Nán amun sro junman dilɛ. Sran ng’ɔ sroman junman dilɛ’n, ɔ tu i klun di junman fa niɛn i bɔbɔ nin sran uflɛ be lika. Kannzɛ bɔbɔ be bomɛn i dunman’n, sanngɛ ɔ tu i klun di.

Sɛ amun klo annzɛ amun kloman o, ninnge sunman be o lɛ m’ɔ fata kɛ amun yo-ɔ. Andɛ sran kpanngban, be kunndɛman kɛ bé dí junman kekle. Sɛ amun liɛ’n, amun sroman junman’n, amún ɲɛ́n i su ye.​—Akunndanfuɛ’n 3:13.

“N wunnin kɛ, kɛ n tu n klun n di junman’n, min klun jɔ. I sɔ’n ti, n ma kloli junman dilɛ. Sɛ amun klo junman dilɛ’n, sran’m bé bó amun dunman kpa.”​—Rɛyɔnun.

NDƐ NGA BIBLU’N KAN’N: “Junman kwlaa nga be mian be ɲin be di’n, be ɲan su ye.”​—Ɲanndra Mun 14:23.

Afɔtuɛ nga’m be kwla uka ɔ naan w’a klo junman dilɛ.

Kɛ be man ɔ junman’n, nian nun di i kpa. Maan ɔ yo awlo lɔ junman o, annzɛ suklu junman o, annzɛ junman uflɛ o, tu ɔ klun di i kpa. Kɛ ɔ́ kɔ́ i ɲrun’n, kunndɛ wafa nga a kwla di junman sɔ’n i ndɛndɛ’n, annzɛ a kwla si i di kpa tra laa’n. Kɛ ɔ sa wá tɔ́ junman’n i dilɛ nun kpa’n, á wá kló i dilɛ.

NDƐ NGA BIBLU’N KAN’N: “?W’a wun sran ng’ɔ si i junman’n i di’n le? Famiɛn’m be ɲrun yɛ ɔ́ jrán-ɔn, ɔ su jranman sran ngbɛnngbɛn’m be ɲrun.”​—Ɲanndra Mun 22:29.

Bu sran uflɛ akunndan. Kɛ a tu ɔ klun di junman’n, sran uflɛ’m be ɲan su ye. I wie yɛle kɛ, kɛ a nian nun di awlo lɔ junman’n, junman’n tinman ɔ awlofuɛ’m be su.

NDƐ NGA BIBLU’N KAN’N: “Sɛ a cɛ sran like’n, ɔ klun jɔ kpa tra kɛ be cɛ wɔ like’n.”​—Sa Nga Be Yoli’n 20:35.

Di junman tra nga be kleli wɔ’n su. Sɛ be man ɔ junman’n, di tra nga be kleli wɔ’n su. Kɛ mɔ ɔ klunklo yɛ a fɛ i sɔ ajalɛ’n, mɔ nán kɛ be miannin wɔ’n ti’n, ɔ klun jɔ́.​—Matie 5:41.

NDƐ NGA BIBLU’N KAN’N: “Sa kpa nga ɔ waan á yó’n, a su yomɛn i mianlɛ su, sanngɛ á yó i ɔ klunklo su.”​—Filemɔn 14.

Di junman ngwlɛlɛ su. Be nga be sroman junman’n, be timan fuɛnfuɛ. Sanngɛ, be diman junman tratraman su. Be tu be klun di junman. Sanngɛ, be fa blɛ be lo wunmiɛn wie.

NDƐ NGA BIBLU’N KAN’N: “Wunmiɛn lolɛ kan’n, ɔ ti kpa tra junman kekle dilɛ’n, m’ɔ ti kɛ sran kun waan ɔ́ fúan aunmuan’n naan ɔ́ kó trɛ́’n i sa’n.”​—Akunndanfuɛ’n 4:6.