Kɛ e kunndɛ kɛ é sí sran kun’n, e dun mmua e usɛ i i dunman’n. Wie liɛ’n e usa sran’n kɛ: “?Be flɛ wɔ sɛ?” ?Sɛ e usa Ɲanmiɛn sɔ’n wie’n, wafa sɛ yɛ ɔ́ tɛ́ e su-ɔ?

Ɔ́ sé kɛ: “N ti Zoova. Min dunman’n yɛ ɔ o lɛ-ɔ.”—Ezai 42:8.

Ɲanmiɛn i dunman’n ti i bɔbɔ i cinnjin. Nán sran yɛ ɔ tɔnnin Ɲanmiɛn i dunman-ɔn. I bɔbɔ yɛ ɔ fa tɔnnin i wun-ɔn. Zoova seli kɛ: “Min dunman m’ɔ o lɛ tititi’n yɛ ɔ o lɛ-ɔ. Dunman sɔ’n yɛ n klo kɛ ɔ ka sran’m be klun tititi-ɔ.” (Ezipti Lɔ Tulɛ 3:15) Biblu’n bo sran wie’m be dunman. I wie yɛle Abraamun, Moizi, Davidi, nin Zezi. Sanngɛ b’a klɛman dunman sɔ’m be kpanngban kɛ Ɲanmiɛn Zoova i dunman liɛ’n sa. Asa ekun’n, kɛ bé bó flɛ́ Ɲanmiɛn’n wie liɛ’n be se kɛ, Ɲanmiɛn m’ɔ Kwla Like Kwlaa Yo’n, annzɛ Siɛ, annzɛ E Min. I kwlaa sɔ’n ti i manmanlɛ dunman. Sanngɛ Ɲanmiɛn i dunman kpakpa mɔ yɛle Zoova’n, be klɛli i kpanngban trɛli i manmanlɛ dunman sɔ mun. Zoova kunndɛ kɛ sran’m be si i dunman’n. Biblu’n se kɛ: “Maan sran’m be si kɛ wɔ mɔ ɔ dunman’n yɛle Zoova’n, ɔ kunngba cɛ yɛ a o Like Kwlaa Ti Su asiɛ wunmuan’n su-ɔ.”—Jue Mun 83:18.

Ɲanmiɛn i dunman’n yoli Zezi i cinnjin. Zezi seli i sɔnnzɔnfuɛ’m be kɛ, kɛ bé srɛ́ Ɲanmiɛn’n be se kɛ: “E Si m’ɔ o ɲanmiɛn su lɔ’n, maan ɔ dunman’n yo sanwun.” (Matie 6:9) Kɛ Zezi bɔbɔ srɛ́ Ɲanmiɛn’n ɔ seli kɛ: “Min Si, yo maan ɔ dunman’n fu.” (Zan 12:28) Ɲanmiɛn i dunman’n yoli Zezi i cinnjin trali like kwlaa. I sɔ’n ti’n, cɛn kun ekun’n, kɛ ɔ́ srɛ́ Ɲanmiɛn’n ɔ seli kɛ: “N yoli maan be sili ɔ dunman’n, yɛ ń yó maan bé sí i titi.”—Zan 17:26.

 Ɲanmiɛn i dunman’n ti be nga be si i’n be cinnjin. Laa Ɲanmiɛn i sufuɛ’m be wunnin i wlɛ kɛ sɛ be kunndɛ kɛ Ɲanmiɛn sasa be annzɛ ɔ de be’n, ɔ fata kɛ be bo i dunman. Biblu’n se kɛ : “Zoova i dunman’n ti kɛ sua fleiin dan kun sa. Sran ng’ɔ yo sa i nuan su’n, ɔ wanndi kɔ lɔ, kpɛkun ɔ ɲan fiawlɛ.” (Ɲanndra Mun 18:10) Biblu’n se ekun kɛ: “Sran kwlaa ng’ɔ bo Zoova i dunman’n, ɔ́ fíte nun.” (Zoɛli 2:32) Biblu’n kle kɛ Ɲanmiɛn i dunman’n yɛ bé fá síe i sufuɛ’m be nzɔliɛ-ɔ. Biblu’n se ekun kɛ: “Nvle’m be kwlaa bé nánti be amuin’m be dunman nun, sanngɛ e liɛ’n, é nánti e Ɲanmiɛn Zoova i dunman nun tititi.”—Mise 4:5; Sa Nga Be Yoli’n 15:14.

Dunman sɔ’n yɛ be fa si Ɲanmiɛn-ɔn. Fluwa sifuɛ kpanngban be waan Ɲanmiɛn i dunman Zoova’n, i bo yɛle kɛ “ɔ yo maan ɔ kpɛn su.” Ndɛ kun m’ɔ Ɲanmiɛn Zoova kan kleli Moizi ti’n, e wunnin i dunman’n i bo’n. Ɔ seli kɛ: “Nga n klo kɛ ń káci’n yɛ ń káci-ɔ.” (Ezipti Lɔ Tulɛ 3:14) Ɲanmiɛn i dunman’n kle kɛ i yɛ ɔ yili ninnge kwlaa-ɔ. Sanngɛ, nɛ́n i ngba-ɔ. Ɔ kle ekun kɛ Ɲanmiɛn bɔbɔ ba’n kwla yo naan i klun sa’n w’a kpɛn su. Annzɛ kusu ɔ kwla fa ninnge ng’ɔ yili be mun yo like kwlaa ng’ɔ klo’n naan i klun sa’n kpɛn su. Ɲanmiɛn i manmanlɛ dunman’m be kle kɛ ɔ le tinmin nin kwlalɛ. Sanngɛ i dunman kpakpa mɔ yɛle Zoova’n, ɔ fa e ɲin sie i sran wafa ng’ɔ ti’n, nin like ng’ɔ kwla yo’n, be su.

Dunman sɔ’n kle kɛ e ndɛ lo Ɲanmiɛn. Ɲanmiɛn i dunman kle kɛ ɔ klo klɔ sran mun nin ninnge kwlaa ng’ɔ yili be’n. Kɛ mɔ Ɲanmiɛn klo kɛ e si i’n, i ti yɛ ɔ boli i dunman’n kleli e-ɔ. Ɲanmiɛn w’a minndɛman kɛ sran’m be usɛ i dunman ka naan w’a bo w’a kle be. I kwlaa sɔ’n kle kɛ Ɲanmiɛn kunndɛ kɛ e si kɛ ɔ o lɛ sakpa, naan e kwla fa e wun e mɛntɛn i.—Jue Mun 73:28.

Kɛ e bo Ɲanmiɛn i dunman’n i sɔ’n kle kɛ e bu i sran. Wienun-ɔn e klo kɛ é trá sran kun i janvuɛ. Kɛ mɔ e klo kɛ ɔ fa e dunman’n flɛ e ti’n, e bo e dunman’n e kle i. ?Sɛ sran sɔ’n kloman kɛ ɔ́ fá e dunman’n flɛ́ e’n, i sɔ’n yó e sɛ? Atrɛkpa’n é sé kɛ, ɔ kloman kɛ ɔ nin e trá janvuɛ ti yɛ ɔ yo sɔ-ɔ. I wafa kunngba’n yɛle Ɲanmiɛn Zoova liɛ’n. Ɔ boli i dunman’n kleli sran mun. Kpɛkun ɔ seli be kɛ be fa flɛ i. Kɛ e faman Zoova i dunman’n e flɛmɛn i’n, e kle kɛ e kloman kɛ é fá e wun mɛ́ntɛn i. Like nga ti yɛ e se sɔ’n, yɛle kɛ Zoova fɛ i ɲin sie i be nga “be bu i dunman’n i su akunndan’n [annzɛ “i dunman’n ti be cinnjin’n,” ja ngua lɔ ndɛ’n] be su.”—Malasi 3:16.

Sɛ e waan é sí Ɲanmiɛn’n, like klikli ng’ɔ fata kɛ e si i’n, yɛle i dunman’n. Sanngɛ nɛ́n i ngba-ɔ. Ɔ fata kɛ e si i nzuɛn’n ɔ nin sran wafa ng’ɔ ti’n.