?Sɛ a si Ɲanmiɛn’n, i su ye benin yɛ á ɲɛ́n i-ɔ?
Sɛ sran kun usa wɔ kɛ wan yɛle Ɲanmiɛn Kpli’n, ndɛ akpasua nga be sinnin lɛ’n be ti’n, atrɛkpa’n a kwla tɛ su siɛn’n. I klikli nun’n, e wunnin kɛ Biblu’n kle kɛ be flɛ Ɲanmiɛn kɛ Zoova naan i nzuɛn’m be nun danfuɛ’n yɛle klolɛ’n. I sin’n, e wunnin ninnge nga Ɲanmiɛn w’a yo be’n, ɔ nin ng’ɔ́ wá yó mán klɔ sran mun’n. Nanwlɛ, Ɲanmiɛn i su like nga e kwla si i’n, be sɔnnin. Sanngɛ a kwla usa kɛ: ‘?Sɛ n si Ɲanmiɛn’n, i su ye benin yɛ ń ɲɛ́n i-ɔ?’
Biblu’n se kɛ “sɛ a kunndɛ i’n, ɔ́ yó maan á wún i.” (1 Be Ɲoliɛ 28:9) Ɔ maan sɛ a si Ɲanmiɛn kpa’n, a kwla yo “i janvuɛ.” I sɔ’n ti cenjele like dan. (Jue Mun 25:14) Sɛ a nin Ɲanmiɛn be tra janvuɛ’n, á ɲán su ye dan.
Ɔ klun jɔ́ kpa. Biblu’n se kɛ Zoova ‘di aklunjɔɛ.’ (1 Timote 1:11) Ɔ maan sɛ a fa ɔ wun mɛntɛn i naan a niɛn i ayeliɛ’n su’n, á dí aklunjɔɛ titi. (Jue Mun 33:12) Ɲanmiɛn kwla uka wɔ naan w’a yoman sa tɛtɛ nga sran’m be yo mɔ i ti yɛ be klun jɔman’n. Asa ekun’n, ɔ kwla uka wɔ naan w’a yo sa kpa naan a nin ɔ wiengu’m b’a tran klanman. Ɔ maan á wún i wlɛ kɛ ndɛ nga laa Ɲanmiɛn i sufuɛ kun kannin’n ti nanwlɛ. I waan: “Min wun mɔ n fa mantan Ɲanmiɛn’n ɔ ti kpa man min.”—Jue Mun 73:28.
Ɔ́ nían ɔ lika. Zoova se kɛ: “Ń má mán ɔ afɔtuɛ, ń nían wɔ su.” (Jue Mun 32:8) I sɔ’n kle kɛ Zoova i sufuɛ’m be tinuntinun, be ndɛ lo i, yɛ like nga be miɛn i wun’n ɔ fa man be. (Jue Mun 139:1, 2) Sɛ a nin Zoova amun afiɛn’n mantan kpa’n, á wún i wlɛ kɛ ɔ nin wɔ be o nun titi.
Cɛn wie lele’n, ɔ liɛ yó ye. Ɲanmiɛn Zoova kwla yo maan dɔ nga su’n, ɔ klun jɔ. Yɛ ɔ kwla uka wɔ naan cɛn wie lele’n ɔ liɛ w’a yo ye. (Ezai 48:17, 18) Zezi seli kɛ: “Kɛ ɔ ko yo naan b’a ɲan nguan m’ɔ leman awieliɛ’n, ɔ ti cinnjin kɛ be si wɔ mɔ ɔ kunngba cɛ yɛ a ti Ɲanmiɛn Kpli’n, ɔ nin sran nga a sunmɛnnin i’n mɔ yɛle Zezi Klisi’n.” (Zan 17:3) Blɛ kekle nga nun’n, like nga e wla o su’n, ɔ tra e ase kɛ like ng’ɔ tra mmeli’n i ase’n sa. Ɔ maan “e jran kekle kpa, yɛ e akunndan’n yoman nɲɔnnɲɔn.”—Ebre Mun 6:19.
Like nga ti yɛ ɔ fata kɛ sran kun si Ɲanmiɛn naan ɔ fɛ i wun mɛntɛn i’n, i wie yɛle nga e kannin be ndɛ fluwa nga nun’n. Sɛ ɔ waan á sí ndɛ nun kpa ekun’n, bo su kle Zoova i Lalofuɛ kun annzɛ kɔ e ɛntɛnɛti adrɛsi jw.org su.
Ninnge wie mɔ be kwla yo ɔ fɛ ekun'n
BIBLU’N NUN NDƐ CINNJIN MUN
?E kwla tra Ɲanmiɛn i janvuɛ?
Kɛ ɔ fɛ i laa lele’n, sran’m be kunndɛ kɛ bé sí be Yifuɛ’n. Biblu’n kwla uka e naan y’a yo Ɲanmiɛn i janvuɛ. I janvuɛ tralɛ’n bo i bo nin i dunman’n i silɛ.
