Like nga Biblu’n kle’n, ɔ kwla uka sran mun naan b’a kaci be nzuɛn’n. É wá fá e ɲin é síe i sran nɲɔn mɔ Biblu’n ukali be naan b’a kwla yo sɔ’n, be su. Be yɛle Rikaado nin Andre.

RIKAADO: Kɛ n ɲannin afuɛ 15, e nin sa tɛtɛ yofuɛ mun e sannin nun. Min janvuɛ sɔ’m be ayeliɛ’n ɲannin ta min su dan. I ti’n, n fali ajalɛ kɛ ń yó sa tɛ wie naan be wla min bisua afuɛ blu. Atrɛkpa’n, amun se amun wun kɛ i sɔ’n ti sinnzin dilɛ. Sanngɛ e tranwlɛ lɔ’n, be nga be di bisua’n sran’m be ɲin yi be, yɛ be yi be ayɛ. I sɔ’n ti’n, n kunndɛli kɛ ń yó kɛ be sa.

Ninnge nga sa tɛtɛ yofuɛ’m be yo be’n, n yoli wie. I wie yɛle kɛ n nɔnnin drɔgi, n kunndɛli bla sukusuku yɛ n yoli sran wie’m be like yaya. Cɛn kun’n, e nin sran tɛtɛ uflɛ wie mun e totoli e wun tui. Cɛn sɔ nun’n, n buli i kɛ bé kún min. Kɛ n fin nun fiteli’n, n ma buli min mɛn dilɛ wafa’n nin like nga n kunndɛli kɛ ń yó’n, be akunndan kpa. N fali ajalɛ kɛ ń káci min ayeliɛ’n. ?Sanngɛ wan yɛ ɔ́ úka min-ɔn?

Min osufuɛ’m be su sa’n timan aɔwi. Ɔ maan, be nun wie fi diman aklunjuɛ. Sanngɛ, n sieli i nzɔliɛ kɛ min manmin i niaan bian kun liɛ’n, ɔ nin i awlofuɛ’m be di aklunjuɛ. N si kɛ be ti sran kpa naan be nanti Biblu’n nun ndɛ’n su. Laa kun’n, be kan kleli min kɛ Ɲanmiɛn i dunman’n yɛle Zoova. Ɔ maan kɛ e nin sran tɛtɛ wie mun e totoli e wun tui’n, w’a cɛman, n srɛli Zoova kɛ ɔ uka min. Kɛ n srɛli Zoova mɔ lika cɛnnin’n, Zoova i Lalofuɛ kun wa boboli min anuan’n. I sɔ’n boli min nuan dan. Zoova i Lalofuɛ sɔ’n yɛ ɔ kleli min Biblu’n nun like-ɔ.

Kɛ n boli Biblu’n nun like suanlɛ bo’n, like ng’ɔ yoli kekle mannin min’n, yɛle kɛ be nga e nin be san nun laa’n, be kunndɛli kɛ e nin be e san nun ekun. I ti’n, be flɛli min telefɔnun nun tikatika. W’a yoman pɔpɔ. Sanngɛ m’an kplinman su. N fuali kpa kɛ ń súan Biblu’n nun like titi. Ajalɛ sɔ’n yoli ajalɛ kpa. Afin n wlali min ayeliɛ tɛtɛ’m be ase ndɛndɛ kpa. Kɛ ɔ fɛ i lɛ’n, min klun wa jɔli dan kpa.

Min wla kpɛn ndɛ kun mɔ n kan kleli Ɲanmiɛn’n, i su. N seli i kɛ laa’n, n kunndɛli kɛ ń kó dí afuɛ blu bisua lɔ naan min janvuɛ’m be klun jɔ min wun. Sanngɛ siɛn’n, n kunndɛ kɛ ɔ uka min naan n di atin bofuɛ junman’n afuɛ blu kun. I liɛ’n, ń kwlá úka sran uflɛ naan ɔ kaci i ayeliɛ’n kɛ min liɛ’n sa. Ɲanmiɛn tɛli min srɛlɛ’n su klanman. Afin, i afuɛ kɔe 17 yɛ n te di atin bolɛ junman’n. I kpa bɔbɔ’n, m’an diman bisua le.

Kɛ é sé yɛ’n, min janvuɛ nga e nin be e nantili laa’n, be nun sunman lika be o bisua. Be nun wie’m be wuli bɔbɔ. Kɛ n bu i akunndan sa’n, n wun i wlɛ kɛ, min wun mɔ n fa mantannin min osufuɛ nga be su Zoova’n, ɔ yoli min ye dan. Be liɛ’n be mian be ɲin be nanti Biblu’n nun ndɛ’n su. Ɔ maan, min ɲin yi min osufuɛ sɔ mun tra be nga e nin be e nantili laa’n. Sanngɛ, Ɲanmiɛn yɛ ń lɛ́ i ase dan-ɔn. Afin i dunman nun ti’n, andɛ’n n o sran nun.

 ANDRE: E tranwlɛ lɔ sran’m be ti yalɛfuɛ. Yɛ be nun sunman be nɔn drɔgi, be wua, be kun sran, yɛ be bo tekle. Min si ti nzanbɔɛfuɛ kpɛkun ɔ nɔn drɔgi dan. Cɛn kwlaa min si nin min nin be kpɛ be wiengu nzowa yɛ be di utre.

Min bakan nun yɛ n boli nzan nin drɔgi nɔnlɛ bo-ɔ. N la gua su, yɛ n wua ninnge mun n yo be atɛ. Kɛ n yoli kaklaka’n, min si wa fɛli i wun mantannin min. Kɛ ɔ fɛ i lɛ’n, n ma sacili tɛtɛ kpa. Yɛle kɛ ɔ kleli min wafa nga n kwla yo drɔgi nin ninnge uflɛ wie mun ekun be atɛ nvle uflɛ nun naan b’a traman min’n. I sɔ’n ti’n, n ɲannin sika kaka kpa. Cɛn kun’n, polisie’m be wa trali min. Afin ɔ ka kan naan m’an kun sran. Kɛ be dili min jɔlɛ’n, be wlali min bisua afuɛ nnun.

I nun mɔ n o bisua lɔ’n, cɛn kun nglɛmun’n, be kan kleli bisuafuɛ’m be kɛ Zoova i Lalofuɛ’m be klo kɛ bé klé be Biblu’n nun like. N ɔli wie. Ndɛ nga n tili’n, ɔ yoli min fɛ dan ti’n, n boli Biblu’n nun like suanlɛ bo. Nán ndɛ nga sɛ e ti-ɔ, ɔ́ yó e fɛ’n yɛ be kan kleli e-ɔ. Be yiyili Ɲanmiɛn i mmla’n nun weinwein be kleli e. B’a kpɛman ndɛ fi wun.

Blɛ wie nun’n, min wiengu bisuafuɛ’m be wlanwlannin min kɛ sɛ m’an yaciman Biblu’n nun like suanlɛ’n, bé yó min like yaya. I sɔ’n ti’n, n ma wunnin i wlɛ kɛ sɛ sran w’a ukaman min’n, n su kwlá kaciman min ayeliɛ’n. N srɛli Zoova kɛ ɔ man min wunmiɛn nin ngwlɛlɛ. Ɔ tɛli min srɛlɛ’n su. Afin, m’an yaciman Biblu’n nun like suanlɛ le. I kpa bɔbɔ’n, yakpa su n boli jasin fɛ’n n kleli min wiengu bisuafuɛ mun.

Kɛ be seli min kɛ afuɛ ng’ɔ fata kɛ n di i bisua lɔ’n w’a wie naan n fite’n, w’a yoman min fɛ. Afin n kunndɛli kɛ ń ká lɔ ekun. Kɛ ń kɔ́’n, min wiengu bisuafuɛ’m be kaleli min. Be nun wie’m be seli min kɛ: “Like klefuɛ, kɔ awlo.”

Sɛ ɔ ti kɛ m’an siman Ɲanmiɛn sa’n, nn sa ng’ɔ́ jú min su’n, Ɲanmiɛn bɔbɔ yɛ ɔ si i-ɔ. N si kɛ Ɲanmiɛn klo min. W’a yiman min blo le. Ɔ maan ń lɛ́ i ase leleele. a