Ɔ ka kan’n awa nga Ɲanmiɛn tɛkɛli i ɲanmiɛn su lɔ’n, ɔ́ wá síe asiɛ wunmuan’n. Blɛ sɔ’n nun’n sran’m be bo yó kun, bé yó sa kpa yɛ bé ɲán junman kpa bé dí. Zezi Klisi yɛ Ɲanmiɛn kpɛli i kɛ ɔ yo awa sɔ’n i su kpɛn-ɔn. Zezi su yoman kɛ andɛ mɛn siefuɛ’m be sa. I liɛ’n ɔ́ yó like kpa mán be ng’ɔ́ síe be’n. Ɔ́ síe sran mun klolɛ su, ɔ́ yó be ye, ɔ́ sí be aunnvuɛ yɛ ɔ́ yó sa’n i nuan su.—Ezai 11:4.

Be nga bé wá trán asiɛ’n su’n be bo yó kun. Be su nianman kɛ be fin nvle fanunfanun nun annzɛ be kanman aniɛn kunngba’n ti’n bé búbú be wun nun. Sran’m be kwlakwla bé trán kɛ awlobo kunngba nunfuɛ mun sa. (Sa Nglo Yilɛ 7:9, 10) Be kwlaa nga bé trán asiɛ’n su’n, bé kló Ɲanmiɛn nin be wiengu mun. Kpɛkun be bo yó kun bé dí junman naan asiɛ’n kaci lika klanman.—Jue Mun 115:16.

Kɛ Ɲanmiɛn wá síe asiɛ’n, i su ninnge’m be su kleman sran’m be yalɛ kun. (Jue Mun 24:1, 2) I nun mɔ Zezi o asiɛ’n su wa’n, cɛn kun’n ɔ jrannin aunmuan dan kun m’ɔ su fita’n. I lɛ nun’n, ɔ kleli like nga Ɲanmiɛn fanngan nun’n ɔ́ wá yó’n i bue kaan sa. (Marki 4:39, 41) I sɔ’n kle kɛ, kɛ Zezi wá síe sran mun’n asiɛ’n su ninnge’m be su yoman be abɔlɛ kun. Blɛ sɔ’n nun’n, klɔ sran mun nin nnɛn’m bé trán fɛfɛ yɛ sran fi su saciman asiɛ’n.—Oze 2:20.

Mɛn uflɛ’n nun’n sran fi su tɔman tukpacɛ kun. Asa’n, be su yoman kpɛnngbɛn yɛ be su wuman kun. (Ezai 35:5, 6) Bé trán lika kun m’ɔ ti klanman kpɛkun ɔ ti sanwun’n i nun. Lika sɔ’n i nun tranlɛ’n wá yó fɛ kɛ Edɛnin fie’n nun lɔ liɛ’n sa. Blɛ sɔ’n nun’n asiɛ’n yó like ye. Ɔ maan asiɛ’n sufuɛ’m bé ɲán aliɛ kpanngban bé dí. (Bo Bolɛ 2:9) Kɛ laa Izraɛli lɔ sa’n, ‘aliɛ’n bóbó’ sran’m be su.—Saun Yolɛ 26:4, 5.

Kɛ Ɲanmiɛn wá síe asiɛ’n, sran’m be kwlaa bé trán fɔun nun yɛ bé yó be wiengu’m be ye. Be su diman alɛ kun, be su mianmianman be wiengu mun kun yɛ sran kwlaa ɲán like nga i sa miɛn i wun’n. Biblu’n se kɛ: “Sran’m bé dí vinyi fie nin be olivie fie fɔuun, sran fi su wlaman be nyin nglonglo kun.”—Mise 4:3, 4.

Awlobo kwlakwla ɲɛ́n i sua liɛ. Yɛ sran fi su fuanman be sua sɔ’m be nun. Asa’n, junman kwlakwla nga bé dí’n bé ɲɛ́n i nuan like. Kɛ nga Biblu’n fa kan’n sa’n, be nga bé trán mɛn uflɛ’n nun’n “be su fɛman ngbɛn.”—Ezai 65:21-23.

Biblu’n se kɛ: “Asiɛ’n wunmuan’n su sran’m bé sí Anannganman lelele.” (Ezai 11:9) Be nga bé trán mɛn uflɛ’n nun’n, bé súan Zoova m’ɔ ti be Yifuɛ’n nin ninnge ng’ɔ yili be’n be su like. Be su faman like nga be si i’n, be yiman alɛ ninnge mun annzɛ be su fa yoman be wiengu’m be abɔlɛ. (Ezai 2:4) Bé súan wafa nga be nin be wiengu’m be kwla tran klanman’n nin wafa nga be kwla nian asiɛ’n i lika’n, be su like.—Jue Mun 37:11.

Ɲanmiɛn fali blɛ siesieli asiɛ’n i klanman kpa naan sran’m be tran su aklunjɔɛ nun. Ɔ kunndɛ kɛ sran’m be tran su tititi. (Jue Mun 37:29; Ezai 45:18) Kɛ ɔ ko yo naan i sɔ liɛ’n w’a yo ye’n, Ɲanmiɛn wá “núnnún wie’n mlɔnmlɔnmlɔn.” (Ezai 25:8) Biblu’n se kɛ: “Wie’n su tranman lɛ kun, be su yoman sɛ kun, be su sunman kun, be su wunman ɲrɛnnɛn kun.” (Sa Nglo Yilɛ 21:4) Be nga bé ɲán be ti mɛn tɛ nga nun’n nin be nga bé wá cɛ́n be mɛn uflɛ’n nun’n, Ɲanmiɛn maan bé trán nguan nun tititi.—Zan 5:28, 29; Sa Nga Be Yoli’n 24:15.

 Dɔ nga su bɔbɔ’n, sran miliɔn kaka be su siesie be wun naan bé trán mɛn uflɛ m’ɔ ka kan bé ɲɛ́n i’n i nun. Kannzɛ fɔ o be nun’n, sanngɛ be nanti Ɲanmiɛn i mmla’m be su. ?Ngue yɛ ɔ uka be naan b’a kwla yo sɔ-ɔ? Be suan Zoova nin i Wa Zezi Klisi be su like.—Zan 17:3.

Sɛ ɔ waan á sí like uflɛ mɔ a kwla yo naan w’a ɲan ɔ ti mɛn nga nun naan w’a tran mɛn uflɛ’n nun wie’n, kplin su kɛ Zoova i Lalofuɛ kun wa kle wɔ Biblu’n nun like. Annzɛ kɔ jw.org su naan ɔ ngunmin suan Biblu’n nun like.