle like nga be kwla yo’n ɔ nin nga be kwlá yoman’n. I wie yɛle kɛ amun kle be blɛ ng’ɔ fata kɛ be ɔ rezo sosio’m be su’n ɔ nin dɔ ng’ɔ fata kɛ be di i lɔ’n.

•   Ndɛ nga Biblu’n kan’n: “An nian wafa nga an fa nanti’n i su kpa titi, [….] an nanti kɛ ngwlɛlɛfuɛ mun sa. An fa amun blɛ’n fa yo ninnge nga be ti cinnjin’n.”—Efɛzifuɛ Mun 5:15, 16.

•   Fa video ng’ɔ suan Nian ɔ wun su ɛntɛnɛti su yalɛ kokolɛ’n nun uka ɔ wa’n naan ɔ wun like nga ti yɛ ɔ fata kɛ ɔ niɛn i wun su rezo sosio’m be lika’n i wlɛ.