E kwla se kɛ cɛcɛ. Afin Satan w’a seman Ɛvu kɛ like kun o i nun naan sɛ ɔ di waka mma’n naan ɔ wu’n like sɔ’n fíte kó trán lika uflɛ. Kɛ Satan sinnin wuo’n i sin m’ɔ nin Ɛvu bé kókó yalɛ’n, ɔ seli i kɛ sɛ ɔ di waka mma’n ɔ su wuman mlɔnmlɔn. Ndɛ trele nga Satan waan ɔ́ kán’n yɛle kɛ Ɛvu ká nguan nun tititi asiɛ’n su wa naan ɔ́ dí aklunjuɛ. Kpɛkun i kwlaa sɔ nun’n ɔ su mianman Ɲanmiɛn wun.​—Bob. 2:17; 3:3-5.

E wunnin i kɛ nán Edɛnin fie’n nun lɔ yɛ ato ndɛ nga sran’m be kɛn i kɛ, kɛ sran wu’n like kun o i nun naan ɔ wuman wie’n fin-ɔn. ?Yɛ nn nin yɛ ato ndɛ sɔ’n fin-ɔn? E kwlá dimɛn i nanwlɛ trele sa. Sanngɛ e si kɛ, kɛ Nowe blɛ su anannganman su nzue’n tɔli’n, Ɲanmiɛn sulɛ wafawafa kwlaa nga be timan su’n be nunnunnin. Nowe nin i awlobofuɛ mɔ be su Ɲanmiɛn kpa’n be ngunmin cɛ yɛ be kali lɛ-ɔ. Ɔ maan e kwlá seman kɛ ato ndɛ sɔ’n fin be.

Ndɛ sɔ’n kle kɛ, kɛ nzue dan’n tɔli m’ɔ kpɛli’n, i sin yɛ sran’m be wa buali ato sɔ’n niɔn. Kɛ Zoova sanngannin klɔ sran’m be aniɛn Babɛli lɔ’n mɔ “be bo sanndili asiɛ wunmuan’n su” atrɛkpa’n i lɛ nun yɛ be yoli maan ato ndɛ sɔ’n truli-ɔ. (Bob. 11:8, 9) Kannzɛ bɔbɔ e siman lika trele nga ato ndɛ sɔ’n fin’n sanngɛ e si kɛ Satan m’ɔ ti ‘ato buafuɛ’m be si’n’ ɔ o ndɛ sɔ’n i sin. Kpɛkun kɛ ɔ wun kɛ ndɛ sɔ’n w’a tru lika’n nun’n, ɔ yo i fɛ dan.​—Zan 8:44.