?KƐ E AKUNNDAN’N SANNGAN’N NGUE YƐ Ɔ KWLA UKA E-Ɔ?
Cɛn wie lele’n sran’m be su kokoman kun
Biblu’n nun ndɛ’n kwla uka e naan y’a kokoman dan. Kɛ mɔ e ti klɔ sran ti’n, e kwlá yoman naan ninnge nga be ti yɛ e koko’n be wie. Sanngɛ e Yifuɛ i liɛ’n ɔ kwla yo maan be wie. I kpa bɔbɔ’n, ɔ kpali Zezi Klisi kɛ uka e. Ɔ cɛ kan’n, ninnge ng’ɔ́ wá yó be asiɛ wunmuan’n su’n, bé trá ng’ɔ yoli be i nun m’ɔ o asiɛ’n su wa’n. I wie yɛle kɛ:
ZEZI WÁ YÓ TUKPACIFUƐ’M BE JUEJUE KƐ NG’Ɔ FA YOLI I LAA’N SA
“Be fali be kwlaa nga tukpacɛ nin be wunnɛn nun yaya fanunfanun ti be o ɲrɛnnɛn nun’n [...] be blɛli i, kpɛkun ɔ yoli be juejue.”—MATIE 4:24.
ZEZI WÁ YÓ MAAN SRAN KWLAKWLA ƝÁN ALIƐ NIN LAWLƐ
“Bé [yɛle kɛ Klisi i sran mun] kplán sua mun yɛ bé trán be nun, bé tá viɲin mun yɛ bé dí be su mma mun. Be su kplanman sua naan sran uflɛ tran nun, yɛ be su taman like naan sran uflɛ di.”—EZAI 65:21, 22.
KƐ ZEZI WÁ SÍE MƐN’N SRAN’M BÉ DÍ FƆUNDI YƐ SRƐ SU KUNMAN BE KUN
“I blɛ su’n, sran kpa’m bé bó nɲrɛ kɛ waka sa, yɛ fɔundi’n yó dan lele saan anglo’n nunman lɛ kun. Sran ng’ɔ́ síe be’n bé fɛ́ i jenvie’n i bue kun su lele fá jú i bue kun’n su lɔ, yɛ bé fɛ́ i Nzue Ba’n su lele fá jú asiɛ’n i tiwa lɔ. [...] I kpɔfuɛ’m bé táfi ndutre’n.”—JUE MUN 72:7-9.
ZEZI WÁ YÓ MAAN SRAN LUFLE BULƐ’N WÍE
“Ɔ́ sí sran ng’ɔ leman wie’n nin yalɛfuɛ’n be aunnvɔɛ, yɛ ɔ́ dé yalɛfuɛ mun. Ɔ́ dé be be nga be kle be yalɛ’n nin nzaje sa yofuɛ’m be sa nun.”—JUE MUN 72:13, 14.
ZEZI WÁ YÓ MAAN ƝRƐNNƐN NIN WIE’N BÉ NÚNNÚN
“Wie’n su tranman lɛ kun, be su yoman sɛ kun, be su sunman kun, be su wunman ɲrɛnnɛn kun.”—SA NGLO YILƐ 21:4.
Ninnge wie mɔ be kwla yo ɔ fɛ ekun'n
KOSAN MƆ BIBLU’N TƐ BE SU’N
?Ngue yɛ Ɲanmiɛn Sielɛ’n wá yó-ɔ?
Nian like nga kɛ Ɲanmiɛn Sielɛ’n wá síe asiɛ wunmuan’n ɔ́ wá yó’n.
