Sa nga be kɛnnin i ndɛ Mmla’n 22:25-27 nun’n, ɔ kanman yasua’n i fɔ bulɛ’n i ndɛ. Afin sran kwlaa si kɛ like ng’ɔ yoli’n ɔ ti tɛ. Sanngɛ mmla’n fa e ɲin sie i wafa nga be kwla wun i wlɛ sɛ ɔ fata kɛ be bu talua’n i fɔ wie annzɛ be yaci i lɛ’n, i su. Maan e yiyi nun kpa.

Mmla’n ndɛ tre 22 i mma 23 nin 24 nun’n be kan talua kun m’ɔ b’a trɛ i ase mɔ yasua kun wun i “klɔ nun” kpɛkun ɔ nin i be la’n i ndɛ. Sa sɔ’n nun’n be bu yasua’n i fɔ, afin ɔ nin bla kun mɔ b’a trɛ i ase’n be lali. Ɔ maan ɔ ti kɛ w’a kunndɛ sran yi sa. ?Yɛ talua’n nin? Sɛ w’a kpanman’n bé bú i fɔ wie. Afin kɛ mɔ be o klɔ lɛ’n ti’n, sɛ ɔ ti kɛ ɔ kpannin sa’n nn atrɛkpa’n sran wie tí i ngan kpɛkun ɔ́ kó dé i. Ɔ maan sɛ w’a kpanman’n nn ɔ ti kɛ ɔ nin yasua’n be bo ti kun sa.​—Mml. 22:23, 24.

Mmla’n kan sa uflɛ ndɛ ekun. Ɔ se kɛ: “Sanngɛ sɛ yasua’n wunnin talua sɔ’n, mɔ wienun ɔn ɔ trɛli i naan ɔ nin i b’a la kekle nun’n, yasua’n i kunngba yɛ amun kun i ɔ. Nán amun yo talua’n i like fi. Talua’n nin kunlɛ fataman, ɔ ti kɛ sran kun mɔ i wiengu kun tɔ i su kun i’n sa. Yasua’n toli talua’n i blo lɔ. Wienun ɔn talua’n ɔ kpannin yɛ w’a ɲanman sran w’a demɛn i ɔ.”​—Mml. 22:25-27.

Sɛ sa sɔ’n ju’n naan jɔlɛ difuɛ’m be waan bé dí be jɔlɛ’n, ndɛ nga talua’n kan’n i su yɛ be fa-ɔ. ?Ngue ti-ɔ? Afin be se be wun kɛ “wienun ɔn talua’n ɔ kpannin yɛ w’a ɲanman sran w’a demɛn i ɔ”. Ɔ maan be kwlá seman kɛ w’a kunndɛ bian i wun bo. Sanngɛ yasua’n i liɛ’n bé bú i fɔ afin ɔ trali talua’n yɛ ɔ nin i be lali kekle nun. Asa ekun’n bé bú i fɔ afin be trali bla’n i ase. Ɔ maan e kwla se kɛ w’a kunndɛ sran yi.

Mmla’n se kɛ sɛ sa kɛ ngalɛ sa’n ju talua kun su’n, be su yomɛn i like fi afin nɛ́n i bɔbɔ yɛ ɔ kunndɛli-ɔ. Sanngɛ yasua’n i liɛ’n, bé bú i fɔ afin ɔ nin bla kun be lali kekle nun. Yɛ kɛ m’ɔ be trali bla’n i ase ti’n, e kwla se kɛ w’a kunndɛ sran yi. I kwlaa yoli-o e lafi su kɛ kwlaa naan jɔlɛ difuɛ’m b’a fa ajalɛ kun’n ‘bé úsaúsa ndɛ’n nun kpa’ kpɛkun ajalɛ nga bé fá’n ɔ́ táka Ɲanmiɛn mmla’n su.​—Mml. 13:14; 17:4; Tul. 20:14.