“Be klo sran. Kpɛkun be klo nnɛn mun wie. Afin cɛn kun’n, be nun kun m’ɔ suan Elɛnin’n, ɔ mannin min alua’m be bisikli. Kɛ ɔ fɛ i lɛ’n, cɛn kwlaa nga e sin be wun lɛ’n alua’m be kunndɛ kɛ bé kɔ́ be wun lɔ naan be man be bisikli.

“Ɔ maan cɛn kwlaa kɛ e sin lɛ’n, be man min alua’m be bisikli. Kpɛkun be nin min koko yalɛ kan. E yoli sɔ anglo kaka, sanngɛ n faman min wun n mantan be kpa sa. Kɛ ɔ́ yó sɔ’n nn n le afuɛ 70 tra su. Sanngɛ n siman like nga Zoova i Lalofuɛ’m be lafi su’n. Kɛ mɔ asɔnun kpanngban be lakali min’n ti’n, n seli min wun kɛ sɛ n tran min awlo wa naan n suan Biblu’n nun like’n ɔ ti kpa.

“I sin’n, n wunnin Zoova i Lalofuɛ uflɛ wie mun klɔ’n i bue uflɛ su lɔ. Be kusu be jinjin be kakaklolo’n i wun lɛ wie. Yɛ be wun yo fɛ wie. N sieli i nzɔliɛ kɛ kosan kwlaa nga n usa be’n, be fa Biblu’n be tɛ su. I sɔ’n ti’n, n ma lafili be su kpa ekun.

“Cɛn kun’n, Elɛnin usali min kɛ: ‘?A si kɛ nnɛn’m be ti like kun mɔ Ɲanmiɛn fa cɛli e-ɔ?’ N tɛli i su kɛ: “Ɛɛn, n si sɔ.” I sin’n, ɔ kanngannin Ezai 11:6-9 nun kleli min. Kɛ ɔ fɛ i lɛ’n, n kunndɛli kɛ ń sí Biblu’n nun ndɛ uflɛ wie mun ekun. Sanngɛ n kunndɛman kɛ ń fá be fluwa mun wie.

“I sin’n, e nin Elɛnin nin i wun Blɛnti e kokoli yalɛ kpɛ sunman. E yalɛ kokolɛ sɔ’n yoli min fɛ kpa. Be seli min kɛ n kanngan Matie fluwa’n nun lele n fa ju Sa Nga Be Yoli fluwa’n nun. I liɛ’n, ń sí like nga Klisifuɛ kpa’m be yo’n. I sɔ kusu yɛ n yoli-ɔ. Kɛ n yoli sɔ’n, w’a cɛman n seli be kɛ be kle min Biblu’n nun like siɛn’n. Kɛ ɔ́ yó sɔ’n nn e o afuɛ 2016 nun.

“Biblu’n nun like suanlɛ’n nin aɲia’m be bo kɔlɛ’n yoli min fɛ dan. Kɛ be blɛ’n ju’n, min wun blibli min kpa. Asa’n, like ng’ɔ yoli min fɛ kpa ekun’n yɛle kɛ n sili like nga Biblu’n kle i sakpasakpa’n. Kɛ ɔ dili afuɛ kun nin sin’n, be yoli min batɛmun. Andɛ’n, n le afuɛ 79 yɛ n lafi su kɛ n wo Ɲanmiɛn sulɛ kpafuɛ’n nun. Kɛ Zoova yoli maan n kacili i sufuɛ’n, nanwlɛ i sɔ’n yo min fɛ lele kpe nun.”