SASAFUƐ TRANWLƐ'N No. 1 2023 | Biblu’n kwla uka be nga be ti nun w’a sanngan’n
Asiɛ wunmuan’n su’n, sran miliɔn kaka be ti nun sanngan. Be nun wie’m be ti gbanflɛn annzɛ talua, yɛ wie’m be ti kpɛnngbɛn. Wie’m be ti yalɛfuɛ yɛ wie’m be ti aɲanbeunfuɛ. Wie’m be dili suklu yɛ wie’m b’a diman suklu. Wie’m be kusu be kan aniɛn fanunfanun annzɛ be kɔ asɔnun fanunfanun nun. ?Kɛ be se kɛ sran kun i ti nun w’a sanngan’n i bo yɛle benin? ?Kɛ ɔ ko yo sɔ’n, wafa sɛ sran sɔ’n i wun yo i-ɔ? Fluwa nga nun’n, é wá wún sa nga ti yɛ ɔ ti cinnjin kɛ be nga sa sɔ’n ju be su’n be yo be wun ayre kpa’n. Asa’n, é wá wún wafa nga Biblu’n kwla uka be’n.
Mɛn wunmuan’n nun’n, sran kpanngban be ti nun sanngan
Sran wafawafa kwlaa be ti nun kwla sanngan. Fa ɔ ɲin sie i wafa nga Biblu’n nun ndɛ’n kwla ɔ naan w’a jran tukpacɛ sɔ’n i ɲrun kekle’n i su.
Ɲanmiɛn nian ɔ lika
?Ngue ti yɛ a kwla lafi su kɛ Ɲanmiɛn Zoova wun wafa nga ɔ wun yo wɔ’n i wlɛ tra sran kwlakwla-ɔ?
1 | Ɲanmiɛn srɛlɛ’n: “An fa amun su sa’n kwlaa wlɛ i Ɲanmiɛn sa nun”
?Sɛ e ti nun sanngan annzɛ e wla bo e wun’n, e kwla srɛ Ɲanmiɛn e kan wafa nga e wun yo e’n i ndɛ e kle i? ?Wafa sɛ yɛ Ɲanmiɛn srɛlɛ’n kwla uka be nga be wla w’a bo be wun’n niɔn?
2 | “Fɔnvɔlɛ mɔ Ɲanmiɛn Ndɛ’n fɔnvɔ e’n”
Biblu’n se kɛ ɔ ka kan’n ninnge kwlaa nga be bo e wla’n bé wíe.
3 | Be nga Biblu’n kan be ndɛ’n be su ndɛ’n kwla uka e
Ɲanmiɛn sufuɛ yasua nin bla wie mɔ Biblu’n kan be ndɛ’n be su ndɛ’n kwla uka e naan sɛ e ti nun sanngan’n w’a yoman e kɛ e ngunmin yɛ e o-ɔ.
4 | Biblu’n nun afɔtuɛ’m be kwla uka e
Sɛ ɔ ti nun w’a sanngan naan a bu Biblu’n ndɛ’n i su akunndan kpɛkun a fa ninnge nga a kwla yo be’n sie ɔ ɲrun’n, i sɔ’n uka ɔ naan w’a jran kekle.
Wafa nga e kwla uka be nga be ti nun w’a sanngan’n
Sɛ a suan ɔ janvuɛ kun mɔ i ti nun w’a sanngan’n i bo’n, i sɔ’n úkɛ i kpa.
