1, 2. ?Kɛ é sú Zoova é kɔ́ e ɲrun’n, ngue yɛ e wun i wlɛ-ɔ? An fa sunnzun ase kun be yiyi nun.

WIE liɛ’n, kɛ sran kun cɛ ba kaan kun i like’n, i si nin i nin be se i kɛ ɔ yo i kwla. Kɛ mɔ i si nin i nin be seli i kɛ ɔ la sran’n i ase’n, i ti yɛ ɔ́ yó sɔ-ɔ. Sanngɛ kɛ ɔ ko yo kaklaka’n, yɛ ɔ́ wún like nga ti yɛ i si nin i nin be seli i kɛ sɛ sran kun cɛ i like’n, ɔ fata kɛ ɔ yo i kwla’n, i wlɛ-ɔ. Kɛ ɔ ko wun i wlɛ sɔ siɛn’n, sɛ sran wie yo like kpa kun mɛn i’n, ɔ́ yó i kwla. Afin ɔ si kɛ ɔ fata kɛ ɔ kle kɛ ɔ si ye.

² I wafa kunngba’n, kɛ e boli Biblu’n nun like suanlɛ bo’n, e wunnin i wlɛ kɛ ɔ fata kɛ e nanti Zoova i mmla cinnjin’m be su. Sanngɛ kɛ é sú Zoova é kɔ́ e ɲrun’n, e si akunndan ng’ɔ bu’n. Yɛle kɛ, e si like ng’ɔ klo i’n, ɔ nin like ng’ɔ klomɛn i’n yɛ wafa ng’ɔ yo ninnge mun’n. Kɛ wafa nga Zoova yo ninnge mun’n i su yɛ e nian e yo e liɛ mun’n, annzɛ i su yɛ e jran e fa ajalɛ’n, e kle kɛ akunndan ng’ɔ bu’n, i wie yɛ e bu-ɔ.

3. ?Ngue ti yɛ kɛ ɔ ko yo naan y’a bu akunndan nga Zoova bu wie’n, ɔ ti kekle man e-ɔ?

³ E klo kpa kɛ é bú akunndan nga Zoova bu’n wie. Sanngɛ fɔ m’ɔ o e nun ti’n, i sɔ yolɛ’n timan pɔpɔ e sa nun cɛn ngba. I wie yɛle kɛ e si wafa nga Zoova bu bla nin bian kunndɛlɛ  sukusuku’n, nin aɲanbeun ninnge’m be kunndɛlɛ ngboko’n, nin jasin fɛ bolɛ’n nin mmoja’n yɛ ninnge wie mun ekun. Sanngɛ wie liɛ’n, e wunman sa nga ti yɛ Zoova bu ninnge sɔ’m be wun akunndan sɔ’n, i wlɛ kpa. ?Ɔ maan é yó sɛ naan titi’n, y’a bu akunndan nga Zoova bu’n wie? ?Wafa sɛ yɛ i sɔ’n kwla uka e naan y’a fa ajalɛ kpa titi-ɔ?

4. ?Sɛ e waan é káci akunndan nga e bu’n, ngue yɛ é yó-ɔ?

⁴ An kanngan Rɔmfuɛ Mun 12:2 nun. Ndɛ mma nga nun’n, akoto Pɔlu kleli like ng’ɔ fata kɛ e yo naan y’a bu akunndan nga Zoova bu’n wie’n. Ɔ seli kɛ nán e “yo kɛ sran mun mɔ be o lɛ ndɛ’n be sa.” Like suanlɛ ng’ɔ sinnin lɛ nun’n, e wunnin kɛ ɔ fataman kɛ e bu akunndan nga mɛn nunfuɛ’m be bu’n wie. Yɛ nán e nian be ayeliɛ’n su. Sanngɛ Pɔlu seli kɛ maan e kaci akunndan nga e bu’n. Sɛ e waan é yó sɔ’n, ɔ fata kɛ e suan Biblu’n nun like naan e si akunndan nga Zoova bu’n. Kpɛkun ɔ fata kɛ e bu like nga e suan’n i su akunndan, yɛ mian e ɲin e bu akunndan nga Zoova bu’n wie.

5. ?Ngbaciɛ benin yɛ ɔ o fluwa nun kannganlɛ’n, ɔ nin fluwa nun like suanlɛ’n be afiɛn-ɔn?

⁵ Kɛ be se kɛ be suan like’n, nɛ́n i yɛle fluwa nun kannganlɛ ndɛndɛ nin kosan’m be su tɛlɛ’m be bo jajalɛ sa ngbɛn. Ɔ fata kɛ e bu like nga e suan’n i su akunndan naan e wun like ng’ɔ kle e Zoova su’n. Kpɛkun maan e wun like ng’ɔ yo be’n i wlɛ yɛ e si wafa ng’ɔ bu akunndan’n. Asa ekun’n, maan e wun sa nga ti yɛ Zoova se e kɛ e yo ninnge wie mun’n kpɛkun ɔ tannin e ninnge wie’m be yolɛ’n, i wlɛ. Ɔ fata kɛ e bu wafa nga e kwla kaci e klun akunndan nin e ayeliɛ’n, i akunndan. Kɛ é súan like’n e su kwlá buman like tɛkɛtɛkɛ kwlaa nga e suannin’n, be su akunndan blɛ kunngba’n nun. Sanngɛ maan e fa blɛ e bu like nga e suannin’n be nun wie’m be su akunndan kpa.—Jue Mun 119:97; 1 Timote 4:15.

6. ?Kɛ e bu Biblu’n nun like nga e suan’n i su akunndan’n, i su ye benin yɛ e ɲɛn i-ɔ?

⁶ Kɛ e bu Biblu’n nun like nga e suan’n, i su akunndan titi’n, e ɲan su ye. Yɛle kɛ e bɔbɔ e wun i wlɛ kɛ akunndan nga Zoova bu’n ti kpa dan. E wun wafa ng’ɔ yo ninnge mun’n, i wlɛ. I agualiɛ su’n, e niɛn i ayeliɛ’n su. E kaci akunndan nga e bu’n. Kpɛkun blɛblɛblɛ, e bu akunndan ng’ɔ bu’n wie.

7, 8. (1) ?Wafa sɛ yɛ Zoova bu aɲanbeun ninnge mun-ɔn? (An nian desɛn nga be o kan like suanlɛ’n bo i bo lɛ’n.) (2) ?Sɛ e bu aɲanbeun ninnge’m be kɛ nga Zoova bu be sa wie’n, ngue yɛ ɔ́ yó e cinnjin-ɔn?

⁷ Akunndan nga e bu’n, i su like yɛ e yo-ɔ. (Mark 7:21-23; Zak 2:17) Maan e fa sunnzun wie mun e yiyi nun. I klikli’n yɛle awlobo nga Zoova maan i nun yɛ be wuli Zezi’n. I sɔ’n yi wafa ng’ɔ bu aɲanbeun ninnge mun’n, i nglo weiin. Ɲanmiɛn bɔbɔ kpali Zozɛfu nin Mali kɛ be tɛ i wa’n, kusu nn be timan aɲanbeunfuɛ. (Saun Yolɛ 12:8; Lik 2:24) Kɛ Mali wuli Zezi’n, ɔ “lɛli i nnɛn’m be like diwlɛ’n nun, yɛlɛ kɛ b’a nyan-man sikewlɛ aofuɛ sua’n nun lɔ.” (Lik 2:7) Sɛ ɔ ti kɛ Zoova kunndɛ kɛ be wu Zezi lika klanman kpa kun nun’n, nn ɔ yoli sɔ. Sanngɛ nɛ́n i sɔ liɛ’n yɛ ɔ ti i cinnjin-ɔn. Like ng’ɔ ti i cinnjin’n,  yɛle kɛ be nga be fɛ i sulɛ’n be sie i like kwlaa ɲrun’n, yɛ be tɛ i wa’n niɔn.

⁸ Zezi i awuliɛ’n i su ndɛ nga Biblu’n kan’n, ɔ yi wafa nga Zoova bu aɲanbeun ninnge mun’n i nglo. Siɛ nin niɛn wie’m be kunndɛ kɛ be mma’m be ɲan aɲanbeun ninnge kpanngban. Kusu nn be si kɛ ninnge sɔ’m be ti’n, be mma’m be nin Zoova be afiɛn kwla saci. Zoova liɛ’n, like ng’ɔ ti i cinnjin kpa’n, yɛle kɛ e nin i e afiɛn mantan kpa. ?Ninnge nga e yo be’n, be kle kɛ i sɔ wie yɛ e kunndɛ-ɔ?—An kanngan Ebre Mun 13:5 nun.

9, 10. ?É yó sɛ naan y’a kle kɛ e bu akunndan nga Zoova nin Zezi be bu’n wie?

⁹ I nɲɔn su’n yɛle wafa nga Zoova bu be nga be yo maan be wiengu’m be yo sa tɛ’n. Sran sɔ’m be wun akunndan nga Zoova bu’n, Zezi kɛnnin i ndɛ. Ɔ seli kɛ: “Sɛ sran wie saci ba kanngan nga be lafi n su’n be nun kun ti nun’n, ɔ flunman kɛ be fa yɛbuɛ nin dan kun minndɛ i kɔmin be to i yi jenvie’n nun.” (Mark 9:42) I sɔ’n kle weiin kɛ Zoova nin Zezi be ɲrun’n, sran ng’ɔ yo sɔ’n nn w’a yo sa tɛ dan. I sɔ’n ti’n, e si kɛ sɛ sran kun i bɔbɔ i ɲinfu saci Zezi i sɔnnzɔnfuɛ kun ti nun’n, Zoova fɛ́ i wun ya dan kpa.—Zan 14:9.

¹⁰ ?Akunndan sɔ mɔ Zoova nin Zezi be bu’n, i wie yɛ e bu-ɔ? Wienun-ɔn e klo tralɛ annzɛ be wun siesielɛ wafa wie kpa. ?Sanngɛ sɛ i sɔ’n kwla sanngan aniaan wie i akunndan asɔnun nun’n, annzɛ ɔ kwla yo maan aniaan wie bu bla annzɛ bian kunndɛlɛ sukusuku i akunndan’n, ngue yɛ é yó-ɔ? ?Klolɛ mɔ e klo e niaan mun ti’n, é kpálo i sɔ ninnge mun?—1 Timote 2:9, 10.

11, 12. ?Sɛ e kpɔ sa tɛ’n naan e nian e wun su titi’n, wafa sɛ yɛ i sɔ’n kwla uka e-ɔ?

¹¹ Like’n i nsan su’n yɛle kɛ Zoova klo sa nga be yo i i nuan su’n. (Ezai 61:8) Sanngɛ Zoova bɔbɔ si kɛ ɔ ju wie’n, sa’n i nuan su yolɛ’n ti kekle man e. Afin fɔ o e nun. Ɔ nin i sɔ ngba’n, ɔ klo kɛ e kpɔ sa tɛ’n, afin i bɔbɔ kpɔ sa tɛ’n. (An kanngan Jue Mun 97:10 nun.) Sɛ e bu like nga ti yɛ Zoova kpɔ ninnge wie mun’n i su akunndan’n, é kwlá bú akunndan ng’ɔ bu’n wie. Kpɛkun i sɔ’n mán e wunmiɛn naan y’a yoman like ng’ɔ ti tɛ’n.

¹² Ayeliɛ wie’m be o lɛ’n, Biblu’n kanman be ndɛ trele. Sɛ e kpɔ sa tɛ’n, é wún i wlɛ kɛ be nin Klistfuɛ fataman. I wie yɛle able silɛ wafa wie m’ɔ w’a tru mɛn nun kpa andɛ’n. Kɛ bé sí able sɔ’n, be yo kɛ be su kunndɛ bla annzɛ bian sa. Sran wie’m be bu i kɛ ɔ timan like tɛ, naan i sɔ’n timan bla annzɛ bian kunndɛlɛ. * (An nian nzɔliɛ’n i su ndɛ’n.) ?Sanngɛ wafa sɛ yɛ Zoova bu i sɔ able liɛ’n niɔn? Nán e wla fi su kɛ Zoova kpɔ sa tɛ’n i wafawafa kwlaa. I sɔ’n ti’n, maan e nian e wun su yɛ e kpɔ like nga Zoova kpɔ i’n. Sɛ e yo sɔ’n,  e konvi su sɔman sa tɛ yolɛ’n.—Rɔmfuɛ Mun 12:9.

13. ?Ngue ti yɛ ɔ fata kɛ e bu wafa nga Zoova yo ninnge mun’n, i su akunndan-ɔn?

¹³ Kɛ é súan like’n, maan e bu wafa nga Zoova yo ninnge mun’n, i su akunndan. I liɛ’n, sɛ e waan é fá ajalɛ wie’n, i sɔ’n úka e. Sɛ sa wie nun’n, ɔ fata kɛ e fa ajalɛ kun ndɛndɛ bɔbɔ’n, é sí like ng’ɔ fata kɛ e yo’n. (Nyanndra Mun 22:3) Biblu’n nun ndɛ wie’m be kle sɔ weiin.

14. ?Ngue yɛ ndɛ nga Zozɛfu kan kleli Potifali i yi’n kle e-ɔ?

¹⁴ Zozɛfu si wafa nga Zoova bu aja’n. I sɔ’n ti’n, kɛ Potifali i yi’n waan ɔ nin i bé lá’n, w’a kplinman su. (An kanngan Bo Bolɛ 39:8, 9 nun.) Zozɛfu seli Potifali i yi’n kɛ: “N yo sa tɛ dan nga-a ɔ yo-man ye. Sɛ n yo sɔ-ɔ, wuun Nyanmiɛn yɛ m’an wɔ i safle-ɔ.” Ndɛ ng’ɔ kannin’n kle kɛ ɔ bu akunndan nga Zoova bu’n wie. ?Yɛ e li? ?Sɛ e wiengu junman difuɛ kun kunndɛ kɛ ɔ nin é trá ndalie’n, ngue yɛ é yó-ɔ? ?Sɛ sran kun klɛ bla annzɛ bian kunndɛlɛ sukusuku i su ndɛ, annzɛ ɔ fɛ i su foto blɛ e e pɔɔtablu nun’n, ngue yɛ é yó-ɔ? * (An nian nzɔliɛ’n i su ndɛ’n.) Maan e dun mmua e suan wafa nga Zoova bu ninnge sɔ mun’n, i su like naan e wun i wlɛ. Kpɛkun sɛ i sɔ sa’n wie ju e su’n, like nga é yó’n, maan e dun mmua e bu i akunndan e sie. Sɛ e yo sɔ’n, Zoova i mmla’m be su nantilɛ’n yó pɔpɔ e sa nun.

15. ?Ngue yɛ é yó naan e nin Zoova y’a nanti klanman titi-ɔ?

¹⁵ Maan e kan Ebre gbanflɛn nsan be ndɛ. Be yɛle Sadraki nin Mesaki, yɛ Abɛdnego. Kɛ Famiɛn Nɛbikadnɛzali seli be kɛ be koto sika ɔkwlɛ sran m’ɔ takali’n i bo’n, b’a kplinman su. Ndɛ nga be kan kleli Famiɛn’n kle weiin kɛ sɛ be nin Zoova be nanti klanman titi’n, wafa nga i bo’n gúa’n, be dun mmua buli su akunndan. (Ezipt Lɔ Tulɛ 20:4, 5; Daniɛl 3:4-6, 12, 16-18) Wienun-ɔn, e junman su min’n se e kɛ e man sika naan bé fá dí cɛn. Kusu nn titi’n, be nga be o Ɲanmiɛn sulɛ wafa ng’ɔ timan su’n be nun’n, be yɛ be di cɛn sɔ’n nin-ɔn. ?Ngue yɛ é yó-ɔ? Ka naan i sɔ sa’n w’a ju e su’n, ɔ fata kɛ dɔ nga su’n, e si cɛn nga sran’m be di be’n, be su akunndan nga Zoova bu’n. I liɛ’n, kɛ Ebre gbanflɛn nsan’m be liɛ’n sa’n, sɛ sa sɔ’n wie fu e nun’n, é sí ndɛ ng’ɔ fata kɛ kan’n, annzɛ like nga é yó’n.

16. ?Kɛ e wun wafa nga Zoova yo ninnge mun i wlɛ’n, mɔ e kɔ dɔɔtrɔ’n wafa sɛ yɛ i sɔ’n kwla uka e-ɔ?

¹⁶ Sɛ e wun wafa nga Zoova yo ninnge mun i wlɛ kpa’n, sɛ e kɔ dɔɔtrɔ naan ɔ fata kɛ e fa ajalɛ ndɛndɛ naan b’a yo e ayre’n, é sí like ng’ɔ fata kɛ e yo’n. E si kɛ e faman mmoja’n nin i nun ninnge cinnjin nnan mun e wlaman e kplo nun. (Sa Nga Be Yoli’n 15:28, 29) Sanngɛ andɛ’n, sran ayre yolɛ nun’n, dɔɔtrɔ’m be kwla fa sran’n i mmoja’n be di junman. I lɛ nun’n, Klistfuɛ kun bɔbɔ yɛ ɔ fata kɛ ɔ nian Ɲanmiɛn  ndɛ nun naan w’a fa ajalɛ kun-ɔn. ?Blɛ benin nun yɛ ɔ fata kɛ e si like trele ng’ɔ fata kɛ e yo’n niɔn? ?Kɛ e la dɔɔtrɔ lɔ’n nin-ɔn? ?Annzɛ kɛ e su fɛ mɔ be mian e kɛ e fa ajalɛ kun ndɛndɛ’n niɔn? Ɔ si’ɛ mlɔnmlɔn. Dɔ nga su yɛ ɔ fata kɛ e kunndɛ ayre wafa sɔ’m be su ndɛ nga e fluwa’m be kan’n, naan e wun i wlɛ kpa-ɔ. Annzɛ sɛ e le dɔɔtrɔ fluwa wie mun’n, maan e klɛklɛ su naan dɔɔtrɔfuɛ’m be wun ayre nga e klo kɛ be fa yo e’n. Fluwa sɔ’n i wie yɛle e fluwa nga be flɛ i kɛ DPA. Asa ekun’n, sɛ e le dɔɔtrɔfuɛ kun m’ɔ yo e ayre titi’n, e nin i e kwla koko i sɔ’n su yalɛ. * (An nian nzɔliɛ’n i su ndɛ’n.)

17-19. ?Ngue ti yɛ dɔ nga su’n, ɔ ti cinnjin kɛ e si akunndan nga Zoova bu’n niɔn, i kpa dɔ nga su-ɔ? An fa sunnzun ase kun be yiyi nun.

¹⁷ Cɛn kun’n, akoto Piɛli seli Zezi kɛ: “N kpla e! Nannan, nán maan Nyanmiɛn di su maan sa nga tɔ wɔ su.” Nán afɔtuɛ kpa yɛ akoto Piɛli mannin Zezi-ɔ. I ti’n, Zezi w’a faman su. Zezi buli like nga Ɲanmiɛn kunndɛ kɛ ɔ yo’n, i su akunndan kpa. Kpɛkun i su ndɛ nga Ɲanmiɛn nuan ijɔfuɛ’m be kannin m’ɔ fata kɛ ɔ kpɛn su’n, ɔ buli su akunndan wie. I sɔ’n m’ɔ yoli’n ti’n, ɔ nin Zoova be nantili klanman lele ɔ fɛli i nguan’n kpɔli e ti.—An kanngan Matie 16:21-23 nun.

¹⁸ Ɲanmiɛn kunndɛ kɛ e yo i janvuɛ, yɛ e tu e klun e bo jasin fɛ’n. (Matie 6:33; 28:19, 20; Zak 4:8) Sanngɛ sran’m be kwla bubu e sa sin. Kɛ bé yó sɔ’n, be bu i kɛ be su yo e ye. Laa’n akoto Piɛli bubuli Zezi i sa sin sɔ wie. Wie liɛ’n, e junman su min’n kwla se e kɛ ɔ́ úka e akatua’n su. Sanngɛ junman nga wá fá mán e ti’n, e su kwlá tranman aɲia’m be kwlaa be bo yɛ e su kwlá boman jasin fɛ’n titi. ?I lɛ nun’n, ngue yɛ é yó-ɔ? Wie liɛ’n kusu’n, e ti suklu ba. Kpɛkun e suklu klefuɛ’m be kunndɛ kɛ bé fá é kɔ́ suklu dan kun nun. Sanngɛ, ɔ fata kɛ e jaso e si nin e nin’m be bo wun naan y’a kwla di suklu sɔ’n. ?Sɛ i sɔ  sa ju’n, ngue yɛ é yó-ɔ? Ka naan y’a fa ajalɛ kun’n, maan e srɛ Zoova, e nian fluwa nga anuannzɛ’n yi be’n, be nun. Kpɛkun e usa ngwlɛlɛ afɛ e osufuɛ mun nin asɔnun kpɛnngbɛn’m be sa nun. Ɔ fata kɛ e si sa sɔ’m be su akunndan nga Zoova bu’n, naan e bu akunndan kunngba’n wie dɔ nga su. I liɛ’n, é fá e ɲin síe i Zoova i sulɛ’n su titi. Ɔ maan, sɛ sa sɔ’m be ju’n, é sí like trele ng’ɔ fata kɛ e yo’n.

¹⁹ E kwla bu sa fanunfanun wie mun ekun mɔ be kwla ju e su’n be akunndan. E si kɛ e kwlá buman ajalɛ kunngunngun nga é fá be sa fanunfanun sɔ’m be nun’n, be akunndan e sieman. Sanngɛ, kɛ e tinuntinun é súan Biblu’n nun like’n, maan e fa blɛ e bu wafa nga Zoova yo ninnge mun’n, be su akunndan kpa naan e wun i wlɛ. I liɛ’n, kɛ sa’m be ju e su’n, e wla kwla kpɛn su. Kpɛkun, e kwla wun wafa nga e kwla jran su e fa ajalɛ kpa’n. I sɔ’n ti’n, kɛ é súan Biblu’n nun like’n, maan e mian e ɲin naan e si akunndan nga Zoova bu’n . Sɛ e yo sɔ’n, é fá ajalɛ kpa titi.

20, 21. (1) ?Ngue ti yɛ é wá dí aklunjuɛ dan mɛn klanman’n nun-ɔn? (2) ?Ngue yɛ é yó naan e klun w’a jɔ andɛ-ɔ?

²⁰ E kwlakwla e ɲin o mɛn klanman’n i sin kpa. E nun kpanngban kpa e lafi su kɛ é trán mɛn klanman nun asiɛ’n su wa. Yɛ kɛ Zezi wá síe e’n, afɛ’n nin ɲrɛnnɛn kwlaa nga be o e su’n bé wíe. Kpɛkun é kwlá yó e klunklo ninnge mun.

²¹ Sanngɛ i sɔ’n kleman kɛ é ɲán atin é yó like kwlaa nga e klo’n. Wafa nga Zoova yo ninnge mun’n, ɔ nin i mmla’m be su yɛ sran wɛtɛɛfuɛ’m bé jrán naan b’a fa ajalɛ titi-ɔ. I sɔ’n ti’n, bé dí aklunjuɛ dan kpa, kpɛkun bé wún jɔ́ be kpa fɔuun titi. (Jue Mun 37:11) Ka naan i sɔ’n blɛ’n w’a ju’n, maan e bu akunndan nga Zoova bu wie titi. I liɛ’n, dɔ nga su bɔbɔ’n e klun kwla jɔ.