Kwlaa naan y’a suan like’n maan e usa e wun kɛ: ?Ngue su yɛ like suanlɛ nga wá fá min ɲin síe-ɔ? Sanngɛ ɔ fataman kɛ e ɲin kpa ninnge uflɛ wie mɔ Zoova kunndɛ kɛ ɔ́ fá e ɲin síe su’n be su. ?É yó sɛ naan y’a wun like nga Zoova waan ɔ́ klé e’n i wlɛ?

Srɛ Zoova naan ɔ man ɔ ngwlɛlɛ. Srɛ i kɛ ɔ kle wɔ like trele nga i waan ɔ́ fá ɔ ɲin síe su blɛ sɔ’n nun’n. (Zak. 1:5) Nán ka like nga a si i laa’n i ngunmin su.—Ɲan. 3:​5, 6.

Maan Ɲanmiɛn Ndɛ’n ɲan ta e su. “Ɲanmiɛn i ndɛ’n le ta kpa.” (Ebr. 4:12) Blɛ kwlaa nga e kanngan Biblu’n nun’n, e kwla wun ninnge uflɛ wie mun. Yɛ e kwla si ninnge uflɛ wie mɔ e kwla yo naan y’a kwla nanti i nun ndɛ’n su kpa ekun’n.

Like kwlaa nga Zoova yo man e’n maan e bu i like cinnjin. Like kwlaa nga Zoova fa man e’n be ti kɛ “aliɛ kpakpa mun” sa. (Eza. 25:6) Nán se kɛ ndɛ wie’m be yoman ɔ fɛ ti’n a su suanman su like. Sɛ like nga Zoova yo maan e’n a bu i like cinnjin’n, á ɲán su ye yɛ á kló like suanlɛ.