Mɛn wunmuan’n nun’n, ɔ yo sran kpanngban’m be kɛ be ngunmin yɛ be o sa naan be kwlá faman be wun mantan sran. Sanngɛ dɔɔtrɔfuɛ wie’m be waan sɛ be nga ɔ yo be kɛ be ngunmin yɛ be o sa’n be uka sran uflɛ’n, bé wún be wun fɛ kan.

•   Fluwa kun seli kɛ: “Sran ng’ɔ ti i wiengu’m be wun ɲanman nun’n, ɔ wun i wlɛ kɛ ɔ nunman mɛn’n nun sa ngbɛn. Asa’n, i sɔ’n ukɛ i naan w’a yomɛn i kɛ i ngunmin yɛ ɔ o naan ɔ kwlá fɛmɛn i wun mantanman sran sa.”—U.S. National Institutes of Health.

 Biblu’n kle e ninnge trele wie mɔ e kwla yo be naan y’a uka e wiengu mun’n. Sɛ e yo ninnge sɔ mun’n, ɔ su yoman e kɛ e ngunmin yɛ e o sa.

 Yo klun ufuefuɛ. Fa ɔ wun mantan sran. Sɛ a kwla ko nian be osu’n yɛ ɔ ti kpa’n niɔn. Asa’n, fa ɔ sa nun ninnge mun suan be bo. Kɛ á yó sɔ’n, bé klé kɛ be si ye. Ɔ maan amun afiɛn mántan kpa.

•   Biblu’n nun ndɛ’n: “Amun cɛ sran like titi, i liɛ’n sran’m bé cɛ́ amun like wie.”—Liki 6:38.

 Ti ɔ wiengu’m be wun ɲanman nun. Sɛ sa kekle wie’m be o ɔ wiengu’m be su’n, yo ninnge trele wie mun fa uka be. I wie yɛle kɛ fa ɔ su sie be nuan bo kpa, annvɔ mɔ be yo’n ti. Asa’n, a kwla se be kɛ á yó ninnge wie mun mán be naan be su sa’n w’a tinman be su dan.

•   Biblu’n nun ndɛ’n: “Janvuɛ kpa’n, ɔ kle kɛ ɔ klo sran blɛ kwlaa nun.”—Ɲanndra Mun 17:17.

 Sɛ a kunndɛ kɛ á sí ninnge nga a kwla yo be naan a nin ɔ wiengu mun amun afiɛn w’a mantan kpa titi’n i su like ekun’n, kanngan ndɛ nga nun: “E awlofuɛ nin e janvuɛ mun.”