1. (1) ?Ngue ndɛ yɛ Ezai kɛnnin i Zezi su-ɔ? (2) ?Ngue ti yɛ ndɛ sɔ’n wla fanngan-ɔn?

ƝANMIƐN nuan ijɔfuɛ Ezai kannin Zezi i ndɛ seli kɛ, “ɔ su nianman sran ɲrun naan w’a bu ndɛ, nán be waan yɛ ɔ́ fá kɛ́n i ndɛ liɛ nin-ɔn. Be nga be ti yalɛfuɛ’n, ɔ́ dí be ndɛ’m be kpa.” (Ezai 11:3, 4) I ndɛ sɔ’n wla fanngan kpa. Afin, andɛ mɛn nga nun’n, sran’m be buman be wiengu’m be wun akunndan kpa. Be nian sran ɲrun yɛ be bu ndɛ-ɔ. I sɔ’n ti’n, e mian jɔlɛ difuɛ kpa kun kɛ Zezi sa’n i wun. I liɛ’n, ɔ nianman sran ɲrun naan w’a di ndɛ.

2. (1) ?Ngue yɛ Zezi seli kɛ e yo-ɔ? (2) ?Ngue yɛ é wá kɛ́n i ndɛ like suanlɛ nga nun-ɔn?

² Cɛn kwlakwla’n, ɔ le akunndan wie mɔ e bu i e wiengu’m be wun-ɔn. Sanngɛ, akunndan nga e bu’n, nɛ́n i ngba yɛ ɔ ti su-ɔ. Afin e timan kɛ Zezi sa. E liɛ’n, fɔ o e nun. Sa nga e wun i’n i su yɛ e jran di jɔlɛ-ɔ. I sɔ’n ti, Zezi seli kɛ: “Nán an nian sran i wafa ng’ɔ ti’n an di ndɛ’n, sanngɛ an di ndɛ nanwlɛ su.” (Zan 7:24) Ndɛ sɔ’n kle kɛ Zezi kunndɛ kɛ e niɛn i ayeliɛ’n su. Like suanlɛ nga nun’n, é wá kán like nsan mɔ be kwla yo naan  y’a diman ndɛ nanwlɛ su’n be ndɛ. Like nsan sɔ mun yɛ: E wunnɛn kplo’n annzɛ e finwlɛ’n, nin like nga le i’n, ɔ nin e afuɛ’n. Kɛ é kán ninnge sɔ’m be ndɛ’n, like nga e kwla yo naan y’a nanti ndɛ nga Zezi kannin’n su’n, é kɛ́n i ndɛ wie.

3, 4. (1) ?Ngue ti yɛ Piɛli kacili akunndan ng’ɔ bu i be nga be timan Zuifu’n be wun-ɔn? (An nian desɛn ng’ɔ o kan like suanlɛ’n bo i bo lɛ’n.) (2) ?Ndɛ nanwlɛ uflɛ benin yɛ Zoova maan Piɛli wunnin i wlɛ-ɔ?

³ Cɛn kun’n, be seli Piɛli kɛ ɔ wɔ Sezare lɔ bian kun mɔ be flɛ i kɔrnɛyi’n i awlo lɔ. Bian sɔ’n timan Zuifu. I sɔ’n ti’n, ndɛ’n yoli Piɛli i kɛnsrɛn. (Sa Nga Be Yoli’n 10:17-29) Be nga be timan Zuifu’n, be wun akunndan nga Zuifu’m be bu’n, ɔ timan kpa mlɔnmlɔn. I sɔ akunndan’n i wie yɛ Piɛli bu-ɔ. Sanngɛ sa kun wa juli, i ti ɔ wa kacili akunndan ng’ɔ bu’n. Yɛle kɛ, cɛn kun Ɲanmiɛn fali like kun kleli i aolia nun. (Sa Nga Be Yoli’n 10:9-16) Piɛli wunnin like kun m’ɔ ti kɛ tannin dan kun mɔ b’a trɛ nun’n sa. Tannin sɔ’n fin Ɲanmiɛn su lɔ su jra. Nnɛn wafawafa kwlaa nga Piɛli bu i kɛ ɔ fataman kɛ be di’n, be o nun. Kpɛkun, ɔ tili sran kun i nɛn’n. Ɔ seli i kɛ: “Piɛr, jao, kun be di.” Sanngɛ, Piɛli w’a kplinman su mlɔnmlɔn. Kɛ ɔ kannin sɔ’n sran’n seli i kɛ: “Like nga Nyanmiɛn bu i kɛ ɔ ti kpa’n, nán bu i kɛ ɔ ti kain.” Piɛli wa wunman like nga ti yɛ sran’n fali like sɔ’n kleli i’n, i wlɛ. Kɛ ɔ yoli sɔ’n, yɛ sran nga Kɔrnɛyi sunmannin be’n be juli lɛ-ɔ. Ɲanmiɛn wawɛ’n seli Piɛli kɛ ɔ wɔ Kɔrnɛyi i awlo lɔ. Yɛ Piɛli nin sran sɔ’m be ɔli-ɔ.

⁴ Sɛ Piɛli waan ɔ́ nían ‘sran i wafa nga [Kɔrnɛyi] ti’n ɔ́ dí ndɛ’n,’ nn w’a ɔmɛn i awlo lɔ. Afin, Zuifu’m be kɔman be nga be timan Zuifu’n be awlo. Piɛli buman be nga be timan Zuifu’m be wun akunndan kpa. ?Sanngɛ ngue ti yɛ Piɛli ɔli Kɔrnɛyi i awlo lɔ-ɔ? Yɛle kɛ, aolia nun like ng’ɔ wunnin i’n, nin atin nga Ɲanmiɛn wawɛ kleli i ti’n, ɔ kacili i akunndan’n. Kɛ Kɔrnɛyi wieli i ndɛ’n i kan’n, Piɛli seli kɛ: “Nanwlɛ, m’an wun i wlɛ kɛ Nyanmiɛn liɛ’n, ɔ kpa-man sran nun, sanngɛ nvle kwlaa nun’n, sran ng’ɔ sro i b’ɔ yo i klun sa’n, i klun jɔ i wun.” (Sa Nga Be Yoli’n 10:34, 35) Ndɛ sɔ mɔ Piɛli wunnin i wlɛ’n, ɔ yoli i fɛ. Yɛ ɔ kwla yo Klistfuɛ’m be kwlakwla be ye wie andɛ.

5. (1) ?Ngue yɛ Zoova kunndɛ kɛ Klistfuɛ’m be kwlakwla be wun i wlɛ-ɔ? (2) ?Kannzɛ e si ndɛ nanwlɛ’n, akunndan benin yɛ e kwla bu-ɔ?

⁵ Zoova sinnin Piɛli i lika naan ɔ́ klé Klistfuɛ’m be kwlakwla kɛ ɔ kpaman sran nun. Sran’m be wunnɛn kplo’n nin be nvle’n, ɔ nin be aniɛn’n timan Zoova cinnjin. Sran kwlaa nga i ɲin yi i m’ɔ yo i klun sa’n, i klun jɔ i wun. (Galasifuɛ Mun 3:26-28; Sa Nglo Yilɛ 7:9, 10) E kwlaa e si ndɛ sɔ’n. Sanngɛ atrɛkpa’n, kan be tali e’n lɛ’n, sran’m be bunman be wiengu’m be wun akunndan kpa. Ɔ maan kɔlɛ’n, i sɔ nzuɛn’n i kan o e nun, sanngɛ e bɔbɔ e siman sɔ. I wie yɛle Piɛli liɛ’n. Ɔ ukɛli i wiengu  mun naan be wun i wlɛ kɛ Ɲanmiɛn kpaman sran nun. Sanngɛ ɔ ju wie’n, ɔ bu i wiengu’m be wun akunndan tɛ. (Galasifuɛ Mun 2:11-14) ?Ngue yɛ é yó naan y’a nanti afɔtuɛ nga Zezi mannin e’n su-ɔ?

6. (1) ?Ngue yɛ ɔ kwla uka e naan y’a bu e wiengu’m be wun akunndan kpa-ɔ? (2) ?Ngue like yɛ ndɛ nga aniaan’n klɛli’n, ɔ kle e i su-ɔ?

⁶ Sɛ e bu e wiengu’m be wun akunndan kpa annzɛ e buman be wun akunndan kpa’n, Ɲanmiɛn Ndɛ’n yɛ ɔ kwla uka e naan y’a wun i wlɛ-ɔ. (Jue Mun 119:105) Asa kusu’n, e kwla usa e janvuɛ kun mɔ e lafi i su’n naan ɔ di i nanwlɛ kle e sɛ e bu e wiengu’m be wun akunndan kpa o. Afin, e bɔbɔ e kwlá wunmɛn i wlɛ. (Galasifuɛ Mun 2:11, 14) Wie liɛ’n, e buman e wiengu’m be wun akunndan kpa, sanngɛ e siman sɔ. I wie yɛle aniaan kun m’ɔ di junman dan anuannzɛ’n nun’n i liɛ’n. Ɔ klɛli aniaan kun nin i yi mɔ be ti blɛ kwlaa nun Ɲanmiɛn junman difuɛ’n, be su ndɛ kun. Sran sunman be buman be nga be kan aniaan sɔ’n i aniɛn’n, be sran. Aniaan ng’ɔ klɛli ndɛ’n, ɔ kannin ndɛ kpakpa wie mun. Sanngɛ ɔ kan guali su kɛ: ‘Kannzɛ aniaan’n kan [aniɛn sɔ’n], sanngɛ wafa ng’ɔ yo ninnge mun ti’n, sran’m be wun i wlɛ kɛ sɛ sran kun kan [aniɛn sɔ’n], i sɔ’n kleman kɛ ɔ ti fiɛn annzɛ e kpa trɛ i. Kɛ a wun aniaan’n sa’n, a siman kɛ ɔ kan [aniɛn sɔ’n] wie.’ Ndɛ sɔ’n kle kɛ, kannzɛ e di junman dan Zoova i anuannzɛ’n nun bɔbɔ’n, e kwla bu e wiengu’m be wun akunndan tɛ. Sɛ be man e afɔtuɛ i sɔ liɛ’n su’n, maan e sɔ nun klanman naan e kaci akunndan nga e bu’n. ?Ngue ekun yɛ e kwla yo naan y’a bu e wiengu’m be wun akunndan kpa-ɔ?

7. ?Wafa sɛ yɛ e kwla kle kɛ e wiengu’m be ‘ndɛ lo e kpa’ ɔ?

⁷ Sɛ e wiengu’m be ‘ndɛ lo e kpa’n,’ é kló be. Kpɛkun, é bú be wun akunndan kpa. (2 Korɛntfuɛ Mun 6:11-13) ?Be nga amun wunnɛn kplo’n, annzɛ amun nvle’n, annzɛ amun aniɛn’n ti kun’n, be ngunmin yɛ amun nin be san nun-ɔn? Sɛ ɔ ti sɔ’n, maan amun nin sran uflɛ mun san nun wie. Amun nin aniaan wie mɔ be nvle’n ti fanunfanun’n be kwla bo jasin fɛ’n likawlɛ. Annzɛ kusu’n, amun kwla yia be amun awlo lɔ be di like likawlɛ, annzɛ be yo like uflɛ. (Sa Nga Be Yoli’n 16:14, 15) Sɛ amun yo sɔ’n, kɛ ɔ́ kɔ́ i ɲrun’n, amún kló amun wiengu mun kpa. Ɔ maan, amun su buman be wun akunndan tɛ kun. Siɛn’n, maan e fa e ɲin e sie i like kun ekun mɔ sɛ e yo’n, ɔ́ klé kɛ e ‘nian sran i wafa ng’ɔ ti’n e di ndɛ’n,’ i su.

8. ?Ndɛ benin yɛ Saun Yolɛ 19:15 kan m’ɔ kle kɛ, sɛ sran kun ti sikafuɛ annzɛ yalɛfuɛ’n, i sɔ’n kwla ɲan ta akunndan nga e bu i wun’n, i su-ɔ?

⁸ Wie liɛ’n, like nga sran kun le i’n, annzɛ ɔ lemɛn i’n, i su yɛ e jran e di i jɔlɛ-ɔ. Saun Yolɛ ndɛ tre 19 i mma 15 se kɛ: “Nán amun nian kɛ sran nga ti yalɛfuɛ’n ti amún bú ndɛ yí i su. Nán amun nian kɛ sran nga kusu ti sikafuɛ’n ti amún jrɛ́n i sin. Sanngɛ kɛ ndɛ’n fa ti’n, yɛ amun fa kan man amun wiengu mun-ɔn.” ?Wafa sɛ yɛ e kwla jran like nga sran kun le i’n su e di i jɔlɛ-ɔ?

9. (1) ?Ndɛ benin yɛ Salomɔn kannin-ɔn? (2) ?Ngue yɛ ndɛ sɔ’n kle e-ɔ?

 ⁹ Salomɔn seli kɛ: “Yalɛfuɛ’n i janvuɛ’n bɔbɔ kpɔ i, sanngɛ be di-man anyanbeunfuɛ’m be janvuɛ’m be yalɛ.” (Nyanndra Mun 14:20) Ndɛ sɔ’n kle kɛ sɛ y’a nianman e wun kpa’n, aniaan nga be le sika’n yɛ é trá be janvuɛ-ɔ. Yɛ e su faman e wun mantanman aniaan nga be ti yalɛfuɛ’n. ?Ngue ti yɛ sɛ e jran like nga sran kun le i’n, annzɛ ɔ lemɛn i’n su e di i jɔlɛ’n, ɔ timan kpa-ɔ?

10. ?Ngue ti yɛ Zaki mannin Klistfuɛ’m be afɔtuɛ-ɔ?

¹⁰ Sɛ e bu e niaan nga be le sika’n be sran tra nga be ti yalɛfuɛ’n, aniaan’m bé búbú be wun nun. I sɔ sa’n i wie juli Klistfuɛ klikli’m be asɔnun wie’m be nun. I sɔ’n ti, Zaki mannin be afɔtuɛ. (An kanngan Zak 2:1-4 nun.) E kunndɛman kɛ i sɔ sa’n ju e asɔnun’n nun mlɔnmlɔn. ?I sɔ’n ti’n, ngue yɛ é yó naan y’a jranman like nga e niaan’m be le i’n su y’a diman be jɔlɛ-ɔ?

11. ?Like nga sran kun le i’n, i ti yɛ ɔ nin Zoova be afiɛn sɛ annzɛ ɔ sɛman-ɔn? An yiyi nun.

¹¹ Maan e bu e niaan mun kɛ nga Zoova fa bu be sa. Nán kɛ sran kun ti sikafuɛ annzɛ yalɛfuɛ’n i ti yɛ Zoova i klun jɔ́ i wun-ɔn. Nán sika annzɛ ninnge nga sran kun le i’n, i ti yɛ ɔ nin Zoova be afiɛn mántan annzɛ ɔ su mantanman-ɔn. Zezi seli kɛ, “kɛ anyanbeunfuɛ kun fɛ i wun man Nyanmiɛn kɛ ɔ sie i’n, ɔ ti kekle.” Sanngɛ, w’a  seman kɛ aɲanbeunfuɛ kun kwlá fɛmɛn i wun manman Ɲanmiɛn kɛ ɔ sie i. (Matie 19:23) Zezi seli ekun kɛ: “Amun bɔ an ti yalɛfuɛ’n, amun liɛ su ti ye, afin Nyanmiɛn yɛ ɔ́ wá síe amun-ɔn.” (Lik 6:20) Sanngɛ, ndɛ sɔ’n kleman kɛ yalɛfuɛ’m be kwlaa bé tíe Zezi i ndɛ’n naan Ɲanmiɛn yrá be su. Yalɛfuɛ kpanngban b’a suman Zezi su. Nanwlɛ, e kwlá jranman like nga sran kun le i’n su e seman kɛ ɔ nin Ɲanmiɛn be afiɛn sɛ, annzɛ ɔ sɛman.

12. ?Ngue ndɛ yɛ Ɲanmiɛn Ndɛ’n kɛn i aɲanbeunfuɛ nin yalɛfuɛ’m be su-ɔ?

¹² Be nga be su Zoova’n, be nun wie’m be ti sikafuɛ yɛ wie’m be ti yalɛfuɛ. Sanngɛ, be kwlaa be klo Zoova yɛ be tu be klun be su i. Ɲanmiɛn Ndɛ’n wla aɲanbeunfuɛ’m be fanngan kɛ, “nán maan be fa be wla gua be anyanbeun b’ɔ su ka-man lɛ’n su sanngɛ be fa gua Nyanmiɛn” su. (An kanngan 1 Timote 6:17-19 nun.) Ɲanmiɛn Ndɛ’n wla Zoova i sufuɛ’m be kwlaa, i sikafuɛ o, i yalɛfuɛ o, be fanngan kɛ nán be yo sika klofuɛ. (1 Timote 6:9, 10) Sɛ wafa nga Zoova bu e niaan mun’n, i sɔ yɛ e bu be’n, e su jranman like nga be le i’n, annzɛ be lemɛn i’n su e diman be jɔlɛ. ?Yɛ sran’m be afuɛ’n nin? ?E kwla jran su e di be jɔlɛ?

13. ?Kpɛnngbɛn’m be su ndɛ benin yɛ Biblu’n kan-ɔn?

¹³ Biblu’n wla e fanngan kɛ maan e ɲin yi sran oke mun. Saun Yolɛ ndɛ tre 19 i mma 32 se kɛ: “Amun wun sran oke mun-ɔn, maan amun ɲin yi be.” Nyanndra Mun ndɛ tre 16 i mma 31 kusu se kɛ: “Be ti je’n ti kɛ famiɛn kle sa, afin nguan tɛnndɛn’n ti sran kpa’m be nvasuɛ.” Pɔlu wlali Timote i fanngan kɛ nán ɔ ijɔ kpɛnngbɛn mun, naan ɔ fa be bu i si. (1 Timote 5:1, 2) Timote kle like asɔnun’n nun. Ɔ maan, e kwla se kɛ ɔ le kwlalɛ. Sanngɛ, ɔ fata kɛ i ɲin yi kpɛnngbɛn mun yɛ ɔ si be aunnvuɛ.

14. ?Blɛ benin nun yɛ ɔ fata kɛ e tu kpɛnngbɛn kun fɔ-ɔ?

¹⁴ ?Sɛ kpɛnngbɛn kun i ɲinfu yo sa tɛ’n, annzɛ ɔ yo like ng’ɔ jɔman Zoova klun’n, ngue yɛ é yó-ɔ? Sɛ sran kun bɔbɔ i ɲinfu yo sa tɛ’n, Zoova su seman kɛ w’a yoman sa. Kannzɛ sran’n ti oke naan sran’m be ɲin yi i’n, saan ɔ́ tú i fɔ. Ezekiɛl ndɛ tre 9 i mma 5 nin 6 se kɛ: “An su sran ng’ɔ o yɛ’n su klɔ’n nun naan an kun klɔ’n nun sran mun. Nán an si be aunnvuɛ kɛ án yáci be lɛ. An nunnun sran oke o, gbanflɛn o, talua o, ba kanngan o, bla mun o.” Ezai kɛnnin i sɔ ndɛ’n wie. (Ezai 65:20) Like ng’ɔ ti cinnjin’n, yɛle kɛ maan e ɲin yi Zoova. (Daniɛl 7:9, 10, 13, 14) Sɛ e ɲin yi Zoova’n, e kwla ɲan wunmiɛn e tu aniaan oke mun bɔbɔ’n be fɔ.—Galasifuɛ Mun 6:1.

15. ?Ngue like yɛ akoto Pɔlu i ndɛ’n kle e aniaan gbanflɛn’m be sran bulɛ su-ɔ?

¹⁵ Sɛ aniaan kun ti gbanflɛn kan’n, ɔ fata kɛ e ɲin yi i. Pɔlu seli Timote kɛ: “Kɛ bɔ a ti gbanflɛn kan’n ti’n, nán yo maan sran fi yo wɔ finfin, sanngɛ yo sa ng’ɔ ti kpa’n, maan be nga be lafi Krist su’n be nian su yo, ɔ ijɔlɛ nun o, ɔ nzuɛn’n nun o, ɔ sran klolɛ nun o, ɔ Nyanmiɛn sulafilɛ nun o, ɔ nin ɔ sa tɛ bɔ a yo-man nin o.” (1 Timote 4:12) Kɛ Pɔlu klɛ́ ndɛ sɔ’n, nn atrɛkpa’n Timote le afuɛ kɔe 30. Sanngɛ blɛ sɔ nun’n, Pɔlu mannin Timote i junman cinnjin wie mun. I sɔ’n kle kɛ, ɔ fataman kɛ e jran aniaan gbanflɛn’m be afuɛ su e di be jɔlɛ. Nán maan e wla fi su kɛ, i nun mɔ Zezi le afuɛ 33, ɔ yoli ninnge kpanngban.

16, 17. (1) ?Wafa sɛ yɛ be sie aniaan kun asɔnunfuɛ’m be lika nianfuɛ annzɛ asɔnun kpɛnngbɛn-ɔn? (2)?Wafa sɛ yɛ akunndan nga e bu’n, ɔ nin ndɛ nga Biblu’n kan’n be kwla sansan be wun-ɔn?

 ¹⁶ Nvle wie’m be nun’n, sran’m be buman gbanflɛn kanngan’m be sran. I sɔ’n ti’n, asɔnun kpɛnngbɛn wie’m be sieman aniaan gbanflɛn mun asɔnunfuɛ’m be lika nianfuɛ annzɛ asɔnun kpɛnngbɛn. Kannzɛ bɔbɔ aniaan kun kwla di i sɔ junman’n, sanngɛ be mɛnmɛn i atin. Biblu’n kleman afuɛ trele kun ng’ɔ fata kɛ aniaan kun ɲɛn i naan b’a kwla sie i asɔnunfuɛ’m be lika nianfuɛ annzɛ asɔnun kpɛnngbɛn’n. (1 Timote 3:1-10, 12, 13; Tit 1:5-9) I sɔ’n ti’n, sɛ asɔnun kpɛnngbɛn kun kpɛ i sɔ liɛ’n i su mmla’n, nn ɔ nantiman Ɲanmiɛn Ndɛ’n su. Ɔ fataman kɛ asɔnun kpɛnngbɛn’m be jran akunndan nga be bɔbɔ be bu’n su, annzɛ wafa nga be yo ninnge’m be nvle’n nun lɔ su be di gbanflɛn’m be jɔlɛ. Sanngɛ, ɔ fata kɛ be nian ndɛ nga Ɲanmiɛn Ndɛ’n kan’n su.—2 Timote 3:16, 17.

¹⁷ Sɛ asɔnun kpɛnngbɛn’m be nianman ndɛ nga Biblu’n kan’n su be sieman aniaan mun asɔnunfuɛ’m be lika nianfuɛ annzɛ asɔnun kpɛnngbɛn’n, aniaan nga be kwla di i sɔ junman’n, be su kwlá diman. Nvle kun nun’n, asɔnunfuɛ’m be lika nianfuɛ kun di asɔnun’n nun junman wie mun klanman kpa. I sɔ’n ti’n, asɔnun kpɛnngbɛn’m be kwlaa be seli kɛ sɛ be jran Ɲanmiɛn ndɛ’n su’n, be kwla sie i asɔnun kpɛnngbɛn. Sanngɛ, be nun wie mun mɔ b’a yo oke’n, be seli kɛ ɔ te yo gbanflɛn kan. I sɔ’n ti, b’a kplinman su. Ɔ maan b’a sieman aniaan’n i asɔnun kpɛnngbɛn. Aniaan kpanngban be bu akunndan sɔ’n wie. Ɔ ti cinnjin kɛ e nanti ndɛ nga Biblu’n kan’n su. Nán maan e lafi akunndan nga e bɔbɔ e bu’n su. I liɛ’n, é nánti ndɛ nga Zezi kannin’n su. Kpɛkun, e su nianman wafa nga sran kun ti’n naan y’a di i jɔlɛ.

18, 19. ?Ngue yɛ ɔ kwla uka e naan y’a bu e niaan mun kɛ nga Zoova fa bu be’n sa-ɔ?

¹⁸ Fɔ o e nun. Sanngɛ, wafa nga Zoova bu sran mun’n, e kwla bu be sɔ wie. (Sa Nga Be Yoli’n 10:34, 35) I sɔ’n ti’n, maan e nanti afɔtuɛ nga Ɲanmiɛn Ndɛ’n man e’n su titi. Sɛ e yo sɔ’n, é nánti ndɛ nga Zezi kannin’n su. Ɔ seli kɛ: “Nán an nian sran i wafa ng’ɔ ti’n an di ndɛ’n.”—Zan 7:24.

¹⁹ Ɔ cɛ kan’n, Zezi Klist m’ɔ ti e Famiɛn’n, ɔ́ wá dí sran’m be kwlaa be jɔlɛ. Ɲanmiɛn i mmla’m be su yɛ ɔ́ jrán dí sran’m be jɔlɛ-ɔ. Nán like ng’ɔ wun i’n, annzɛ ndɛ ng’ɔ tili’n, i su yɛ ɔ́ jrán dí sran’m be jɔlɛ-ɔ. (Ezai 11:3, 4) E kwlaa e ɲin o blɛ sɔ’n i sin kpa.