1-2. ?Sa benin yɛ ɔ kwla uka e naan y’a wun i wlɛ kɛ, kɛ be kpɛli Zoova i su gblɛ’n, i sɔ’n yoli i ya-ɔ?

 WIENUN-ƆN sran kun mɔ a klo i kpa’n, ɔ kannin ɔ su ndɛ tɛtɛ wie mun. A si kɛ gblɛ yɛ ɔ kpɛli-ɔ, sanngɛ sran wie’m be fa su. Ng’ɔ ti tɛ bɔbɔ’n yɛle kɛ be fa ndɛ sɔ’n be tru. Ɔ maan sran uflɛ wie mun ekun be fa su. ?I sɔ’n yó wɔ sɛ? I sɔ’n yó wɔ ya. Afin sran ndɛ lo wɔ, yɛ a kunndɛman kɛ be saci ɔ dunman.—Ɲan. 22:1.

² Ndɛ sɔ’n kwla uka e naan y’a wun i wlɛ kɛ, kɛ be sacili Zoova i dunman’n i sɔ’n yoli i ya dan. I anzi’m be nun kun kpɛli i su gblɛ kleli Ɛvu. Yɛ Ɛvu kusu fali su. I sɔ’n ti’n, Adan nin Ɛvu be yoli ɲin kekle Zoova su. I bo m’ɔ́ gúa’n yɛle fɔ’n nin wie mɔ be kle sran’m be yalɛ’n. (Bob. 3:​1-6; Rɔm. 5:12) Wie’n nin alɛ’n nin ɲrɛnnɛn wafawafa kwlaa nga e wun be mɛn’n nun’n, be bo’n fin gblɛ nga Satan kpɛli i Edɛnin fie’n nun lɔ’n. Nanwlɛ, kɛ Zoova wunnin kɛ be kpɛli i su gblɛ, naan kusu klɔ sran’m be wun i su afɛ’n, i sɔ’n yoli i ya dan. Ɔ nin i sɔ ngba’n, Zoova i wla w’a bomɛn i wun. Ɔ ti ‘Ɲanmiɛn m’ɔ di aklunjɔɛ’ titi-ɔ.—1 Tim. 1:11.

3. ?Ngue yɛ e kwla yo-ɔ?

³ E kwla yo like kun e kle kɛ Satan buali Zoova i su ato. Like sɔ mɔ e kwla yo’n, Biblu’n kɛn i ndɛ. Ɔ se kɛ: “Amun manman Zoova i dunman’n.” (Jue. 113:1) Wafa nga e kwla manman Zoova i dunman’n, yɛle kɛ e kɛn i su ndɛ nanwlɛ’n e kle e wiengu mun. I sɔ’n ti’n, maan e fa e ɲin e sie i sa nsan nga ti yɛ ɔ fata kɛ e tu e klun e manman Ɲanmiɛn i dunman’n be su.

KƐ E MANMAN ZOOVA I DUNMAN’N I KLUN JƆ

4. ?Ngue ti yɛ kɛ e manman Zoova’n, i sɔ’n yo i fɛ-ɔ? An fa sa kun yiyi nun. (An nian foto’n wie.)

⁴ Kɛ e manman e Si Ɲanmiɛn i dunman’n i klun jɔ. (Jue.  119:108) ?Ɔ maan é sé kɛ Ɲanmiɛn m’ɔ kwla like kwlaa yo’n, ɔ ti kɛ klɔ sran wie mɔ be kunndɛ kɛ be wiengu’m be manman be naan b’a bu be wun sran’n be sa? Cɛcɛ. Maan e fa sa kun e yiyi nun. Wienun-ɔn, ba bla kaan kun w’a to i sa’n w’a blɛ i si i kɔmin nun, kpɛkun ɔ se i kɛ: “Baba, a leman wunsu.” I sɔ’n yo i si i fɛ dan. Ɔ maan ɔ sri puɛɛ. ?Ngue ti yɛ ɔ yo i fɛ-ɔ? ?Ɔ bumɛn i wun sran, yɛ ɔ kunndɛ kɛ i wa’n mɛnmɛn i ti-ɔ? Cɛcɛ. Sanngɛ i wa’n kleli kɛ ɔ klo i yɛ ɔ si ye. I sɔ liɛ’n yɛ ɔ yo i fɛ-ɔ. Ɔ si kɛ nzuɛn kɛ ngalɛ’n sa’m be kwla ukɛ i wa’n naan kɛ ɔ́ ɲín kɔ́’n, w’a kwla di aklunjɔɛ. I wafa kunngba’n, kɛ e manman e Si Zoova m’ɔ leman wunsu’n, i sɔ’n yo i fɛ.

5. ?Kɛ e manman Zoova’n, ndɛ benin yɛ e kle kɛ ɔ ti ato-ɔ?

⁵ Kɛ e manman Ɲanmiɛn’n e kle kɛ e su ndɛ kun mɔ Satan kannin’n, ɔ ti ato wie. Satan seli kɛ klɔ sran fi su manmanman Ɲanmiɛn i dunman’n guɛmɛn i ti nin i bo. I waan sɛ ɔ kle klɔ sran’m be yalɛ’n, be nun wie fi su jranman kekle. I kpa bɔbɔ’n, ɔ seli kɛ sɛ e nian naan sɛ e yaci Ɲanmiɛn sulɛ’n é ɲán nun like’n, é yáci i sulɛ. (Zɔb. 1:​9-11; 2:4) Sanngɛ Zɔbu kleli kɛ Satan ti gblɛfuɛ. Afin ɔ nin Ɲanmiɛn be nantili klanman. ?Yɛ e li? E tinuntinun e kwla manman Ɲanmiɛn i dunman’n, yɛ e nin i e kwla nanti klanman naan i klun jɔ e wun. (Ɲan. 27:11) Nanwlɛ, sɛ e yo sɔ’n, e cenjele nun-ɔn.

6. ?Wafa sɛ yɛ e kwla nian Famiɛn Davidi nin Levifuɛ’m be ajalɛ’n su-ɔ? (Neemin 9:5)

⁶ Be nga be klo Zoova’n be kunndɛ kɛ bé yó like kwlaa nga be kwla yo naan b’a mɛnmɛn i dunman’n. Famiɛn Davidi seli kɛ: “Ń mánmán Zoova. Maan min wunnɛn wunmuan’n mɛnmɛn i dunman m’ɔ ti sanwun’n.” (Jue. 103:1) Davidi wunnin i wlɛ kɛ sran ng’ɔ manman Zoova i dunman’n, ɔ manman Zoova bɔbɔ. Kɛ e ti Zoova i dunman’n, e bu sran wafa ng’ɔ ti’n i akunndan. Asa’n e bu i nzuɛn’n nin sa kpakpa ng’ɔ yo be’n be akunndan. Davidi kunndɛli kɛ ɔ́ klé kɛ i Si Ɲanmiɛn i dunman’n ti sanwun, naan ɔ kunndɛ kɛ ɔ́ mɛ́nmɛ́n i. Ɔ kunndɛli kɛ i “wunnɛn wunmuan’n” manman Zoova. I wafa kunngba’n, Levifuɛ’m be fali Zoova i manmanlɛ’n i nun ta. Be dili i nanwlɛ kɛ ndɛ kwlaa nga bé kán bé fá mánmán Zoova i dunman’n, ɔ kwlá yiman Zoova i dunman’n i sanwun dan m’ɔ ti’n i nglo weiin sa. (An kanngan Neemin 9:5 nun.) E kwla lafi su kɛ, kɛ be kannin be wun ase be manmannin Zoova kɛ ngalɛ’n sa’n, i klun jɔli su.

7. ?Kɛ é bó jasin fɛ’n, yɛ kɛ e nin e wiengu mun é yó ninnge wie mun likawlɛ’n, wafa sɛ yɛ e kwla manman Zoova-ɔ?

 ⁷ Andɛ kusu’n, e kwla kan Zoova i ndɛ e fa kle kɛ e klo i naan e si ye. Kɛ é bó jasin fɛ’n, like cinnjin nga e kunndɛ kɛ é yó’n, yɛle kɛ é úka e wiengu mun naan be fa be wun mantan Zoova, naan be kusu be bu i kɛ nga e fa bu i’n sa. (Zak. 4:8) Kɛ e fa Zoova i su ndɛ nga Biblu’n kan’n e fa kle sran mun’n, i sɔ’n yo e fɛ kpa. Biblu’n kle kɛ Zoova klo sran, ɔ yo sa i nuan su, ɔ ti ngwlɛlɛfuɛ, ɔ le tinmin. Yɛ ɔ le nzuɛn kpa wie mun ekun. Asa ekun’n, kɛ e mian e ɲin e fa Zoova i nzuɛn’n i sɔ’n mɛnmɛn i, kpɛkun i klun jɔ e wun. (Efɛ. 5:1) Kɛ e yo sɔ’n, e kle kɛ e ayeliɛ’n nin mɛn nga nunfuɛ’m be liɛ’n timan kun. Sran’m be kwla sie i sɔ liɛ’n i nzɔliɛ, yɛ be kwla usa e sa nga ti yɛ e yoman kɛ be sa’n. (Mat. 5:​14-16) Kɛ e nin be é yó ninnge wie mun likawlɛ’n, e kwla yiyi sa nga ti yɛ e yoman ninnge mun kɛ be sa’n i nun e kle be. Kɛ e yo sɔ’n, be nga be klo Ɲanmiɛn’n be kwla kunndɛ kɛ bé fá be wun bé mɛ́ntɛn i. Kɛ e yo ninnge kɛ ngalɛ’n sa mun e fa manman Zoova’n, i klun jɔ e wun.—1 Tim. 2:​3, 4.

KƐ E MANMAN ZOOVA I DUNMAN’N I SƆ’N YO ZEZI I FƐ

8. ?Zoova i dunman’n i manmanlɛ’n nun’n, ngue ti yɛ e kwla se kɛ ajalɛ nga Zezi kleli’n leman wunsu-ɔ?

⁸ Ɔ wie ɲanmiɛn su lɔ-o, annzɛ asiɛ’n su wa-o, sran fi siman Zoova kpa kɛ Zezi sa. (Mat. 11:27) Zezi klo i Si. I yɛ ɔ fali Zoova i dunman’n i manmanlɛ’n i nun ta’n niɔn. (Zan 14:31) Kɛ bé wá kún Zezi mɔ kɔnguɛ’n ɔ srɛli i Si’n, ɔ kannin like cinnjin kpafuɛ ng’ɔ yoli i asiɛ’n su wa’n i ndɛ. Ɔ seli kɛ: “N yoli maan be sili ɔ dunman’n.” (Zan 17:26) ?Wafa sɛ yɛ ɔ yoli sɔ-ɔ?

9. ?Kɛ ɔ ko yo naan sran’m ba si Zoova kpa’n, ɲanndra benin yɛ Zezi buli-ɔ?

⁹ Zifu nga Zezi kleli be like’n, be si Ɲanmiɛn i dunman’n. Ɔ maan Zezi w’a seman be ngbɛn kɛ Ɲanmiɛn i dunman’n yɛle Zoova. Sanngɛ ɔ kleli be “sran wafa ng’ɔ ti’n.” (Zan 1:​17, 18) Ɲanmiɛn Ndɛ’n i bue nga i klikli’n nun’n be klɛli i Ebre nun’n se kɛ Zoova si aunnvɔɛ naan ɔ yaci sa cɛ. (Tul. 34:​5-7) Kɛ ɔ ko yo naan sran’m b’a wun ndɛ sɔ’n i wlɛ weiin’n, Zezi buli ɲanndra kun. Ɲanndra sɔ’n nun’n, ɔ kannin siɛ kun nin i wa m’ɔ yoli i wun wanzo’n be ndɛ. Zezi seli kɛ, kɛ ba’n kacili i nzuɛn’n m’ɔ́ sɛ́ i sin mɔ i si wunnin i mmua lɔ’n, ɔ wanndili ko tɔli i nun. Kpɛkun ɔ yacili i wun sa’n cɛli i klun ufue su. Ndɛ sɔ’n ti’n, e wun i wlɛ weiin kɛ Zoova si aunnvɔɛ naan ɔ yaci sran wun sa cɛ i sakpa. (Lik. 15:​11-32) I lɛ nun’n, Zezi ukali sran mun naan b’a si Zoova kpa.

10. (1) ?Ngue yɛ ɔ kle kɛ Zezi boli i Si i dunman’n niɔn? (2) ?Yɛ ngue yɛ ɔ kle kɛ ɔ kunndɛ kɛ i wiengu’m be yo sɔ wie-ɔ? (Marki 5:19) (An nian desɛn’n wie.) (3) ?Ngue yɛ Zezi kunndɛ kɛ e yo i andɛ-ɔ?

¹⁰ Zezi kunndɛli kɛ i wiengu’m be bo i Si i dunman wie. Zezi blɛ su’n, atrɛkpa’n Zifu’m be Ɲanmiɛn sulɛ wafa’m be su kpɛnngbɛn wie’m be buli i kɛ ɔ fataman kɛ be bo Ɲanmiɛn i dunman’n, naan sran ng’ɔ yo sɔ’n i ɲin yiman Ɲanmiɛn. Sanngɛ Zezi liɛ’n, ɔ boli i Si i dunman’n, w’a faman be ndɛ sɔ m’ɔ takaman Ɲanmiɛn Ndɛ’n su’n i su. I nun mɔ Zezi o Zerazafuɛ’m be mɛn’n nun lɔ’n, ɔ yoli bian kun mɔ mmusu’m be kle i yalɛ’n i juejue. Srɛ m’ɔ kunnin sran mun’n ti’n, be seli Zezi kɛ ɔ jaso be mɛn’n nun. Ɔ maan Zezi jasoli lɔ. (Mar. 5:​16, 17) Sanngɛ Zezi kunndɛli kɛ sran’m be si Zoova i dunman’n lika sɔ’n nun lɔ. Kwlaa naan w’a jaso lɔ’n, w’a seman bian’n kɛ ɔ kan like nga i bɔbɔ Zezi yoli’n i ndɛ, sanngɛ ɔ  kan like nga Zoova yoli’n i ndɛ kle sran mun. (An kanngan Marki 5:19 nun.)​ a I sɔ wie yɛ Zezi kunndɛ kɛ e yo i andɛ-ɔ. Yɛle kɛ e yo naan sran’m be si i Si i dunman’n mɛn wunmuan’n nun. (Mat. 24:14; 28:​19, 20) Kɛ e yo sɔ’n, e Famiɛn Zezi i klun jɔ e wun.

11. (1) ?Zezi seli i sɔnnzɔnfuɛ’m be kɛ, kɛ bé srɛ́ Ɲanmiɛn’n ndɛ benin yɛ be kwla kan-ɔn? (2) ?Yɛ ngue ti yɛ ndɛ sɔ’n ti cinnjin-ɔn? (Ezekiɛli 36:23)

¹¹ Zezi si kɛ Zoova sunnzun kɛ ɔ́ yó naan i dunman’n yo sanwun. I sɔ’n ti’n, ɔ kleli i sɔnnzɔnfuɛ’m be kɛ, kɛ bé srɛ́ Ɲanmiɛn’n, maan be se kɛ: “E Si m’ɔ o ɲanmiɛn su lɔ’n, maan ɔ dunman’n yo sanwun.” (Mat. 6:9) Zezi wunnin i wlɛ kɛ Zoova i dunman’n i sanwun yolɛ’n ti cinnjin tra like kwlaa. (An kanngan Ezekiɛli 36:23 nun.) Like nga Zezi yoli naan Zoova i dunman’n w’a yo sanwun’n, ɔ tra klɔ sran mun nin anzi’m be liɛ’n. Sanngɛ kɛ Zezi i kpɔfuɛ’m be trɛli i’n, be waan w’a saci Ɲanmiɛn wun. Zezi si kɛ sa tɛ dan kpafuɛ nga sran kun kwla yo’n, yɛle i Si i dunman sacilɛ annzɛ i dunman’n i finfin yolɛ. Kɛ ɔ wunnin kɛ i kpɔfuɛ’m bé wá jrɛ́n i sɔ liɛ’n su bé bú i fɔ’n, i akunndan’n sanngannin dan. Atrɛkpa’n sa cinnjin nga ti yɛ kɛ bé wá trá Zezi’n i ‘wla boli i wun dan’n,’ yɛ ɔ o lɛ-ɔ.—Lik. 22:​41-44.

12. ?Ngue ti yɛ e kwla se kɛ wafa nga Zezi miɛnnin i ɲin naan w’a yo i Si i dunman’n i sanwun’n, ɔ leman wunsu-ɔ?

¹² Be kleli Zezi i ɲrɛnnɛn, be kpɛli i nzowa yɛ be sacili i wun. Sanngɛ ɔ trɛli i awlɛn sa kwlaa sɔ’m be nun naan w’a kwla yo i Si i dunman’n i sanwun. Ɔ si kɛ ɔ yoli like kwlaa nga i Si seli i kɛ ɔ yo’n. Ɔ maan ɔ nunman nun kɛ ɲannzuɛn kun i. (Ebr. 12:2) Asa’n ɔ si kɛ Satan i sa o ɲrɛnnɛn nga be su kle i lɛ’n nun. (Lik. 22:​2-4; 23:​33, 34) Satan waan ɔ́ yó naan Zezi yaci seiin nantilɛ. Sanngɛ i sɔ’n w’a yoman ye. Zezi kleli kɛ Satan ti gblɛfuɛ tɛ naan Zoova i sufuɛ wie’m be o lɛ’n, kannzɛ ɲrɛnnɛn ng’ɔ́ tɔ́ be su’n ɔ ti sɛ ti sɛ’n, bé nánti seiin titi.

13. ?Ngue yɛ a kwla yo naan Zezi m’ɔ ti ɔ Famiɛn’n i klun w’a jɔ ɔ wun-ɔn?

¹³ ?A kunndɛ kɛ Zezi m’ɔ ti ɔ Famiɛn’n i  klun jɔ ɔ wun? Sɛ ɔ ti sɔ’n, manman Zoova i dunman’n titi. Uka ɔ wiengu mun naan be si sran wafa nga Ɲanmiɛn ti’n. Sɛ a yo sɔ’n, á klé kɛ a nanti Zezi i ajalɛ’n su. (1 Piɛ. 2:21) Yɛ Zoova i klun jɔ́ ɔ wun, kɛ nga i klun fa jɔli Zezi wun’n sa. Kpɛkun á klé kɛ i kpɔfuɛ Satan ti gblɛfuɛ.

KƐ E MANMAN ZOOVA I DUNMAN’N E KWLA DE E WIENGU MUN

14-15. ?Kɛ e kan Zoova i ndɛ e kle sran mun’n, wafa sɛ yɛ i bo’n gua-ɔ?

¹⁴ ?Wafa sɛ yɛ Zoova i dunman mɔ e manman’n, ɔ kwla de e wiengu mun-ɔn? Biblu’n se kɛ Satan ‘sili sran mɔ be lafiman Ɲanmiɛn su’n be ɲin.’ (2 Kor. 4:4) I sɔ’n ti’n, be fa ato nga Satan bua’n su. I wie yɛle kɛ be bu i kɛ Ɲanmiɛn nunman lɛ, annzɛ Ɲanmiɛn o mmua dan ti’n i ndɛ nunman e ndɛ nun, annzɛ kusu Ɲanmiɛn i klun yo wi naan ɔ kle klunwifuɛ’m be ɲrɛnnɛn sa trilili. Satan bua ato sɔ mun naan ɔ́ sáci Ɲanmiɛn i dunman naan sran’m b’a faman be wun b’a mɛntɛnmɛn i. Sanngɛ jasin fɛ nga e bo’n ti’n, like nga Satan waan ɔ́ yó’n, ɔ kpi ase. E kle sran’m be like naan be si e Si Ɲanmiɛn i su ndɛ nanwlɛ’n, yɛ e mɛnmɛn i dunman m’ɔ ti sanwun’n. ?Kɛ e yo sɔ’n, wafa sɛ yɛ i bo’n gua-ɔ?

¹⁵ Ndɛ nanwlɛ m’ɔ o Ɲanmiɛn Ndɛ’n nun’n, ɔ le ta kpa. Kɛ e kan Zoova i su ndɛ e kle sran mun mɔ be si sran wafa ng’ɔ ti’n, wafa nga i bo’n gua’n, ɔ yo ɲɛnmɛn dan. Yɛle kɛ sɛ é kwlá sé’n, be ɲinma’n tike blɛblɛblɛ, kpɛkun be wun i wlɛ kɛ e Si Ɲanmiɛn i nzuɛn’n ti kpa dan. Yɛ kɛ be wun kɛ ɔ kwla sa kwlaa yo’n, be ɲin yi i dan. (Eza. 40:26) Asa’n kɛ be wun kɛ ɔ yo sa i nuan su sɛsɛsɛ’n, be fa be wla’n be guɛ i su. (Mml. 32:4) Yɛ kɛ bé súan like bé kɔ́’n, be wun i wlɛ kɛ ɔ si ngwlɛlɛ dan. (Eza. 55:9; Rɔm. 11:33) Kɛ be wun i wlɛ kɛ ɔ ti klolɛ’n, i sɔ’n gua be awlɛn su nzue. (1 Zan 4:8) Kɛ ɔ ko yo sɔ mɔ bé fá be wun bé mántan Zoova kpa’n, nn bé wún i wlɛ kɛ be kwla ɲan nguan m’ɔ leman awieliɛ’n sakpasakpa. Kɛ e kwla uka sran mun naan b’a fa be wun b’a mantan Ɲanmiɛn’n i sɔ’n ti e cenjele like. Kɛ e yo sɔ kusu’n, Zoova bu e kɛ i wiengu junman difuɛ mun sa.—1 Kor. 3:​5, 9.

16. ?Kɛ sran wie’m be tili Ɲanmiɛn i dunman’n i sɔ’n yoli be sɛ? An fa sa wie mun yiyi nun.

 ¹⁶ I bo bolɛ’n nun’n, e kwla se sran’m be ngbɛn kɛ Ɲanmiɛn i dunman’n yɛle Zoova. Ndɛ sɔ’n kwla uka be nga Ɲanmiɛn ndɛ’n lo be’n be kpa. I wie yɛle bla kun mɔ be flɛ i kɛ Aaliya b i liɛ’n. I kaan nun’n, Ɲanmiɛn sulɛ wafa ng’ɔ o nun’n i nun’n, nán Biblu’n yɛ be fa kle sran’m be like-ɔ. Sanngɛ like nga be kle be lɔ’n, ɔ timɛn i liɛ’n su. Yɛ ɔ yo i kɛ ɔ nin Ɲanmiɛn be afiɛn mantanman sa. Sanngɛ kɛ Zoova i Lalofuɛ’m be wa boli i Biblu’n nun like klelɛ bo’n, i wun w’a yomɛn i sɔ kun. Siɛn’n ɔ bu Ɲanmiɛn kɛ i janvuɛ sa. Yɛ kɛ ɔ wunnin i wlɛ kɛ be yili Ɲanmiɛn i dunman’n Biblu sunman nun naan be fali manmanlɛ dunman kɛ e Min’n sa fa sieli i osu’n, i sɔ’n boli i nuan dan. Like cinnjin kpafuɛ ng’ɔ ukɛli i naan w’a fa ajalɛ’n yɛle Zoova i dunman mɔ be kleli i’n. Ɔ seli kɛ: “Min janvuɛ kpafuɛ’n le dunman. Min wla gua ase siɛn’n. Nanwlɛ, min cenjele nun-ɔn.” Be flɛ Zifu bian kun m’ɔ bo miziki’n kɛ Stivu. Laa’n ɔ kunndɛman kɛ ɔ́ fɛ́ i wun wlá Ɲanmiɛn sulɛ wafa wie fi nun. Afin i waan like nga be kle’n be bɔbɔ be diman su. Sanngɛ blɛ mɔ i nin’n wuli mɔ Zoova i Lalofuɛ’m bé klé sran kun i Biblu’n nun like’n ɔ ko trɛnnin i bo. Kɛ ɔ tili Ɲanmiɛn i dunman’n, i sɔ’n yoli i fɛ dan. Ɔ seli kɛ: “N nin-a timan Ɲanmiɛn i dunman’n le. Kpɛ klikli nga ń wún i wlɛ kɛ Ɲanmiɛn o lɛ sakpa’n, yɛle ngalɛ’n. N wunnin i wlɛ kɛ m’an ɲan janvuɛ kun.”

17. ?Ngue ti yɛ w’a fua kpa kɛ á mánmán Zoova i dunman’n titi-ɔ? (An nian foto’n wie.)

¹⁷ ?Kɛ á bó jasin fɛ’n annzɛ á klé sran’m be like’n, a bo Ɲanmiɛn i dunman mɔ yɛle Zoova’n kle be? ?A uka be naan be si Ɲanmiɛn i nzuɛn’n? Sɛ a yo sɔ’n á klé kɛ a manman Ɲanmiɛn i dunman’n. Manman Zoova i dunman m’ɔ ti sanwun’n titi naan sran’m be si sran wafa ng’ɔ ti’n. Sɛ a yo sɔ’n á dé sran wie mun. Á klé kɛ a nanti Klisi Zezi m’ɔ ti ɔ Famiɛn’n i ajalɛ’n su. Yɛ like ng’ɔ ti cinnjin trɛ i ngba’n, yɛle kɛ ɔ Si Ɲanmiɛn Zoova i klun jɔ́ ɔ wun. I sɔ’n ti’n, ‘mɛnmɛn i dunman’n tititi.’—Jue. 145:2.