Ndɛ ng’ɔ o Ebre Mun 12:16 nun ti’n, laa’n e buli i sɔ. Ɔ se kɛ Ezau ‘w’a buman Ɲanmiɛn i ninnge’m be like fi. Aliɛ talie kun ti ɔ yoli i kpɛnngbɛn’n i atɛ.’ Ɔ maan, kɛ mɔ Ezau yoli “i kpɛnngbɛn’n” i atɛ Zakɔbu sa nun’n, e buli i kɛ i sɔ’n ti yɛ Zakɔbu yoli Mɛsi’n i nannan-ɔn.—Matie 1:2, 16; Lik 3:23, 34.

Sanngɛ, e wa fali e ɲin sieli i Biblu’n nun ndɛ wie mun ekun be su kpa. Ɔ maan, e wunnin i wlɛ kɛ ɔ timan cinnjin kɛ yasua kun yo ba kpɛn naan w’a yo Mɛsi’n i nannan. Maan e fa e ɲin e sie i ndɛ sɔ’m be nun wie’m be su.

Ribɛnin ti Zakɔbu nin Lea be wa kpɛn. Yɛ Zozɛfu kusu ti Zakɔbu nin Rasɛli be wa kpɛn. Kɛ Ribɛnin nin i si’n i soman’n be lali’n, aja ng’ɔ fata kɛ ba kpɛn’n ɲɛn i’n, w’a ɲɛnmɛn i. Aja sɔ’n yoli Zozɛfu liɛ. (Bo Bolɛ 29:31-35; 30:22-25; 35:22-26; 49:22-26; 1 Be Nyoliɛ 5:1, 2) Sanngɛ, i Ribɛnin o, i Zozɛfu o, be nun wie fi w’a yoman Mɛsi’n i nannan. Zida m’ɔ ti Zakɔbu nin Lea be wa nnan su’n, yɛ ɔ yoli Mɛsi’n i nannan-ɔn.—Bo Bolɛ 49:10.

Mɛsi’n i nannan nnun be dunman o Lik 3:32 nun. Be kwlakwla be ti ba kpɛn. I wie yɛle kɛ, ndɛ mma sɔ’n se kɛ Bɔazi ti Zɔbɛdi i si, yɛ Zɔbɛdi kusu ti Izai i si.—Rit 4:17, 20-22; 1 Be Nyoliɛ 2:10-12.

Izai ɲannin ba yasua mɔcuɛ. Davidi yɛ ɔ ti be kasiɛn’n niɔn. Sanngɛ, Davidi yoli Mɛsi’n i nannan. (1 Samiɛl 16:10, 11; 17:12; Matie 1:5, 6) Salomɔn kusu timan Davidi i  wa klikli. Sanngɛ, ɔ yoli Mɛsi’n i nannan wie.—2 Samiɛl 3:2-5.

I sɔ’n kleman kɛ sɛ sran kun ti ba kpɛn’n i sɔ’n timan cinnjin. Afin, ba yasua nga be ti ba kpɛn’n be ɲan ninnge wie mɔ ba yasua onga’m be ɲanman wie-ɔ. I wie yɛle kɛ, sɛ siɛ’n nunman lɛ’n, i yɛ ɔ ti awlo’n i su kpɛn-ɔn. Asa ekun’n, aja like ng’ɔ ɲɛn i’n, ɔ trɛ i niaan yasua onga’m be liɛ’n kpɛ nɲɔn.—Bo Bolɛ 43:33; Mmla’n 21:17; Zozie 17:1.

Biblu’n kle kɛ ba yasua uflɛ kwla sin ba kpɛn’n i osu. Kɛ Abraamun fuannin Ismaɛli m’ɔ ti i wa kpɛn’n, Izaaki yɛ ɔ ɲannin aja ng’ɔ fata kɛ Ismaɛli ɲɛn i’n niɔn. (Bo Bolɛ 21:14-21; 22:2) Yɛ kɛ nga e fa wunnin i’n sa’n, aja like ng’ɔ fata kɛ Ribɛnin m’ɔ ti ba kpɛn’n, ɔ ɲɛn i’n, Zozɛfu yɛ ɔ wa ɲɛnnin i-ɔ.

?Sɛ ɔ ti sɔ’n, ngue yɛ ndɛ nga akoto Pɔlu kɛnnin i Ebre Mun 12:16 nun’n, ɔ kle e-ɔ? Ɔ seli kɛ: “An nian amun wun kpa naan sran fi a kunndɛ-man bla nin bian, yɛ sran fi a bu-man Nyanmiɛn i ninnge’m be kɛ be ti-man like fi kɛ Ezau bɔ aliɛ talie kun ti ɔ yoli i kpɛnngbɛn’n i atɛ’n sa.”

Ndɛ mma sɔ nun’n, nán kɛ Pɔlu su kan Mɛsi’n i nannan’m be ndɛ-ɔ. Sanngɛ, ɔ su man Klistfuɛ’m be afɔtuɛ. Ɔ seli be kɛ: “An kpɛ atin nga an sin nun’n kpa. [...] Nán maan ye nga Nyanmiɛn yo sran’n ɔ to fuan sran fi.” Sɛ Klistfuɛ sɔ’m b’a nianman be wun kpa’n, naan be kunndɛ bla nin bian sukusuku’n, Ɲanmiɛn su kwlá yoman be ye. (Ebre Mun 12:12-16) Yɛ bé yó kɛ Ezau sa. Like mɔ i konvi sɔ i’n ti’n, ‘w’a buman Ɲanmiɛn i ninnge’m be like fi.’

Laa’n, be nga be su Zoova’n be yi tɛ be mɛn i. Atrɛkpa’n, Ezau yoli sɔ wie. (Bo Bolɛ 8:20, 21; 12:7, 8; Zɔb 1:4, 5) Sanngɛ akpesi dilɛ ti’n, ɔ yoli i kpɛnngbɛn’n i atɛ. Zoova seli Abraamun kɛ i anunman’m bé wún be ɲrun. (Bo Bolɛ 15:13) Atrɛkpa’n, Ezau w’a kunndɛman kɛ i sɔ sa’n ju. Like kun ekun m’ɔ kle kɛ Ezau buman Ɲanmiɛn i ninnge’m be like fi’n, yɛle kɛ bla ng’ɔ jali be’n, be suman Ɲanmiɛn. I sɔ’n yoli i si nin i nin be ya dan. (Bo Bolɛ 26:34, 35) Zakɔbu liɛ’n, w’a yoman kɛ Ezau sa. Ɔ jali Ɲanmiɛn i sufuɛ kun.—Bo Bolɛ 28:6, 7; 29:10-12, 18.

Biblu’n nun ndɛ sɔ’m be kle kɛ, Mɛsi’n i nannan’m be nun wie’m be ti ba kpɛn, yɛ wie’m be kusu be timan ba kpɛn. Zuifu’m be wunnin i wlɛ sɔ. Yɛ b’a siman su akplowa. Afin, be bɔbɔ be dili i nanwlɛ kɛ Klist ti Davidi m’ɔ ti Izai i wa kasiɛn’n, i anunman.—Matie 22:42.