1. ?Ngue yɛ Zoova kunndɛ kɛ e yo-ɔ?

 KƐ YASUA kun nin i yi be wu ba’n be klun jɔ dan. Kannzɛ be klo be wa nɔnman sɔ’n sanngɛ be kunndɛman kɛ ɔ ka bakan titi. I kpa bɔbɔ’n, sɛ be nian naan be wa’n ɔ ɲinman’n srɛ kwla kun be. I wafa kunngba’n, kɛ e bo Zoova i su like suanlɛ bo’n ɔ yo i fɛ. Sanngɛ ɔ kunndɛman kɛ e kɛ i sɔ’n su. (1 Kor. 3:1) Ɔ kunndɛ kɛ e yo kɛ “kpɛnngbɛn mun sa.”—1 Kor. 14:20.

2. ?Ngue yɛ é wá kɛ́n i ndɛ like suanlɛ nga nun-ɔn?

² ?Kɛ be se kɛ Klisifuɛ kun w’a yo kɛ kpɛnngbɛn sa’n, i bo’n yɛle benin? ?Ngue yɛ ɔ fata kɛ Klisifuɛ kun yo naan i ɲin w’a ti Ɲanmiɛn sulɛ’n nun-ɔn? ?Wafa sɛ yɛ Biblu’n nun ndɛ nga be ti kɛ aliɛ sa’n, be su akunndan bulɛ’n kwla uka e naan y’a tin Ɲanmiɛn sulɛ’n nun-ɔn? ?Yɛ ngue ti yɛ ɔ fataman kɛ e lafi e wun su dan-ɔn? Like suanlɛ nga nun’n, é wá tɛ́ kosan sɔ’m be su.

?KƐ BE SE KƐ KLISIFUƐ KUN W’A TIN ƝANMIƐN SULƐ’N NUN’N I BO’N YƐLE BENIN?

3. ?Kɛ be se kɛ ɔ fata kɛ Klisifuɛ’m be yo kpɛnngbɛn Ɲanmiɛn sulɛ’n nun’n, i bo’n yɛle benin?

³ Glɛki nun ndɛ nga be kacili i Wawle’n nun kɛ “kpɛnngbɛn mun’n” be kwla kaci i ekun kɛ “be nga b’a tin’n.” (1 Kor. 2:6) Ɔ maan wafa nga ba nɔnman kun ɲin lele ɔ fa yo kpɛnngbɛn’n, i wafa kunngba’n ɔ fata kɛ Klisifuɛ’m be wɔ be ɲrun naan be tin Ɲanmiɛn sulɛ’n nun. I yo, kannzɛ y’a wɔ e ɲrun naan y’a tin Ɲanmiɛn sulɛ’n nun’n, ɔ fata kɛ e mian e ɲin e yo sɔ titi. (1 Tim. 4:15) I gbanflɛn annzɛ talua-o, i kpɛnngbɛn-o, e kwlakwla e ɲin kwla ti Ɲanmiɛn sulɛ’n nun. ?Sanngɛ ngue yɛ ɔ kle kɛ Klisifuɛ kun i ɲin w’a ti Ɲanmiɛn sulɛ’n nun-ɔn?

4. ?Ngue yɛ ɔ kle kɛ Klisifuɛ kun w’a tin Ɲanmiɛn sulɛ’n nun-ɔn?

⁴ Klisifuɛ nga w’a tin Ɲanmiɛn sulɛ’n nun’n, ɔ nanti Ɲanmiɛn i mmla’m be kwlaa be su. Ɔ kpaman be nun. Ɔ ti su kɛ ɔ kwla fɔn, afin fɔ o i nun. Sanngɛ cɛn kwlakwla’n ɔ miɛn i ɲin  bu akunndan kunngba nga Zoova bu’n wie, yɛ ɔ yo Zoova i klun sa’n. Ɔ fa nzuɛn uflɛ’n yɛ ɔ miɛn i ɲin kpa titi naan akunndan ng’ɔ bu’n ɔ nin Zoova liɛ’n be yo kun. (Efɛ. 4:​22-24) Ajalɛ ng’ɔ fa be’n be taka Ɲanmiɛn i mmla mun ɔ nin i mmla’m be sin akunndan’n be su. Ɔ maan ɔ nunman nun kɛ sa kwlaa nun’n be kpɛ mmla be mɛn i naan w’a si like ng’ɔ fata kɛ ɔ yo’n. Kɛ ɔ ko fa ajalɛ kun’n ɔ miɛn i ɲin nanti su.—1 Kor. 9:​26, 27.

5. ?Ninnge benin mun yɛ be kwla kle sran nga i ɲin nin-a timan Ɲanmiɛn sulɛ’n nun’n i yalɛ-ɔ? (Efɛzifuɛ Mun 4:​14, 15)

⁵ Klisifuɛ nga i ɲin nin-a timan Ɲanmiɛn sulɛ’n nun’n i lakalɛ timan kekle. Ɔ fa “gblɛfuɛ mɔ be laka sran mun naan be fa atin tɛ su’n” be ndɛ’m be su ndɛndɛ kpa. Ato ndɛ nga be kɛn i televiziɔn nun annzɛ ɛntɛnɛti su’n ɔ cɛman naan w’a fa su. Asa’n be nga be nin Ɲanmiɛn b’a bu’n be kwla lɛkɛ i. a (An kanngan Efɛzifuɛ Mun 4:​14, 15 nun.) Ɔ ju wie’n, ɔ fɛ i ɲin ci i wiengu mun, ɔ nin i wiengu mun be timan be wun aniɛn, annzɛ ɔ fa ya ndɛndɛ. Asa’n ɔ kwla tɔ sa tɛ yolɛ’n nun ndɛndɛ.—1 Kor. 3:3.

6. ?Sunnzun ase benin yɛ e kwla fa kan wafa nga Klisifuɛ kun kɔ i ɲrun lele ɔ tin Ɲanmiɛn sulɛ’n nun’n i ndɛ-ɔ? (An nian foto’n wie.)

⁶ Kɛ nga e fa wunnin i’n sa’n, Biblu’n fa wafa nga bakan kun ɲin lele ɔ fa yo kaklaka’n, ɔ sunnzun wafa nga sran kun kɔ i ɲrun lele ɔ tin Ɲanmiɛn sulɛ’n nun’n. Ninnge sunman be o lɛ mɔ bakan kun su wunmɛn i wlɛ-ɔ. Ɔ maan ɔ fata kɛ be sɛsɛ i yɛ be niɛn i su lele naan w’a yo kaklaka. Maan e fa sa kun e yiyi nun. Niɛn kun kwla se i wa kan’n kɛ ɔ trɛ i sa’n naan b’a kpɛ akpɔ’n. Sanngɛ kɛ ba’n ɲín’n, i nin kwla mɛn i atin kɛ i ngunmin kpɛ akpɔ’n siɛn’n. Sanngɛ ɔ́ kpɛ́n i wla kɛ maan ɔ dun mmua nian bɛ su nin fama su ka naan w’a kpɛ akpɔ’n. Kɛ ba’n ko yo kaklaka’n, i bɔbɔ si wafa ng’ɔ kwla sɛsɛ i wun’n. Ɔ fata kɛ kpɛnngbɛn’m be uka bakanngan mun naan sa w’a ɲanman be. I wafa kunngba’n, ɔ fata kɛ aniaan nga b’a tin Ɲanmiɛn sulɛ’n nun’n, be uka be nga be nin-a tinman’n naan b’a fa ajalɛ kpa naan be nin Zoova be afiɛn w’a saciman. Klisifuɛ nga w’a tin Ɲanmiɛn sulɛ’n nun’n i liɛ’n, ka naan w’a fa ajalɛ kun’n, ajalɛ sɔ’n i su  akunndan nga Zoova bu mɔ Biblu’n kɛn i ndɛ’n, ɔ fa blɛ bu su akunndan kpa. Kpɛkun ɔ nian su fa ajalɛ.

7. ?Sran nga w’a tin Ɲanmiɛn sulɛ’n nun’n, ɔ mianman ukalɛ wun kun?

⁷ ?Sran nga w’a tin Ɲanmiɛn sulɛ’n nun’n, ɔ mianman ukalɛ wun kun? Cɛcɛ. Ɔ ju wie’n ɔ fata kɛ ɔ usa ngwlɛlɛ afɛ. Ɔ kwla usa be nga be ti akunndanfuɛ’n, annzɛ be si sa wie nun trɛ i’n be ngwlɛlɛ afɛ. Yɛ ɔ wun i wlɛ kɛ i bɔbɔ yɛ “ɔ́ súɛ i trɔ’n niɔn.” (Gal. 6:5) Sran nga i ɲin nin-a timan’n i liɛ’n, ɔ minndɛ kɛ sran uflɛ yɛ ɔ kle i like kwlaa ng’ɔ fata kɛ ɔ yo’n niɔn.

8. ?Ngue yɛ ɔ kle kɛ Klisifuɛ nga b’a tin Ɲanmiɛn sulɛ’n nun’n, be kwlaa be ninnge yolɛ wafa’n timan kun-ɔn?

⁸ Sran kaklaka’m be kwlaa be sran waka ɔ nin be ɲrun waka’n timan kun. I wafa kunngba’n Klisifuɛ nga b’a tin Ɲanmiɛn sulɛ’n nun’n be kwlaa be ninnge yolɛ wafa’n timan kun. Wie’m be si ngwlɛlɛ kpa, wie’m be ti yakpafuɛ kpa, wie’m be kusu be klun ti ufue dan, yɛ wie’m be si aunnvɔɛ dan. Asa’n sɛ sa kun tɔ Klisifuɛ nɲɔn mɔ b’a tin Ɲanmiɛn sulɛ’n nun’n be su’n, bé jrán Biblu’n su naan b’a fa ajalɛ. Sanngɛ wie liɛ’n nán ajalɛ kunngba’n yɛ bé fá-ɔ. Afin wie liɛ’n like nga sran kun i klun akunndan’n mɛn i atin kɛ ɔ yo’n, ɔ nin sran uflɛ liɛ’n timan kun. Kɛ mɔ be wun i sɔ liɛ’n i wlɛ’n ti’n, be su diman be wiengu jɔlɛ ajalɛ ng’ɔ fali’n ti. Sanngɛ be mian be ɲin naan be bo w’a yo kun titi.—Rɔm. 14:10; 1 Kor. 1:10.

LIKE NGA KLISIFUƐ KUN YÓ NAAN W’A TIN ƝANMIƐN SULƐ’N NUN’N

9. ?Wafa nga Klisifuɛ kun tin Ɲanmiɛn sulɛ’n nun’n, ɔ nin bakan kun i ɲinlɛ liɛ’n ɔ ti kun?

⁹ Kɛ bakan kun o lɛ’n, e si kɛ i kwlaa yoli-o, saan ɔ́ ɲín. Sanngɛ Ɲanmiɛn sulɛ’n nun’n ɔ timan sɔ. Ɔ fata kɛ sran kun i bɔbɔ miɛn i ɲin yo ninnge wie mun naan i ɲin w’a ti Ɲanmiɛn sulɛ’n nun. I wie yɛle Klisifuɛ nga be o Korɛnti lɔ’n be liɛ’n. Kɛ be yoli be batɛmun’n, Ɲanmiɛn fɛli i wawɛ’n mannin be. Kpɛkun akoto Pɔlu bɔbɔ kleli be like. (Yol. 18:​8-11) Ɔ nin i sɔ ngba’n, kɛ afuɛ kpanngban sín’n nn be nun kpanngban be nin-a tinman Ɲanmiɛn sulɛ’n nun. (1 Kor. 3:2) ?É yó sɛ naan i sɔ sa’n w’a juman e su wie?

10. ?Ngue yɛ ɔ fata kɛ e yo naan y’a tin Ɲanmiɛn sulɛ’n nun-ɔn? (Zidi 20)

¹⁰ Kɛ ɔ ko yo naan sran kun i ɲin w’a ti Ɲanmiɛn sulɛ’n nun’n, ɔ fata kɛ i bɔbɔ kunndɛ kpa kɛ ɔ́ yó sɔ. Be nga be siman sa mɔ be kunndɛman kɛ bé káci’n, be ɲin su kwlá timan Ɲanmiɛn sulɛ’n nun. (Ɲan. 1:22) E kunndɛman kɛ é yó kɛ be nga b’a yo kaklaka mɔ sanngɛ be te kunndɛ kɛ be si nin be nin mun yɛ be kle be ajalɛ kwlaa ng’ɔ fata kɛ be fa’n be sa. E kunndɛ kɛ é yó e liɛ ng’ɔ fata kɛ e yo’n naan e nin Zoova e afiɛn w’a mantan kpa titi. (An kanngan Zidi 20 nun.) Sɛ a su mian ɔ ɲin naan w’a tin Ɲanmiɛn sulɛ’n nun’n, srɛ Zoova kɛ ɔ yo maan a “kunndɛ” kpa kɛ á yó sɔ, yɛ ɔ man ɔ “wunmiɛn” naan w’a kwla yo sɔ.—Fip. 2:13.

11. ?Ngue yɛ Zoova yo fa uka e naan e ɲin w’a ti i sulɛ’n nun-ɔn? (Efɛzifuɛ Mun 4:​11-13)

¹¹ Zoova uka e naan y’a tin i sulɛ’n nun. Asɔnun kpɛnngbɛn mɔ be nian e lika yɛ be kle e like’n, be uka e naan sɛ é kwlá sé’n ‘y’a yo kpɛnngbɛn’ Ɲanmiɛn sulɛ’n nun. I sɔ’n yo maan ‘e tin yɛ e yo sran kpa kɛ Klisi sa.’ (An kanngan Efɛzifuɛ Mun 4:​11-13 nun.) Asa’n, Zoova fɛ i wawɛ’n man e naan y’a bu “akunndan nga Klisi bu’n wie.” (1 Kor. 2:​14-16) Kpɛkun ɔ yoli maan be klɛli Zezi i su ndɛ naan y’a si akunndan ng’ɔ bu’n, ɔ nin ndɛ ng’ɔ kannin be’n, nin ninnge ng’ɔ yoli be’n. Sɛ e bu akunndan kɛ Zezi sa’n, yɛ e yo ninnge mun kɛ i sa’n, e ɲin tí Ɲanmiɛn sulɛ’n nun.

 BIBLU’N NUN NDƐ NGA BE TI KƐ ALIƐ SA’N BE SU LIKE SUANLƐ’N KWLA UKA E

12. ?Ngue yɛle ‘Ɲanmiɛn ndɛ’n i bo bolɛ ninnge mun’?

¹² Sɛ e kunndɛ kɛ e ɲin ti Ɲanmiɛn sulɛ’n nun’n, ɔ fataman kɛ e ka “Ɲanmiɛn ndɛ’n i bo bolɛ ninnge’m be su like suanlɛ’n su.” Ninnge sɔ mɔ e dun mmua suannin be su like’n, be nun wie mun yɛle Ɲanmiɛn sulafilɛ’n ɔ nin batɛmun yolɛ’n ɔ nin sran cɛnlɛ’n. (Ebr. 6:​1, 2) Klisifuɛ’m be kwlaa be lafi ndɛ sɔ’m be su. I sɔ’n ti’n kɛ akoto Piɛli kán Ɲanmiɛn ndɛ Pantekɔtu nun’n, ɔ kannin ninnge sɔ’m be ndɛ. (Yol. 2:​32-35, 38) Kwlaa naan y’a kaci Klisifuɛ’n ɔ fata kɛ e lafi ndɛ sɔ’m be su. I wie yɛle kɛ Pɔlu seli kɛ sɛ sran kun lafiman su kɛ sran’m bé cɛ́n’n, ɔ kwlá seman kɛ ɔ ti Zezi i sɔnnzɔnfuɛ. (1 Kor. 15:​12-14) Sanngɛ ɔ fata kɛ e suan like uflɛ e fa uka ngalɛ’n su.

13. ?Sɛ e kunndɛ kɛ é ɲán aliɛ nga Ebre Mun 5:14 kɛn i ndɛ’n i su ye’n, ngue yɛ ɔ fata kɛ e yo-ɔ? (An nian foto’n wie.)

¹³ Biblu’n nun ndɛ nga be ti kɛ aliɛ sa m’ɔ fata kɛ e si be wie’n, Zoova i mmla’m be o nun. Sanngɛ nɛ́n i ngba-ɔ. Be wie ekun yɛle akunndan ng’ɔ o Zoova i mmla’m be sin’n. Ndɛ kwlaa sɔ’m be uka e naan y’a si akunndan nga Ɲanmiɛn bu’n. Sɛ e kunndɛ é ɲán aliɛ sɔ’n i su ye’n, ɔ fata kɛ e suan Ɲanmiɛn Ndɛ’n i nun like, e bu su akunndan kpa yɛ e mian e ɲin e nanti su. Sɛ e yo sɔ’n ajalɛ nga é fá be’n bé jɔ́ Zoova klun. b—An kanngan Ebre Mun 5:14 nun.

14. ?Wafa sɛ yɛ Pɔlu ukali Korɛntifuɛ mun naan be ɲin w’a ti Ɲanmiɛn sulɛ’n nun-ɔn?

¹⁴ Be nga be nin-a tinman Ɲanmiɛn sulɛ’n nun’n, sɛ ɔ fata kɛ be yo like kun naan Biblu’n kɛnmɛn i ndɛ trele’n, kpɛkun w’a mian be sa. Kɛ sa wie nun’n Biblu’n kanman like trele ng’ɔ fata kɛ e yo’n i ndɛ’n, sran wie’m be se be wun kɛ be kwla yo like kwlaa nga be klo’n. Wie’m be kusu be kunndɛ kɛ be kpɛ mmla be man be sa kwlaa nun. I wie yɛle kɛ atrɛkpa’n, Klisifuɛ nga be o Korɛnti lɔ’n be usali Pɔlu sɛ Klisifuɛ kun kwla di aliɛ nga be fa mannin mmusu mun’n nin-o. Pɔlu w’a kleman be like trele ng’ɔ fata kɛ be yo’n, sanngɛ ɔ seli be kɛ like nga sran kun le atin yo’n ɔ nin sran uflɛ liɛ’n ɔ timan kun.  Pɔlu fali Ɲanmiɛn Ndɛ’n ukali be naan be wun i wlɛ kɛ ɔ fataman kɛ ajalɛ nga bé fá’n ti’n be akunndan bu be fɔ, yɛ ɔ fataman kɛ be yo maan be wiengu i ja kpla. (1 Kor. 8:​4, 7-9) I lɛ nun’n, Pɔlu ukali Korɛntifuɛ mun naan be bɔbɔ b’a wun sa kpa’n nin sa tɛ’n be ngbaciɛ’n. I liɛ’n, be su minndɛman kɛ sran kun kle be like ng’ɔ fata kɛ be yo’n, yɛ be su kunndɛman kɛ be kpɛ mmla man be sa kwlaa nun.

15. ?Wafa sɛ yɛ Pɔlu ukali Klisifuɛ nga be ti Ebre’n naan be ɲin w’a ti Ɲanmiɛn sulɛ’n nun-ɔn?

¹⁵ Ndɛ nga Pɔlu kan kleli Klisifuɛ nga be ti Ebre’n, ɔ kle e like cinnjin kpa kun. Klisifuɛ sɔ’m be nun wie’m b’a wɔman be ɲrun Ɲanmiɛn sulɛ’n nun. Ɔ maan ɔ ti kɛ be “te nɔn wunflɛn sa.” Be “diman sran nga b’a tin’n be aliɛ liɛ’n.” (Ebr. 5:12) Ninnge uflɛ nga Zoova sin asɔnun’n i lika kle be’n be faman be ɲin be sieman su naan b’a nanti su. (Ɲan. 4:18) I wie yɛle kɛ Klisifuɛ nga be ti Zifu’n be nun kpanngban be te se sran’m be kɛ ɔ fata kɛ be di Moizi Mmla’n su. Kusu nn be diman mmla sɔ’n su kun w’a di afuɛ 30. Afin Zezi fɛli i wun yili klɔ sran’m be ti tɛ. (Rɔm. 10:4; Tit. 1:10) Afuɛ 30 nga be sinnin lɛ’n nun’n, e kwla se kɛ be ɲannin blɛ kpanngban naan b’a kaci be akunndan. Sran kwlaa ng’ɔ kanngan fluwa nga Pɔlu klɛli ko mannin Ebre mun’n i nun’n ɔ wun i wlɛ kɛ i nun ndɛ’m be bo ti kploun kpa. Ɔ ukali be naan b’a wun i wlɛ kɛ ajalɛ nga Zoova fali naan b’a kwla sin Zezi i lika b’a su i’n ɔ ti kpa tra wafa nga be su Ɲanmiɛn laa’n. I sɔ’n úka be naan b’a kwla jran yalɛ mɔ Zifu’m be kle be’n i ɲrun kekle.—Ebr. 10:​19-23.

NÁN MAAN E LAFI E WUN SU DAN

16. ?Kɛ e ko mian e ɲin mɔ e ko tin Ɲanmiɛn sulɛ’n nun’n, ngue yɛ ɔ fata kɛ e yo i ekun-ɔn?

¹⁶ Kɛ e ko mian e ɲin mɔ e ko tin Ɲanmiɛn sulɛ’n nun’n, ɔ fata kɛ e nian e wun su naan y’a ka sɔ titi. Sɛ e waan é kwlá yó sɔ’n, nán maan e lafi e wun su dan. (1 Kor. 10:12) I sɔ’n ti’n ɔ fata kɛ ‘e bu e klun lɔ titi’ e nian sɛ e te kɔ e ɲrun Ɲanmiɛn sulɛ’n nun titi-o.—2 Kor. 13:5.

17. ?Wafa sɛ yɛ ndɛ nga Pɔlu klɛli ko mannin Kolɔsufuɛ mun’n, ɔ kle kɛ kɛ Klisifuɛ kun ko tin’n, ɔ fata kɛ ɔ miɛn i ɲin naan w’a ka sɔ titi-ɔ?

¹⁷ Kɛ Pɔlu klɛ́ Korɛntifuɛ’m be fluwa’n, ɔ kannin sa nga ti yɛ kɛ be ko wɔ be ɲrun Ɲanmiɛn sulɛ’n nun’n, ɔ ti cinnjin kɛ be ka  sɔ’n i ndɛ. Kannzɛ Klisifuɛ sɔ’m be ɲin w’a ti Ɲanmiɛn sulɛ’n nun’n, sanngɛ Pɔlu seli be kɛ be nian be wun su naan akunndan nga mɛn nunfuɛ’m be bu’n w’a lakaman be. (Kol. 2:​6-10) Yɛ Epafrasi m’ɔ si Klisifuɛ sɔ’m be kpa’n ɔ srɛli Zoova naan b’a “tin kpa” ekun. (Kol. 4:12) Pɔlu nin Epafrasi be wunnin i wlɛ kɛ, kɛ Klisifuɛ kun i ɲin ko ti Ɲanmiɛn sulɛ’n nun’n kɛ ɔ ko yo naan w’a ka sɔ titi’n, ɔ fata kɛ i bɔbɔ miɛn i ɲin yo ninnge wie mun yɛ ɔ fata kɛ Ɲanmiɛn ukɛ i. Be kunndɛ kɛ, kannzɛ sa nga be o Klisifuɛ nga be o Kolɔsu lɔ’n be su’n be ti sɛ ti sɛ’n, ɔ fata kɛ be yo kɛ kpɛnngbɛn mun sa titi. Yɛle kɛ maan be ɲin ti Ɲanmiɛn sulɛ’n nun.

18. ?Sa benin yɛ ɔ kwla ju Klisifuɛ kun mɔ i ɲin w’a ti Ɲanmiɛn sulɛ’n nun’n i su-ɔ? (An nian foto’n wie.)

¹⁸ Pɔlu seli Klisifuɛ nga be ti Ebre’n be kɛ, sɛ Klisifuɛ kun mɔ i ɲin w’a ti Ɲanmiɛn sulɛ’n nun’n w’a niɛnmɛn i wun su’n, ɔ nin Ɲanmiɛn be afiɛn kwla saci. Klisifuɛ kun kwla yo sa tɛ lele maan i awlɛn’n kete. Ɔ maan ɔ kwlá kacimɛn i ayeliɛ’n kun naan Ɲanmiɛn i klun w’a jɔ i wun. Sanngɛ Ɲanmiɛn sa, i sɔ sa’n w’a juman Klisifuɛ nga be ti Ebre’n be su. (Ebr. 6:​4-9) ?Yɛ be nga be yaci jasin fɛ’n i bolɛ annzɛ be tu be asɔnun’n nun, kpɛkun i sin’n be sa be sin be wa su Zoova ekun’n be li? Kɛ mɔ be kacili be sa’n ti’n, e kwla se kɛ be timan kɛ be nga Pɔlu kannin be ndɛ’n be sa. Sanngɛ kɛ be ko sa be sin Zoova wun’n, ɔ fata kɛ be uka be titi. (Eze. 34:​15, 16) Asɔnun kpɛnngbɛn mun be kwla se aniaan wie kɛ ɔ uka be blɛblɛblɛ naan be nin Zoova be afiɛn w’a mantan kpa ekun.

19. ?Ngue yɛ ɔ fata kɛ e kunndɛ kpa kɛ é yó-ɔ?

¹⁹ Sɛ a su mian ɔ ɲin kpa naan ɔ ɲin w’a ti Ɲanmiɛn sulɛ’n nun’n i sɔ liɛ’n kwla yo ye. I lɛ nun’n, fa ɔ ɲin sie i Biblu’n nun ndɛ nga be ti kɛ aliɛ sa’n be su. Yɛ mian ɔ ɲin titi naan w’a bu akunndan kunngba nga Zoova bu’n wie. Sɛ kusu ɔ ɲin w’a ti Ɲanmiɛn sulɛ’n nun’n, mian ɔ ɲin naan w’a ka sɔ titi.