‘MƐN’N i awieliɛ blɛ nga nun’n,’ e si kɛ Zoova kle i sufuɛ’m be atin yɛ ɔ man be ninnge kwlaa nga be sa miɛn i wun naan be nin i be afiɛn w’a mantan kpa’n. (2 Tim. 3:1) Sanngɛ sɛ e kunndɛ kɛ é nánti ajalɛ ng’ɔ fa be’n be su, ɔ fata kɛ e ɲin yi i kpa. E kwla fa blɛ nga e o nun yɛ’n, e sunnzun blɛ mɔ Izraɛlifuɛ’m be o aawlɛ flɛnnɛn nun lɔ’n. Blɛ sɔ nun’n be bo awɛ. Kɛ be ti awɛ’n i tɛlɛ’n ɔ le ninnge wie mun m’ɔ fata kɛ be yo-ɔ.

Zoova seli Moizi kɛ ɔ fa jɛtɛ ufue fa yi awɛ nɲɔn naan “be bo be fa flɛ sran’m be kwlaa.” Kpɛkun “kɛ be tutu be tannin sua’n be bo bɔ bé kɔ́’n, maan be bo naan sran’m be wɔ nyrun.” (Kal. 10:2) Kɛ ɔ ko yo naan sɛ awɛ’n tɛ’n, sran’m b’a si like trele ng’ɔ fata kɛ be yo’n, ɔ fata kɛ Ɲanmiɛn ɲrun jranfuɛ’m be bo awɛ’n i wafawafa. (Kal. 10:3-8) Andɛ kusu’n, Ɲanmiɛn sin ninnge sunman lika kle e ajalɛ. Ndɛ akpasua nga nun’n, é wá kán ninnge nsan mɔ Ɲanmiɛn sin be lika kle e ajalɛ’n be ndɛ. Kpɛkun é wá fá ninnge sɔ mun e sunnzun laa Izraɛli lɔ awɛ’n i tɛlɛ’n. Ninnge nsan sɔ mun yɛle e aɲia dandan mun, nin asɔnun kpɛnngbɛn’m be suklu’n, ɔ nin blɛ mɔ be kle asɔnun bo’m be ajalɛ uflɛ ninnge wie’m be nun’n.

I nun mɔ Izraɛlifuɛ’m be o aawlɛ flɛnnɛn nun lɔ’n, sɛ Zoova kunndɛ kɛ “sran kwlaa” be yia tannin sua’n i bue ng’ɔ kpɛ wia afiliɛ lɔ’n i anuan nun lɛ’n, ɔ fata kɛ Ɲanmiɛn ɲrun jranfuɛ’m be bo awɛ nɲɔn’n likawlɛ. (Kal. 10:3) Akpasua 12 mɔ be bubuli be nun akpasua nnan mɔ be bo sin yia tannin sua’n be kwlaa be ti awɛ’n i tɛlɛ’n. Kɛ ɔ ko yo sɔ’n, be nga be mantan tannin sua’n i anuan’n i wun kokolɛ’n be ju lɔ ndɛ nun. Sanngɛ be nga be o mmua kan’n, be cɛ atin nun kan yɛ ɔ fata kɛ be mian be ɲin naan b’a ju tannin sua’n i wun lɔ. I kwlaa yoli-o, Zoova kunndɛ kɛ be kwlaa be yia naan be ɲan ndɛ ng’ɔ́ wá kán klé be’n i su ye.

Andɛ’n, Ɲanmiɛn semɛn i sufuɛ’m be kɛ be yia tannin sua nun kun. Sanngɛ ɔ te yiɛ i sufuɛ mun aɲia wie’m be bo. Aɲia sɔ’m be nun wie mun yɛle nvle kun aɲia mun nin aɲia uflɛ wie mun ekun. Aɲia sɔ’m be bo’n, be kan ndɛ cinnjin wie mun kle e yɛ be kle e atin ninnge wie’m be yolɛ’n nun. Mɛn wunmuan’n nun’n like kunngba’n yɛ be kle Zoova i sufuɛ mun-ɔn. Be kwlaa nga be mian be ɲin be tran aɲia sɔ’m be bo’n be di aklunjuɛ. Kannzɛ wie’m be fin mmua, yɛ wie’m be kusu be nunman mmua dan, sanngɛ be kwlaa nga be ba’n be wun i wlɛ kɛ balɛ mɔ be bali’n, w’a yoman ngbɛn.

?Yɛ be nga be o mmua mɔ be kwlá yiaman aɲia yowlɛ’n be nun’n be li? Ajulisu mannzin’m be ti’n, sran sɔ’m be kwla ɲan aɲia sɔ’m be su ye. Kpɛkun sɛ é kwlá sé’n ɔ ti kɛ be nin be niaan onga’m be o aɲia yowlɛ kunngba’n nun sa. I wie yɛle blɛ mɔ Anuannzɛ’n i janunfuɛ kun ɔli Benɛn lɔ’n. Blɛ sɔ’n nun’n, aniaan’m be yoli maan aniaan nga be tran Nizɛr lɔ klɔ kun m’ɔ suan  Aaliti’n su’n, be kwla tili ndɛ nga aniaan bian’n kannin’n wie. Klɔ sɔ’n kusu o aawlɛ flɛnnɛn nga be flɛ i kɛ Saara’n i lika wie nun. Sran 21 be trannin aɲia’n i bo. Kannzɛ bɔbɔ be o mmua’n, sanngɛ be nin sran 44.131 be tieli aɲia’n i bo ndɛ likawlɛ. I sɔ’n ti’n, aniaan bian kun klɛli fluwa seli kɛ: “É yó amun mo lelele. Afin amun dunman nun’n e kwla tili aɲia’n i bo ndɛ’n wie. I sɔ’n yoli maan e wunnin i wlɛ kɛ amun klo e dan.”

Laa Izraɛli lɔ’n, kɛ awɛ kunngba yɛ Ɲanmiɛn ɲrun jranfuɛ’m be bo’n, ‘wlengbi mun nin sran akpi su kpɛn’m be ngunmin yɛ be yia tannin sua’n i wun lɛ-ɔ. (Kal. 10:4) Blɛ sɔ’n nun’n, Moizi kan ndɛ wie mun kle be yɛ ɔ kle be like. Like ng’ɔ kle be’n, uka be naan b’a kwla di be junman nga be fa mannin be’n i kpa. ?Sɛ ɔ ti kɛ a o sran sɔ’m be nun wie’n, nn a su yoman like kwlaa nga a kwla yo naan w’a tran aɲia sɔ’n i bo naan w’a ɲan su ye wie?

Andɛ’n, asɔnun kpɛnngbɛn’m be timan “wlengbi.” Asa ekun’n, be junman’n i dilɛ’n nun’n be tinman Ɲanmiɛn i bua fa m’ɔ fa mannin be kɛ be nian su’n, i su. (1 Piɛ. 5:1-3) Sanngɛ be mian be ɲin be niɛn i lika kpa. Ɔ maan kɛ be yia be kɛ be bla naan be kle be ninnge wie’m be yolɛ’n, be kpli yɛ be kɔ-ɔ. I wie yɛle kɛ be yia be kɛ be tran Asɔnun kpɛnngbɛn nin asɔnunfuɛ’m be lika nianfuɛ’m be suklu’n i bo. Suklu sɔ’n i bo’n, be kle be wafa nga be kwla siesie asɔnun’n nun ndɛ’m be kpa tra laa’n. Like nga be kle be suklu sɔ’n i bo’n ti’n, be bɔbɔ nin be nga be nian be lika’n, be kwla fa be wun mantan Zoova kpa. Ɔ maan kannzɛ bɔbɔ e traman suklu sɔ’n i bo’n, sanngɛ be nga be trɛn i bo’n be ti’n, e ɲan su ye wie.

Blɛ wie nun’n, kɛ Ɲanmiɛn ɲrun jranfuɛ’m be bo awɛ’n, i sin’n be bo su ndɛ. Kɛ be yo sɔ’n, Zoova kunndɛ kɛ akpasua’m be wɔ. (Kal. 10:5, 6) Kɛ ɔ fata kɛ akpasua’m be tu be wun bo be wɔ’n, be yomɛn i sukusuku. Sanngɛ i sɔ’n yolɛ’n ti junman dan kun. Ɔ maan wie liɛ’n kɔlɛ yoman Izraɛlifuɛ wie’m be fɛ. ?Ngue ti-ɔ?

Atrɛkpa’n, Izraɛlifuɛ wie’m be se be wun kɛ kɔlɛ’n fu be nun annzɛ i sɔ yolɛ’n sɔnnin dan. Biblu’n se kɛ: “Sɛ sin wɛnsrɛn’n ka sua’n su lɛ kɔnguɛ, naan kpɛkun kɛ aliɛ’n cɛ́n-ɔn, ɔ tu i bo’n, be kusu be tu be bo.” Blɛ uflɛ wie nun kusu’n ‘sin wɛnsrɛn’n ka Nyanmiɛn tannin sua’n su lɛ cɛn ba nnyɔn, anglo kun, annzɛ afuɛ kun,’ ka naan w’a tu i bo. (Kal. 9:21, 22) ?Lika nɲɛ nun yɛ Izraɛlfuɛ’m be kpɛli be ngblaliɛ-ɔ? Kalɛ fluwa’n i ndɛ tre 33 kan lika 40 ndɛ.

Blɛ wie nun’n, lika nga Izraɛlfuɛ’m be kpɛ be ngblaliɛ lɛ’n fɔnvɔ o lɛ. Ɔ maan kɛ be nanti “aawlɛ flɛnnɛn dan sroesroe” nun lele mɔ be ju lika kɛ ngalɛ sa nun’n, nanwlɛ be wun fa be feke. (Mml. 1:19) Ɔ maan kɛ be se be kɛ be wɔ’n, be kwla se be wun kɛ lika nga bé wá kó kpɛ́ ngblaliɛ uflɛ lɔ’n, ɔ su yoman kɛ lika sɔ’n sa.

Kɛ awɛ’n ko tɛ m’ɔ fata kɛ be wɔ’n, ɔ fata kɛ akpasua wie’m be minndɛ kɛ kɔlɛ’n to be ka naan b’a tu be wun bo. Be kwlaa be ti awɛ i tɛlɛ’n, sanngɛ be ngba be kwlá kɔman likawlɛ. Kɛ be bo awɛ mɔ i sin’n be bo su ndɛ’n, ɔ fata kɛ akpasua nga be o wia afiliɛ lɔ’n be wɔ. Akpasua sɔ mun yɛle Zida, nin Isakar ɔ nin Zabilɔn. (Kal. 2:3-8; 10:5, 6) Kɛ akpasua sɔ’m be ko wɔ’n, Ɲanmiɛn ɲrun jranfuɛ’m be bo awɛ’n kpɛkun be bo ndɛ ekun. Kɛ ɔ ko yo sɔ’n, nn kɔlɛ’n w’a to akpasua nsan mɔ be o ngua lɔ’n. Ɲanmiɛn ɲrun jranfuɛ’m be yo sɔ lele saan akpasua’m be kwlaa b’a wie kɔ.

Atrɛkpa’n, kɛ anuannzɛ’n fa ninnge wie’m be yolɛ’n i wun ajalɛ uflɛ’n, kɛ ɔ ko yo naan y’a nanti su’n ɔ kwla yo kekle man e. ?Ngue ti-ɔ? Wie liɛ’n, e kwla se e wun kɛ anuannzɛ’n kacikaci ninnge mun dan. Annzɛ kusu e klo wafa nga e yo ninnge mun laa’n. Ɔ maan e kunndɛman kɛ é káci be yolɛ wafa’n. Atrɛkpa kusu’n, sa wie’m be ti’n, kɛ ɔ ko yo naan y’a tra e awlɛn y’a nanti ajalɛ sɔ’m be su’n, ɔ timan pɔpɔ. Sanngɛ sɛ e mian e ɲin e nanti ajalɛ sɔ’m be su’n, é wún i kɛ be ti kpa man e naan Zoova yra e su.

Moizi blɛ su’n, Zoova kleli sran miliɔn kpanngban be atin aawlɛ flɛnnɛn’n nun. Sɛ ɔ ti kɛ Zoova w’a kleman be atin yɛ w’a nianman be lika sa’n, nn b’a fiteman nun. Andɛ kusu’n, sɛ é kwlá sé’n Zoova kle e atin mɛn tɛ nga nun. Ɔ uka e naan e nin i e afiɛn mantan kpa naan e lafi i su tankaan kpa. Maan e fua kpa kɛ é yó kɛ Izraɛlifuɛ mɔ kɛ awɛ’n tɛ’n be yo i nuan su sa’n be liɛ’n sa.