Fluwa’n nun kannganfuɛ’m be kosan mun
?Wafa sɛ yɛ like suanlɛ nga be flɛ i kɛ “Maan ɔ dunman’n yo sanwun” m’ɔ o afuɛ 2020, Zuɛn Sasafuɛ Tranwlɛ’n nun’n, ɔ ukali e naan y’a wun Zoova i dunman’n nin i atin m’ɔ le i sie nglo nin asiɛ’n be ndɛ’n i wlɛ kpa-ɔ?
Like suanlɛ sɔ’n nun’n, e kannin sa cinnjin kun m’ɔ kan anzi nin klɔ sran mun’n i ndɛ. Sa sɔ’n yɛle Zoova i dunman m’ɔ fata kɛ ɔ yo sanwun’n. I wie yɛle kɛ ɔ fata kɛ e wun i wlɛ sɛ Zoova i sielɛ liɛ’n yɛ ɔ ti kpa-o, annzɛ ɔ timan kpa-o. Asa’n, ɔ fata kɛ e tinuntinun e yi i nglo sɛ e nin Ɲanmiɛn é nánti klanman-o, annzɛ e su yoman sɔ-o.
?Ngue yɛ ɔ ukali e naan y’a wun i wlɛ kɛ ndɛ kwlaa sɔ’m be nin Zoova i dunman m’ɔ fata kɛ ɔ yo sanwun’n be kɔ likawlɛ-ɔ? Maan e fa e ɲin e sie i sa nsan su.
Kɛ ɔ fɛ i Edɛnin lɔ fie nun lele andɛ’n, Satan saci Zoova i dunman.
Like klikli’n yɛle kɛ Edɛnin lɔ fie nun lɔ’n, Satan sacili Zoova i dunman. Kosan nga Satan usali Ɛvu’n kle kɛ i waan ɔ́ sé kɛ Zoova i klun yo wi naan ɔ kle be nga ɔ sie be’n be yalɛ. I sin’n, ɔ seli kɛ ndɛ nga Zoova kannin’n ɔ timan su. Ɔ maan, ɔ su se kɛ Ɲanmiɛn diman nanwlɛ. I lɛ nun’n, ɔ sacili Ɲanmiɛn i dunman. I sɔ’n ti yɛ be wa flɛli i kɛ “Suɛn Tɔnfuɛ’n” niɔn. (Zan 8:44) Kɛ mɔ Ɛvu fali Satan i ato ndɛ’n su ti’n, ɔ yoli ɲin kekle Ɲanmiɛn su yɛ w’a kplinman su kɛ Ɲanmiɛn sie i kun. (Bob. 3:1-6) Lele nin andɛ’n, Satan te saci Zoova i dunman. Be nga be fa Satan i ato ndɛ’m be su’n, kpɛ sunman be yo ɲin kekle Zoova su. Zoova i sufuɛ’m be ɲrun’n, Zoova i dunman sacilɛ’n timan su kaan sa. I sɔ’n ti yɛ mɛn’n w’a saci mɔ sran’m be wun be ɲrun dan’n niɔn.
Like nɲɔn su’n yɛle kɛ Zoova w’a fua kpa kɛ ɔ́ yó naan i dunman’n yo sanwun. I waan ɔ́ yó sɔ naan ninnge kwlaa ng’ɔ yili be’n be ɲan su ye. I sɔ’n ti Zoova i cinnjin tra like kwlaa. Ɔ maan ɔ seli kɛ: “Ń má yó maan [min dunman’n ] yó sanwun.” (Eze. 36:23) Zezi seli kɛ, kɛ Zoova i sufuɛ’m bé srɛ́ Ɲanmiɛn’n, like ng’ɔ fata kɛ ɔ yo be cinnjin kpafuɛ’n yɛle Zoova i dunman m’ɔ fata kɛ ɔ yo sanwun’n. Ɔ seli kɛ be srɛ kɛ: “Maan ɔ dunman’n yo sanwun.” (Mat. 6:9) Biblu’n kan Zoova i dunman m’ɔ fata kɛ ɔ yo sanwun’n i ndɛ kpɛ sunman. I wie yɛle kɛ: “Amun manman Zoova kɛ ɔ nin i fata’n sa, i dunman dan’n ti.” (1 Ɲol. 16:29; Jue. 96:8) “Amun to jue be mɛnmɛn i dunman m’ɔ ti dan’n.” (Jue. 66:2) “Ń mánmán ɔ dunman’n tititi.” (Jue. 86:12) Cɛn kun mɔ Zezi o Ɲanmiɛn i sua’n nun Zerizalɛmun lɔ’n, ɔ seli kɛ: “Min Si, yo maan ɔ dunman’n fu.” Kɛ ɔ kannin sɔ’n Zoova bɔbɔ tɛli su kɛ: “N yoli maan ɔ fuli, yɛ ń wá yó maan ɔ́ fú ekun.”—Zan 12:28. a
Like nsan su’n, yɛle kɛ Zoova i dunman’n i sanwun yolɛ’n nin i klun sa’n i su kpɛnlɛ’n be kɔ likawlɛ. Maan e yiyi nun kan: ?Kɛ Klisi i Afuɛ Akpi Famiɛn Dilɛ Blɛ’n ko wie mɔ be ko sa sran mun ko nian ko wie’n, sa benin yɛ ɔ́ jú-ɔ? ?Klɔ sran nin anzi mun bé sí Zoova i dunman i sanwun m’ɔ ti’n i su akplowa ekun? Kɛ ɔ ko yo naan y’a tɛ kosan sɔ’n su’n, maan e fa e ɲin e sie i like nɲɔn nga’m be su. I klikli yɛle wafa nga sran’m be nin Ɲanmiɛn be nanti’n yɛ i nɲɔn su’n yɛle atin mɔ Zoova le i sie nglo nin asiɛ’n. Blɛ sɔ’n nun’n, ɔ nunman nun kɛ be sa sran mun nian sɛ be nin Ɲanmiɛn bé nánti klanman-o. Afin fɔ nunman be nun kun yɛ be kleli kɛ be ti ndɛnmanfuɛ. Bé ɲán nguan m’ɔ leman awieliɛ’n. ?Blɛ sɔ’n nun’n, bé sí atin mɔ Zoova le i sie nglo nin asiɛ’n, i su akplowa ekun’n? Cɛcɛ. Afin nglo lɔfuɛ mun nin asiɛ’n sufuɛ’m be bo yó kun yɛ bé kplín su kɛ Zoova sie be. ?Kɛ ɔ ko yo sɔ’n, Zoova i dunman’n yó i sufuɛ’m be cinnjin titi?
Blɛ sɔ’n nun’n, nn Zoova i dunman’n w’a yo sanwun. Sanngɛ Zoova i dunman’n ɔ́ yó i sufuɛ mɔ be o nglo lɔ’n nin asiɛ’n su wa’n, be cinnjin titi. Afin bé wá wún abonuan sa kpanngban wie mun ekun mɔ Zoova wá yó be’n. Kɛ Zezi ko fa sielɛ’n ko wlɛ i Zoova sa nun’n, Zoova “síe like kwlaa.” (1 Kor. 15:28) I sin’n, asiɛ’n sufuɛ’m “bé ɲán be ti mlɔnmlɔn kɛ Ɲanmiɛn i mma mun sa.” (Rɔm. 8:21) Ɔ maan kɛ nga Zoova fa sunnzunnin’n sa’n, ɲanmiɛn su lɔfuɛ mun nin asiɛ’n sufuɛ’m be bo yó kun kɛ awlobo kunngba nunfuɛ mun sa.—Efɛ. 1:10.
?Kɛ ninnge kwlaa sɔ’m be nuan ko yia’n, i sɔ’n yó ɲanmiɛn su lɔfuɛ mun nin asiɛ’n sufuɛ’m be sɛ? Kɛ ɔ ko yo sɔ’n, bé kúnndɛ kpa kɛ bé mánmán Zoova i dunman’n. Jue tofuɛ Davidi seli kɛ: ‘Maan manmanlɛ’n yo Ɲanmiɛn Zoova i liɛ. Maan be mɛnmɛn i dunman m’ɔ ti dan’n tititi.’ (Jue. 72:18, 19) É wá wún ninnge uflɛ wie mun ekun mɔ be ti’n, é mánmán Zoova tititi-ɔ.
Zoova i dunman’n yi sran wafa ng’ɔ ti’n i nglo. Kɛ e ti i dunman’n, e wla kpɛn su kɛ ɔ ti klolɛ. (1 Zan 4:8) É wlá kpɛ́n su titi kɛ, kɛ mɔ Zoova klo e’n i ti yɛ ɔ yili e-ɔ. Klolɛ sɔ’n ti yɛ ɔ yili e ti tɛ’n niɔn. Asa’n, e wlá kpɛ́n su titi kɛ wafa ng’ɔ sie sran mun’n, ɔ taka klolɛ su. Sanngɛ é wá wún ninnge wie mun ekun mɔ be kle kɛ Zoova ti klolɛ-ɔ. É wá fá e wun é mántan e Si Ɲanmiɛn titi yɛ é tó jue mɛ́nmɛ́n i dunman’n.—Jue. 73:28.
